1. Paano si Satanas nakakaagid sa paraayam?

MAY saro sanang gustong mangyari an paraayam—an madakop an hayop o magadan iyan. Puwede siyang gumamit nin manlain-lain na silo o siod, arog kan sinabi kan saro sa bakong totoong amigo ni Job. (Job 18:8-10) Paano puwedeng dayaon kan paraayam an sarong hayop para magduman iyan sa silo niya? Pinagmamasdan niyang marhay an hayop—kun sain na mga lugar iyan nagduduman, kun ano an gustong-gusto kaiyan na gibuhon, asin kun paano iyan madadakop na daing kaaram-aram. Arog kaiyan si Satanas. Pinagmamasdan niya kitang marhay. Inaaram niya kun sain kita nagduduman saka kun ano an gustong-gusto tang ginigibo. Tapos nagtatáon siya nin silo para dakupon kita na daing kaaram-aram. Dawa arog kaiyan, sinisigurado sato kan Bibliya na kun madakop kita, puwede kitang makadulag. Itinutukdo man sato kaiyan kun paano ta malilikayan an ano man na silo.

2. Ano an duwa sa pinakaepektibong silo ni Satanas?

² An duwa sa pinakaepektibong silo ni Satanas iyo an pagigin orgulyoso asin kahanaban. * Sa laog nin ribo-ribong taon, ekspertong ginamit ni Satanas an bakong marahay na mga ugaling iyan. Garo siya paradakop nin gamgam na dinadaya an gamgam para magduman iyan sa siod o sa hikot. (Sal. 91:3) Pero puwede tang malikayan na madakop ni Satanas. Taano? Dahil ihinayag sato ni Jehova an mga taktikang ginagamit ni Satanas.—2 Cor. 2:11.

3. Taano ta iiniba ni Jehova sa Bibliya an mga halimbawa nin mga tawong nagin orgulyoso saka mahanab?

³ An saro sa mga paagi na pinapatanidan kita ni Jehova manungod sa pagigin orgulyoso asin kahanaban iyo an pagdagka sato  na makanuod sa mga eksperyensiya sa tunay na buhay. Mangnuhon sa mga halimbawang pag-uulayan ta na nasilo ni Satanas maski an maygurang na mga lingkod ni Jehova. Nangangahulugan daw iyan na dai ta na iyan malilikayan o madudulagan? Dai nanggad. Iiniba ni Jehova sa Bibliya an mga halimbawang ini bilang “patanid sa satuya.” (1 Cor. 10:11) Aram niya na kun makakanuod kita sa nagpapatanid na mga halimbawang iyan, malilikayan ta o makakadulag kita sa mga silo kan Diyablo.

4. Ano an mangyayari sa sarong orgulyoso?

⁴ Gusto ni Satanas na magin orgulyoso kita. Aram niya na kun magin orgulyoso kita, magigin arog kita saiya asin maiwawara ta an oportunidad na magkaigwa nin buhay na daing katapusan. (Tal. 16:18) Kaya nagpatanid si apostol Pablo na an saro puwedeng “makamati . . . nin sobrang pag-orgulyo asin akuon . . . an paghukom na kapareho kan inako kan Diyablo.” (1 Tim. 3:6, 7) Puwede iyan mangyari sa siisay man sato, kita man baguhan sa katotoohan o dakul na taon nang naglilingkod ki Jehova.

5. Arog kan mababasa sa Parahulit 7:16, 20, paano mahihiling sa sarong tawo an pagigin orgulyoso?

⁵ An tawong orgulyoso makasadiri. Para magin makasadiri kita, hinihinguwa ni Satanas na mas isipon ta an sadiri ta kisa ki Jehova, lalo na pag may problema kita. Halimbawa, may nagsasahot daw saimo nin bakong totoo? O trinato ka daw nin bakong makatanusan? Mauugmang marhay si Satanas na mahiling kang binabasol mo si Jehova o an mga tugang. Saka gusto kan Diyablo na isipon mong an solamenteng solusyon iyo na sunudon mo an sadiri mo imbes na an paggiyang itinatao ni Jehova sa saiyang Tataramon.—Basahon an Parahulit 7:16, 20, NWT.

