Hoe ty Paoly: “Noho i raho nagnorike i lalànay ty nahafate ahy naho amy i lalànay, mba hahavelogne ahy ho an’Andrianagnahare.”​—Gal. 2:19.

Nisy voka’e tamy ty Kristiana ila’e ta Galatia agne ty fampianaran-diso o mpampianatse sandokeo. Nampianare i lahilahy rey ohatse tie tsy maintsy miambegne i Lalà i Mosesỳ ty ndaty raike naho te ho voavonje, lohotsie fa i lalàna miomba ty savatsey. Fa nihay i Paoly tie tsy takegne amo o Kristianao sasa ty hagnoriha iareo i lalàna miomba ty savatsey. Nagnomey porofo mitombegne soa reke mba hampisehoagne fa diso i fampianaragne rey, sady natao’e ze hahamafe oregne ty finoa o rahalahio i sorogne nanoe i Jesosy Kristỳ. (Gal. 2:4; 5:2) Le tamy i Paoly nagnazava tie tsy voatere hagnorike i Lalà i Mosesỳ ty ndaty raikey, ty nanorata’e o rehake amy Galatianina 2:19 ao iohoe.

Rehafe ty Baiboly mazava soa tie tsy misy raha rendre’e ndra mahatsapa naho maharey ty raha miseho magnodidigne aze o ndatio naho fa mate. (Mpito. 9:5) Naho fa nirehake areke ty Paoly tie: ‘Nimate raho naho amy i lalànay’, le te hirehake reke tie tsy manan-kery ama’e sasa i Lalà i Mosesỳ. I reke aza natoky fa noho ty finoa’e i solovoigney, le nanjare “velogne ho an’Andrianagnahare reke.”

“Noho i lalànay” ty nahavy ty fomba fiaigna i Paoly hiova. Fa nagnino tika ro mirehake izay? Satria vaho boake nagnazava reke tie: ‘Ty finoagne i Jesosy Kristy avao ty hahavy ty ndaty raike hambara ho maregne, fa tsy noho ty asa i lalànay.’ (Gal. 2:16) Maregne fa nahavita raha tena niambake i Lalànay. Hoe ty Paoly tamo o Galatianao: “Nimeagne ka io mba hampibaribariagne ty fandikan-dalàna, amparake ty iavia i taranake nanoagne i fampitamàgneỳ.” (Gal. 3:19) Nabaribary i Lalànay vata’e fa tsy vita o ndaty mpanotao ty hagnorike i Lalànay amy ty fomba voririke, sady nila sorogne tsy misy tsiko’e iareo. Nagnampe o ndatio hahatakatse areke i Lalànay tie i Jesosy “i taranakey.” Naho maneho finoagne i Jesosy Kristy ty ndaty raike, le afake ty hambara ho maregne agnatrehan’Agnahare eo. (Gal. 3:24) Nambara ho maregne zao ty Paoly, satria nanjare nagneke naho nino i Jesosy reke noho i Lalànay. Nanjare ‘velogne ho an’Andrianagnahare’ areke ty Paoly, faie ‘mate reke naho amy i lalànay.’ Tsy nanan-kery tama’e sasa i Lalànay fa Andrianagnahare ro nanan-kery tama’e.

Nirehake raha mitovy amy izay ka ty Paoly amy i taratasi’e hoahy i Romanaoy. Hoe reke: “Hoe izay ka nareo ry rahalahiko: Tamy ty alala ty vata i Kristy, le mate nareo naho amy i Lalànay ... Faie fa afake amy i Lalànay tika amy hinane zao, satria fa nimate amy i nitanagne antikagne mafey.” (Rom. 7:4, 6) Tsy nirehake miomba ty fahafatezagne ara-bakiteny noho ty nandikagne i Lalànay ty Paoly amo o andine’e rehoe naho amy i andine’e amy Galatianina 2:19 aoy. Nirehake miomba ty fagnafahagne amy i Lalànaỳ reke. Tsy nanan-kery tama’e naho tamy ty Kristiana hafa sasa i Lalànay, satria fa nafahagne iareo noho ty finoa iareo i sorogne nanoe i Kristỳ.