1. Сатана нениҥ учун аҥчыга тӱҥдештирилет?

АҤЧЫНЫҤ амадузы — аҥ-кушты тудуп эмезе ӧлтӱрип алары. Ол башка-башка јепселдер тузаланат. Олордыҥ кезиги Агару Бичикте айдылып калган (Иов 18:8—10). Аҥчы аҥ-кушты тузакка эмезе чакпыга тӱжӱп калзын деп нени эдет? Озо баштап ол, тудуп аларга турган аҥы кайда јӱрӱп турганын, нени јип турганын ла нени эдип турганын ајыктап кӧрӧт. Сатана анайып ла эдет. Ол бисти кайда јӱрӱп турганысты, биске не јарап турганын ла нени эдип турганысты билип аларга албаданат. Оноҥ ол бисти сакыбаган јанынаҥ тудуп аларга, јарагадый тузак тургузат. Је бис оныҥ тузагына тӱжӱп те калзаас, јайымдалатан арга бар деп, Агару Бичикте айдылат. Керек дезе оныҥ тузактарына эмезе чакпыларына чек тӱшпейтен де арга бар.

2. Сатана улуста кандый эки кылык-јаҥды кӱйбӱредет?

² Сатананыҥ тузаланып турган эҥ једимдӱ јепселдериниҥ экӱзи — бийиркеери ле ачыркаары *. Бу јаман эки кылык-јаҥды ол муҥ јылдардыҥ туркунына улуста кӱйбӱредип јат. Сатана бисти тудуп аларга, куш тудаачы чылап неле-неле јилбиркедерге албаданып јат (Сар. 91:3). Је бис Сатананыҥ тузактарына тӱшпес аргалу. Нениҥ учун дезе Иегова Сатананы кандый эп-аргалар тузаланып турганын ачып салган (2 Кор. 2:11).

3. Иегова јаман темдерди нениҥ учун бичип салган?

³ Иегова бийиркеери ле ачыркаары коркышту јаман кылык-јаҥдар деп кӧргӱзерге, андый кылык-јаҥду болгон улустыҥ темдерин шӱӱп сананзын деп кӱӱнзедет. Бу јӧрмӧлдӧ Сатана кӧгӱзи тереҥ де улусты тузагына тудуп алат деп кӧрӱлер. Андый болордо, бис те оныҥ тузагына  качан бирде тӱжӱп каларыс па? Јок. Нениҥ учун дезе Иегова јаман темдерди биске «ӱредӱ болзын» деп бичиткен (1 Кор. 10:11). Бис бу темдерди шӱӱп сананып турзаас, Сатананыҥ тузагына тӱшпезис эмезе тӱжӱп калган болзоос, јайымдалар аргалу болорыс.

4. Бийиркениш неге экелет?

⁴ Сатана бистерди бийиркек болзын деп кӱӱнзеп јат. Бийиркене берзеес, бис Сатанага тӱҥей болуп каларыс ла ӱргӱлјиге јӱретен арганы јылыйтып саларыс (Укаа 16:18). Оныҥ да учун Павел христиандарды бийиркенип, калак, «кӧрмӧслӧ кожо јаргыга» кирип калдаар деп айткан (1 Тим. 3:6, 7). Сатананыҥ тузагына чындыкта удап та калган, удабаган да улус тӱжӱп калардаҥ айабас.

5. Экклезиаст 7:16, 20-ле болзо, кижиниҥ бийиркеги недеҥ кӧрӱнет?

⁵ Бийиркек кижи јаҥыс бойын сананат. Сатана бисти анчада ла кӱчтер боло берзе, Иегованы эмес, је бойысты сананзын деп кӱӱнзейт. Слерди кем-кем актуга ла бурулаган ба? Мындый ӧйдӧ бис Иегованы ла организацияны јамандазаас, Сатананы сӱӱндирерис. Ол бисти керектиҥ аайына Агару Бичиктеги башкартула эмес, је баш билинип, бойыстыҥ санаасла чыгып салзын деп кӱӱнзеп јат. (Экклезиаст 7:16, 20 кычырыгар.)

6. Нидерландыда јадып турган эјенеҥ неге ӱренип јадыс?

