Paulo olempe: “Vekhaikhai kòhokhwa wa ikano niwoko na ikano, weera kimukhalele Muluku.”—Agal. 2:19.

Ele Paulo aalempaawe envarihana ni moonelo aataphulelaawe miloko sa eprovincia ya oroma ya aGalaciya. Makristu a elapo ele yaarukureeriwa ni anamaxuttiha oowootha. Anamaxuttiha awo yannixuttiha weera, weera mutthu avuluwe onnitthuneya otthara nlamulo na Mose, vantxipalexa nlamulo noowiinelana. Mene nto, Paulo aasuwela weera, Muluku khaanyeserera tho makristu otthara nlamulo noowiinelana. Avarihelaka muteko muupuwelelo ni ovareleya muteko, avaanyiha khuluwi sooxuttiha iye soowootha ni aahaalipiha asinna weera eroromeleke yooveleela ya yoowoopola ya Yesu Kristu.—Agal. 2:4; 5:2.

Bibliya onnithaliha weera mpaka atthu enkhwa ehiisuwelaka. Khiyaavo etthu eri mukhiviru mwaya enaakhavihera. (Koh. 9:5) Vaavo Paulo enraawe: “kòhokhwa wa ikano” owo aatthuna ohima weera nlamulo na Moise khanaakhalanne tho ikuru mweekumini mwawe. Mweekhaikhai Paulo anniroromela weera naari nroromelo wa yoowoopola yaamupakiha “omukhalela Muluku.”

Matxentxo a Paulo yaakhumelenle “moorweela mwa nlamulo.” Vahinaakuveene, Paulo othaliha enre: “Mutthu khankhalihiwa naxariya niwoko na miteko sa ikano, mene niwoko nomwìwelela Yesu Kristu.” (Agal. 2:16) Ekhaikhai weera nlamulo na Moise naakhavihera vantxipale. Tivaavonto Paulo enraawe wa Agalata: “Ikano sahàtxereriwa niwoko na opahula, silamuliwaka ni ntxelo, mmatatani mwa mphuki mpaka orwa wa mmiso wamaneliwe natiri.” (Agal. 3:19) Aani, nlamulo naahima mooluluwanya weera mutthu yoowo oyariwe ni yoottheka, khaawereya wiiwelela moomalela. Atthu awo yannitthuna yooveleela yeeyo yahaakhalanne yoottheka ni yahaarowa otxentxiwaka. Mweekhaikhai, nlamulo naahaapakiha atthu wa, “mwaana,” neere ha, Kristu. Wakhala weera mutthu onnoonihera nroromelo wa Yesu, aamukhalihiwa naxariya ni Muluku. (Agal. 3:24) Paulo aamukhalihiwa naxariya mwaha wooweera, moorweela mwa nlamulo, owo aamwaakhulela Yesu ni okhala ni nroromelo wa yoowo. Mwaha woopaka eyo, Paulo ‘aahookhwa mwa nlamulo’ ni ‘annikhala mwa Muluku’. Tivaavoonto, nlamulo khanaakhalanne owera mwa Paulo, mene owo aakhala mwa Muluku.

Paulo ahuuluma etthu emoha-moharu wa akristu a oRoma. Owo aalempe ha: “Siso asinn’aka, nyuwo tho mòkhwela ikano sa khalayi mwa erutthu ya Kristu . . . Nto vanano vava hiyo nòtaphuliwa wa ikano, nikhwenlene yeeyo nitthukeliwahuno.” (Arom. 7:4, 6) Ntoko yoolepa ela naari ya Agalata 2:19, Paulo khuuluma voohima sa okhwa ntoko namatthekela nlamulo. Opwaha mwa yeeyo, owo uuluma sa otaphuliwa. Nlamulo khanaakhalanne tho owera mwa yoowo ni wa atthu akina. Atthu ootheene yaataphuliwa moorweela mwa nroromelo mwa yoowoopola ya Yesu.