1. ?Olsem wanem Setan i sem mak long wan man blong hanting?

WAN man blong hanting, i gat mak blong hem. Hemia blong kasem wan animol o kilim i ded. Maet hem i save yusum ol defdefren trap, olsem wan long ol giaman fren blong Job i tokbaot. (Job 18: 8-10) ?Olsem wanem wan man blong hanting i save trikim animol i go long trap blong hem? Fastaem, bambae hem i wajem gud animol ya blong luk weples i stap go long hem, wanem hem i laekem, mo wanem beswan trap blong kasem animol ya. Setan i olsem man ya blong hanting. Hem i wajem gud yumi blong luk weples yumi stap go long hem, mo wanem yumi laekem. Biaen hem i putum wan trap, we hem i hop se yumi no luksave mo fas long hem. Baebol i talem se sipos yumi fas long ol trap blong hem, be yet yumi save kamaot. Mo i tijim yumi tu olsem wanem blong no fas long ol trap ya.

2. ?Wanem tu men trap blong Setan we oli wok gud?

² Tu trap blong Setan we oli wok gud, hemia fasin blong praod mo griri. * Blong plante taosen yia finis, Setan i yusum tufala nogud fasin ya blong mekem plante man i foldaon. Hem i olsem wan man blong kasem pijin we i trikim pijin i go insaed long trap o net blong kasem hem. (Sam 91:3) Be yumi save ronwe long ol trap blong Setan. ?From wanem? From we Jehova i talemaot ol trap we Setan i stap yusum.—2 Kor. 2: 11.

3. ?From wanem Jehova i putum sam stori long Baebol olsem wan woning long yumi?

³ Wan long ol rod we Jehova i yusum blong wonem yumi long fasin blong praod mo griri, hemia tru long ol stori blong  ol man blong Jehova. Bambae yumi luk olsem wanem Setan i yusum ol trap blong hem blong kasem ol man we oli mekem wok blong Jehova longtaem finis. ?Hemia i min se yumi no naf blong ronwe? Si yumi naf, from we Jehova i putum ol stori ya long Baebol blong givim “woning long yumi.” (1 Kor. 10:11) Hem i save se bambae yumi lanem lesen from ol eksampol ya mo yumi ronwe long ol trap blong Setan.

4. ?Wanem i save hapen sipos yumi praod?

⁴ Setan i wantem se yumi praod be long wan fasin we i no stret. Hem i save se sipos yumi gat rabis praod ya, bambae yumi kam olsem hem, yumi no kasem laef olwe. (Prov. 16:18) Taswe aposol Pol i givim woning se sipos man i no lukaot gud, maet “tingting blong hem i go antap gogo i kam flas, nao i kasem sem jajmen we Devel i kasem.” (1 Tim. 3:6, 7) Hemia i save hapen long eniwan long yumi, nating sipos yumi jes kam long trutok o yumi mekem wok blong Jehova plante yia finis.

5. Folem Prija 7:16, 20, ?olsem wanem man i soemaot se hem i praod?

⁵ Man we i praod, i tingbaot hem wan nomo. Setan i wantem se yumi tingbaot yumi wan moa i bitim we yumi tingbaot Jehova, speseli taem yumi fesem wan problem. Eksampol, ?wan narafala i bin talem wan giaman tok long saed blong yu o i mekem i no stret long yu? Setan i wantem luk se yumi blemem Jehova o ol brata sista. Hem i wantem yu gat tingting ya se, wan rod nomo blong stretem problem, hemia blong folem prapa tingting blong yu, i bitim we yu folem tingting blong Jehova long Baebol.—Ridim Prija 7:16, 20.

6. ?Yu lanem wanem long stori blong wan sista long Netalan?