⁶ Нидерландыда јадып турган эјениҥ темин кӧрӱп ийектер. Ол эје јуундагы ака-эјелердиҥ јастыраларын кӧрӱп, коркышту ачынып туратан. Ол мынайып айдат: «Мен јаҥысканзырап, канчазын чыдажайын, деп сананала, ӧбӧӧниме айттым: „Биске ӧскӧ јуундӧӧн кӧчӧр керек ошкош“». Је 2016 јылда тулаан айда чыккан JW Broadcasting^®-тиҥ программазын кӧргӧн кийнинде оныҥ кӧрӱми солынган. Ол программада ака-эјелерге биске кандый кӧрӱмдӱ болор керек деп јарталган. Эје оноҥ ары куучындайт: «Меге ака-эјелерди эмес, је бойымды  солыыр керек эмтир. Улустыҥ јастыраларын чотоордыҥ ордына меге Иегова ла оныҥ башкарузы керегинде сананар керек деп оҥдоп алгам». Бис мынаҥ неге ӱренедис? Бис кемле-кемле јарашпай турган болзоос, бойыстыҥ кӱӱнисти эмес, је Иегованыҥ кӱӱнин сананар керек. Ака-эјелерге Иегованыҥ кӧрӱмиле кӧрӱгер. Ол олордыҥ јастыраларын кӧрӱп те турган болзо, олордыҥ јаманын таштап јат. Айдарда, биске де анайып ла эдер керек (1 Иоанн 4:20).

7. Озия каанла не болгон?

⁷ Иуданыҥ кааны Озия бийиркене береле, берилген јӧпти де укпаган, јасакты да бузып ийген. Ол озо баштап санаалу, ойгор башкараачы болгон, јуу-согуштарда кӧп јеҥӱлер алган, кӧп калалар ла шибеелер туткан. Анайда ок маала-ажыла јакшы башкарган. Агару Бичикте айдылганыла, «чындык Кудай ого алкыжын берген» (2 Лет. 26:3—7, 10). Оноҥ «ол кӱчтӱ болуп калала, бийиркене берген. Мынызы бойына ла тӱбек экелди». Озия ӧргӧӧгӧ кирип, фимиамды ӧртӧгӧн. Је Јасакла болзо, бу ишти јӱк ле абыстар эдер учурлу болгон. Бу учун Иегова оны кату каруузына тургускан. Мынайып Озия бастыра јӱрӱмине капкаш балула оорыган (2 Лет. 26:16—21).

8. 1 Коринфтегилерге 4:6, 7-деги сӧстӧр биске бийиркенбеске канайып болужар?

⁸ Бис те Озия каан чылап бийиркеништиҥ тузагына тӱжӱп калардаҥ айабазыс. Хосе аканыҥ темин кӧрӱп ийектер. Ол бизнесмен, анайда ок јуунда аксагал болгон. Јуундагы ака-эјелер оны тооп туратан. Курултайларда ол куучын-эрмектер айдатан, аймак кӧрӧӧчилер де оноҥ јӧп сурагылайтан. Ол бойы мынайып куучындаган: «Мен бойымныҥ ченемелиме иженип, Иегованыҥ јӧптӧрин укпагам». Мынаҥ улам Хосе ака уур кинчек эделе, јууннаҥ чыгардырган. Тоолу јыл кайра ол јуунда орныктырылып, мындый сӧстӧр айдат: «Иегова бисти кандый бир молјуларлу эш болгоныс учун эмес, је озо ло баштап ого сӧсуккур болуп турганыс учун баалап јат, деп оҥдоп алгам». Айдарда, бистиҥ молјуларыс та, јайалталарыс та — ӱзе Иегованаҥ. (1 Коринфтегилерге 4:6, 7 кычырыгар.) Бис бийиркене берзеес, Иегова бисти тузаланып болбос.

9. Ачыркаары Сатананы ла Еваны неге экелген?

⁹ Ачыркаары деген сӧсти угуп ла ийзеес, санаабыска Сатана јуралып келет. Ол Кудайдыҥ ангелдериниҥ бирӱзи болгон, оныҥ учун ондо кӧп молјулар болгон. Је Сатана мыны ассынып, улусты ого бажырзын деп кӱӱнзей береле, Иегованыҥ башкарар јаҥын блаажып јат. Сатана бисти де ачыркак ол эмезе бар немегисле болорзынбай јӱрзин деп кӱӱнзеп јат. Агару Бичикте Кудай Адам ла Еваны јайап, олорды јараш, јӱзӱн-јӱӱр агаштарлу Эдем садта јатыргызып салган деп айдылат. Олорго садтагы агаштардыҥ јӱк бирӱзин јибес керек болгон (Баш. 2:16). Је Сатана Еваны јарабас агаштаҥ јип ийзин деп кӱӱнзедет. Ева Сатананыҥ тӧгӱнине кирип, бар немезине ассына береле, Кудайдыҥ јакарузын бузып ийет. Анайып Ева кинчек эделе, учы-тӱбинде божоп калган (Баш. 3:6, 19).

