Pawulo lovide gu khuye: “Nyi fude khu kota nya Nayo khu gufela gu vbanyela Nungungulu.” — Gal. 2:19.

Esi Pawulo a lovidego si di gu gimbileyana ni mahungu a nga ba tshamuseya libandla la Roma, Galatiya. Makristo nyo khaguri eyi ma di gu kutsedzedwa khu vahevbudzi nya malipha. Vama vava va di gu hevbudza gu khavo gasi gu muthu a vbuluga a di yede gu engisa Nayo wa Mosi, ngudzungudzu nayo wu gimbidzisanago ni gu hana wugwera. Ganiolu, Pawulo a di gu dziti gu khuye Nungungulu kha nga ba a gurumedza vathu gu hana wugwera. Khu ndziya nya yadi Pawulo ganedzide sihevbudzo nya malipha a bwe a tiyisa gukhodwa ga vandriyathu avba nya muphaso nya dzegiso wa Jesu Kristo. — Gal. 2:4; 5:2.

Bhibhiliya yi ngu si vega guagani gu khiyo muthu a fudego khati gilo nigu kha kuhwi khesi si giregago. (Muh. 9:5) Tepo Pawulo a nga ganeya gu khuye “Nyi fude khu kota nya Nayo” uye a di gu vbweta gu ganeya gu khuye a diri mwalo vbavbatshi nya Nayo wa Mosi. Pawulo a di gu tiyisega gu khuye gukhodwa gwaye avba nya dzegiso khugo gu nga ba gu mu gira a “vbanyela Nungungulu.”

Nayo wu giride gu giemo gya Pawulo gi vbindrugedza. Khu ndziya muni? Tepwana hwane Pawulo a di tshamusede gu khuye: “Muthu kha sayedwi gululama khu kota nya mithumo ya Nayo, aholu khu gukhodwa linani ga Kristo Jesu.” (Gal. 2:16) Lisine gu Nayo wu di tadziside gilo nyo khaguri nya lisima. Kha nga Pawulo a ganedego ga Vagalatiya: “Nayo wu vegidwe khu kota nyamba landrisa mithumo: Gu di vbwetega wu thuma kala gi gu vboha gyanana nya gitumbiso.” (Gal. 3:19) Khu lisine, Nayo wu si vegide guagani gu khuwo vathu nya mba vbeleya va di hadzi gu mba si kodza gu wu landrisa khu gu vbeleya. Ni gu avo va di gu vbweta muphaso nyo vbeleye. Nayo wu di gu yisa vathu ga Gyanana gi tumbisidwego, mwendro Kristo. Muthu a nga hadzi khodwa ga Jesu Kristo a di hadzi wonwa kha nga muthu nyo lulame khu Nungungulu. (Gal. 3:24) Pawulo wonidwe nga muthu nyo lulame kholu khu kota nya Nayo dzumede Jesu a bwe a khodwa gwaye. Khu kharato, Pawulo “fude khu kota nya Nayo” a bwe a “vbanyela Nungungulu.” Khu ndziya yoyo, Pawulo a diri mwalo gambe vbavbatshi nya Nayo wa Mosi, ganiolu a di gu thangedwa khu Nungungulu.

Pawulo ganede silo nyo fane avba nya lidangaliya laye ga Varoma. Uye lovide, khuye: “Vandruye, khu gufa ga Kristo enu nenu mu fude ga nayo . . . Olu hi tshulegide ga nayo, gambe hi fude ga satshavbo esi si nga bani si gu hi hunga wugumbini.” (Rom. 7:4, 6) Avba nya Lowo wowu ni ga Vagalatiya 2:19, Pawulo kha nga ba a ganeya khu gufa kha nga gighohi gi ndragidego Nayo, wulangani nya isoso, uye a di gu ganeya khu gu tshudwa. Uye gumogo ni ava nyo fane naye, va diri mwalo vbavbatshi nya Nayo, avo va di tshudwe khu kotani nya gu khodwe avba nya muphaso wa Kristo.