Hi Pablo nagsurat: “Pinaagi han balaud namatay ako ha balaud, basi mabuhi ako ha Dios.”​—Gal. 2:19.

An iginsurat ni Pablo konektado ha nangunguna nga punto nga iya ginhihisgotan ha mga kongregasyon ha Galacia nga probinsya han Roma. An iba nga mga Kristiano didto naimpluwensyahan han buwa nga mga magturutdo. Ito nga mga tawo nagtututdo nga basi matalwas an usa, kinahanglan niya tumanon an mga iginsusugo han Mosaiko nga Balaud, labi na an pagturi. Pero maaram hi Pablo nga diri na gin-oobligar han Dios nga magpaturi an iya mga magsiringba. Pinaagi han makakombinse nga pangatadongan, ginpamatud-an ni Pablo nga buwa ito nga mga katutdoan ngan ginparig-on niya an pagtoo han kabugtoan ha halad-lukat ni Jesu-Kristo.​—Gal. 2:4; 5:2.

An Biblia klaro nga nasiring nga kon patay na an usa nga tawo, diri na hiya maaram o apektado han bisan ano nga nakapalibot ha iya. (Ecles. 9:5) Han hi Pablo nagsiring: “Namatay ako ha balaud,” iginpapasabot niya nga an Mosaiko nga Balaud waray na awtoridad ha iya. Lugod, sigurado hi Pablo nga pinaagi han iya pagtoo ha halad-lukat, ‘nabuhi hiya ha Dios.’

Ito nga pagbag-o ha kahimtang ni Pablo nahitabo “pinaagi han balaud.” Paonan-o? Iya pa la iginsaysay nga “an usa ka tawo iginpapahayag nga matadong, diri pinaagi ha pagsunod ha balaud, kondi pinaagi la ha pagtoo kan Jesu-Kristo.” (Gal. 2:16) Tinuod, an Balaud may nahimo nga importante gud. Hi Pablo nagsaysay ha mga taga-Galacia: “Igindugang ito basi maipahayag an mga pagtalapas, tubtob nga umabot an tulin nga makarawat han saad.” (Gal. 3:19) Oo, iginpakita han Balaud nga an diri perpekto ngan makasasala nga mga tawo diri bug-os nga makakatuman han Balaud ngan kinahanglan nira hin ultimo ngan perpekto nga halad. Salit an Balaud binulig ha mga tawo nga masantop nira nga an Kristo amo “an tulin.” Pinaagi ha pagtoo kan Jesu-Kristo, maipapahayag han Dios nga matadong an usa nga tawo. (Gal. 3:24) Iginpahayag hi Pablo nga matadong tungod kay pinaagi han Balaud, ginkarawat niya hi Jesus ngan tinoo hiya ha iya. Salit hi Pablo ‘namatay ha balaud’ ngan ‘nabuhi ha Dios.’ An Balaud waray na awtoridad ha iya, kondi an Dios may awtoridad ha iya.

Iginpahayag ni Pablo an pariho nga punto ha iya surat ha mga taga-Roma: “Mga kabugtoan ko, kamo liwat namatay na ha Balaud pinaagi han lawas han Kristo . . . Igin-gawas na kita tikang ha Balaud, kay namatay na kita hito nga nagpugong ha aton.” (Roma 7:4, 6) Ito nga teksto ngan an Galacia 2:19 nagpapakita nga an ginhihisgotan ni Pablo diri an mahitungod ha kamatay sugad nga hinukman nga salaan han Balaud. Lugod, an iya ginhihisgotan amo an mahitungod han pagkaada kagawasan. An Balaud waray na awtoridad ha iya ngan ha iba pa nga mga Kristiano nga pariho ha iya. Nagkaada hira kagawasan pinaagi han pagtoo ha lukat han Kristo.