10. Давид ачыркаарыныҥ тузагына канайып тӱшкен?

¹⁰ Давидте ӱзе неме болгон. Кудайдыҥ болужыла ол су-кадык, јарлу, бай болгон. Анайда ок јуу-согуштарда кӧп јеҥӱ алып туратан. Мындый алкыштар учун Давид сӱреен быйанду болуп, мынайып бичиген: «Сениҥ эткен керектериҥ андый кӧп» (Сар. 40:5). Је кийнинде ол Иегованыҥ алкыштарын ундып салала, ачыркай берген. Давид бир канча ӱйлӱ де болгон болзо, олорды ассынып, Урия деп хеттеян кижиниҥ ӱйин кӱӱнзей берген. Ол ӱй кижиниҥ ады Вирсавия. Олор экӱ конгон кийнинде Вирсавия табынып алган. Давид мыны да ассынып, Урияны ӧлтӱрип салат! (2 Сам. 11:2—15). Давид нени сананып мынайып кылынды не? Иегова оны кӧрбӧй турган деп сананган ба? Је кийнинде Давид кинчегин алынып, Кудайга оноҥ ло ары иштеген де болзо, коркышту тыҥ шыра кӧргӧн. Иегова оныҥ кинчегин таштап саларда Давид сӱреен тыҥ сӱӱнген (2 Сам. 12:7—13).

11. Ефестегилерге 5:3, 4-лӧ болзо, ачыркабаска биске не болужар?

¹¹ Давидтиҥ теминеҥ неге ӱренедис? Иеговага ончо алкыштары учун быйанду болзоос, ачыркабазыс. (Ефестегилерге 5:3, 4 кычырыгар.) Бар немегисле  болорзынып јӱрер керек. Бис ӱренип турган улусты кажы ла алкыжын шӱӱп сананып, Иеговага быйанын айдып турзын деп ӱредедис. Анайып олор бир неделениҥ туркунына кажы ла кӱн Иеговага быйанын айдып турза, јети кӱнниҥ туркунына јети башка неме учун быйанын айткан болор (1 Фес. 5:18). А слер анайып ла эдип јӱредеер бе? Иегованыҥ биске берип турган алкыштарын шӱӱп сананып турзаас, быйанду болорыс. Быйанду болзоос, бар немегисле болорзынып јӱрерис. Болорзынып турзаас, јӱрегисте ачыркаш болбос.

12. Иуда Искариоттыҥ ачыркажы неге экелген?

¹² Иуда Искариот ачыркап, Иисус Христосты садып ийген. Ол озо баштап андый болбогон. Иисус оны апостол эдип талдап турарда ол сагышту, бӱдӱмјилӱ кижи болгон (Лука 6:13, 16). Оныҥ да учун Иисус оны акчалу кайырчак учун каруулу эдип тургускан. Кайырчакка салынган акча дезе, бӱгӱнги кӱнде ака-эјелердиҥ телекейлик ишке берип турган берӱлерине тӱҥей. Је кийнинде Иуда ол кайырчактаҥ акча уурдап баштаган. Иисус ого оныҥ андый кылыгы јакшы ла немеге экелбес деп канча катап айткан да болзо, Иуда оны укпаган (Марк 7:22, 23; Лука 11:39; 12:15).

13. Иуданыҥ ачыркажы качан јарт кӧрӱне берген?

¹³ Иуданыҥ ачыркажы Иисустыҥ божоорыныҥ алдында јарт кӧрӱне берген. Бир катап Иисус ла оныҥ ӱренчиктери, ол тоодо Марфа ла Мария, капкаш балула ооруган Симон эште айылдаган. Ажанып јаткан ӧйдӧ Мария баалу-чуулу майды алып, Иисустыҥ бажына уруп баштаарда, кезик ӱренчиктер кайкажып чугулдана бергилеген. Андый баалу-чуулу майды садып ийеле, акчазын јарлаар ишке тузаланза торт болор эди деп санангылаган болор. Је Иудада дезе башка санаа болгон. Ол оныҥ акчазын кайырчактаҥ уурдап аларга кӱӱнзеген. Кийнинде уурчы Иуда Иисусты бир кулдыҥ баазына — одус мӧҥӱн акчага садып ийген (Матф. 26:6—16; Лука 22:3—6; Иоанн 12:2—6).

