Павел гожтӥз: «Инмарлы яраса улон понна закон пыр мон законлы кулӥ» (Гал. 2:19).

Та кылъёсты валан понна, лыдэ басьтоно валтӥсь малпанэз, кудзэ апостол Павеллэн валэктэмез потэ вал Рим котырысь Галатия улосысь кенешъёслы. Со кенешъёсысь христианъёс оскизы зэмос луисьтэм дышетӥсьёслы, кудъёсыз дышетӥзы, утиськон понна Моисейлэн законэзъя улоно шуыса, кылсярысь, вандӥськон сямез ортчытоно. Но Павел тодӥз, Инмар сыӵе курон-косонэз уг пукты ини шуыса. Аслаз гожтэтаз Павел вераз кулэ луись малпанъёсты, кудъёсыз возьматӥзы, сыӵе дышетонъёс зэм уг луо шуыса, но кудъёсыз вын-агайёслэсь осконзэс юнматӥзы Иисус Христослэн мозмытӥсь курбонэзлы (Гал. 2:4; 5:2).

Библия валамон дышетэ, кулэм адями номыре уг шӧды ни но номыр карыны уг быгаты ни шуыса (Екк. 9:5). Озьыен, куке Павел вераз «мон законлы кулӥ», солэн шуэмез потэ вал, Моисейлэн законэз кужымзэ ыштӥз шуыса. Со дыре ик Павел оскиз, мозмытӥсь курбонлы луыса со «Инмарлы яраса улон понна» улӟиз шуыса.

Соку малы Павел вера, сыӵе воштӥськонъёс «закон пыр» луизы шуыса? Кӧня ке азьлогес со валэктэ, «Моисей законэз быдэсъян пыр адями шонере уг поты, Иисус Христослы оскон пыр гинэ со шонере потэ» шуыса (Гал. 2:16). Веранэз ӧвӧл, Моисейлэн законэз туж кулэ луись ужпумез быдэстӥз. Апостол Павел валэктӥз: та Закон сётэмын вал, йыружъёсты шарае поттон понна, «кидыслэн лыктонэз дырозьлы, кудӥзлы сӥзён сётэмын вал» (Гал. 3:19). Зэм, Закон возьматӥз: сьӧлыко адямиос Инмарлэсь курон-косонъёссэ быдэсак быдэсъяны уг быгато но, сьӧлыкъёссэс простить карон понна, соослы тырбыдэс курбон кулэ. Озьыен, Моисейлэн законэз вуттӥз адямиосты «кидыс» доры — Христос доры. Иисус Христослэн мозмытӥсь курбонэзлы оскыса, адями Инмарлэн син азяз шонерлыко луыны быгатэ вал (Гал. 3:24). Павел но сыӵе адямиос пӧлын вал. Моисейлэсь законзэ валан Павеллы оскыны юрттӥз, Иисус — Мессия шуыса, озьы ик осконзэ уж вылын возьматыны юрттӥз. Озьыен, Павел Законлы кулӥз, нош «Инмарлы яраса улон понна» улӟиз. Павел Моисейлэн законэзлэсь кылзӥськыса ӧз ни улы, нош Инмарлэсь кылзӥськыса улӥз.

Та выллем ик малпанэз апостол Павел Римъёслы гожтэтаз гожтӥз: «Озьы ик тӥ но, агай-вынъёсы... Христослэн мугорыз пыр... законлы кулӥды... Нош табере закон понна кулыса, кудӥз асьмеды пленын возе вал, асьмеос солэсь мозмытскимы» (Рим. 7:4, 6). Та кылбуръёсын но, Галатъёслы 2:19 но Павел уг вера, христианъёс, Моисейлэн законэзлэсь кылзӥськытэк улэмзы сэрен, кулӥзы шуыса. Зэмзэ вераса, Павел вера, со ачиз, озьы ик мукет христианъёс но, та Законлэсь мозмытско шуыса. Озьы луыны быгатэ Иисус Христослэн мозмытӥсь курбонэзлы оскемзылы луыса.