Mupostolo Pawulo a tsale leswi: “Ni file hi mhaka ya nawu. Hi mhaka ya leswo, ni hanyela Xikwembu.” — Gal. 2:19.

Leswi Pawulo a nga swi tsala ka ndzimana leyi, a swi fana ni leswi a nga swi tlhamusela ka mabandla ya Roma. Vakreste van’wana va mabandla wolawo a va kanganyisiwa hi vadjondzisi va mavunhwa, lava a va vula swaku kuva munhu a ponisiwa a a fanele a landzela Nawu wa Moxe, ngopfungopfu lowu fambisanaka ni ku soka. Kambe Pawulo a a swi tiva leswaku ka Yehovha a swi nga ha bohi leswaku munhu a soka leswaku a ponisiwa. Hi ku tiyiseka, Pawulo a byele vamakwerhu swaku tidjondzo toleto a ti nga li ntiyiso, a tlhela a va pfuna leswaku va kombisa lipfumelo ka lifu la Yesu. — Gal. 2:4; 5:2.

Bibele li vula hi ku kongoma swaku loko munhu a file a nga ha tivi nchumu lexi yentxekaka, naswona a nga voni kumbe ku twa nchumu lexi yentxekaka. (Ekl. 9:5) Loko Pawulo a vule swaku: “Ni file hi mhaka ya Nawu,” a a lava ku vula swaku Nawu wa Moxe a wu nga ha na matimba ka yena, kambe a a swi tiva swaku ku va ni lipfumelo ka lifu la Yesu hi swona a swi ta mu yentxa a “hanyela Xikwembu.”

Hinkwaku ku txintxa loku Pawulo a nga kumana na kona, ku yentxekile “hi mhaka ya Nawu.” Phela Pawulo se a a va tlhamuselile a ku: “A nga kona lweyi Xikwembu xi nga ta vulaka swaku a lulamile hileswi a landzelaka nawu, kambe hi mhaka ya ku pfumela ntsena ka Yesu Kreste.” (Gal. 2:16) I ntiyiso swaku Nawu a wu hetisise swilo swa lisima hilani Pawulo a nga byela Vagalatiya ha kona loko a ku: A Nawu “wu ve kona leswaku swihoxo swi ta voneka kahle anze ku fika n’wana lweyi ku nga yentxiwa xitshembiso hi yena.” (Gal. 3:19) Swa tikomba swaku Nawu a wu kombisa swaku vanhu lava nga ni xidjoho a va nge swi koti ku yingisa Xikwembu hilani ku heleleke. Kambe a ku lavela nchumu wa lisima hintamu lowu a wu ta kota ku yentxa swilo swa ku tlula leswi Nawu a wu kota ku swi yentxa. A ntiyiso wa mhaka hi leswaku Nawu a wu kongomisa vanhu swaku va ya ka Kreste, hikusa munhu lweyi a a ta kombisa lipfumelo ka Kreste, Xikwembu a xi ta mu vula munhu wa ku lulama. (Gal. 3:24) Pawulo a a vuliwa wa ku lulama hikusa hi mhaka ya Nawu a kombise lipfumelo ka Yesu. Hi mhaka leyo, Pawulo a “file hi mhaka ya Nawu” kambe a tlhele a “hanyela Xikwembu.” Se Nawu a wu nga ha na matimba ka Pawulo, leswi vulaka swaku Pawulo a a nga ha ta fumiwa hi Nawu kambe a a ta fumiwa hi Xikwembu.

Leswi Pawulo a nga swi byela Vagalatiya, swa fana ni leswi a nga gama a swi byela Varoma loko a te: “Hi ku fana, na n’wina vamakwerhu miri wa Kreste wu mi chunsile ka Nawu wa Moxe. . . . Kambe swoswi hi chunsiwile ka Nawu hikusa a wa ha hi mandi.” (Rom. 7:4, 6) Ka Varoma 7:4, 6 ni ka Vagalatiya 2:19, mupostolo Pawulo a a nga vulavuli hi kuva vanhu va fa hileswi va nga yavanyisiwa hi Nawu, kambe a a vulavula hi kuva va chunsiwa ka wona hikusa leswi a va ni lipfumelo ka lifu la Yesu, a va chunsiwile ka Nawu.