Paulo waaleembele eevi: “Kupitila muzilo naafuile ku muzilo, eevi ngaluke mukose kuli Leeza.”​—Bag. 2:19, NWT.

Milandu yaaleembele Paulo, yaali yapateene ni kintu kikata kyaalandile ku bilonghaano bya mu Galatia, provense ya Roma. Bakristu bange ba kooko baali bwatwamininua na bakasambilizia ba bufi. Babo bantu baali basambilizia nangue muntu pakuti apusuke apalile kukoonka malaizio ali mu Muzilo Wakue Musa, makamaka Muzilo palua kuteetua yando. Inzi, Paulo waali wamanine nangue Leeza taali walombele kabili baalia bazumiine baye bateetua yando. Waalondoluele wasininkiziizie ni kulangilila nangue azo masambilizio abanga ali a bufi.​—Bag. 2:4; 5:2.

Bibilia ili yalanda nangue kine muntu wafua, tamanine ata kantu ao taviinda kwinika kintu kyonse kyali kukitilua. (Kas. 9:5) Musita Paulo lwaalandile nangue “Naafuile ku Muzilo,” waali wakeba kulanda nangue Muzilo Wakue Musa te waali wakili kabili na buviinde pali weene. Inzi, Paulo waali wasininkiziizie nangue kupitila kulangilila kiketekelo mu ngeleelo ya kilumbula mulandu ‘waalukile mukose kuli Leeza.’

Muzilo waalengiizie aali yakue Paulo yaluluke. Mu nzila ki? Waali wafuminesie leenu pa kulanda nangue ‘muntu teezi kulunghamikua pa mulandu wa kukoonka muzilo wa kale, ingasie pa mulandu wa kumuketekela Kristu.’ (Bag. 2:16) Anzia evio, Muzilo waafikiliziizie kintu kya mana saana. Paulo waababuilile eevi Bagalatia: ‘Ozo muzilo waalundilue pakuti ulangisie vili bibalo . . . mpaka lwaaizile olia wa mu luvyalo.’ (Bag. 3:19) Muzilo waalangiliile paswetele nangue muntu asipuililikile, kabili wa mazaambi, taviinda kukoonka Muzilo mu nzila ipuililikile, kabili waali wakabiile ngeleelo ipuililikile ya kupeleezia. Pakaako, Muzilo waatunguluile bantu ku “luvyalo,” i kulanda kuli Kristu. Kupitila kulangilila kiketekelo muli Yesu Kristu, muntu kunti wakuutua wa nsaambu kuli Leeza. (Bag. 3:24) Paulo waalandile evio paantu kupitila Muzilo, weene waafikiile kwitabila ni kwaluka ni kiketekelo muli Yesu. Kutendekela paapo, Paulo ‘waafuile ku muzilo’ ni kwaluka “mukose kuli Leeza.” Muzilo te waali kabili na buviinde pali weene, ingasie Leeza i waali ni buviinde pali weene.

Paulo waabaleembeele Baroma malanga apaleene ni azo. Waabaleembeele eevi: “Mwe balupua bane, ni mwemue mwakyalulua bafuile ku Muzilo kupitila mubili wakue Kristu . . . tukakwilue kufuma mu Muzilo, paantu fwefue twakifua ku keelia kyaali kyatukakile.” (Bar. 7:4, 6, NWT) Leeli lileembo pamo ni lya Bagalatia 2:19, lyalangilila nangue Paulo taali walandila palua kufua kwa muntu wa lizaambi ali pensina Muzilo. Inzi, waali walandila palua kulubulua. Muzilo te waali kabili na buviinde pali weene ni pa bantu bange. Baalubwilue kupitila kulangilila kiketekelo mu kilubula mulandu kyakue Kristu.