1. ?Ngue ti yɛ e kwla fa Satan e sunnzun koniɛn difuɛ-ɔ?

LIKE nga koniɛn difuɛ kwlakwla kunndɛ’n, yɛle nnɛn tralɛ annzɛ i kunlɛ. I sɔ’n ti’n, wie liɛ’n ɔ sua nnɛn’m be wun aya fanunfanun. Biblu’n bɔbɔ kɛn i sɔ liɛ’n i ndɛ. (Jue. 140:6) Kɛ ɔ ko yo naan koniɛn difuɛ kun w’a tra nnɛn kun’n, ɔ fɛ i ɲin sie i nnɛn sɔ’n i su kpa. I wie yɛle kɛ ɔ usɛ i wun kɛ: ?Ninfan yɛ nnɛn sɔ’n didi-ɔ? ?Ngue yɛ ɔ klo i kpa-ɔ? ?Aya benin yɛ ɔ kwla trɛ i-ɔ? Like kunngba’n yɛ Satan yo-ɔ. Ɔ fɛ i ɲin sie i e su kpa naan w’a si ninnge nga e klo be yolɛ’n nin lika nga e klo lɔ kɔlɛ’n. Kpɛkun ɔ nian ninnge sɔ’m be su sua e wun aya. Sanngɛ Biblu’n gua e awlɛn su nzue kɛ sɛ e tɔ Satan i aya’n nun’n, e kwla flo. Asa ekun’n, ɔ kle e like ng’ɔ fata kɛ e yo naan y’a tɔman nun’n.

2. ?Satan i aya nga be tra sran kpanngban kpa’n, be nun nɲɔn yɛle benin?

² Satan i aya nga be tra sran kpanngban kpa’n, be nun nɲɔn yɛle be wun tulɛ’n ɔ nin aɲinkpli’n. * Nán andɛ sa yɛ Satan fa ninnge nɲɔn sɔ mun fa sua Ɲanmiɛn i sufuɛ’m be wun aya-ɔ. Satan ti kɛ anunman wun koniɛn difuɛ sa. Be nga be di anunman’m be wun koniɛn’n, be fa aliɛ nga anunman’m be klo i kpa’n be sua be wun aya. Annzɛ kusu be fa tɛ be tra be. (Zer. 5:26) Sanngɛ e liɛ’n e kwla jran Satan i ɲrun kekle. Afin Zoova tu ninnge nga Satan yo be gblɛ nun’n be ɲin kle e.—2 Kor. 2:11.

3. ?Ngue ti yɛ Zoova yoli maan be klɛli i sufuɛ wie’m be su ndɛ Biblu’n nun-ɔn?

³ Zoova uka e naan y’a wun i wlɛ kɛ be wun tulɛ’n nin aɲinkpli’n be timan kpa mlɔnmlɔn. I wie yɛle kɛ ɔ yoli maan be klɛli i sufuɛ wie mɔ be tuli be wun annzɛ be yoli aɲinkplifuɛ’n be su ndɛ Biblu’n nun. Like suanlɛ nga nun’n, é wá kán Ɲanmiɛn i sufuɛ sɔ’m be nun wie’m be ndɛ. É wá wún i kɛ  kannzɛ be su Zoova w’a cɛ’n, sanngɛ Satan kwla lakali be maan be tuli be wun yɛ be yoli aɲinkplifuɛ. Sanngɛ i sɔ liɛ’n kleman kɛ saan fii e kusu é tɔ́ Satan i aya sɔ’m be nun wie. Afin Zoova yoli maan be klɛli sran sɔ’m be su ndɛ Biblu’n nun naan “y’a yoman kɛ be sa.” (1 Kor. 10:11) Ɔ si kɛ sɛ e fa sran sɔ’m be su ndɛ e fa tu e wun fɔ’n, e su tɔman Satan i aya’m be nun wie. Sɛ kusu e tɔ nun’n, e kwla flo.

4. ?Sɛ e tu e wun’n wafa sɛ yɛ i bo’n gúa-ɔ?

⁴ Satan kunndɛ kɛ e tu e wun. Afin ɔ si kɛ sɛ e tu e wun’n, é káci kɛ i sa. Ɔ maan e su ɲanman nguan m’ɔ leman awieliɛ’n wie. (Nya. 16:18) I sɔ’n ti’n, akoto Pɔlu wlali e su nun kpa kɛ sɛ y’a nianman e wun su kpa’n, ‘ɔ cɛman naan y’a tu e wun naan fɔ nga be buli Suɛn tɔnfuɛ’n b’a bu e wie.’ (1 Tim. 3:6, 7) Sɛ e su Zoova w’a cɛ-o, annzɛ ɔ nin-a cɛman-o i sɔ sa liɛ’n kwla ju e su wie.

