1. Mɛni he je nɛ wa ma nyɛ maa ngɔ Satan kɛ to detsɛ he ɔ?

OTI nɛ detsɛ kɛ maa e hɛ mi ji kaa e maa gbe lohwe ko loo e maa nu lohwe ko. Kaa bɔ nɛ Hiob huɛ yaya amɛ a kpɛti nɔ kake tsɔɔ ɔ, detsɛ ma nyɛ maa ngɔ klama slɔɔtohi kɛ tsu ní. (Hiob 18:8-10) Mɛni blɔ nɔ detsɛ ma nyɛ maa gu kɛ da lohwe ko konɛ e du klama nɛ e tsɔ̃ lɛ ɔ? E hyɛɛ bɔ nɛ lohwe ɔ peeɔ e ní ha. Jije lohwe ɔ hii yae? Mɛni nɛ e bua jɔ he? Nɛ mɛni klama nɛ ma nyɛ maa du lɛ? Satan ngɛ kaa detsɛ. E hyɛɛ bɔ nɛ wa peeɔ wa ní ha, e toɔ hehi nɛ wa yaa kɛ níhi nɛ wa bua jɔ he ɔ a he hɛ, kɛkɛ ɔ, e tsɔ̃ klama kɛ juɛmi ɔ kaa e maa du wɔ be mi nɛ wa hɛ be wa he nɔ. Se Baiblo ɔ ha nɛ wa ná nɔ mi mami kaa ke wa du e klama a po ɔ, wa ma nyɛ maa je mi. Jehanɛ hu ɔ, Baiblo ɔ tsɔɔ wɔ nɔ́ nɛ wa ma nyɛ maa pee konɛ wa ko du e klama amɛ kulaa.

2. Mɛni ji klama enyɔ nɛ Satan kɛ tsuɔ ní wawɛɛ nɛ e yeɔ manye?

² Klama enyɔ nɛ Satan kɛ tsuɔ ní wawɛɛ nɛ e yeɔ manye ji he nɔ womi kɛ hɛkɔ. * Jeha akpehi abɔ ji nɛ ɔ nɛ Satan kɛ klama nɛ ɔmɛ tsu ní nɛ e ye manye. E ngɛ kaa nɔ ko nɛ e tsɔ̃ɔ lohwe pɛlitsɛmɛ klama. E ngɔɔ ya loo klama kpa komɛ kɛ daa lohwe ɔmɛ. (La 91:3) Se e sɛ nɛ wa ha nɛ Satan klama amɛ nɛ du wɔ. Mɛni he je? Ejakaa Yehowa tsɔɔ wɔ Satan ga tsɔmi ɔmɛ.—2 Kor. 2:11.

3. Mɛni he je nɛ Yehowa ha nɛ a ngma nihi nɛ a wo a he nɔ nɛ a hɛ kɔ̃ ɔ a nɔ hyɛmi níhi ngɛ Baiblo ɔ mi ɔ?

 ³ Blɔ kake nɔ nɛ Yehowa guɔ kɛ bɔɔ wɔ kɔkɔ ji kaa e woɔ wɔ he wami konɛ waa kase ní kɛ je ni kpahi a níhi a si kpamihi a mi. Nyɛ ha nɛ wa susu nɔ hyɛmi ní komɛ a he nɛ waa hyɛ. Ngɛ nɔ hyɛmi ní nɛ ɔmɛ a mi ɔ, kadi bɔ nɛ Satan klama a du Yehowa sɔmɔli nɛ a nane pi si po ɔ ha. Se anɛ lɔ ɔ tsɔɔ kaa wa be nyɛe ma kua he nɔ womi kɛ hɛkɔ lo? Dɛbi kulaa. Yehowa ha nɛ a ngma nɔ hyɛmi ní nɛ ɔmɛ ngɛ Baiblo ɔ mi konɛ ‘a kɛ bɔ wɔ kɔkɔ.’ (1 Kor. 10:11) E le kaa wa ma nyɛ maa kase ní kɛ je nɔ hyɛmi ní nɛ ɔmɛ a mi konɛ waa je Abosiami klama amɛ a mi loo wa ko du kulaa.

