Paulo jwalembile kuti, “Kupitila mu chilamusi une naliji jwam’we ku chilamusi, mwamti nganimba njegamile pa chilamusicho kuti mbe jwa chijumi kwa Mlungu.”—Agal. 2:19, NWT.

Maloŵe gaŵalembile Paulo gali gakamulana mnope ni mfundo jajasimanikwaga mu utenga wawaliji m’yikalata yakwawula m’mipingo ja ku Galatiya jajaliji ku Loma. Aklistu ŵane ŵasokonechelaga ni nganisyo sya ŵandu ŵaŵajiganyaga yindu yaunami. Ŵandu ŵeleŵa ŵajiganyaga kuti mundu kuti akulupuche akusosekwa kukuya yachasalaga Chilamusi cha Mose mnopemnope lilamusi lya kuwumbala. Paulo jwamanyililaga kuti Mlungu ŵalesile kwalamula ŵandu ŵakusamkulupilila jwalakwe kuti awumbaleje. Jwalakwe jwasisisye yijiganyo yaunamiyi mwamti jwalimbikasyaga Aklistu kuti akulupilileje mnope mbopesi ja Yesu Klistu.—Agal. 2:4; 5:2.

Baibulo jikusasala mwakupikanika chenene kuti mundu pawile jwangamanyilila chilichose. (Jwak. 9:5) Myoyo Paulo pajwaŵechete kuti , “Nawile ku chilamusi,” jwagopolelaga kuti Chilamusi cha Mose ngachikamulasoni masengo pa jwalakwe. Mmalo mwakwe Paulo jwaliji jwakusimichisya kuti ligongo lyakujikulupilila mbopesi jakutuwombola “jwakwete umi kwa Mlungu.”

Chilamusichi ni chachatendekasisye umi wa Paulo kuchenga. Ligongo chichi tukuŵecheta myoyo? Jwalakwe jwalondesisye kuti, “Mundu ngaŵa mkusimanikwa kuti ali jwakulungama pa meso pa Mlungu ligongo lyakutenda yagakuti malamusi, nambo pakulupilila mwa Yesu Klistu.” (Agal. 2:16) Chilamusichi chakwanilisye yindu yakusosekwa mnope. Paulo jwawusalile mpingo wa kwa Galatiya kuti, “Mlungu ŵajonjechesyepo malamusi kuti ŵamanyisye ŵandu yakulemwa, mpaka yisukulu ya Abulahamu, yele Mlungu ŵatesile nayo chilanga chila.” (Agal. 3:19) Chilamusi chalosyaga mwakupikanika chenene kuti mundu jwangali umlama nganaŵa akombwele kukuya chenene chilamusi mwangalemwesya kalikose, mmalo mwakwe ŵasosekwaga mbopesi jangali chakulemwa chilichose. Chilamusichi chakamuchisye ŵandu kumanyilila kuti “mbeju” kapena kuti yisukulu ya Abulahamu yaŵasalaga pa lilembali ali Klistu. Mwamti mundu jwakusakulupilila mwa Yesu Klistu ni jwakusaŵa jwakulungama pa meso pa Mlungu. (Agal. 3:24) Paulo jwasasile yeleyi ligongo lyakuti Chilamusi ni chachamkamuchisye kuti akole chikulupi mwa Yesu. Ni ligongo lyakwe jwatite “jwaliji jwam’we ku chilamusi” ni chakulinga chakuti aŵe jwa “umi kwa Mlungu.” Myoyo Chilamusichi nganichikola machili pa Paulo, nambo Mlungu ni juŵakwete machili pa jwalakwe.

Paulo jwakamulichisyesoni masengo mfundo jeleji mu chikalata chakwe chakwawula ku Loma. Jwalakwe jwalembile kuti, “Jemanja achalongo achimjangu mwatendekwe kuŵa ŵawe mu chilu cha Klistu, nambo sambano tugopoledwe ku malamusigo twatesile mpela twawile ni kulekangana ni malamusi gigaliji mkututaŵa kala.” (Alo. 7:4,  6) Lilemba lyeleli nambosoni lya Agalatiya 2:19, likulosya kuti Paulo nganaŵechetaga ya kuwa mpela mundu jwakulemwa ligongo lya Chilamusi. Nambo jwaŵechetaga ya kugopolwa ku ulemwa. Mwamti chilamusi nganichikamulaga masengo pa jwalakwe soni achimjakwe ŵaŵakwete chembecheyo cha mpelaga cha jwalakwejo. Jemanjaji ŵagopoledwe ku ulemwa ligongo lyakulupilila mbopesi jakutuwombola ja Yesu Klistu.