5. ?Kɛ nga Akunndanfuɛ’n 7:16, 20 fa kan’n sa’n, ngue yɛ sran ng’ɔ tu i wun’n ɔ yo-ɔ?

⁵ Sran ng’ɔ tu i wun’n, ɔ bu i ngunmin i wun akunndan. Satan kunndɛ kɛ e bu e ngunmin e wun akunndan naan nán e bu Zoova i akunndan. I li kɛ sa ko tɔ e su’n, yɛ ɔ kunndɛ kɛ e yo i sɔ kpa’n niɔn. I wie yɛle kɛ sɛ aniaan kun tɔnnin e suɛn annzɛ ɔ yoli e sa uflɛ wie’n, ɔ kunndɛ kɛ e fa Zoova nin aniaan’m be wun ya. Asa ekun’n, ɔ kunndɛ kɛ sa sɔ’n i siesielɛ nun’n e yo ninnge mun kɛ nga e bɔbɔ e fa klo’n sa. Kusu nn ɔ fata kɛ e nian Ɲanmiɛn Ndɛ’n nun naan e yo i kɛ nga Zoova fa klo’n sa.—An kanngan Akunndanfuɛ’n 7:16, 20 nun.

6. ?Ngue yɛ aniaan bla kun i su ndɛ’n kle e-ɔ?

⁶ Maan e kan sa kun m’ɔ juli aniaan bla kun su’n i ndɛ kan. Aniaan’m be yo ninnge wie m’ɔ yomɛn i fɛ-ɔ. I sɔ’n ti’n, ɔ fali aniaan’m be wun ya. Kpɛkun w’a fɛmɛn i wun w’a mantanman be kun. Ɔ seli kɛ: “Kɛ ɔ yoli sɔ’n, m’an wunman min wun fɛ asɔnun’n nun kun. Afin n kunndɛman kɛ ń yáci be wun sa’n ń cɛ́ be. Asa’n, n seli min wun’n i kɛ e wɔ asɔnun bo uflɛ nun.” Sanngɛ i sin’n, aniaan bla’n wa niannin JW Televiziɔn^® ng’ɔ fiteli afuɛ 2016 Marsi anglo’n nun’n. Video sɔ’n nun’n, be kleli e ajalɛ wie mɔ be kwla uka e naan y’a tra e awlɛn aniaan’m be wun’n. Aniaan bla’n  seli kɛ: “N wunnin i wlɛ kɛ ɔ fata kɛ n yo wun ase kanfuɛ. Afin ɔ ju wie’n n bɔbɔ n yo ninnge wie mɔ be yoman aniaan’m be fɛ-ɔ. Asa’n, n wunnin i wlɛ kɛ ɔ fataman kɛ n kunndɛ kɛ aniaan’m be yo ninnge mun kɛ nga n bɔbɔ n fa klo’n sa. Video sɔ’n nun’n, be kpɛnnin e wla kɛ Zoova yɛ ɔ le atin kle e like ng’ɔ fata kɛ e yo’n niɔn. Ɔ maan like kwlaa nga ń yó’n nun’n, ɔ fata kɛ n bu i sɔ liɛ’n i akunndan.” ?Ngue yɛ aniaan bla’n i su ndɛ’n kle e-ɔ? Sɛ aniaan kun yo e sa’n, maan e fa wlɛ i Zoova sa nun. Kpɛkun e srɛ i kɛ ɔ uka e naan e bu aniaan mun kɛ ng’ɔ fa bu be’n sa. E Si m’ɔ o ɲanmiɛn su lɔ’n wun fɔnlɛ nga be fɔn’n. Sanngɛ ɔ yaci cɛ be yɛ ɔ kunndɛ kɛ e yo kɛ i sa wie.—1 Zan 4:20.

7. ?Sa benin yɛ ɔ juli Famiɛn Oziasi su-ɔ?