4. Ke wa woɔ wa he nɔ ɔ, mɛni ma nyɛ maa ba?

⁴ Satan suɔ nɛ wa wo wa he nɔ. E le kaa ke wa wo wa he nɔ ɔ, wa maa pee kaa lɛ nɛ wa be neneene wami náe. (Abɛ 16:18) Enɛ ɔ he je nɛ bɔfo Paulo de kaa nɔ ko ma nyɛ maa “pee pupuupu, nɛ e maa nɔ kojomi nɛ a kojo Abosiami ɔ mi” ɔ nɛ. (1 Tim. 3:6, 7) E ma nyɛ maa ba jã ngɛ wa ti nɔ fɛɛ nɔ blɔ fa mi, wa ngɛ anɔkuale ɔ mi be kɛkɛɛ jio, kpaako wa ba anɔkuale ɔ mi jio.

5. Ngɛ Fiɛlɔ 7:16, 20 ɔ nya a, mɛni blɔ nɔ nɛ nɔ ko ma nyɛ ma wo e he nɔ?

⁵ Nihi nɛ a woɔ a he nɔ ɔ foɔ mɛ pɛ a nɔ́ mi. Satan suɔ nɛ wa fo wɔ pɛ wa nɔ́ mi, titli ke waa kɛ ka ko ngɛ kpee. E suɔ nɛ waa ngɔ wa juɛmi kɛ ma wɔ nitsɛmɛ wa nɔ pe Yehowa. Kaa nɔ hyɛmi nɔ́ ɔ, anɛ a po sane kɛ fɔ o nɔ lo? Aloo a kɛ mo ye ngɛ blɔ nɛ dɛ nɔ lo? Satan suɔ nɛ o pia Yehowa loo o nyɛmimɛ ɔmɛ ke o kɛ nyagba nɛ ɔmɛ eko kpe. Nɛ e suɔ nɛ o susu kaa blɔ pɛ nɔ nɛ o maa gu kɛ tsu sane ɔ he ní ji kaa o maa pee níhi ngɛ o dɛ he mohu pe nɛ o kɛ blɔ tsɔɔmihi nɛ Yehowa kɛ ha ngɛ e Munyu ɔ mi ɔ ma tsu ní.—Kane Fiɛlɔ 7:16, 20.

6. Mɛni o kase ngɛ nyɛmiyo ɔ nɛ e ngɛ Netherlands ɔ níhi a si kpami ɔ mi?

⁶ Mo susu nyɛmiyo ko nɛ e ngɛ Netherlands ɔ níhi a si kpami he nɛ o hyɛ. Ni kpahi a  gbɔjɔmihi woɔ e mi mi la wawɛɛ. E mwɔ e yi mi kpɔ kaa e kɛ nyɛmimɛ nɛ ɔmɛ be bɔe hu. E de ke: “Enɛ ɔ haa nɛ i nuɔ he kaa e piɛ imi pɛ, nɛ i nyɛ we nɛ ma pee bɔ nɛ i nuɔ he ha a he nɔ́ ko. I de ye huno ɔ kaa e sa nɛ waa hia kɛ ya asafo kpa mi.” Se pee se ɔ, nyɛmiyo ɔ hyɛ March 2016 JW Brɔɔdkastin ɔ. Jamɛ a ní peemi ɔ tsɔɔ níhi nɛ wa ma nyɛ maa pee konɛ wa nyɛ nɛ waa da ni kpahi a gbɔjɔmihi a nya. Nyɛmiyo ɔ de ke: “I ba na kaa e sa nɛ ma ba ye he si nɛ ma kplɛɛ nɔ kaa imi hu i tɔ̃ɔ, mohu pe nɛ ma bɔ mɔde kaa ma tsake nyɛmimɛ nyumuhi kɛ yihi nɛ a ngɛ asafo ɔ mi ɔ. Brɔɔdkastin ɔ ye bua mi nɛ i ngɔ ye juɛmi kɛ ma Yehowa kɛ he blɔ nɛ e ngɛ kaa e maa tsɔɔ wɔ nɔ́ nɛ e sa nɛ waa pee ɔ nɔ.” O na oti ɔ lo? Ke o kɛ ka ko kpe ɔ, ngɔɔ o juɛmi kɛ ma Yehowa nɔ. Kpa lɛ pɛɛ nɛ e ye bua mo nɛ o na ni kpahi kaa bɔ nɛ e naa mɛ ɔ. O hiɔwe Tsɛ ɔ naa a tɔmi ɔmɛ, se kɛ̃ ɔ, e pee klaalo kaa e kɛ maa ke mɛ. Nɛ e suɔ nɛ mo hu o pee jã nɔuu.—1 Yoh. 4:20.

