Mvuala Polo wusonika: “Mu kibila ki nsiku, minu yifua muingi yizinga mu Nzambi.”—Ngala. 2:19.

Mambu mvuala Polo kasonika, maba nguizani na diambu di mfunu nandi kaba vanga mu bimvuka ku dibueti di Ngalatia. Baklisto bawombo baba vukumuka mu malongi ma minlongisi mi luvunu. Bawu baba longanga ti, muingi kubaka phulusu vaba tombulu kulandakana nsiku wu Mose wu kuzenga nyitu yi kibakala. Vayi mvuala Polo wuzaba ti, vabasa bue tombulu ko kuvanga mawu muingi kubaka phulusu. Angi vaba tombulu kuba kiminu mu nkhayilu wu khudulu yi Yesu. Diawu nandi kabayisila malongi amomo ayi kakindisila zikhomba muingi baba kiminu mu nkhayilu wu khudulu yi Yesu.—Ngala. 2:4; 5:2.

Kibibila kintuba ti, bo mutu kafuidi kabue zabanga ko ni kiuma kimvela. (Mpovi 9:5) Bo mvuala Polo katuba ti: “Minu yifua mu kibila ki nsiku,” nandi wabe tomba kutuba ti kasa bue ba ko ku tsi nsiku wu Mose. Vayi nandi wuba lufiatu ti mu kuba kiminu mu khudulu yi Yesu, nandi “wuba wu moyo mu Nzambi.”

Nzingulu yi mvuala Polo yibaluka “mu kibila ki nsiku.” Mu phila mbi? Nandi wumana kusudikisa ti, ni mutu kalendi ba ko wusonga mu kulandakana to minsiku mi Mose, vayi mu ‘kuba kiminu mu Yesu Klisto.’ (Ngala. 2:16) Bukiedika, tuzebi ti minsiku mi Mose mfunu beni miba. Mvuala Polo wusudikisa kuidi basi Ngalatia: “Nsiku wubuelimina muingi kumonisa ti tuidi batu ba masumu nate muana mutu kankuiza, kibila mu nzil’andi bavanina lukanu.” (Ngala. 3:19) Nsiku wu Mose wuba mbonosono ti batu ba masumu, balendi tumamana ko Nzambi mu phila yisulama kheti ba kutatamana kuvana minkhayilu mi bibulu. Vayi vaba tombulu nkhayilu wufuana ayi wusonga muingi kuvanga mawu. Buawu mvuala Polo katubila ti nsiku wu Mose wuyiza ba ntuadis’itu, wu tunata kuidi Klisto muingi tuba batu basonga mu nzila kiminu mu nandi. Mawu mansundula ti mu kuba kiminu mu Yesu, tulenda ba batu basonga va meso ma Nzambi. (Ngala. 3:24) Mvuala Polo kavisila mawu buboti kibila mu nzila nsiku wu Mose, muawu kabakila lusadusu muingi kukuna kiminu mu Yesu. Diawu mvuala Polo wufua mu matedi nsiku wu Mose, vayi wuyiza baka “luzingu mu matedi Nzambi” mu nzila kiminu kiandi mu Yesu.

Mvuala Polo wubue tubila diyindu beni mu nkanda kasonikina basi Loma. Nandi wutuba: “Zikhomba ziama, benu mvinu luidi bafua va ntuala nsiku wu nyitu wu Klisto. . . Vayi buabu tukulu ku tsi luyalu lu nsiku kibila tuba bafua mu nsiku.” (Loma 7:4, 6) Lutangu alolo ayi mvandi madi mu Ngalatia 2:19, mammonisa ti Mvuala Polo kabasa tubila ko lufua lu kinsunyi mu kuba mutu wu masumu. Vayi nandi waba tomba kutuba ti, nsiku wu Mose wabasa bue kuntuadisa ko ayi kutuadisa bankaka. Kibila bawu bakulu mu nsiku beni mu kiminu baba mu khudulu yi Klisto.