⁷ Oziasi m’ɔ yoli Zida famiɛn’n ɔ tuli i wun. I sɔ’n ti’n, w’a faman afɔtuɛ nga be mɛnnin i’n su. Kpɛkun ɔ yoli like kun m’ɔ leman atin yoman’n. Oziasi yoli ninnge kpanngban kpa. I wie yɛle kɛ ɔ kunnin i kpɔfuɛ kaka alɛ’n nun, ɔ kplannin klɔ wie mun, yɛ ɔ dili fie kpanngban. Biblu’n se kɛ: “Ɲanmiɛn maan i ninnge ng’ɔ yoli be’n be yoli ye.” (2 Nyo. 26:3-7, 10) Sanngɛ kɛ ɔ wa ɲannin ɲrun kpa’n, ɔ tuli i wun. Ɔ maan ɔ yoli sa tɛ. Yɛle kɛ Zoova seli kɛ i ɲrun jranfuɛ’m be ngunmin yɛ be le atin be yra ansan i sua’n nun-ɔn. Sanngɛ Oziasi m’ɔ ti famiɛn’n ɔ ko yrali ansan Ɲanmiɛn i sua’n nun. I lɛ nun’n, ɔ yoli like kun m’ɔ leman atin yoman-ɔn. I sɔ’n w’a yoman Zoova i fɛ kaan sa naan w’a fa kokowe w’a guɛ i wun. Kokowe sɔ’n kali Oziasi wun lele ɔ fa wuli.—2 Nyo. 26:16-21.

8. ?Kɛ nga 1 Korɛntifuɛ Mun 4:6, 7 fa kan’n sa’n, ngue yɛ e kwla yo naan y’a tuman e wun-ɔn?

⁸ Sa ng’ɔ juli Oziasi su’n kle kɛ sɛ y’a nianman e wun kpa’n, e kusu e kwla tu e wun wie. Maan e kan aniaan bian kun m’ɔ suan Zoze’n, i ndɛ kan. Ɔ di junman kun m’ɔ ɲan nun sika kpa-ɔ, yɛ i kunngba’n ti asɔnun kpɛnngbɛn. Kɛ bé yó akpasua kun aɲia mun nin nvle kun aɲia mun’n, ɔ ijɔ nzra nun. Aniaan’m be ɲin yi i kpa, yɛ wie liɛ bɔbɔ’n akpasua sunianfuɛ’m be usɛ i ngwlɛlɛ afɛ. Sanngɛ aniaan bian’n seli kɛ: “N lafili min wun su dan ti’n, n buli i kɛ sa fi kwlá ɲanman min. Ɔ maan n kpaloli afɔtuɛ nga Zoova mannin min’n.” Kɛ ɔ́ kɔ́ i ɲrun’n, Zoze yoli sa tɛ dan kun. Ɔ maan be tuli i asɔnun’n nun. Sanngɛ kɛ ɔ cɛli kan’n, ɔ sɛli i sin suli Zoova ekun. I sin’n, Zoze seli kɛ: “Zoova kleli min kɛ nán junman nga e di i anuannzɛ’n nun’n yɛ ɔ ti cinnjin-ɔn. Sanngɛ i klun sa yolɛ’n niɔn.” Nán e wla fi su kɛ ninnge nga e si be yo’n ɔ nin junman  nga e di i anuannzɛ’n nun’n, be kwlaa be fin Zoova. (An kanngan 1 Korɛntifuɛ Mun 4:6, 7 nun.) Ɔ maan sɛ e tu e wun’n, Zoova su faman e diman junman kun.

9. ?Kɛ Satan nin Ɛvu be yoli aɲinkplifuɛ’n, wafa sɛ yɛ i bo’n guali-ɔ?

⁹ Kɛ bé kán aɲinkpli’n i ndɛ’n, sran klikli nga e bu i akunndan’n yɛle Satan. I nun mɔ Satan te yo Zoova i anzi’n, Zoova mɛnnin i ninnge kpanngban. Sanngɛ w’a jumɛn i, ɔ kunndɛli kɛ be su i wie. Kusu nn Zoova kunngba cɛ yɛ ɔ fata kɛ be su i-ɔ. Satan kunndɛ kɛ e yo kɛ i sa. I sɔ’n ti’n, ɔ yo like kwlaa ng’ɔ kwla yo naan e klun w’a jɔman like nga e le i’n su’n. Ɛvu su yɛ ɔ boli i sɔ yolɛ bo-ɔ. Zoova mannin Ɛvu nin i wun’n be atin kɛ be di ‘fie’n nun waka mma kwlaa nga be waan bé dí’n.’ Saan waka kunngba i su mma liɛ’n yɛ ɔ seli be kɛ nán be di-ɔ. (Bob. 2:16) Sanngɛ Satan lakali Ɛvu maan Ɛvu buli i kɛ sɛ w’a diman waka mma sɔ’n, i liɛ su yoman ye. Kɛ ɔ yoli sɔ’n, Ɛvu i ɲin w’a yiman like nga Zoova fa mɛnnin i’n kun. Ɔ maan ɔ dili waka mma’n. Yɛ e kwlaa e si wafa nga i bo’n guali’n. Ɛvu yoli sa tɛ. Ɔ maan i agualiɛ su’n ɔ wuli.—Bob. 3:6, 19.