7. Mɛni ba Matsɛ Uzia nɔ?

⁷ He nɔ womi ha nɛ Yuda Matsɛ Uzia bui ga womi tue, nɛ e pee nɔ́ ko nɛ e be he blɔ kaa e peeɔ. Uzia pee ní kpakpahi fuu. E ye manye ngɛ tahi a mi, e ma mɔhi nɛ e fia gbogbo kɛ wo ma a he. E lɛ lohwehi babauu nɛ e pee ngmɔhi fuu hulɔ. ‘Yehowa hu gbaa lɛ.’ (2 Kron. 26:3-7, 10) Baiblo ɔ de ke: “Se benɛ Uzia tsɛ yemi ɔ ba he si ɔ, e wo e he nɔ, nɛ nɔ́ nɛ ɔ ha nɛ e hɛ mi kpata.” Yehowa sɛ hlami fã kaa osɔfo ɔmɛ pɛ nɛ a ngɛ he blɔ kaa a sãa tsopa kɛ e he via ngɛ sɔlemi we ɔ. Matsɛ Uzia ya sɔlemi we ɔ nɛ e ya sã tsopa kɛ e he via be mi nɛ e be he blɔ kaa e peeɔ jã. Yehowa bua jɔɛ nɔ́ nɛ nyumu he nɔ wolɔ nɛ ɔ pee ɔ he, nɛ e ha nɛ kpiti pue lɛ. Uzia pee kpititsɛ kɛ ya si benɛ e gbo.—2 Kron. 26:16-21.

8. Ngɛ mɛni blɔ nɔ nɛ 1 Korinto Bi 4:6, 7 ɔ ma nyɛ maa ye bua wɔ nɛ wa ko wo wa he nɔ?

⁸ Anɛ wɔ hu wa ma nyɛ ma wo wa he nɔ nɛ waa pee yayami kaa Uzia lo? Nyɛ ha nɛ wa susu José nɔ hyɛmi nɔ́ ɔ he. E sɔmɔ kaa asafo mi nɔkɔtɔma, e ní tsumi yaa nɔ saminya nɛ e ngɛ sika hulɔ. E tuɔ magbɛ nɔ munyuhi ngɛ kpɔ mi kpehi kɛ kpokpa nɔ kpe a sisi, nɛ kpɔ mi nɔ hyɛli hu biɔ lɛ ga womi. E de ke: “I ngɔ ye hɛ kɛ fɔ nyɛmihi kɛ níhi a si kpamihi nɛ i ngɛ ɔ a nɔ, nɛ i kɛ ye hɛ fɔ we Yehowa nɔ. I susu kaa i ngɛ níhi a si kpami, lɔ ɔ he ɔ, i kɛ Yehowa kɔkɔ bɔmihi tsu we ní.” José ya pee  yayami nɛ hɛdɔ ngɛ he nɛ a fiee lɛ kɛ je asafo ɔ mi. A ngɔ lɛ ngɛ asafo ɔ mi ekohu jeha komɛ nɛ be ɔ. E de ke: “Yehowa tsɔɔ mi kaa nɔ́ nɛ he hia ji kaa wa maa pee e suɔmi nya ní, se pi he blɔ nɛ wa ma ná.” Nyɛ ha nɛ wa kai kaa nyɛmi fɛɛ nyɛmi nɛ wa ngɛ, kɛ he blɔ fɛɛ he blɔ nɛ wa ma ná ngɛ asafo ɔ mi ɔ je Yehowa ngɔ. (Kane 1 Korinto Bi 4:6, 7.) Ke wa woɔ wa he nɔ ɔ, Yehowa kɛ wɔ be ní tsue.