⁶ Traem tingbaot ekspiriens blong wan sista long Netalan, we i kam kros from i luk slak fasin blong narafala, nao i no moa wantem joen wetem olgeta. Hem i se: “Mi harem se mi no gat fren mo mi no save jenisim tingting we mi gat long olgeta. Taswe mi talem long hasban blong mi se mitufala i mas muv i go  long wan narafala kongregesen.” Biaen hem i wajem JW Brodkasting^® blong Maj 2016. Program ya i givim sam advaes olsem wanem blong dil wetem slak fasin blong ol narafala. Sista ya i se: “Mi luksave se mi mas gat tingting daon mo tingbaot prapa mastik blong mi i bitim we mi traem jenisim fasin blong ol brata mo sista long kongregesen. Program ya i halpem mi blong tingbaot moa Jehova mo hae rul blong hem. Bigfala poen se, taem yu fesem wan traem, putum tingting blong yu nomo long Jehova. Askem strong long hem blong i halpem yu blong yu luk ol narafala, olsem we hem i luk olgeta. Jehova i luk mastik blong olgeta, be yet, hem i glad blong fogivim olgeta, mo hem i wantem se yu mekem sem mak.—1 Jon 4:20.

7. ?Wanem i hapen long King Usia?

⁷ Praod i lidim King Usia blong Juda blong i sakemaot advaes mo mekem samting we hem i no gat raet blong mekem. Usia i mekem plante gudfala samting. Hem i winim plante faet, i bildim plante taon, mo i wokem plante garen. “Tru God i mekem se hem i gat plante samting.” (2 Kron. 26:3-7, 10) Baebol i talem se: “Be taem hem i kam strong moa, hat blong hem i kam praod tumas, mo hemia i spolem hem.” Jehova i bin talem se ol pris nomo oli gat raet blong bonem insens long tempol. Be King Usia i mekem samting we hem i no gat raet blong mekem, i go long tempol mo i bonem insens. Jehova i no glad long Usia mo i panisim hem wetem leprosi mo i stap olsem long ful laef blong hem.—2 Kron. 26:16-21.

8. Folem 1 Korin 4:6, 7, ?olsem wanem blong blokem fasin blong praod?

⁸ ?Olsem wanem? ?Yumi save kam praod mo mekem sin olsem Usia? Tingbaot eksampol blong José. Hem i wan bisnes man mo i wan elda we plante oli respektem hem. Hem i stap mekem tok long ol asembli, mo ol eria elda tu oli stap askem advaes long hem. Hem i talem se: “Mi mi trastem prapa save mo ekspiriens blong mi, mo mi no moa dipen long Jehova. Mi ting se mi mi strong, so mi no moa lesin long ol woning mo ol advaes blong Jehova.” José i mekem wan bigfala sin mo i disfelosip. Biaen long sam yia we i pas, kongregesen i tekembak hem. Mo naoia hem i talem se: “Jehova i tijim mi se, impoten samting hemia blong mekem samting we hem i wantem, be i  no posisen we yumi kasem.” Yumi mas tingbaot se Jehova nao i mekem se yumi gat gudhan blong mekem wan wok long kongregesen o blong kasem eni privilej. (Ridim 1 Korin 4:6, 7.) Sipos yumi praod, Jehova bambae i no yusum yumi.

9. ?Griri fasin i pulum Setan mo Iv blong mekem wanem?

⁹ Taem yumi harem tok ya griri, ating faswan man we yumi tingbaot hemia Devel Setan. Taem hem i stap olsem wan gudfala enjel blong Jehova, ating hem i bin gat plante gudfala privilej. Be hem i harem se hemia i no naf, hem i wantem kasem wosip we Jehova nomo i gat raet blong kasem. Setan i wantem se yumi kam olsem hem, so hem i traem pulum yumi blong gat moa samting. Faswan taem we hem i mekem olsem, hemia taem hem i toktok wetem Iv. Jehova i letem Iv mo hasban blong hem blong tufala i save kakae frut blong “evri tri we oli stap long garen ya,” be wan nomo hem i blokem. (Jen. 2:16) Be yet, Setan i pulum Iv blong gat tingting ya se hem i mas kakae frut blong tri ya we Jehova i blokem. Iv i foldaon long trap ya blong wantem moa samting. Ale hem i mekem sin, mo biaen hem i ded.—Jen. 3:6, 19.

