Pọl de si: “Me wan oma rẹ urhi na ghwu kẹ urhi nure rere me vwọ mrasan rhọ kẹ Ọghẹnẹ.”—Gal. 2:19.

Oborẹ Pọl siri ghwe shephiyọ vẹ ẹkpo ọvo kiriguo rọ kanrunumu kẹ ikoko rehẹ ubrotọ ri Galesha rọhẹ otọ rẹ usuon ri Rom. Inenikristi evo nenesi rẹ ihwo ri yono iyono rẹ efian. Ayen yonori nẹ tavwen ohwo ki se vwo usivwin, ko muọghọ kẹ Urhi ri Mosis, ma rho kẹ urhi ro shekpahen oyavwe. Ẹkẹvuọvo, Pọl riẹnre nẹ Ọghẹnẹ rha guọnọ nẹ ohwo yavwe tavwen o ki sikẹrẹ-ẹ. Ọ da vwẹ ẹkpo re nabọ ghwotọ vwo tueghe iyono rẹ efian tiọyena, je bọn esegbuyota rẹ iniọvo na gan kpahen izobo rẹ ọtanhirhe ri Jesu Kristi.—Gal. 2:4; 5:2.

Baibol na tare nẹ ohwo ro ghwu nure rha riẹn emuvuọvo ọfa-a. (Aghwo. 9:5) Pọl vwọ tanẹ ọyen “ghwu kẹ urhi,” o mudiaphiyọ nẹ Urhi ri Mosis rhe vwo ẹgba vwẹ oma rọyen ọfa-a. Ukperẹ ọtiọyen, Pọl vwo imuẹro nẹ ọyen “mrasan rhọ kẹ Ọghẹnẹ” womarẹ esegbuyota ro vwori kpahen izobo rẹ ọtanhirhe na.

“Oma rẹ urhi” na yen ewene yena wan rhe akpeyeren ri Pọl. Vwẹ idjerhe vọ? Ọ tarọ jovwo nẹ “ohwo sa vwi fiki rẹ iruo rẹ urhi na rease-e ẹkẹvuọvo vwẹ oma rẹ esegbuyota vwi Jesu Kristi.” (Gal. 2:16) A riẹnre dẹn nẹ Urhi na fierere kẹ ihwo rẹ Ọghẹnẹ dẹvure. Ẹkẹvuọvo, Pọl da ta kẹ Inenikristi rehẹ Galesha: “A vwe rọ ba fiki rẹ urhi egbe bẹsiẹ rẹ uvwiẹ na che vwo te obọ rẹ ohwo re ve ive na kẹ.” (Gal. 3:19) Urhi na nẹrhẹ a riẹn nẹ ihworakpọ ri jẹgba che se nene Urhi rẹ Ọghẹnẹ gbagba-a, ayen guọnọ izobo ọgbagba re che ze obọ vuọvo goi. Urhi na sun ihwo vwo rhe “uvwiẹ na,” rọ dia Kristi. Ọghẹnẹ cha reyọ kohwo kohwo ro vwo esegbuyota kpahen Jesu Kristi phiyọ ọvwata. (Gal. 3:24) Pọl rhe dia ọvwata, kidie Urhi na chọn rọ uko vwo rhiabọreyọ Jesu ji vwo esegbuyota kpahọn. Ọtiọyena, Pọl vwo “ghwu kẹ urhi” na nu, ọ da “rhọ kẹ Ọghẹnẹ.” Ọghẹnẹ kọyen rhi vwo ẹgba vwẹ oma rọyen, ọ rha dia Urhi na-a.

Pọl je ta oka rẹ ota tiọyen vwẹ ileta ro si rhe iniọvo rehẹ Rom. “Imoni mẹ, rẹ oma rẹ ovwan rẹ awanre vi Kristi vwo ghwu . . . nure na . . . a rhan avwanre nẹ abọ rẹ urhi na, ri ghwu kẹ obo re gba avwanre phihọ ọviẹn.” (Rom 7:4, 6) Ẹkpo ri Baibol nana kugbe ọbe ri Galesha 2:19 djerephia nẹ ọ dia ozighẹ re brorhiẹn rẹ ughwu hwe womarẹ Urhi na yen Pọl ta ota kpaha-an. Ukperẹ ọtiọyen, Pọl ta ota kpahen ẹdia rẹ ọmuvwiẹ. Urhi na rhe vwo ẹgba vwẹ oma rọyen kugbe ihwo efa rehẹ ẹdia rẹ ọmuvwiẹ-ẹ. Esegbuyota rẹ ayen vwo kpahen izobo ọtanhirhe ri Jesu yen ru ayen phiyọ ọmuvwiẹ.