Paulus nẹ̌bera, ”Hukung ene hala nakakoạ iạ nate su ral᷊ungu hukung, sarang iạ botonge měbiahẹ̌ gunang Mawu.”​—Gal. 2:19.

Apa niwohẹ i Paulus ene nẹ̌tatahino dingangu pokok utama mapulu ul᷊ịkange su manga sidang su Galatia. Pirang katau tau Kristen sene napěngaruh manga měnaněntiro palsu. Manga taumata kerene něněntiro tadeạu masal᷊amatẹ̌ taumata harusẹ̌ tumuhụ Hukung Musa, lembone soal u sunatẹ̌. Katewe, i Paulus masingkạ Mawu seng tawe něngoro manga ělang’E harusẹ̌ isunatẹ̌. I sie dingangu mangimang něnodẹ těntiro ene kai nẹ̌sal᷊a kụ něnoghasẹ̌ pangangimangu anạu sěmbaụ su tatěbusi Yesus Kristus.​—Gal. 2:4; 5:2.

Alkitapẹ̌ nělahẹ su tempong sěngkatau nate, i sie běgaweng apa-apa arau seng tawẹ apa makapěngaruh si sie. (Pkh. 9:5) Su tempong i Paulus nẹ̌bera, ”Iạ nate su ral᷊ungu hukung”, ene mangal᷊ene i sie seng tawe napěngaruh Hukung Musa. Katewe, i Paulus masingkạ pangangimange su tatěbusẹ̌ ene makakoạ i sie ”botonge měbiahẹ̌ gunang Mawu”.

Hukung nakakoạ situasing i Paulus nẹ̌bal᷊ui. Kawe nụe? Paulus bọu nělahẹ, ”Sěngkatau makoạ nihino kětạeng mạeng i sie mangimang si Yesus Kristus, bal᷊inẹ ual᷊ingu tumol᷊e hukung.” (Gal. 2:16) Tantu, Hukung seng nakakoạ sěmbaụ hal᷊ẹ̌ penting. Paulus nělahẹ su taumata su Galatia, ”Hukung nitamba gunang měnodẹ pẹ̌sasal᷊a, kụ ene mapakẹ sarang hite měnarimạ diandi ene marěnta.” (Gal. 3:19) Nal᷊ahẹ, hukung něnodẹ taumata tawe nasukụ tawe makatol᷊e Hukung dingangu nasukụ, kụ i sire membutuhkan tatěbusẹ̌ nasukụ. Hakị u ene, Hukung sěběnarẹ̌e makakoạ taumata masadarẹ̌ hite ene kai i Yesus. Mạeng mangimang si Yesus Kristus, sěngkatau botonge ikawera nihino su těngong Mawu. (Gal. 3:24) Paulus botonge ikawera nihino ual᷊ingu něnarimạ lai mangimang si Yesus limiung Hukung. Bọu ene i Paulus ”nate su ral᷊ungu hukung” dingangu ”měbiahẹ̌ gunang Mawu”. Hukung seng tawe nẹ̌kawasa si sie, katewe Mawu.

Paulus nělahẹ tiněna mẹ̌sul᷊ung su tempong němohẹ suratẹ̌ su tau Roma. I sie němohẹ, ”Bọu wadang i Kristus, i kamene seng nate su ral᷊ungu hukung Taurat . . . i kitẹ seng nipakawebasẹ̌ bọu hukung Taurat, ual᷊ingu i kitẹ seng nate su ral᷊ungu hukung seng nẹ̌kawasa si kitẹ.” (Rm. 7:4, 6) Ayatẹ̌ ene dingangu su Galatia 2:19 něnodẹ, i Paulus tawe nẹ̌bisara soal u mate ual᷊ingu marosa su al᷊ungu Hukung. Katewe, i sie sěběnarẹ̌e nẹ̌bisara soal u kawawebasẹ̌. Hukung seng tawẹ apa pěngarune si sie dingangu su taumata wal᷊inẹ kere i sie. I sire nipakawebasẹ̌ ual᷊ingu mangimang su tatěbusi Kristus.