10. ?Olsem wanem griri fasin i olsem trap we i kasem King Deved?

¹⁰ Griri fasin i mekem King Deved i fogetem se Jehova nao i mekem hem i rij, i putumap hem i king, mo i mekem hem i winim plante faet. Fastaem, Deved i luksave se ol presen ya oli kam long God, mo hem i ‘no save tokbaot olgeta evriwan from oli plante tumas.’ (Sam 40:5) Be i gat wan taem we Deved i fogetem ol samting ya we Jehova i givim long hem. Hem i no moa glad long ol samting ya, be i wantem moa. Deved i gat plante woman finis, be yet, hem i wantem waef blong narafala man, nating se Jehova i talem se fasin ya i no stret. Woman ya hemia Batseba mo hasban blong hem Uria, wan laen blong Het. Deved i tingbaot hem wan, nao hem i slip wetem Batseba, ale Batseba i gat bel. !Antap long hemia, Deved i mekem plan blong oli kilim Uria i ded! (2 Saml. 11:2-15) ?Olsem wanem? ?Deved i ting se Jehova i no luk samting ya? Nating se Deved i mekem wok blong Jehova longtaem, be yet, hem i kam griri mo hemia i mekem hem i harem nogud bigwan. Biaen Deved i  talemaot sin blong hem mo i tanem tingting blong hem. !I sua se hem i glad tumas se Jehova i fogivim hem!—2 Saml. 12:7-13.

11. Folem Efesas 5:3, 4, ?wanem i save halpem yumi blong blokem griri fasin?

¹¹ ?Yumi lanem wanem long eksampol blong Deved? Yumi lanem se yumi save faet agensem griri fasin, sipos yumi gohed blong talem tangkiu long Jehova from ol samting we hem i givim long yumi. (Ridim Efesas 5:3, 4.) Yumi mas glad long eni samting we yumi gat. I gud yumi tijim ol niufala Baebol studen blong tingbaot wan gudfala samting we Jehova i givim mo talem tangkiu from. Sipos wan man i mekem olsem evri dei blong wan wik, hemia i min se bambae hem i prea from seven defren topik. (1 Tes. 5:18) ?Yu tu yu stap mekem olsem? Sipos yu tingting dip long evri samting we Jehova i mekem long yu, bambae yu wantem talem tangkiu long hem. Mo taem yu talem tangkiu, bambae yu glad moa long samting we yu gat finis. Mo taem yu glad long samting we yu gat, bambae yu naf blong blokem griri fasin.

12. ?Griri fasin i pulum Judas blong mekem wanem?

¹² Griri fasin i lidim Judas Iskariot blong mekem samting we i no stret mo salem Jisas. Fastaem Judas i wan gudfala man nomo. (Luk 6:13, 16) Jisas i jusum hem olsem wan aposol blong hem. Jisas i trastem hem, taswe i putumap hem blong lukaot long bokis blong mane. Jisas mo ol aposol oli yusum mane ya blong pem ol samting we oli nidim long wok blong prij. Hemia i olsem ol presen mane we oli yusum blong sapotem wok blong prij long ful wol tede. Be samtaem biaen, Judas i stat blong stil, nating se plante taem hem i harem woning we Jisas i givim long saed blong griri fasin. (Mak 7:22, 23; Luk 11:39; 12:15) Judas i tanem baksaed long ol woning ya.

13. ?Wetaem griri fasin blong Judas i kam klia?

¹³ Griri fasin blong Judas i kamaot klia smoltaem bifo we Jisas i ded. Jisas mo ol disaepol blong hem, inkludum Meri mo sista blong hem Mata, oli go kakae long haos blong Saemon we fastaem i gat leprosi. Long taem ya, Meri i girap mo i kafsaed oel we i smel gud olsem senta long hed blong Jisas. Oel ya praes blong hem i sas we i sas. Be Judas mo ol narafala disaepol oli no glad long samting ya. Maet ol narafala disaepol oli ting se i moa gud oli salem senta ya mo yusum mane blong hem long wok blong prij. Be Judas i gat defren tingting. “Hem i man blong stil,” mo i wantem stilim mane long bokis. Mo from we hem i gat griri fasin, hem i salem Jisas long praes blong wan slef.—Jon 12:2-6; Mat. 26:6-16; Luk 22:3-6.

