Paulo wangulemba kuti: “Chifukwa cha dangu ndingufwa ku dangu, kuti ndije wamoyu kwaku Chiuta.”—Aga. 2:19.

Vo Paulo wangulemba, vingukoliyana ndi fundu yikulu yo wangulembe mipingu ya ku Roma yo yenga muchigaŵa cha Galatiya. Akhristu anyaki ayendiyanga fundu za asambizi aboza. Yiwu asambizanga kuti munthu wakhumbikanga kulondo Dangu laku Mozesi kuti wazitaskiki, ukongwa pa nkhani yakudumulika. Kweni Paulo waziŵanga kuti Chiuta wakuleka fundu yakuti ŵanthu akhumbika kudumulika kuti azitaskiki. Mwaviyo, iyu wangususka mwanthazi visambizu vaboza venivi ndipu wanguwovya abali kuti aje ndi chivwanu chakukho mu sembi yaku Yesu Khristu.—Aga. 2:4; 5:2.

Bayibolu likamba mwakuvwika umampha kuti asani munthu wafwa waziŵa chechosi cha pamwenga palivi cho chitimuchitikiya. (Waku. 9:5) Paulo wachikamba kuti: “Ndingufwa ku dangu,” wang’anamuwanga kuti wenga pasi pa Dangu laku Mozesi cha. Mumalu mwaki, wasimikiziyanga kuti chifukwa chakuti wenga ndi chivwanu mu sembi yaku Yesu, ‘wanguja wamoyu kwaku Chiuta.’

Paulo wanguja wamoyu kwaku Chiuta “chifukwa cha dangu.” Kumbi vinguchitika wuli? Chifukwa pa nyengu iyi ndipu wakamba kali kuti “munthu wakambika kuti ndi murunji chifukwa cha dangu cha, kweni chifukwa chakuja ndi chivwanu mwaku Yesu Khristu.” (Aga. 2:16) Mbuneneska kuti Dangu lingugwira ntchitu yikulu ukongwa. Paulo wangukonkhoske Akhristu a ku Galatiya kuti: “[Dangu] linguperekeka kuti ubudi uwoneke mpaka po mphapu yinguziya, yeniyo yingupaskika layizgu.” (Aga. 3:19) Kukamba uneneska, Dangu lingulongore limu kuti ŵanthu akubuda, angalisunga cha Dangu mwakufikapu kweniso lingulongo kuti akhumbikanga sembi yakufikapu. Mwaviyo, Dangu linguwovya ŵanthu kuti aziŵi kuti Khristu ndiyu wenga “mphapu.” Munthu wangakambika kuti ndi murunji ndi Chiuta chifukwa chakuja ndi chivwanu mu sembi yaku Yesu Khristu. (Aga. 3:24) Paulo wangukambika kuti ndi murunji chifukwa kuziya mu Dangu, wangumuzomera Yesu ndipu wanguja ndi chivwanu mwaku iyu. Mwaviyo, Paulo ‘wangufwa ku dangu,’ ndipu wanguja “wamoyu kwaku Chiuta.” Ndipu Dangu lengavi nthazi paku iyu, kweni Chiuta ndiyu.

Paulo wangukamba so fundu yeniyi, mukalata yo wangulembe Akhristu a ku Roma. Iyu wangulemba kuti: “Abali ŵangu, namwi so mukufwatulika ku Dangu chifukwa cha liŵavu laku Khristu . . . Tafwatulika ku Dangu, chifukwa tafwa ku chinthu cho chatimanganga.” (Aro. 7:4, 6) Lemba ili kweniso lemba la Agalatiya 2:19, ngalongo kuti Paulo wakambanga za kufwa nge munthu wakubuda chifukwa cha Dangu cha. Mumalu mwaki, wakambanga za kufwatulika. Iyu ndipuso Akhristu anyaki wo ŵenga nge iyu, ŵenga pasi pa Dangu cha. Kweni angufwatulika chifukwa cha kuja ndi chivwanu mu sembi yaku Khristu.