10. ?Kɛ Famiɛn Davidi yoli aɲinkplifuɛ’n, wafa sɛ yɛ i bo’n guali-ɔ?

¹⁰ Zoova maan Davidi ɲannin aɲanbeun ninnge kpanngban kpɛkun i dunman’n fuli kpa. Asa ekun’n, ɔ kwlɛli i kpɔfuɛ kaka. I kwlaa sɔ’n ti’n, Davidi sili Ɲanmiɛn i ye. Ɔ seli kɛ ninnge nga Ɲanmiɛn mɛnnin i’n ‘be sɔnnin dan, ɔ kwlá kaman be ngba.’ (Jue. 40:6) Sanngɛ i sin’n, Davidi wa yoli aɲinkplifuɛ. Ɔ maan i ɲin w’a yiman ninnge nga Ɲanmiɛn fa mɛnnin i’n kun. Yɛle kɛ kannzɛ Davidi le bla kaka’n, sanngɛ i ɲin wa bloli sran uflɛ i yi liɛ’n i wun. Be flɛ bla sɔ’n kɛ Bat-Seba, yɛ i wun’n suan Iri. Ɔ ti Ɛtifuɛ. Davidi nin Bat-Seba be sili sua kpɛkun bla’n wunnzɛli. Like sɔ mɔ Davidi yoli’n ti tɛ kpa. Sanngɛ ɔ yoli sa tɛ dan kun ekun fa ukali su. Yɛle kɛ ɔ yoli maan be kunnin bla’n i wun’n. (2 Sam. 11:2-15) ?Ngue ti yɛ Davidi m’ɔ ti Ɲanmiɛn i sufuɛ kpa’n, ɔ kwla yoli sa tɛ dan sɔ-ɔ? I yo, Davidi su Zoova w’a cɛ sɔ. Sanngɛ kɛ m’ɔ yoli aɲinkplifuɛ’n ti’n, ɔ yoli sa tɛ yɛ i bo w’a guaman kpa w’a mɛnmɛn i. Sanngɛ Ɲanmiɛn sa, Davidi dili sa ng’ɔ yoli’n i nanwlɛ kleli Zoova yɛ ɔ kacili i sa. Ɔ maan Zoova i klun jɔli i wun ekun. Nanwlɛ, i sɔ’n yoli Davidi i fɛ kpa.—2 Sam. 12:7-13.

11. ?Kɛ nga Efɛzifuɛ Mun 5:3, 4 fa kan’n sa’n, ngue yɛ ɔ kwla uka e naan y’a yoman aɲinkplifuɛ-ɔ?

 ¹¹ ?Ngue yɛ Davidi i su ndɛ’n kle e-ɔ? Ɔ kle e kɛ sɛ e si ninnge nga Zoova fa man e’n be su ye naan e lɛ i ase’n, e su yoman aɲinkplifuɛ. (An kanngan Efɛzifuɛ Mun 5:3, 4 nun.) Asa ekun’n, ɔ fata kɛ e klun jɔ like nga e le i’n su. Kɛ é klé sran’m be Biblu’n nun like’n, maan e uka be naan be bu ninnge kpakpa nga Zoova yo man be’n be su akunndan naan be lɛ i ase. Maan aliɛ ba kwlaa nun’n, e srɛ Ɲanmiɛn e lɛ i ase. Sɛ e yo sɔ’n, lele mɔ lemɔcuɛ kun fá wíe’n nn y’a lɛ i ase kpɛ kaka. (1 Tes. 5:18) Sɛ e bu ninnge nga Zoova yo man e’n be su akunndan’n, i sɔ’n úka e naan y’a si ye. Sran ng’ɔ si ye’n, i klun jɔ like ng’ɔ le i’n su. Kusu sɛ e klun jɔ like nga e le i’n su’n, e su yoman aɲinkplifuɛ.

12. ?Kɛ Zida Iskariɔti kacili aɲinkplifuɛ’n, ngue yɛ ɔ yoli-ɔ?

