Paulo o ṅwala uri: “Ndo fa siani ḽa mulayo ndi tshi itiswa nga wonoyo mulayo, uri ndi kone u tshilela Mudzimu.”—Vhagal. 2:19.

Zwe Paulo a zwi ṅwala zwo vha zwi tshi khou tshimbidzana na zwe a vha a tshi khou ṅwalela zwone zwivhidzo zwi re Galata, ḽine ḽa vha vundu ḽa Roma. Vhaṅwe Vhakriste henefho vho vha vha tshi khou ṱuṱuwedzwa nga vhafunzi vha mazwifhi. Vhenevho vhanna vho vha vha tshi khou funza uri muthu u tea u tevhedza Mulayo wa Mushe uri a tshidzwe, zwihuluhulu musi zwi tshi ḓa kha u fumba. Paulo o vha a tshi zwi ḓivha uri Mudzimu ha tsha ṱoḓa vhathu vha tshi kombetshedzea u fumbiswa. O ṱalutshedza vhahashu na u vha sumbedza nga nḓila i pfalaho uri dzenedzi pfunzo ndi mazwifhi nahone a khwaṱhisa lutendo lwavho kha tshirengululi tsha Yesu Kristo.—Vhagal. 2:4; 5:2.

Bivhili i ri musi muthu a tshi fa, ha ḓivhi tshithu nahone ha kwamei nga zwine zwa itea. (Muh. 9:5) Musi Paulo a tshi ri: “Ndo fa siani ḽa mulayo,” o vha a tshi khou amba uri Mulayo wa Mushe a u tsha shuma khae. Paulo o vha e na vhungoho ha uri lutendo lwawe kha tshirengululi lwo ita uri a “kone u tshilela Mudzimu.”

“Mulayo” ndi wone wo itaho uri vhuimo ha Paulo vhu shanduke. Nga nḓila ḓe? O vha a tshi kha ḓi tou bva u ṱalutshedza uri “muthu ha vhidzwi o lugaho nga nṱhani ha u tevhedza mulayo, fhedzi u vhidzwa o lugaho nga u tenda Kristo Yesu.” (Vhagal. 2:16) Ndi ngoho uri Mulayo wo vha wo khunyeledza tshithu tsha ndeme. Paulo o vhudza Vhagalata a ri: “Wo itelwa uri hu vhonale zwo khakheaho zwine vhathu vha zwi ita, u swika ṅwana wau o fhulufhedziswaho a tshi ḓa.” (Vhagal. 3:19) Mulayo wo zwi bvisela khagala uri vhathu vha re na tshivhi vho vha vha nga si kone u tevhedza Mulayo nga ho fhelelaho na uri vho vha vha tshi ṱoḓa tshirengululi tsha u fhedza tsho fhelelaho. Nga zwenezwo, Mulayo wo thusa vhathu uri vha ṱhogomele uri Yesu o vha e ene“ṅwana” o fhulufhedziswaho. U vha na lutendo kha Yesu zwo vha zwi tshi nga ita uri Mudzimu a dzhie onoyu muthu o luga. (Vhagal. 3:24) Paulo o dzhiiwa sa o lugaho ngauri Mulayo wo vha wo mu thusa uri a ṱanganedze Yesu na u vha na lutendo khae. Nga zwenezwo, Paulo o “fa siani ḽa mulayo” uri a “kone u tshilela Mudzimu.” O vha a si tsha vha nga fhasi ha Mulayo, fhedzi o vha a tshi vho tshilela Mudzimu.

Paulo o amba zwi fanaho na zwenezwo musi a tshi ṅwalela Vharoma vhurifhi. O ri: “Vhahashu, na inwi no vha no vhofhiwa nga Mulayo. Fhedzi nga tshiṱhavhelo tsha Kristo na vhofhololwa . . . Zwino ro vhofhololwa kha Mulayo.” (Vharoma 7:4, 6) Kha lwonolu luṅwalo na kha Vhagalata 2:19, Paulo o vha a sa khou amba nga ha u fa sa muitazwivhi u ya nga Mulayo. Nṱhani hazwo o vha a tshi khou amba nga ha u vhofhololwa kha Mulayo. Ene na vhaṅwe vhane vha nga ene vho vha vha si tsha vha nga fhasi ha Mulayo. Vho vha vho vhofhololwa ngauri vho vha vhe na lutendo kha tshirengululi tsha Kristo.