Paulu wa soneha hati: “Pocakati cocihandeleko nda fa kocihandeleko oco okuti, ndi muila omuenyo ku Suku.”—Va Gal. 2:19.

Ovina Paulu a soneha via likuata locina cimue ca velapo eye a kala oku lingila akongelo o ko Roma volupale luo Galatia. Akristão volupale luaco va kala oku kembiwa lalongisi vesanda. Alume vaco va kala oku longisa okuti oco omanu va popeliwe va sukilile oku lava ocihandeleko ca Mose ndeci, oku seviwa evamba. Pole, Paulu wa kũlĩhĩle okuti Suku ka yonguile vali okuti vana va tava va seviwa evamba. Lutõi eye wa pisa alongiso aco esanda kuenje wa pamisa ekolelo lia vamanji kocisembi cocilumba ca Yesu Kristu.—Va Gal. 2:4; 5:2.

Embimbiliya li popia hati eci omunu a fa, ka kũlĩhĩle vali cimue ale oku mola vali cina co ñuala. (Uku. 9:5) Eci Paulu a popia hati: “Nda fa kocihandeleko,” eye wa yonguile oku popia okuti Ocihandeleko ca Mose ka ci kuete vali unene umue vokuange. Pole, Paulu wa kolelele okuti omo liekolelo liaye kocilumba cocisembi, o “muila omuenyo ku Suku.”

Epongoloko eli kekalo lia Paulu lia molẽha “pocakati cocihandeleko.” Ndamupi? Eye wa lombolola okuti “omunu o tendiwa ndukuesunga hamekondako lioku kuama ocihandeleko, pole te lika pocakati cekolelo vu Yesu Kristu.” (Va Gal. 2:16) Ocihandeleko ca tẽlisa ocina cimue ci kuete esilivilo lialua. Paulu wa sapuila va Galatia hati: “Ceyilila oku situlula ovina vĩvi omanu va lingaile, toke eci ocitumbulukila ceya ku yuna ohuminyo ya lingiwile.” (Va Gal. 3:19) Ocili okuti Ocihandeleko ca lekisa okuti omanu ka va lipuile haivo vakuakandu ka va ponduile oku suisapo ocihandeleko cosi kuenda va sukilile ocilumba cimue ca lipua. Ocihandeleko ca laikele oku kuatisa omanu okuti Kristu eye “ocitumbulukila.” Poku lekisa ekolelo ku Yesu omunu umue o pondola oku tendiwa la Suku okuti ukuesunga. (Va Gal. 3:24) Paulu weya oku limbuka okuti omo Liocihandeleko eye wa laikele oku taviwa loku kolela ku Yesu. Noke Paulu wa “fa kocihandeleko” kuenda wa “muila omuenyo ku Suku.” Ocihandeleko ka ca kuatele vali unene kokuaye pole te lika Suku.

Paulu wa tukula ovisimĩlo vimuamue eci a sonehela ukanda waye ku va Roma poku popia hati: “A vamanji, wa fivo Kocihandeleko omo lietimba lia Kristu. . . Tua fa Kovihandeleko, eli olio esunga lieci tua yovuiwila cilo Kovihandeleko.” (Va Rom. 7:4, 6) Ocisonehua ku Va Galatia 2:19, ci lekisa okuti, Paulu ka kaile oku lombolola catiamẽla koku fa kuomunu umue ukuekandu vemẽhi Liocihandeleko. Pole, eye wa kala oku lombolola catiamẽla koku yovuiwa. Ocihandeleko ka ca kuatela vali unene vokuaye kuenda ku vakuavo. Ovo va yovuiwa omo lioku lekisa ekolelo kocisembi ca Kristu.