6. Ano an manunudan ta sa eksperyensiya nin sarong sister sa Netherlands?

⁶ Pag-isipan an eksperyensiya nin sarong sister sa Netherlands na nairitar sa mga kaluyahan kan iba. Nagdesisyon siya na dai niya na matatagalan iyan. “Grabe su kamunduan ko tapos dai ko na mabago an sabuot ko sainda,” an sabi niya. “Sinabi ko ki agom na maglipat na lang kami sa ibang kongregasyon.” Tapos hiniling niya an Marso 2016 na JW Broadcasting^®  program. Nagtao an programang iyan nin nagkapirang suhestiyon kun paano aatubangon an mga kaluyahan kan iba. Inistorya kan sister: “Narealisar ko na kaipuhan kong magin mapakumbaba saka onestong hilingon an mga nagigibo ko mismong sala imbes na purbaran na baguhon an ugali kan mga tugang sa kongregasyon. Nakatabang sako an programa na magpokus ki Jehova saka sa saiyang soberaniya.” Ano an manunudan ta diyan? Pag may problema ka, magdanay na nakapokus ki Jehova. Makimahirak saiya na tabangan kang hilingon an iba arog kan paghiling niya sainda. Nahihiling kan saimong langitnon na Ama an nagigibo nindang mga sala; pero, andam siyang patawadon sinda. Gusto niya na iyan man an gibuhon mo.—1 Juan 4:20.

7. Ano an nangyari ki Hading Uzias?

⁷ Dahil nagin orgulyoso si Hading Uzias, dai siya nagdangog sa sadol asin nagin pangahas. Maabilidad na marhay si Uzias. Mapanggana siya sa mga kampanya militar, proyekto sa pagtugdok, saka sa agrikultura. “Pinangyari kan tunay na Diyos na magin siyang mauswag.” (2 Cron. 26:3-7, 10, NWT) “Alagad kan siya makusog na, nagin mapalangkaw an saiyang puso na nagin dahilan kan saiyang kapahamakan,” an sabi kan Bibliya. Bago pa kaiyan, ipinagbuot ni Jehova na an mga saserdote sana an puwedeng magdulot nin insenso sa templo. Pero pangahas na naglaog sa templo si Hading Uzias para magdulot nin insenso. Dai iyan ikinaugma ni Jehova kaya pinadusahan niya nin leproso an mapalangkaw na lalaking ini. Nagdanay na may leproso si Uzias sagkod na siya magadan.—2 Cron. 26:16-21.

8. Arog kan mababasa sa 1 Corinto 4:6, 7, paano ta malilikayan na magin orgulyoso?

⁸ Puwede daw na magin orgulyoso man kita asin masilo arog ni Hading Uzias? Pag-isipan an nangyari ki Jose. Mapanggana siyang marhay na negosyante saka iginagalang na elder sa kongregasyon. Nagpapahayag siya pag asembleya asin kumbensiyon, saka nagkokonsulta saiya an mga paraataman nin sirkito. “Pero nagtiwala ako sa abilidad ko saka eksperyensiya,” an sabi niya. “Binaliwala ko si Jehova. Inisip kong makusog ako kaya dai ako nagdangog sa mga patanid saka sadol ni Jehova.” Nakakomiter si Jose nin magabat na kasalan kaya natiwalag siya. Nakabalik siya nagkapirang taon na an nakaagi. Sinabi niya: “Itinukdo sako ni Jehova na an mahalaga, bako an pagkaigwa nin katungdan, kundi an paggibo kan ipinapagibo niya sato.” Tandaan ta na ano man na abilidad an igwa kita o ano man na pribilehiyo an akuon ta sa laog kan kongregasyon,  gabos iyan hali ki Jehova. (Basahon an 1 Corinto 4:6, 7.) Kun orgulyoso kita, dai kita gagamiton ni Jehova.

9. Dahil sa kahanaban, ano an ginibo ni Satanas asin ni Eva?

⁹ Pag-abot sa kahanaban, posibleng marhay na si Satanas na Diyablo tulos an maiisip ta. Bilang saro sa mga anghel ni Jehova, siguradong dakul kaidtong marahayon na pribilehiyo si Satanas. Pero bako lang iyan an gusto niya. Gusto niyang sambahon siya—sarong bagay na para lang dapat ki Jehova. Gusto niya kitang magin arog niya, kaya pinupurbaran niyang makamati kita nin pagkadiskontento sa kun ano an igwa kita. Pinunan niyang gibuhon iyan kan dulukon niya si Eva. Mamumuton na tinawan ni Jehova si Eva saka an agom niya nin abunda saka masisiram na kakanon—hali sa “arin man na kahoy sa tatamnan” apuwera sa saro. (Gen. 2:16) Dawa arog kaiyan, napatubod ni Satanas si Eva na kaipuhan kaining magkakan nin bunga hali sa ipinagbabawal na kahoy. Dai nakontento si Eva sa kun ano an igwa siya; gusto niya nin mas dakul pa. Aram ta an kinaluwasan kaiyan. Nagpadara sa kasalan si Eva asin nagadan pag-abot nin panahon.—Gen. 3:6, 19.

