Pɔɔlɔ akafunde ate: “Lo tshimbo y’ɛlɛmbɛ, dimi lambovɔ lo kɛnɛ kendana la ɛlɛmbɛ dia dimi monga la lɔsɛnɔ le Nzambi.”​—Ngal. 2:19.

Kɛnɛ kakafunde Pɔɔlɔ kakɔtɔnɛka la lokanyi loleki ohomba lakandafundɛ tshumanelo dia la Rɔmɔ dia lo prɔvɛnsɛ ka Ngalatiya. Akristo amɔtshi wa lɛkɔ wakasɛngiyama la embetsha wa kashi. Anto asɔ waketshaka ɔnɛ dia onto nkondja panda, nde pombaka nkitanyiya kɛnɛ kakalɔmbamaka l’Ɛlɛmbɛ wa Mɔsɛ, djekoleko wonyelo wa mpota. Koko Pɔɔlɔ akeyaka ɔnɛ Nzambi ayɔlɔmba ambetawudi dia minya mpota. Lo nkamba la ekanelo ka yimba ka dimɛna efula, nde akatone wetshelo wa kashi ɛsɔ ndo nde akakeketsha anango dia monga la mbetawɔ l’oshinga w’etshungwelo waki Yeso Kristo.​—Ngal. 2:4; 5:2.

Bible mbutaka hwe dia etena kavɔ onto, nde heye ndooko dikambo ndo hakoke sɛngiyama kaanga la dikambo ɔtɔi. (Ond. 9:5) Etena kakate Pɔɔlɔ ate: “Dimi lambovɔ lo kɛnɛ kendana la ɛlɛmbɛ,” nde akalange mbuta dia nde aya bu l’ɛse k’Ɛlɛmbɛ wa Mɔsɛ. Koko Pɔɔlɔ aki l’eshikikelo di’oma lo mbetawɔ kande l’oshinga w’etshungwelo, nde ‘akonge la lɔsɛnɔ le Nzambi.’

“Lo tshimbo y’Ɛlɛmbɛ” mbakatshikitana lɔsɛnɔ la Pɔɔlɔ. Lo ngande? Nde akalembetshiya ate: “Onto mbɔsamaka oko onto ɔlɔlɔ, aha oma lo etsha w’ɛlɛmbɛ, koko paka oma lo mbetawɔ kele la nde le Yeso Kristo.” (Ngal. 2:16) Koko Ɛlɛmbɛ waki l’oyango ɔmɔtshi w’ohomba. Pɔɔlɔ akalembetshiya ase Ngalatiya ate: “Vɔ wakakotshama dia ntondja kɔlɔ sɛkɛ polo ndo lam’akahombe ndja kanula, ɔnɛ lakawalake daka.” (Ngal. 3:19) Eelo, Ɛlɛmbɛ wakɛnya hwe di’anto wele keema kokele ndo wele atshi wa pɛkato hawokoke nkitanyiya Ɛlɛmbɛ lo yoho ya kokele ndo ɔnɛ vɔ waki l’ohomba w’olambo wa kokele. Diakɔ diele, Ɛlɛmbɛ wakalɔmbɔla anto otsha le “kanula,” mbuta ate Kristo. Lo monga la mbetawɔ le Yeso Kristo, onto koka mbɔsama oko onto ɔlɔlɔ lo washo wa Nzambi. (Ngal. 3:24) Pɔɔlɔ akakome lo mbuta ngasɔ nɛ dia lo tshimbo y’Ɛlɛmbɛ nde aketawɔ ndo akonge la mbetawɔ le Yeso. Lo yoho shɔ mbele Pɔɔlɔ “[akavu] lo kɛnɛ kendana la ɛlɛmbɛ” ndo “[akonge] la lɔsɛnɔ le Nzambi.” Ɛlɛmbɛ komonga nto la wolo laadiko diande, paka Nzambi.

Kanyi yakɔ yaamɛ mbakɛnya Pɔɔlɔ lo mukanda wakandafundɛ ase Rɔmɔ, lo mbuta ate: “Analengo, nyu lawɔ nyakayala anto wambovɔ lo Ɛlɛmbɛ lo tshimbo ya demba dia Kristo . . . Sho tambotshungɔ oma lo Ɛlɛmbɛ, nɛ dia sho tambovɔ lo kɛnɛ kakatakelekama.” (Rɔmɔ 7:4, 6) Avɛsa anɛ ndo Ngalatiya 2:19 mɛnyaka dia Pɔɔlɔ kɔtɛkɛtaka dia mvɔ oko otshi wa pɛkato lo ndjela Ɛlɛmbɛ. Koko nde akatɛkɛtaka dia woho wakandatshungɔ. Ɛlɛmbɛ komonga nto la wolo laadiko diande ndo laadiko di’anto akina waki oko nde. Vɔ wakatshungɔ diɛsɛ la mbetawɔ kawɔ l’oshinga w’etshungwelo wa Kristo.