Pol i tok: “Mi bihainim lo na long dispela rot mi kamap olsem man i dai pinis long sait bilong lo, mi mekim olsem bai mi ken stap laip long ai bilong God.”—Gal. 2:19.

Tok bilong Pol i stret wantaim wanpela bikpela tok em i mekim long ol kongrigesen long Galesia, em wanpela provins bilong Rom. Ol giaman tisa i wok long pulim sampela Kristen long dispela hap. Ol dispela giaman tisa i skulim ol man olsem sapos man i laik bai God i kisim bek em, em i mas bihainim Lo Bilong Moses—wanpela lo em olsem em i mas katim skin. Tasol Pol i save olsem God i tok i no gat wok moa long ol Kristen i katim skin. Olsem na Pol i mekim ol tok bilong kamapim klia olsem ol dispela bilip ol i bilip giaman, na em i strongim ol brata long bilip long ofa bilong Jisas Krais.—Gal. 2:4; 5:2.

Baibel i tok stret olsem, taim man i dai, em i no save long wanpela samting na ol man i no inap mekim wanpela samting long em. (Ekl. 9:5) Taim Pol i tok: “Mi kamap olsem man i dai pinis long sait bilong lo,” em i min olsem em i no moa stap aninit long Lo Bilong Moses. Tasol em i bilip tru long ofa bilong Krais, olsem na em i tok mi “stap laip long ai bilong God.”

Pol i “bihainim lo,” olsem na em i mekim dispela tok. Hau yumi save long dispela? Em i bin stori olsem “man i bilip long Jisas Krais na long dispela rot tasol God inap kolim em stretpela man.” (Gal. 2:16) Lo i bin inapim wanpela bikpela samting. Pol i tokim ol Kristen long Galesia olsem: “Lo i stap bilong kamapim klia ol rong i go inap long dispela pikinini i kamap. Em dispela pikinini tok promis i go long em.” (Gal. 3:19) Yes, Lo i kamapim klia olsem em i no inap lukautim ol sinman inap oltaim, ol i nidim wanpela ofa i gutpela olgeta. So Lo i bringim ol man i go long dispela “pikinini,” em Krais. Taim man i bilip long Jisas Krais, God inap kolim em olsem stretpela man. (Gal. 3:24) God inap kolim Pol stretpela man bikos long rot bilong Lo, em i bilip long Jisas. Olsem na Pol i “dai pinis long sait bilong lo” na kisim “laip long ai bilong God.” Lo i no gat strong moa long bosim em, tasol God i gat strong long mekim olsem.

Pol i kamapim wankain tok long pas em i raitim i go long ol Kristen long Rom. Em i tok: “Ol brata, long sait bilong Lo i olsem yupela i dai pinis, dispela i kamap long rot bilong bodi bilong Krais . . . Lo i no pasim yumi moa, long wanem, long sait bilong Lo yumi dai pinis na yumi lusim pinis dispela samting i bin holimpas yumi.” (Rom 7:4, 6) Dispela skripsa, na tu, Galesia 2:19 i kamapim klia olsem Pol i no tok em i mas dai olsem sinman olsem Lo i makim. Tasol em i stori olsem em i stap fri. Lo i no moa pasim em na ol narapela wankain olsem em. Ol i bilip long ofa bilong Krais, olsem na ol i kamap fri.