¹² Kɛ mɔ Zida Iskariɔti yoli aɲinkplifuɛ’n ti’n, ɔ yoli sa tɛtɛ wie mun. I wie yɛle kɛ ɔ kpɛli Zezi i bo waka. Sanngɛ i bo bolɛ nun’n, Zida ti sran kpa. (Lik. 6:13, 16) Afin Zezi kpɛli i kɛ ɔ yo i akoto. Asa’n, ɔ ti sran kun mɔ be kwla lafi i su-ɔ. Afin Zezi seli i kɛ ɔ nian be sika’n su. Kɛ bé bó jasin fɛ’n bé sín’n, be fa sika sɔ’n be toto ninnge nga be sa mian be wun’n. Sɛ é kwlá sé’n, sika sɔ’n ti kɛ sika nga anuannzɛ’n fa di junman mɛn wunmuan’n nun andɛ’n sa. Sanngɛ i sin’n, Zida wuali sika sɔ’n wie. Kusu nn kɛ Zezi sé sran’m be kɛ be nian be wun su aɲinkpli’n i lika’n, nn ɔ o lɛ. (Mar. 7:22, 23; Lik. 11:39; 12:15) Sanngɛ Zida w’a faman ndɛ nga Zezi kannin’n su.

13. ?Sa benin yɛ ɔ kleli weiin kɛ Zida ti aɲinkplifuɛ-ɔ?

¹³ Kɛ ɔ cɛ kan bé kún Zezi’n, sa kun yili i nglo weiin kɛ Zida ti aɲinkplifuɛ. Yɛle kɛ cɛn kun’n, Simɔn m’ɔ ti kokowefuɛ’n ɔ yiali Zezi nin i sɔnnzɔnfuɛ mun i awlo lɔ kɛ be ko di like. Mari nin i niaan bla Mati be ɔli wie. Kɛ bé dí like’n, Mari jasoli yɛ ɔ fali ngo kun m’ɔ le gua kpa’n fa guɛli i Zezi i ti’n su. Kɛ Zida nin Zezi i sɔnnzɔnfuɛ onga’m be wunnin i sɔ’n, w’a yoman be fɛ. Zezi i sɔnnzɔnfuɛ onga’m be liɛ’n, be waan be kwla yo ngo sɔ’n i atɛ kpɛkun be fɛ i sika’n be yo like uflɛ. Sanngɛ Zida liɛ’n, akunndan uflɛ o i klun. Kɛ ‘m’ɔ ti awiefuɛ’n’ ti’n, ɔ kunndɛli kɛ be yo ngo’n i atɛ naan be fɛ i sika’n be guɛ i be sika guawlɛ’n nun. I liɛ’n, ɔ́ sín be sin kó wúa. Sika ti’n, Zida kpɛli Zezi i bo waka.—Zan 12:2-6; Mat. 26:6-16; Lik. 22:3-6.

14. ?Wafa sɛ yɛ aniaan bian kun nin i yi be nantili ndɛ ng’ɔ o Liki 16:13 nun’n su-ɔ?

¹⁴ Zezi kannin ndɛ cinnjin kun kleli i sɔnnzɔnfuɛ mun. Ɔ seli be kɛ: “Amun kwlá yoman Ɲanmiɛn i kanga naan amun kunngba’n amun a yo Aɲanbeun’n i kanga.” (An kanngan Liki 16:13 nun.) Lele nin andɛ’n ndɛ sɔ’n te yo nanwlɛ. Maan e fa e ɲin e sie i wafa nga aniaan bian kun nin i yi mɔ be fin Rumanin’n, be nantili Zezi i ndɛ sɔ’n su’n i su. Be mannin be junman kun nvle kun mɔ lɔfuɛ’m be le sika kpa’n, i nun. Be seli kɛ: “Kɛ ɔ́ yó sɔ’n nn y’a fa kalɛ dan kpa banki kun nun. Ɔ maan e seli e wun kɛ Zoova yɛ ɔ su yra e su lɛ-ɔ.” Sanngɛ ndɛ kun o lɛ. Yɛle kɛ sɛ be sɔ junman sɔ’n nun’n, be su ɲanman blɛ be suman Zoova kpa kun. I sin’n, be kanngannin ndɛ kun m’ɔ o afuɛ 2008, Utu 1 Sasafuɛ Tranwlɛ’n nun’n, i nun. Ndɛ sɔ’n yɛle “Nán maan e awlɛn’n yo nɲɔnnɲɔn Ɲanmiɛn sulɛ’n nun.” Ɔ maan be fali ajalɛ kun. Be seli kɛ: “E wunnin i wlɛ kɛ sɛ sika kunndɛlɛ’n ti’n e tu e nvle’n nun e kɔ nvle uflɛ nun naan e kwlá suman Zoova kpa kun’n, nn y’a sie Zoova i sulɛ’n i siɛn. Ɔ maan e nin Zoova e afiɛn su mantanman kpa kun.” I sɔ’n ti’n, b’a sɔman junman sɔ’n nun. ?Kɛ be fali ajalɛ sɔ’n, wafa sɛ yɛ i bo’n guali-ɔ? Aniaan bian’n wa ɲannin junman uflɛ be nvle liɛ’n nun lɔ. Junman sɔ’n ti’n be kwla ɲan like kan be nian be wun lika. I sɔ’n ti’n, aniaan bla’n seli kɛ: “Nanwlɛ,  Zoova yimɛn i sufuɛ’m be ase le.” Aniaan bian’n nin i yi’n be di aklunjɔɛ afin be kleli kɛ Zoova yɛ ɔ ti be Min’n niɔn, nán sika-ɔ.

