Ja Pablo stsʼijbʼan: «Ja yujil, yuja jkʼuʼan ja leyi, elyonta libre ja bʼa leyi bʼa jachuk ojxa bʼobʼ ajyukon sakʼan sbʼaja Dyosi» (Gál. 2:19, TNM).

Ja jas tsʼijbʼan ja Pablo jel tʼilan bʼa ya ekʼyi ja kongregasyonik ja bʼa chonabʼik ja bʼa parteʼik syamunej ja Roma bʼa Galacia. Jujuntik ja nebʼumanik it skʼuʼaneta ja sjejelik bʼa maestroʼik mi meranuk, bʼa jejitayile bʼa oj staʼe ja koltajeli tʼilan oj skʼuʼuke spetsanil ja mandarik bʼa Ley bʼa Moisés, sbʼaja yajelyi senya ja swinkile. Pe ja Pablo wani snaʼa ke ja Dyos mixani wanuk skʼanjelyi ja yaʼtijumik oj yaweyi senya ja swinkile. Ja jastal xcholo leki, sjeʼa ja sjejelik jaw mini meranuk sok jachuk tsatsbʼi ja skʼuʼajel yiʼoje ja hermanoʼik ja bʼa xchamelal ja Jesukristo (Gál. 2:4; 5:2).

Ja Biblia wa xyala jaman lek, yajni jun kristyano wa xchami, mixato xyabʼ ja jas wan ekʼeli (Ecl. 9:5). Yajni ja Pablo yala «elyonta libre ja bʼa leyi», jani wan yaljel ja bʼa Ley bʼa Moisés yujni mixa xmakuniyuj ja yeʼn. Ja yuj seguroxa ay soka skʼuʼajel yiʼoj ja bʼa koltaneli kʼotelxa ajyuk «sakʼan sbʼaja Dyosi».

Ja jaw aji tukbʼuk ja jastal wa xtax ja Pablo bʼa yala «yuja jkʼuʼan ja leyi». ¿Jas wa xkʼan yale? Ja yeʼn xcholotani ke «ja ixuk winik mi tojuk ay ta wa skʼulan ja jas wa xyala ja leyi. toj ay ta wan kʼa skʼu‘an ja Jesukristo‘i» (Gál. 2:16, Ja yajkʼachil sjuʼunil ja dyosi). Meran, ja Ley skʼulantani jun aʼtel jel tʼilan. Ja Pablo yala yabʼ ja swinkil ja Galacia: «Ajini bʼa xchiktesel ja mulalik man x-eljul ja intilali ja maʼ ajiyi ja skʼapjelali» (Gál. 3:19, TNM). Jachuk, ja Ley xchiktes ja kristyano mulanume sok mi oj skʼuʼuke tsʼikan lek sok ja yuj wa skʼanawe jun majtanal mey yiʼoj mulal. Ja yuja Leyi skoltay ja chonabʼ bʼa snaʼawe ke ja Jesús yeʼn ja «intilali». Ta june wa sjeʼa skʼuʼajel bʼa Jesukristo, ja Dyos ojni bʼobʼ yal ke toj (Gál. 3:24, TNM). Ja Pablo alji ke toj waj ja yeʼn yuja Ley bʼa Jesús sok ajyiyuj skʼuʼajel bʼa yeʼna. Jachuk yala «elyonta libre ja bʼa leyi» sok ajyixani «sakʼan sbʼaja Dyosi». Ja yuj ja Ley mixani ayip bʼa yeʼna, pe ja bʼa Dyos ayniʼa.

Ja Pablo yala junxtatik ja bʼa karta bʼa Romanos: «Quermano jumasa. Lajan soc chamtic ja yora cham ja Cristo [...]. Yuchʼanotic teʼ soc ja mandar ajyi pero ja huego, mi xa smozoucotic ja mandar jumasa jahui. Como lajan soc chamtic soc ja Cristo, libre xa ayotic yuj» (Rom. 7:4, 6). Ja bʼa bersikuloʼik it sok jastal ja Gálatas 2:19, ja Pablo mini jaʼuk wan yaljel oj chaman jastal jun mulanum ja bʼa Leyi. Jani wan yaljel librexa ay ja bʼa Ley jaw. Bʼa yeʼna mixani xmakuniyuj ja Ley cha mixani sbʼaja tuk, ja wego librexa aye yuja skʼuʼajel yiʼoje ja bʼa koltanel yaʼa ja Jesukristo.