Pawule i tsalile lezvi: “Hi kota ya Nayo ndzi file hi ka Nayo, kasi ndzi hanyela Nungungulu.” — Gal. 2:19.

Lezvi Pawule a nga tsala zvi wa yelana ni mhaka a nga kari a tlhamusela maKristu ya bandla ga le Roma ni ga le Galatiya. A maKristu yo kari ka mabandla lawa ma wa kari ma hambukisiwa hi vanhu va nga gondzisa mawunwa. A vanhu lavo va wa gondzisa ku kasi a munhu a ponisiwa i wa fanele ku ingisa Nayo wa Mosi, nguvhunguvhu lowu wa ku maha wukwera. Kanilezvi, Pawule i wa zvi tiva ku Nungungulu i wa nga ha layi lezvaku a vanhu va maha wukwera. Makunu, i no tlhamusela hi ndlela ya ntamu nguvhu, a kaneta tigondzo leto ta mawunwa a tlhela a tiyisa kukholwa loku a vamakabye va nga hi nako hi hakhelo ya kutlhatlhisa ya Jesu Kristu. — Gal. 2:4; 5:2.

A Bhibhiliya gi zvi veka kubaseni lezvaku loku a munhu aza afa, a nga ha tivi nchumu ne a ka hi na leci a khumbiwako hi cona. (Mutsh. 9:5) Makunu, a cikhati Pawule a ngaku “ndzi file hi ka Nayo”, i wa lava ku wula lezvaku a wutomi gakwe gi wa nga ha khumbiwi hi Nayo wa Mosi. I wa tiyiseka lezvaku hi kuva a kholwa hakhelo ya kutlhatlhisa, makunu i wa “hanyela Nungungulu.”

A Nayo hi wona wu nga cica ciyimo ca Pawule. Hi ndlela muni? I wa sina a tlhamusele aku “a munhu a nga wuliwi wo lulama hi kota ya mitiro ya nayo, kanilezvi i wuliwa wo lulama ntsena hi ku kholwa ka Jesu Kristu.” (Gal. 2:16) A mhaka yo tiya hi ku a Nayo wu wa mahile ntiro wa lisima. Pawule i tlhamusele va le Galatiya aku: “A Nayo wu tlhatekelwe kasi a zvigoho zvi fela ku woneka kubaseni, kala wu chikela a pswalo lowu wu tsumbisilweko a citsumbiso.” (Gal. 3:19) Zvi te dlunya! A Nayo wu zvi vekile kubaseni lezvaku a vanhu vo kala kumbhelela tlhelo vawonhi, va wa nga ta zvi kota ku ingisa Nayo hi kumbhelela niku ku wa ta laveka a muphahlo wo mbhelela ni wo gumesa. Hi kwalaho, a Nayo wu rangele vanhu kala ku chikela “pswalo”, ku nga Kristu. A munhu i wa ta wuliwa wo lulama mahlweni ka Nungungulu hi ku kholwa ka Jesu Kristu. (Gal. 3:24) Pawule i wa yi zwisisile mhaka leyo hakuva a Nayo wu mu vhunile ku vhumela Jesu ni ku kholwa ka yena. Hi kota ya lezvo, Pawule i ‘nofa hi ka Nayo’, a “hanyela Nungungulu.” A Nayo wu wa nga ha hi na ntamu ka yena. Kanilezvi Nungungulu i nawo.

Pawule i tlhamusele zvo fana ni lezvo ka papilo gakwe ka va le Roma. I te: “Vamakabye, n’winawu mu file hi tlhelo ga Nayo hi kota ya miri wa Kristu, . . . Hi tlhatlhisilwe ka Nayo, hakuva hi file ka lezvi zvi nga hi bohelele.” (Rom. 7:4, 6) A mutsalo lowu wa va le Roma, ni wa Va Le Galatiya 2:19, yi komba ku Pawule i wa nga wulawuli hi kufa hi ku koniwa hi Nayo kota muwonhi. Kanilezvi, i wa wulawula hi ku tlhatlhiswa. A Nayo wu wa nga ha hi na ntamu ka yena ni ka van’wani va nga hi ka ciyimo co fana ni ca yena. Va wa tlhatlhisilwe hi ku kholwa a hakhelo ya kutlhatlhisa ya Kristu.