9. Mɛni nɛ hɛkɔ ha nɛ Satan kɛ Hawa pee?

⁹ Ke wa nu munyu nɛ ji hɛkɔ ɔ, eko ɔ, nɔ nɛ maa ba wa yi mi kekleekle ji Satan Abosiami. Akɛnɛ Satan piɛɛ Yehowa bɔfo ɔmɛ a he he je ɔ, e ma nyɛ maa ba kaa e ngɛ he blɔhi fuu. Se e ngɛ babauu hlae kɛ piɛɛ he. Yehowa pɛ nɛ e sa nɛ wa ja, se Satan ngɛ he blɔ nɛ ɔ hlae. Satan ngɛ hlae nɛ waa pee kaa lɛ, enɛ ɔ he ɔ, e bɔɔ mɔde kaa e ma ha nɛ waa nu he kaa níhi nɛ wa ngɛ ɔ pi. Kekleekle be nɛ e bɔ mɔde kaa e maa pee jã ji be nɛ e kɛ Hawa tu munyu ɔ. Yehowa je suɔmi mi nɛ e ha Hawa kɛ e huno ɔ niye ní babauu, a ma nyɛ maa ye tso ɔmɛ nɛ ngɛ ngmɔ ɔ mi ɔ “eko tsuaa eko yiblii faa,” ja kake pɛ. (1 Mose 2: 16) Se Satan sisi Hawa nɛ e susu kaa e sa nɛ e ye tso kake ɔ nɛ a fã lɛ ke e ko ye e nɔ yiblii ɔ. Níhi nɛ Hawa ngɛ ɔ sɛ e hɛ mi; e ngɛ hlae nɛ e ná babauu. Wa le bɔ nɛ e nyagbe ba ha. Hawa pee yayami nɛ nyagbenyagbe ɔ, e gbo.—1 Mose 3:6, 19.

10. Mɛni blɔ nɔ nɛ hɛkɔ ba pee klama kɛ ha Matsɛ David?

¹⁰ Yehowa ha nɛ Matsɛ David ná ní, e he biɛ, nɛ e ye e he nyɛli fuu a nɔ kunimi. Se hɛkɔ ha nɛ Matsɛ David hɛ je níhi nɛ Yehowa pee ha lɛ ɔ nɔ. David tsɔɔ kaa ke e ke e maa kane níhi nɛ Yehowa kɛ dloo lɛ ɔ, e “be nyɛe; ejakaa a he hiɛ tsɔ.” (La 40:5) Se be ko ɔ, David hɛ je níhi nɛ Yehowa pee ha lɛ ɔ nɔ. Ní ɔmɛ pi ha lɛ hu, e ngɛ babauu hlae kɛ piɛɛ he. E ngɛ mi kaa David ngɛ yihi fuu mohu lɛɛ, se e ha nɛ akɔnɔ yaya sɛ e mi nɛ e ná nɔ ko yo he suɔmi ngɛ e tsui mi. Yo nɛ ɔ ji Batsheba, nɛ e huno ɔ ji Uria nɛ ji Hit no ɔ. David kɛ Batsheba ná bɔmi nɛ e ngɔ hɔ. Nɔ́ nɛ David pee ɔ hí, se nɔ́ nɛ e kpale pee kɛ nyɛɛ se ɔ puɛ sane ɔ kulaa. E to ga konɛ a gbe Uria! (2 Sam. 11:2-15) Mɛni nɛ David ngɛ susue? Anɛ e susu kaa Yehowa be nae lo? E ngɛ mi kaa David kɛ be kɛkɛɛ sɔmɔ Yehowa mohu lɛɛ, se hɛkɔ ha nɛ e pee nɔ́ nɛ dɛ nɛ e na mi nɔ́. Bua jɔmi sane ji kaa David kplɛɛ e tɔmi ɔ  nɔ nɛ e tsake e tsui. E bua jɔ wawɛɛ kaa Yehowa kɛ e tɔmi ɔ ke lɛ!—2 Sam. 12:7-13.

11. Ngɛ Efeso Bi 5:3, 4 ɔ nya a, mɛni ma nyɛ maa ye bua wɔ nɛ waa hwu kɛ si hɛkɔ?

¹¹ Mɛni wa kaseɔ ngɛ David sane ɔ mi? Wa ba na kaa wa ma nyɛ maa hwu kɛ si hɛkɔ ke wa bua jɔ níhi nɛ Yehowa kɛ ha wɔ ɔ a he. (Kane Efeso Bi 5:3, 4.) E sa nɛ wa hɛ nɛ sa níhi nɛ wa ngɛ ɔ. Ke waa kɛ nɔ ko ngɛ Baiblo ɔ kasee ɔ, wa ma nyɛ maa tsɔɔ lɛ nɛ e susu níhi nɛ Yehowa pee kɛ ha lɛ ɔ he, nɛ e na lɛ si ngɛ he. Ke nɔ ɔ peeɔ jã daa ligbi ngɛ otsi ɔ mi ɔ, lɔ ɔ tsɔɔ kaa e sɔleɔ ngɛ níhi kpaago he. (1 Tɛs. 5:18) Anɛ o peeɔ nɔ́ ko kaa jã lo? Ke o pueɔ o yi mi tɛ ngɛ níhi nɛ Yehowa pee kɛ ha mo ɔ a he ɔ, e maa ye bua mo nɛ o na lɛ si. Nɛ ke o na Yehowa si ngɛ níhi nɛ e pee kɛ ha mo ɔ a he ɔ, o hɛ maa sa níhi nɛ o ngɛ ɔ. Ke o hɛ sa níhi nɛ o ngɛ ɔ, hɛkɔ be o nɔ he wami náe.