10. Paano nagin silo ki David an kahanaban?

¹⁰ Dahil sa kahanaban, nalingawan ni Hading David kun ano an itinao saiya ni Jehova, kaiba diyan an kayamanan, pagigin prominente, saka kapangganahan sa dakul na ralaban. Mapagpasalamat na sinabi ni David na an mga regalo nin Diyos ‘dai mauubos [na bilangon] sa kadakulan.’ (Sal. 40:5, An Marahay na Bareta Biblia) Pero nag-abot sa punto na nalingawan ni David an mga itinao saiya ni Jehova. Bako na siyang kontento; gusto niya nin mas dakul pa. Dawa may nagkapira nang agom si David, tinugutan niyang magtubo sa puso niya an salang pagmawot sa agom nin ibang lalaki. An babaying iyan iyo si Bat-seba na agom ni Urias na Hiteo. Nagkaigwa nin seksuwal na relasyon an makasadiring si David ki Bat-seba, asin nagbados ini. Grabe an ginibo ni David, pero may mas grabe pa siyang ginibo—ipinagadan niya si Urias! (2 Sam. 11:2-15) Ano kaya an nasa isip ni David? Inisip niya daw na dai siya nahihiling ni Jehova? An dating maimbod na lingkod na iyan ni Jehova nagin makasadiri saka mahanab, asin dakulaon an nagin karibay kaiyan. Marahay na sana ta pag-abot nin panahon inadmitir ni David an kasalan niya asin nagsulsol. Siguradong grabe an pasasalamat niya na nakua niya giraray an pag-uyon ni Jehova!—2 Sam. 12:7-13.

11. Sigun sa Efeso 5:3, 4, ano an makakatabang sato na malabanan an kahanaban?

 ¹¹ Ano an manunudan ta sa halimbawa ni David? Nanudan ta na malalabanan ta an kahanaban kun magdadanay kitang mapagpasalamat sa gabos na itinao sato ni Jehova. (Basahon an Efeso 5:3, 4.) Dapat na magin kontento kita sa kun ano an igwa kita. Dinadagka an bagong mga tinutukduan sa Bibliya na mag-isip nin sarong espesipikong bendisyon tapos pasalamatan si Jehova dahil diyan. Kun aroaldaw iyan na gigibuhon nin saro sa laog nin sarong semana, buot sabihon, mga pitong manlain-lain na bagay an maipapamibi niya. (1 Tes. 5:18) May ginigibo ka daw na arog kaiyan? Kun huhurop-hurupon mo an gabos na ginibo ni Jehova para saimo, makakatabang iyan na magi kang mapagpasalamat. Asin kun mapagpasalamat ka, magigin kontento ka. Pag kontento ka, dai ka magigin mahanab.

12. Dahil sa kahanaban, ano an ginibo ni Judas Iscariote?

¹² Dahil sa kahanaban, nakagibo nin marauton na bagay si Judas Iscariote asin trinaydor si Jesus. Pero bako man siyang arog kaiyan kan inot. (Luc. 6:13, 16) Pinili siya ni Jesus na magin apostol. Minalataw na mahusay saka maaasahan si Judas, dahil saiya ipinagkatiwala an kahon nin kuwarta. Ginagamit ni Jesus saka kan mga apostol an pondong iyan para sa mga gastos ninda sa paghuhulit. Kaya kun baga, garo iyan mga donasyon sa pambilog na kinaban na gibuhon sa panahon ta. Pero paghaloy-haloy, nagpuon na maghabon si Judas, dawa nadangog niya an pauruutrong patanid ni Jesus manungod sa kahanaban. (Mar. 7:22, 23; Luc. 11:39; 12:15) Binaliwala ni Judas an mga patanid na iyan.

