Pawulo u tsale a ku: “Ndzi file hikwalaho ka nawu, hikwalaho ka swona ndzi hanyela Xikwembu.”—Gal. 2:19.

Leswi Pawulo a swi tsaleke swi fambisana kahle ni marito lawa a tshameke a ma vula emavandlheni ya le Galatiya lawa a ma ri exifundzheni xa Rhoma. Vakreste van’wana exifundzheni lexi, a va kuceteriwa hi vadyondzisi va mavunwa. A va dyondzisa leswaku munhu a nge ponisiwi loko a nga yimbanga hilaha Nawu wa Muxe a wu vula hakona. Kambe Pawulo a a swi tiva leswaku Nawu wolowo wa ku yimbisiwa a wu nga ha tirhi eka Xikwembu. Hi xivindzi, u kanetane ni dyondzo yoleyo ni ku tlhela a khutaza Vakreste leswaku va va ni ripfumelo eka gandzelo ra nkutsulo ra Yesu Kreste.—Gal. 2:4; 5:2.

Bibele yi swi hlamusela kahle leswaku loko munhu a fa, a nga ha tivi nchumu. (Ekl. 9:5) Loko Pawulo a ku, “Ndzi file hikwalaho ka nawu,” a a vula leswaku Nawu wa Muxe se a wu nga ha ri na matimba eka yena. Kambe a a swi tiva leswaku loko a va ni ripfumelo eka gandzelo ra nkutsulo, swi kombisa leswaku u “hanyela Xikwembu.”

Pawulo u cince vonelo rakwe “hikwalaho ka nawu.” Njhani? U te: “Munhu u vuriwa loyi a lulameke ku nga ri hikwalaho ka ku landzela nawu kambe hi ku va ni ripfumelo eka Yesu Kreste.” (Gal. 2:16) I ntiyiso leswaku Nawu wu tlange xiphemu xa nkoka. Pawulo u byele Vagalatiya a ku: “Wu ve kona leswaku ku tlula ka nawu ku ta vonaka, kukondza ku fika n’wana loyi xitshembiso xi endliweke ha yena.” (Gal. 3:19) Nawu wu kombise leswaku a swi ta tika ku va vanhu lava velekiweke ni xidyoho va wu yingisa hilaha ku heleleke kutani a ku laveka nkutsulo. Hikwalaho, Nawu wu pfune vanhu va lunghekela ku ta ka “n’wana,” ku nga Kreste. Lava kombisaka ripfumelo eka Yesu Kreste, Xikwembu xi ta va vula lava lulameke. (Gal. 3:24) Pawulo a a swi tiva leswaku hikwalaho ka Nawu, u kote ku amukela Yesu ni ku va ni ripfumelo eka yena. U swi veke erivaleni leswaku u “file hikwalaho ka nawu” naswona u “hanyela Xikwembu.” Nawu a wu nga ha ri na matimba eka yena kambe a lawuriwa hi Xikwembu.

Eka Papila rakwe leri yaka eka Varhoma, Pawulo u hlamusele nchumu lowu fanaka. U te: “Vamakwerhu miri wa Kreste wu mi tshunxile eka Nawu . . . “Hi tshunxiwile eNawini hikuva se hi file eka Nawu lowu a wu hi lawula.” (Rhom. 7:4, 6) Tsalwa leri ni ra Vagalatiya 2:19, ma kombisa leswaku Pawulo a a nga vulavuli hi ku fa a ri hlonga leri nga ehansi ka Nawu. Kambe a a vulavula hi ku tshunxiwa eka vuhlonga bya Nawu. Nawu lowu a wu nga ha ri na matimba eka yena kumbe eka vanhu van’wana vo fana na yena. A va tshunxiwile hileswi a va ri ni ripfumelo eka gandzelo ra nkutsulo ra Kreste.