PHawuloosi hagaadan giis: “Taani Xoossaayyo paxa de7ana mala, higgiyaa baggaara higgiyaayyo haiqqaas.”—Gal. 2:19.

PHawuloosi Rooma haaruwan Galaatiyan deˈiya gubaaˈetussi qonccissido waannabaara maayettiyaabaa xaafiis. Yan deˈiya amarida Kiristtaaneti worddo asttamaareta kaalloosona. Issi uri atotettaa demmanawu qaxxaraabaa yootiya Muuse Higgiyaa kaallana koshshees giidi he asati tamaarissoosona. SHin ammaniyaageeti qaxxarettanaadan Xoossay etappe naagennaagaa PHawuloosi erees. I ammanttiya ogiyan yootiisinne he timirtteti worddo gidiyoogaa qonccissiis, qassi Yesuus Kiristtoosa wozuwaa yarshshuwan ishanttussi deˈiya ammanuwaa minttiis.—Gal. 2:4; 5:2.

Issi uri hayqqiyo wode ba yuushuwan deˈiya aybanne erennaagaa woy aybiininne qohettennaagaa Geeshsha Maxaafay qonccissidi yootees. (Era. 9:5) PHawuloosi taani “higgiyaayyo haiqqaas” giido wode Muuse Higgiyawu ba bolli aybanne oottiyo wolqqi baynnaagaa yootanawu koyiis. PHawuloosi wozuwaa yarshshuwan ammaniyo ammanuwan I ‘Xoossaayyo paxa deˈanaagaa’ erees.

Higgee PHawuloosa hanotay laamettanaadan oottiis. Waatidi? I issi “asi Yesuus Kiristtoosa ammanidi xillanaappe attin, higgiyaa naagiyoogan xillennaagaa” yootiis. (Gal. 2:16) Higgee keehi koshshiyaabaa polidoogee qoncce. Galaatiyan deˈiya Kiristtaanetuyyo PHawuloosi hagaadan giis: “Higgee mooro ooso gidiyaabai aibakko bessanau Xoossai immana giidi haasayido Abrahaama zaree yaana gakkanaashin gujettiis.” (Gal. 3:19) Ee, Higgee nagaranchcha asi wottiyoobi baynna ogiyan Higgiyaa naagana danddayennaageenne wurssettan etayyo wottiyoobi baynna yarshshuwaa koshshiyoogee qonccanaadan oottiis. Yaatiyo gishshawu, Higgee asaa ‘Abrahaama zariyaa’ Kiristtoosakko kaalettiis. Yesuus Kiristtoosa ammaniyoogan issi uri Xoossaa sinttan xillo geetettana danddayees. (Gal. 3:24) PHawuloosi Higgiyaa baggaara Yesuusa ammanido gishshawu xillo geetettiis. Hegaa gishshawu, PHawuloosi ‘higgiyaayyo hayqqidi Xoossaayyo paxa’ deˈiis. PHawuloosa bolli Xoossaayyo wolqqay deˈeesippe attin, Higgiyaayyo baawa.

PHawuloosi Roomen deˈiya Kiristtaanetuyyo xaafido ba dabddaabbiyan hegaa mala qofaa qonccissiis. “Ta ishatoo, hegaadan intte qassi Kiristtoosa asatettaappe issi bagga gidiyo gishshau, higgiyaa qoppiyaabaa gidikko, intte haiqqideta. . . Nuuni nuna qachchidaagau haiqqido gishshau, Xoossai nuna higgiyaa qashuwaappe birshshiis.” (Roo. 7:4, 6) PHawuloosi he xiqisiyaaninne Galaatiyaa 2:19n, Higgiyaa maaran nagaranchcha geetettidi hayqqiyoogaabaa gidennan, laˈa kiyiyoogaabaa yootiis. Higgiyawu PHawuloosa bollinne A mala hara Kiristtaanetu bolli aybanne oottiyo wolqqi baawa. Eti Kiristtoosa wozuwan ammaniyoogan laˈa kiyidosona.