15. ?Ngue ti yɛ e kwla lafi su kɛ e kwla flo Satan i aya’m be nun-ɔn?

¹⁵ Sɛ e tɔ be wun tulɛ’n nin aɲinkpli’n be aya’n nun’n, e kwla flo. Afin Pɔlu seli kɛ be nga Suɛn tɔnfuɛ’n ‘trali be’n’ be kwla ɲan be ti. (2 Tim. 2:26) I wie yɛle Davidi i liɛ’n. Kɛ ɔ fali Natan i afɔtuɛ’n su’n, w’a yoman aɲinkplifuɛ kun. Ɔ maan ɔ nin Zoova be afiɛn wa sɛli ekun. Nán e wla fi su le kɛ Zoova le tinmin tra Satan. Ɔ maan sɛ e kplin su kɛ Zoova uka e’n, é kwlá fló Satan i aya’m be nun.

16. ?Ngue yɛ e kwla yo naan y’a tɔman Satan i aya’m be nun-ɔn?

¹⁶ E kwla flo Satan i aya’m be nun sɔ. Sanngɛ sɛ e mian e ɲin naan y’a tɔman nun mlɔnmlɔn’n, ɔ flunman. Ɲanmiɛn Kpli kunngba cɛ yɛ ɔ kwla uka e naan y’a yo sɔ-ɔ. Ɔ maan nán e lafi e wun su naan e se kɛ e su tuman e wun le annzɛ e su yoman aɲinkplifuɛ le. Be nga be su Zoova w’a cɛ bɔbɔ’n, be nun wie’m be tuli be wun annzɛ be yoli aɲinkplifuɛ. I sɔ’n ti’n, maan e srɛ Zoova cɛn kwlakwla kɛ ɔ uka e naan sɛ e su yi ayeliɛ tɛtɛ sɔ’m be nglo’n e wun i wlɛ naan e wla be ase. (Jue. 139:23, 24) Maan e yo like kwlaa nga e kwla yo naan y’a tuman e wun’n annzɛ y’a yoman aɲinkplifuɛ’n.

17. ?Sa benin yɛ ɔ cɛ kan’n ɔ́ jú e kpɔfuɛ’n su-ɔ?

¹⁷ Sɛ é kwlá sé’n, nán andɛ sa yɛ Satan di Zoova i sufuɛ’m be wun koniɛn-ɔn. Sanngɛ ɔ ka kan’n, Zoova wá yó maan bé trɛ́ i bé cící i yɛ bé wlɛ́ i bisua. Kpɛkun i agualiɛ su’n bé núnnún i. (Ngl. 20:1-3, 10) Nanwlɛ, e ɲin o cɛn sɔ’n i sin kpa. Sanngɛ kwlaa naan cɛn sɔ’n w’a ju’n, maan e nian e wun su kpa naan y’a tɔman Satan i aya’m be nun. Yɛle kɛ e yo like kwlaa nga e kwla yo naan y’a tuman e wun annzɛ y’a yoman aɲinkplifuɛ’n. Maan e kwlakwla e fua kpa kɛ ‘é jrán Suɛn tɔnfuɛ’n i ɲrun kekle. I liɛ’n ɔ́ wánndi e.’—Zak. 4:7.