14. ?Olsem wanem wan kapol i folem tok ya long Luk 16:13?

¹⁴ Jisas i rimaenem ol man blong hem long stamba trutok ya se: “Yufala i no save kam slef blong God mo long semtaem yufala i slef blong Mane.” (Ridim Luk 16:13.) Mo hemia i stret yet tede. Traem luk olsem wanem wan kapol long Romania i folem tok ya blong Jisas. Oli askem tufala blong go wok smoltaem long wan rij kantri. Tufala i talem se: “Mitufala i gat bigfala lon blong pembak long bang, so fastaem mitufala i ting se niufala wok ya i wan blesing we i kam long Jehova.” Be i gat wan problem. Sipos tufala i akseptem wok ya, bambae tufala i no gat taem blong mekem wok blong Jehova. Afta we tufala i ridim stadi ya “Stap Tru Oltaem Wetem Wan Tingting Nomo Long Hat Blong Yumi,” we i stap long Wajtaoa blong 15 Ogis 2008, tufala i mekem wan desisen. Tufala i se: “Sipos samting we i pulum mitufala blong go, hemia blong winim moa mane, hemia i min se wok blong Jehova  bambae i stap long seken ples. Mo i sua se bambae mitufala i no moa fren gud wetem Jehova.” Taswe tufala i no akseptem wok ya. ?Wanem i hapen? Brata i faenem wan wok long kantri blong tufala we i naf blong sapotem tufala. Sista i se: “Han blong Jehova i neva sot.” Kapol ya i glad tumas se oli luk Jehova olsem Masta blong olgeta, be i no mane.

15. ?From wanem yumi sua se yumi save kamaot long trap blong Setan?

¹⁵ Sipos yumi luksave se yumi foldaon finis long trap ya blong kam praod mo griri, yumi stil save kamaot. ?From wanem? Pol i talem se olgeta we Devel i “kasem olgeta finis” oli save kamaot yet long trap blong hem. (2 Tim. 2:26) Hemia nao samting we Deved i mekem. Hem i lesin long strong advaes we Natan i givim long hem, hem i tanem tingting blong hem, mo i traehad blong fren gud wetem Jehova bakegen. Yumi no mas foget se Jehova i gat moa paoa i bitim Setan. Taswe, sipos yumi letem Jehova i halpem yumi, bambae yumi save ronwe long eni trap blong Devel Setan.

16. ?Wanem i save halpem yumi blong ronwe long ol trap blong Setan?

¹⁶ I moa gud blong no gat fasin ya blong praod mo griri, i bitim we yu foldaon long hem mo traehad blong kamaot. Jehova nomo i save halpem yumi blong ronwe long ol trap ya. !Yumi no mas gat tingting se yumi strong mo bambae yumi neva foldaon! Sam man blong Jehova we oli mekem wok blong hem longtaem finis, olgeta tu oli bin kam praod o griri. So askem Jehova evri dei blong halpem yu blong luk sipos ol nogud fasin ya oli stat blong gat paoa long tingting mo long aksen blong yu. (Sam 139:23, 24) !Yu mas traehad blong no kam praod o griri!

17. ?I no longtaem wanem bambae i hapen long Devel Setan?

¹⁷ Longtaem finis i kam, Setan i stap hanting from ol man blong Jehova. Mo i no longtaem, bambae oli fasem hem mo distroem hem. (Rev. 20:1-3, 10) Yumi wantem tumas se dei ya i kam hariap. Be go kasem taem ya, yumi mas lukaot gud long ol trap blong Setan. Yumi mas wok had blong no kam praod o griri. Yumi mas gat strong tingting blong “agensem Devel, mo hem bambae i ronwe long [yumi].”—Jem. 4:7.