I yoloy Paul ni gaar: “Ku gum’ kug chuw rok e Motochiyel​—ni Motochiyel e ke lieg​—ni fan e nggu fos nggu pigpig ngak Got.”​—Gal. 2:19.

N’en ni yoloy Paul e bay rogon nga ban’en ni be tamilangnag ko pi ulung u Galatia. Bay boch e Kristiano ko pi ulung nem ni kar paged e pi tamachib ni googsur ni nge suruy lanin’rad. Pi girdi’ ney e yad be machibnag ni faanra nge yag e yafos ku be’, ma thingari fol ko n’en ni bay ko fare Motochiyel rok Moses, nib ga’ ni bin be weliy murung’agen ni ngan maad’adnagey. Machane manang Paul ndaki t’uf ni ngan maad’adnag e piin Kristiano. Ere non ngorad u reb e kanawo’ nra micheg ngorad nde riyul’ e pi machib ney, miki gelnag e michan’ rorad ko fare biyul ni maligach ni pi’ Jesus Kristus.​—Gal. 2:4; 5:2.

Be tamilangnag e Bible nnap’an nra yim’ be’ ma dakuriy ban’en ni manang. (Ekl. 9:5) Ere nap’an ni gaar Paul: “Ku gum’ kug chuw rok e Motochiyel,” ma be yip’ fan ndaki moy u tan fare Motochiyel rok Moses. Ba mich u wan’ ni bochan ni ke mich fare biyul ni maligach u wan’, ma aram e ke ‘fos ni nge pigpig ngak Got.’

Fare Motochiyel e aram e n’en ni thilyeg rarogon Paul. Ni uw rogon? Ka fini mu’ Paul i yog “ni ke mus nu daken e michan’ rok be’ ngak Jesus Kristus e ir e rayog ni nge mat’aw riy ngak Got, ma ri gathi bochan e i rin’ e tin ni ke yog e Motochiyel rok Moses ngak ni ir e ngi i rin’.” (Gal. 2:16) Ere bay ban’en nib ga’ fan ni ke yag ni nge lebug u tan fare Motochiyel. I weliy Paul ngak piyu Galatia ni gaar: “I puthuy ko n’en ni ognag ni nge pi’ ngak Abraham ni fan e nge dag ko mang e ngongol nib kireb, me finey Got ni nge par e re Motochiyel nem nge yan i mada’ ko ngiyal’ ni bay yib i m’ug riy faanem ni ir e owchen Abraham, ni ir faanem ni ognag Got.” (Gal. 3:19) Ere fare Motochiyel e tamilangnag ndabiyog ko girdi’ ndawor ra flontgad ni ngar folgad ko re Motochiyel nem nrib fel’ rogon mab t’uf be’ ni nge pi’ bbiyul nib flont ni fan ngorad. Ki ayuweg e girdi’ ni ngar nanged ni Jesus e ir faen “owchen” ni kan micheg. Ra maruweliy be’ e michan’ rok ngak Jesus Kristus, ma aram e rayog ni nge mat’aw ngak Got. (Gal. 3:24) Ere ku aram rogon Paul ni ke yag ni nge mat’aw ngak Got ni bochan e ke maruweliy e michan’ rok ngak Jesus u daken fare Motochiyel. Bochan e re n’ey, ma aram fan ni ke ‘yim’ ke chuw rok e Motochiyel’ ma ke ‘fos ni nge pigpig ngak Got.’ Ere Got e ir e be gagiyegnag Paul ma gathi ka fare Motochiyel.

Ku aram e n’en ni yog Paul u lan e babyor ni yoloy ngak piyu Roma. I gaar: “Pi walageg, ere ku er rogomed ni kam m’ad rok e Motochiyel, ni bochan e kam manged bangi downgin Kristus . . . Machane chiney e kad chuwgad u tan e Motochiyel, ya kad m’ad rok e re n’en ni i taydad ba ngiyal’ ni gadad e kalbus rok.” (Rom. 7:4, 6) Re thin nu Bible ney nge fa binem ko Galatia 2:19 e be tamilangnag nder weliy Paul murung’agen be’ nib tadenen ni ke yim’ u tan fare Motochiyel. Ya be weliy murung’agen rogon ni yira chuw u tan e re motochiyel nem. Dakuriy gelngin fare Motochiyel ni nge gagiyegnag Paul nge piin taareb rogorad ngak, ya bochan ni ke mich u wan’rad fare biyul ni pi’ Kristus ma ke yag ni ngar chuwgad u tan e re Motochiyel nem.