Paulus ben skrifi: „Fu di mi du san a Wèt taki, meki mi dede te a abi fu du nanga a Wèt. Ma disi meki taki mi kan libi gi Gado.”​—Gal. 2:19.

A sani disi di Paulus ben skrifi ben de wan prenspari sani di ben abi fu du nanga den gemeente na ini a distrikt Galasia, di ben de ondro a tiri fu Rome. Son Kresten drape ben e bribi den sani di den falsi leriman ben taki. Den falsi leriman disi ben taki dati te wan sma ben wani kisi frulusu a ben musu gi yesi na a Wet fu Moses, spesrutu te a abi fu du nanga a tori taki sma ben musu besnèi. Ma Paulus ben sabi taki gi Gado a no ben de fanowdu moro taki sma di ben kon na ini a bribi ben musu besnèi. Nanga krin buweisi Paulus ben sori taki den sani disi ben de falsi leri. Paulus ben tranga a bribi tu fu den brada nanga sisa na ini a frulusu-ofrandi fu Yesus Krestes.​—Gal. 2:4; 5:2.

Bijbel e taki krin dati te wan sma dede a no sabi notinoti èn nowan sani man abi krakti na en tapu (Preik. 9:5). Sobun di Paulus taki dati a „dede te a abi fu du nanga a Wèt”, dan dati ben wani taki dati a Wet fu Moses no ben abi krakti na en tapu moro. Na presi fu dati Paulus ben de seiker taki a bribi di a ben abi na ini a frulusu-ofrandi ben meki taki a ben kan bigin „libi gi Gado”.

Fu san ede „a Wèt” ben kan meki taki Paulus bigin „libi gi Gado”? Na ini wan tu vers na fesi, Paulus ben taki dati „Gado e si wan sma leki wan reti-ati sma, soso te a e bribi na ini Krestes Yesus èn no te a e du san a Wèt e taki” (Gal. 2:16). A tru taki a Wet ben du wan prenspari sani. Paulus ben taigi den Galasiasma: „Gado ben poti a Wèt fu tyari sondu kon na krin, teleki a bakapikin doro di ben o kisi san Gado pramisi” (Gal. 3:19). Iya, a Wet ben tyari kon na krin taki sondu libisma no ben o man hori densrefi finifini na ala sani di skrifi na ini a Wet. Te fu kaba den ben o abi wan ofrandi fanowdu di ben o tapu ala den sondu fu den. Sobun, a Wet yepi sma fu frustan taki Yesus ben de „a bakapikin” dati. Te wan sma ben o poti bribi na ini Yesus Krestes, dan Gado ben o man si a sma dati leki wan reti-ati sma (Gal. 3:24). Gado ben si Paulus leki wan reti-ati sma fu di nanga yepi fu a Wet a ben kon frustan a sani disi èn a ben poti bribi na ini Yesus. Na so Paulus „dede te a abi fu du nanga a Wèt” èn a bigin „libi gi Gado”. A Wet no ben abi krakti moro tapu en. Ma na Gado ben abi krakti tapu en.

Paulus ben taki fu wan srefi sortu sani na ini Romesma 7:4, 6. A taki drape: „Mi brada, na so a de nanga unu tu. Fu di Krestes gi en skin, meki wi no abi fu gi yesi na a Wèt moro . . . Ma now wi no abi fu gi yesi na a Wèt moro, bika wi kon fri fu a Wèt di ben basi wi.” Den wortu „no abi fu gi yesi na a Wèt moro” wani taki a srefi leki „dede te a abi fu du nanga a Wèt”. Sobun, na ini Romesma 7:4, 6 èn Galasiasma 2:19, Paulus no ben wani sori taki sma e dede fu di a Wet ben taki dati den na sondusma. Na presi fu dati a ben sori krin taki wi kon fri. A Wet no ben abi krakti moro tapu en nanga den tra Kresten di ben poti bribi na ini Yesus. Den ben kon fri fu di den ben poti bribi na ini a lusu-paiman fu Krestes.