Paulosu bi sikifi taa: „U di mi du andi di wëti taki, mbei mi dëdë te a nama a soni u di wëti. Ma di soni aki mbei mi sa ta libi kumafa Gadu kë.”​—Gal. 2:19, NW.

Di soni di Paulosu bi taki aki, bi dë wan fanöudu soni di a bi taki da dee kemeente a di pisiwata u Galasia ka Loomë bi ta tii. So Keesitu sëmbë bi ta haika so poipoi leima. Dee leima aki bi ta taki taa ee wan sëmbë kë feni libi, nöö a musu ta hoi di Wëti di Gadu bi da Mosesi, möönmöön di wëti di ta taki taa womi sëmbë musu koti di maaka u dee Dju. Ma Paulosu bi sabi taa Gadu bi tooka di soni aki. Paulosu bi konda soni a wan fasi di bi ta lei gbelingbelin taa dee soni di dee leima aki bi ta taki, an bi dë sö tuutuu. Söseei a bi heepi dee baaa ku dee sisa u de ko ta biibi möön gaanfa taa Jesosi Keesitu paka paima da u.​—Gal. 2:4; 5:2.

Di Bëibel ta taki taa te wan sëmbë dëdë, an ta sabi soni möön (Peleik. 9:5). Di Paulosu bi taki taa: „Mi dëdë te a nama a soni u di wëti”, nöö a bi kë taki taa an bi ta du soni möön kumafa di Wëti di Gadu bi da Mosesi bi ta taki. Ma Paulosu bi dë seiki taa u di a bi ta biibi taa Jesosi ko paka paima dëën, mbei a bi „sa ta libi kumafa Gadu kë”.

Di Wëti bi mbei soni bi ko tooka da Paulosu. Unfa sö? A bi taki a fesi taa: „So fuu bi ko sabi taa di hoi di u bi ta hoi dee wëti dë, nöö an ta heepi u fuu ko bumbuu sëmbë möönsö a Gadu wojo. Wan kodo soni tö nöö sa mbei u ko sö, hën da ee u ta biibi a Jesosi Keesitu liba” (Gal. 2:16). An dë u taki taa dee Wëti bi tja heepi ko a di ten di pasa. Paulosu bi piki dee baaa ku dee sisa u Galasia taa: „Ku un pakisei Gadu da u dee wëti? Wë a da u de faa lei u andi da bunu ku andi da hogi, nöö fu de hoi u a pasi tu fu te dou di juu di Masa Jesosi o ko” (Gal. 3:19). Di Wëti bi ta lei taa zöndu libisëmbë an sa ta hoi di Wëti söndö u mbei föutu, söseei a bi ta lei taa u bi abi wan möön bunu lusupaima fanöudu. Di Wëti bi ta heepi sëmbë u de ko sabi ambë bi o dë di „böngö”, nasö di Keesitu. Te wan sëmbë lei taa a ta biibi Jesosi Keesitu, nöö a sa ko dë bumbuu sëmbë a Gadu wojo (Gal. 3:24). Paulosu bi sa taki di soni aki, u di di Wëti bi mbei a biibi taa Jesosi da di Mësiasi. Di soni aki mbei a bi taki taa a „dëdë te a nama a soni u di wëti”. Paulosu an bi ta libi a di Wëti basu möön, ma a Gadu basu.

Paulosu bi taki sö wan soni a di biifi di a bi manda da dee baaa ku dee sisa u Loomë. A bi taki taa: „A wan juu dë un bi dë a wëti basu. Ma fa i si unu ku [Masa Jesosi] Keesitu ko nama naandë kaa, nöö wan dë a wëti basu möön e. Un ko abi wan oto masa awaa . . . A dë leti kuma u dëdë kumutu nëën basu ko fii. Biga wa ta dini Gadu a di awoo fasi dë möön, ta biinga u hoi wëti sikifisikifi a pampia e. Nönö. U ko ta dini ën a wan hii njunjun fasi” (Lom. 7:4, 6). Di tëkisi aki, ku di u Galasia 2:19, ta lei taa Paulosu an bi ta taki taa a musu dëdë u di a bi dë wan zöndu libisëmbë. Ma a bi ta taki u di fii di a bi ko fii. An bi dë a di Wëti basu möön. A bi ko fii u di Jesosi bi paka paima dëën. Na da hën wanwan, ma da sömëni woto sëmbë jeti.