14. Лука 16:13-теги сӧстӧрди бир биле канайып тузаланган?

¹⁴ Иисус ӱренчиктерин мындый чындыкка ӱреткен: «Кудайга ла јӧӧжӧгӧ теҥ јалчы болуп албазыгар». (Лука 16:13 кычырыгар.) Румынияда јадып турган бир билениҥ темин кӧрӱп ийектер. Олорго бай ороондо јакшы иш келиже берген. Бу биле мынайып куучындайт: «Банкта бисте јаан тӧлӱ болгон. Оныҥ учун бу ишти биске Иегова берип туру деп сананганыс. Кӧрӧр болзо, ол иш Иегованаҥ эмес. Бис ол ишке кирип алган болзоос, кӧгӱс керектериске ӧй јетпес эди. Биске 2008 јылдыҥ куран айыныҥ 15-чи кӱниниҥ «Каруулчы шибеезинде» «Пусть твоё сердце будет полностью предано Иегове» деген јӧрмӧл болушкан». Оноҥ ары олор мынайып куучындаган: «Бис ӧскӧ ороонго акча ла иштеп аларга барган болзоос, Иегова экинчи јерде болор эди. Мынаҥ улам колбуларыс та ӱрелип калар деп оҥдоп алганыс». Оныҥ учун олор бу ишке кирбегендер. Кийнинде, ӧбӧӧни бойыныҥ ла ороонынаҥ олордыҥ чыгымын бӧктӧгӧдий иш табып алган. Ӱйи мынайып айдат: «Иегованыҥ колы кыска эмес. Карын, бистиҥ бийис акча эмес, је Иегова болгон».

15. Сатананыҥ тузактарынаҥ јайымдалатан арга бар деп, бис нениҥ учун алаҥзыбай јадыс?

¹⁵ Ачыркаштыҥ ла бийиркеништиҥ тузагына тӱжӱп калган болзоос, јайымдалатан  арга бар ба? Павелдиҥ сӧстӧрин кӧрзӧӧс, чакпыга тӱжӱп калган улус јайымдалар аргалу (2 Тим. 2:26). Давид дезе анайып ла јайымдалган. Нафан оны тӱзедерде, ол јастыразын алынып, Кудайла колбуларын орныктырып алган. Качан да ундыбай турактар: Иегова Сатананаҥ кӱчтӱ! Оныҥ учун Сатананыҥ кандый да тузагына тӱжӱп калзаас, је Иегованыҥ болужын алынзаас, тузагынаҥ јайымдалып каларыс.

16. Сатананыҥ тузактарына тӱшпеске не болужар?

¹⁶ Тузакка тӱжӱп калала, оноҥ чыгарга албаданганча, ого чек тӱшпезе торт. Је ого бис јӱк ле Кудайдыҥ болужыла тӱшпес аргалу. Сатананыҥ кандый да тузагына эмезе чакпызына качан да тӱшпезис деп сананбас керек. Керек дезе Иеговага канча јылдардыҥ туркунына да иштеген улус ачыркап, бийиркенип баштагылап јат. Оныҥ учун Иегованы, андый јаман кылык-јаҥдар ӧзӱп келеткен болзо, кӧргӱзип берзин деп кажы ла кӱн сурагар (Сар. 139:23, 24). Ачыркашты да, бийиркеништи де качан да ӧскӱрбегер!

17. Сатанала удабас не болор?

¹⁷ Сатана канча муҥ јылдардыҥ туркунына биске тузактар тургузып, аҥдап јат. Је удабас ол бойы тутурттып, кӱлӱдип койор. Учы-учында јоголтылып калар (Ачыл. 20:1—3, 10). Бис бу ӧйди тыҥ сакып јадыс! Је бу ӧй келгенче Сатананыҥ кандый тузактар тургузып турганын ундыбай турактар. Бир де ачыркабаска ла бийиркенбеске бастыра кӱчистеҥ албаданактар. Сатанага «удура турыгар, ол слердеҥ кача берер» (Иак. 4:7).