13. Sa anong pangyayari nagin risang-risa an kahanaban ni Judas?

¹³ Nagin risang-risa an kahanaban ni Judas sa sarong pangyayari kaidtong madali nang gadanon si Jesus. Bisita kaidto kan leprosong si Simon si Jesus saka an mga disipulo niya, kaiba si Maria asin an tugang kaining si Marta. Kan nagkakakan na sinda, nagtindog si Maria tapos ibinubo sa payo ni Jesus an sarong mamahalon na pahamot na lana. Ikinauyam iyan na marhay ni Judas saka kan iba pang mga disipulo. Para sa ibang mga disipulo, mas marahay kuta kun sa ministeryo na lang gamiton an kuwarta. Pero iba an motibo ni Judas. “Parahabon siya,” asin gusto niyang maghabon nin kuwarta sa kahon. Pag-abot nin panahon, dahil sa kahanaban ni Judas trinaydor niya si Jesus karibay nin kantidad na katumbas nin sarong uripon.—Juan 12:2-6; Mat. 26:6-16; Luc. 22:3-6.

14. Paano isinabuhay nin sarong mag-agom an leksiyon na nasa Lucas 16:13?

¹⁴ Ipinagirumdom ni Jesus sa mga parasunod niya an mahalagang katotoohan na ini: “Dai kamo puwedeng magin uripon nin Diyos asin nin Kayamanan.” (Basahon an Lucas 16:13.) Totoo iyan dawa ngunyan. Pag-isipan kun paano isinabuhay nin sarong mag-agom sa Romania an mga tataramon ni Jesus. Inalukan sinda nin temporaryong trabaho sa sarong mas mayaman na nasyon. “May dakula kaming utang sa bangko, kaya kan inot inisip ming bendisyon ni Jehova an trabahong idto,” an inadmitir ninda. An problema, makakaulang iyan sa paglilingkod ninda ki Jehova. Pagkatapos mabasa an artikulong “Papagdanayon an Kaimbodan na May Bilog na Puso” sa An Torrengbantayan na Agosto 15, 2008, nagdesisyon sinda. Sinabi ninda: “Kun an motibo mi sa pagtrabaho sa ibang nasyon iyo na makaganar nin mas dakul na kuwarta, buot sabihon kaiyan ipinapanduwa mi na sana si Jehova. Sigurado kami na maaapektaran talaga an espirituwalidad mi.” Kaya sinayumahan ninda an alok. Ano an nangyari? Nakahanap an agom na lalaki nin trabaho sa nasyon ninda na igo na sa mga pangangaipo ninda. Sinabi kan agom na babayi: “Pirming tinatabangan ni Jehova an mga lingkod niya.”  Maugma an mag-agom na ini na si Jehova an pinili nindang magin Kagurangnan imbes na an kuwarta.

15. Taano ta makakasigurado kita na puwede kitang makadulag sa mga silo ni Satanas?

¹⁵ Paano kun narisa tang nagin orgulyoso o mahanab na kita? Kaya ta nanggad magbago! Sinabi ni Pablo na puwede pang makadulag sa silo kan Diyablo an mga “nagkadarakop [na] buhay.” (2 Tim. 2:26) Nangyari iyan ki David. Nagdangog siya sa pagsagwi ni Natan, nagsulsol sa kahanaban niya, asin naibalik an marahay na relasyon niya ki Jehova. Nungkang paglingawan na mas makapangyarihan si Jehova kisa ki Satanas. Kaya kun aakuon ta an tabang ni Jehova, makakadulag kita sa ano man na silo o siod na pigtáon kan Diyablo.

16. Ano an makakatabang sato na malikayan an mga silo ni Satanas?

¹⁶ Siyempre, mas marahay nanggad na malikayan ta an gabos na silo o siod ni Satanas kisa sa madakop kita kaiyan tapos makadulag. Magigibo tang malikayan iyan paagi sana sa tabang nin Diyos. Pero dai nanggad kita dapat magin kampante! Maski an haloy nang mga lingkod ni Jehova nagin orgulyoso o mahanab. Kaya aroaldaw na makimahirak ki Jehova na tabangan kang maaraman kun baga naiimpluwensiyahan na kan maraot na mga ugaling iyan an kaisipan saka paggawi mo. (Sal. 139:23, 24) Nungkang tugutan na masilo ka kaiyan!

17. Ano an madali nang mangyari sa satong kaiwal, an Diyablo?

¹⁷ Ribo-ribong taon nang paraayam si Satanas. Pero madali na siyang igapos dangan paraon pag-abot nin panahon. (Kap. 20:1-3, 10) Gustong-gusto ta nang mangyari iyan. Pero mantang dai pa iyan nangyayari, magdanay na alerto sa mga silo ni Satanas. Magmaigot na dai magin orgulyoso o mahanab. Magin determinado na “labanan . . . an Diyablo, asin madulag siya sa saindo.”—Sant. 4:7.