Pawula wabhala watsi: “Ngemtsetfo ngafa emtsetfweni, kuze ngiphile kuNkulunkulu.”—Gal. 2:19.

Loko Pawula lakubhala bekuhlobene neliphuzu lelibalulekile lebekalisho emabandleni lasesifundzeni saseRoma, eGalathiya. Lamanye emaKhristu alapho bekayengwa bafundzisi bemanga. Lamadvodza bekafundzisa kutsi kuze umuntfu asindziswe bekufanele agcine uMtsetfo waMose, ikakhulukati umtsetfo wekusoka. Kodvwa Pawula bekati kutsi kuNkulunkulu, besekute sidzingo sekutsi labamkhontako basoke. Wabonisana nawo, wativeta ebaleni letimfundziso letingemanga, waphindze wacinisa kukholwa kwebazalwane enhlawulweni yaJesu Khristu.—Gal. 2:4; 5:2.

LiBhayibheli lisho ngalokucacile kutsi umuntfu nasekafile, akati lutfo futsi akeva lutfo. (Shu. 9:5) Ngesikhatsi Pawula atsi: “Ngafa emtsetfweni,” bekasho kutsi uMtsetfo waMosi awusakutsintsi kuphila kwakhe. Pawula bekaciniseka kutsi ngenca yekukholwa kwakhe enhlawulweni, ‘besekaphila kuNkulunkulu.’

Lolushintjo lwenteka ngenca ‘yemtsetfo.’ Kanjani? Bekasandza kuchaza kutsi “umuntfu kutsiwa ulungile ngenca yekukholwa kuJesu Khristu, hhayi ngenca yekwenta imisebenti lefunwa ngumtsetfo.” (Gal. 2:16) Kuyavunywa kutsi uMtsetfo bewudlale indzima lebalulekile. Pawula wachazela baseGalathiya watsi: “Wengetelwa kuveta tiphambeko tebantfu, kuze kube ngulapho kufika intalelwane lokwentiwa kuyo lesetsembiso.” (Gal. 3:19) UMtsetfo bewenta kucace kutsi bantfu labanesono, bebangeke bakhone kuwugcina kahle futsi bebadzinga umhlatjelo lote sono. Ngako uMtsetfo wasita bantfu babona kutsi Khristu ‘ungulentalelwane.’ Umuntfu lokhombisa kukholwa kuJesu Khristu, Nkulunkulu bekangatsi ulungile. (Gal. 3:24) Pawula washo lamavi ngobe ngenca yeMtsetfo, bekemukele Jesu futsi akholwa kuye. Ngako Pawula ‘wafa emtsetfweni’ futsi ‘waphila kuNkulunkulu.’ UMtsetfo besewute emandla kuye, kodvwa besekalawulwa nguNkulunkulu.

Pawula waveta umcondvo lofanako nasencwadzini yakhe layibhalela baseRoma. “Ngemtimba waKhristu, nani bazalwane naba ngulabafile eMtsetfweni . . . Sesikhululiwe eMtsetfweni, ngobe sesafa kuloko lebesiboshelwe kuko.” (Rom. 7:4, 6) Kulombhalo kanye naKubaseGalathiya 2:19 kuyabonakala kutsi Pawula bekangakhulumi ngekufa asoni ngephansi kweMtsetfo, kunaloko bekakhuluma ngekukhululwa. UMtsetfo besewute emandla kuye nakulabanye labafana naye. Bebakhululwe kukholwa enhlawulweni yaKhristu.