12. Mɛni nɛ hɛkɔ ha nɛ Yuda Iskariot pee?

¹² Hɛkɔ ha nɛ Yuda Iskariot ba pee nɔ se blɔ tsɔɔlɔ. Sisije ɔ, pi nɔmlɔ yayami ji lɛ. (Luka 6:13, 16) Yesu hla lɛ kaa e bɔfo ɔmɛ a kpɛti nɔ kake. Yesu he lɛ ye ejakaa lɛ nɛ e hyɛɛ a sika nɔ. Yesu kɛ e bɔfo ɔmɛ kɛ jamɛ a sika a heɔ níhi nɛ maa hia mɛ ngɛ a fiɛɛmi ní tsumi ɔ mi. Ngɛ blɔ ko nɔ ɔ, sika a ngɛ kaa níhi nɛ a kɛ yeɔ bua je kɛ wɛ ní tsumi ɔ mwɔnɛ ɔ. Yesu bɔ mɛ kɔkɔ si abɔ ngɛ hɛkɔ he, se e ba su be ko ɔ, Yuda bɔni sika a jumi. (Maak. 7:22, 23; Luka 11:39; 12:15) Yuda kɛ jamɛ a kɔkɔ bɔmi ɔmɛ tsu we ní.

13. Mɛni be nɛ e ba pee heii kaa Yuda hɛ kɔ̃ɔ?

¹³ Yuda pee níhi nɛ tsɔɔ kaa e hɛ kɔ̃ɔ wawɛɛ benɛ e piɛ bɔɔ nɛ a maa gbe Yesu ɔ. Yesu kɛ e kaseli ɔmɛ nɛ Maria kɛ Marta hu piɛɛ he ɔ ya ngɛ ní yee ngɛ Simon kpititsɛ ɔ we mi. Benɛ a ngɛ ní ɔ yee ɔ, Maria ngɔ nu kɛ e he via nɛ e he jua wa kɛ ba pue Yesu yi mi. Yuda kɛ kaseli kpa amɛ a mi mi fu wawɛɛ. Eko ɔ, kaseli kpa amɛ susu kaa sika nɛ a kɛ he nu nɛ ɔ ma nyɛ maa ye bua mɛ ngɛ fiɛɛmi ní tsumi ɔ mi. Se Yuda lɛɛ e hɛɛ juɛmi kpa. “Julɔ ji lɛ,” nɛ e suɔ nɛ e ju sika nɛ ngɛ daka a mi ɔ. Pee se ɔ, hɛkɔ ha nɛ e tsɔɔ Yesu se blɔ kɛ ngɔ sika bɔɔ ko.—Yoh. 12:2-6; Mat. 26:6-16; Luka 22:3-6.

