Pawulu wakalemba kuti: “Kwiinda mumulawo ndakafwa kumulawo kutegwa ndibe muumi kuli Leza.”—Gal. 2:19.

Majwi ngaakaamba Pawulu aleendelana akaambo kapati nkaakali kuyanda kuti maKristu bakuGalatiya bakamvwisisisye. Bamwi maKristu bakuGalatiya bakali kweenwa abayiisi bakubeja. Bayiisi bakubeja bakali kuyiisya bantu kuti muntu wakeelede kutobela Mulawu waMozesi kuchitila kuti afutulwe, ikapati Mulawu wakupalulwa. Pesi Pawulu wakalizi kuti Leza taakachili kuyanda kuti bakombi bakwe bapalulwe. Wakayikazya njiisyo eeyo alubo wakagwasya bakombinyina kuti babone kuti chiyandikana luzutu nkusyoma muchinunuzyo chaJesu Kristu.—Gal. 2:4; 5:2.

Bbayibbele lyaamba kuti muntu uufwide taakwe nchazi pe alubo zintu zichitika taziboni pe. (Muk. 9:5) Pawulu naakaamba kuti: “Ndakafwa kumulawo,” wakali kwaamba kuti taakachili aansi aMulawu waMozesi pe pesi wakali aachoonzyo chakuti kusyoma muchinunuzyo kwakali kupa kuti abe “muumi kuli Leza.”

Mulawu nguwo wakapa kuti chiimo chaPawulu chichinche. Biyeni? Pawulu wakapandulula kuti “muntu waambwa kuti mululami ikutali akaambo kakucita milimo yaambwa mumulawo pe, pele buyo kwiinda mulusyomo ndwajisi muli Jesu Kristo.” (Gal. 2:16) Mulawu wakagwasya loko. Pawulu wakalembela maKristu bakuGalatiya kuti: “Wakayungizyigwa ikutegwa kusotoka mulawo kulibonye, kusikila lunyungu oolo lukasike, oolo lwakasyomezyegwa.” (Gal. 3:19) Mbukunga bantu bali aachibi, Mulawu wakabagwasya kubona kuti kwakali kuyandikana chipayizyo chimaninide nkaambo teebakali kukonzya pe kuuswiilila munzila iimaninide. Nkinkaako, Mulawu wakazulwida bantu kusikila ‘kulunyungu,’ chaamba Kristu. Kusyoma muli Jesu Kristu nkuko kupa kuti muntu aambwe kuti uliluleme. (Gal. 3:24) Pawulu wakaambwa kuti uliluleme akaambo kakuti Mulawu wakamugwasya kuti atambule Jesu akuti abe aalusyomo mulinguwe. Nkinkaako, Pawulu ‘wakafwa kumulawu’ alubo wakaba “muumi kuli Leza.” Taakachili kweendelezegwa aaMulawu pe pesi wakali wabweendelezegwa aLeza.

Pawulu wakalembela maKristu bakuRoma majwi ayendelana aangakalembela maKristu bakuGalatiya. Wakalemba kuti: “Nobakwesu, andinywe mwakafwa kujatikizya Mulawo kwiinda mumubili wa Kristo . . . lino twaangununwa ku Mulawo ooyo, nkaambo twafwa kuli ceeco cakatwaangide.” (Rom. 7:4, 6) Mulugwalo oolu amuli Bagalatiya 2:19, Pawulu taakali kwaamba kufwa kali sizibi akaambo kakutaswiilila Mulawu pesi wakali kwaamba kuti wakaangununwa nkaambo taakachili aansi aaMulawu. Pawulu abamwi bakaangununwa akaambo kakusyoma muchinunuzyo chaJesu.