14. Mɛni blɔ nɔ nɛ nyɛminyumu ko kɛ e yo ngɔ munyu nɛ ngɛ Luka 16:13 ɔ kɛ tsu ní?

¹⁴ Yesu kai e se nyɛɛli anɔkuale sane nɛ ɔ: “Nyɛ be nyɛe maa pee nyɔguɛhi kɛ ha Mawu kɛ Ní Nami tsuo.” (Kane Luka 16:13.) Loloolo ɔ, munyu nɛ ɔ ji anɔkuale. Nyɛ ha nɛ wa susu bɔ nɛ munyu nɛ ɔ ná nyɛminyumu ko kɛ e yo nɛ a ngɛ Romania a a nɔ he wami ha a he nɛ waa hyɛ. A ná ní tsumi ko nɛ a ma tsu lɛ be kpiti ngɛ ma ko nɛ a ngɛ sika wawɛɛ ɔ mi. A de ke: “Wa ye hiɔ fuu, enɛ ɔ he ɔ, wa susu kaa e ji jɔɔmi nɛ je Yehowa ngɔ.” Se nyagba ko ngɛ. Ke a kplɛɛ ní tsumi nɛ ɔ nɔ ɔ, a be be fuu náe kɛ sɔmɔ Yehowa. Benɛ a kane munyu nɛ ji “Maintain Loyalty With a Unified Heart” nɛ je kpo ngɛ August 15, 2008 Blɛfo gbi Hwɔɔmi Mɔ ɔ mi ɔ, a ma a juɛmi nya si. A de ke: “Ke sika he je nɛ wa yaa tsu ní ngɛ ma kpa nɔ ɔ, lɛɛ waa kɛ huɛ bɔmi nɛ ngɛ waa kɛ Yehowa wa kpɛti ɔ yí kekleekle blɔ he. Wa le kaa huɛ bɔmi nɛ ngɛ waa kɛ Yehowa wa kpɛti ɔ mi ma gbɔjɔ.” Enɛ ɔ he ɔ, a kplɛɛ we ní tsumi ɔ nɔ. Mɛni ba? Nyumu ɔ ná ní tsumi ngɛ a ma a mi, nɛ a nyɛ nɛ a tsu a hiami níhi a he ní. E yo ɔ de ke: “Yehowa maa ye bua e we bi be fɛɛ be.” Nyɛminyumu nɛ ɔ kɛ e yo ɔ a bua jɔ kaa a ngɔ Yehowa kɛ pee a Nyɔmtsɛ se pi sika.

15. Mɛni he je nɛ wa ma nyɛ ma ná nɔ mi mami kaa wa ma nyɛ maa je Satan klama amɛ a mi ɔ?

¹⁵ Ke wa yɔse kaa wa ngɛ wa he nɔ woe loo wa hɛ kɔ̃ɔ ɔ, mɛni e sa kaa waa pee? Wa ma  nyɛ maa pee tsakemi! Paulo tsɔɔ kaa nihi nɛ Abosiami “nu mɛ hɛ ngmengmle” ɔ ma nyɛ maa je e klama a mi. (2 Tim. 2:26) Jã nɛ David pee. E bu ga womi nɛ Natan kɛ ha lɛ ɔ tue, e pee tsakemi, nɛ e dla huɛ bɔmi nɛ ngɛ e kɛ Yehowa a kpɛti ɔ. O hɛ ko je nɔ kaa Yehowa he wa kulaa pe Satan. Lɔ ɔ he ɔ, ke wa kplɛɛ Yehowa yemi kɛ buami nɔ ɔ, wa ma nyɛ maa je Abosiami klama amɛ a mi.

16. Mɛni maa ye bua wɔ nɛ waa yu wa he ngɛ Satan klama amɛ a he?

¹⁶ Ngɛ anɔkuale mi ɔ, e maa hi kaa wa maa yu wa he kulaa ngɛ Satan klama amɛ a he pe nɛ a maa du wɔ loko waa je mi. Mawu pɛ lɛ ma nyɛ maa ye bua wɔ nɛ waa yu wa he ngɛ Satan klama amɛ a he. Se e sɛ nɛ wa susu kɔkɔɔkɔ kaa wa be nyɛe ma wo wa he nɔ loo wa hɛ be nyɛe maa kɔ̃! Nihi nɛ a sɔmɔ Yehowa be kɛkɛɛ po a hɛ kɔ̃ nɛ a wo a he nɔ. Lɔ ɔ he ɔ, moo sɔle ha Yehowa daa ligbi nɛ e ye bua mo o hyɛ kaa o ngɛ su nɛ ɔmɛ eko kpo jee lo. (La 139:23, 24) Ko ha nɛ su nɛ ɔmɛ nɛ a ná o nɔ he wami kɔkɔɔkɔ!

17. Mɛni nɛ e be kɛe nɛ e maa ba wa he nyɛlɔ Abosiami nɔ?

¹⁷ Jeha akpehi abɔ ji nɛ ɔ nɛ Satan pee e he detsɛ. Se e be kɛe nɛ a maa fĩ lɛ nɛ nyagbenyagbe ɔ, a kpata e hɛ mi. (Kpj. 20:1-3, 10) Wa ngɛ jamɛ a ligbi ɔ blɔ hyɛe wawɛɛ. Se loko jamɛ a ligbi ɔ maa su ɔ, o hɛ nɛ hi Satan klama amɛ a nɔ. Bɔɔ mɔde nɛ o ko ha nɛ he nɔ womi loo hɛkɔ nɛ ná o nɔ he wami. Moo fia o pɛɛ si kaa o maa “te si kɛ wo Abosiami, nɛ e maa tu fo kɛ je [o] he.”—Yak. 4:7.