1. Wai wi ku seh dat Saytan da laik wahn honta?

WAHN seeryos honta waahn kech er kil wahn animal. Laik weh wan a Joab soa-kaal fren seh, wahn honta kud yooz difrent kaina chrap fi du dat. (Job 18:8-10) How wahn honta ku chrik wahn animal fi mek ih geh kech eena ih chrap? Hihn wuda wach di animal gud fi si wehpaat ih goh, weh ih laik, ahn wat wuda bee di bes chrap fi yooz. Saytan da laik da honta. Hihn wach wi gud fi si wehpaat wi goh ahn weh wi laik. Den hihn set wahn chrap fi wee ahn hoap dat ih wahn kech wi wen wi noh ekspek it. Bot, di Baibl tel wi dat if wi geh kech eena Saytan chrap, wi ku eskayp. Ih aalso teech wi how fi mek shoar dat wi noh geh kech.

2. Wat da too a Saytan bes chrap?

² Too a Saytan bes chrap da praid ahn greed. * Saytan di yooz dehnya chrap fi towznz a yaaz. Hihn da laik sohnbadi weh hont fi berd. Ih chrik dehn mek dehn geh kech eena ih chrap dehn er ih kech dehn eena wahn net. (Ps. 91:3) Bot wee noh haftu geh kech eena Saytan chrap dehn. Wai nat? Bikaaz Jehoava don tel wi weh kaina chriks Saytan yooz.—2 Kor. 2:11.

3. Wai Jehoava mi inklood egzamplz eena di Baibl a sohn peepl weh mi geh prowd ahn greedi?

³ Jehoava teech wi how daynjaros praid ahn greed ku bee wen ih tel wi bowt weh hapm tu som a ih servant  dehn eena di paas. Dehndeh egzampl teech wi how fi mek shoar wi noh geh kech eena di saym chrap. Wi wahn si how Saytan mi aybl fi chrap peepl weh mi-di serv Jehoava fi wahn lang taim. Bot dat noh meen dat wi haftu geh kech eena Saytan chrap dehn. Jehoava inklood dehndeh egzampl eena di Baibl “fi waan wee.” (1 Kor. 10:11) Hihn noa dat dehndeh egzampl ku teech wi how fi mek shoar wi noh geh kech er how fi eskayp if wi doo geh kech.

4. Weh ku hapm tu wi if wi prowd?

⁴ Saytan waahn mek wi bee prowd, kaaz den wee wahn bee jos laik hihn an wi wahn looz owt pan evalastin laif. (Prov. 16:18) Dats wai di apasl Paal mi waan wi dat wahn persn ku “geh tu prowd ahn fays di saym jojment laik di Devl.” (1 Tim. 3:6, 7) Dat ku hapm tu eni wan a wi, weda wi jos kom eena di chroot er if wi di serv Jehoava fi yaaz.

5. Akaadn tu Ecclesiastes 7:16, 20, how wahn persn mait shoa dat dehn prowd?

⁵ Prowd peepl selfish. Saytan chrai mek wi tink moa bowt wiself dan wi tink bowt Jehoava, espeshali wen wi ga prablemz. Fi egzampl, sohnbadi eva akyooz yu fi du sohnting weh yu neva du? Enibadi eva chreet yu eena wahn way weh neva fyaa? Saytan wuda lov it if wi blaym Jehoava er wi bradaz ahn sistaz. Hihn waahn wi tink dat di onli way fi fiks di prablem da fi du tingz wi oan way insteda fala di gaidans weh Jehoava gi wi eena di Baibl.—Reed Ecclesiastes 7:16, 20.

6. Weh wi ku laan fahn weh mi hapm tu wahn sista weh liv da di Netherlands?

⁶ Tink bowt weh mi hapm tu wahn sista weh liv da di Netherlands. Shee mi geh foschraytid wid adaz oava eni lee mistayk. Afta sohntaim, shee kudn tek it nohmoh. Ih seh: “Ah mi feel veri loanli ahn Ah kudn chaynj how Ah mi feel bowt di bradaz an sistaz. Ah mi tel  mi hozban dat wi haftu moov tu wahn nada kangrigayshan.” Den shee mi wach di Maach 2016 JW Braadkyaastin proagram pahn jw.org. Da proagram mi gat een sohn gud sojeshan bowt how fi get lang wid adaz. Di sista seh: “Ah mi si dat Ah mi haftu tek wahn aanis ahn hombl luk pahn mi oan mistayk dehn insteda chrai chaynj di bradaz ahn sistaz eena di kangrigayshan. Di proagram mi help mi fi tink moa bowt Jehoava ahn fi hihn atariti.” Yu si di point? Wen yoo goh chroo wahn chraiyal, kip aan di tink bowt Jehoava. Bayg ahn fi help yu si adaz di way hihn si dehn. Yu hevnli Faada si di mistayk dehn weh dehn mek, bot hihn stil wilin fi fergiv dehn. Hihn waahn yoo fi du di saym ting.—1 Jan 4:20.

7. Weh mi hapm tu King Yuzaiya?

⁷ King Yuzaiya a Jooda mi geh prowd ahn sayka dat ih neva lisn tu kongsl fahn adaz an ih mi du sohnting weh ih neva sopoaz tu du. Yuzaiya da-mi wahn man weh mi ga lata skilz. Ih mi win lata waar, bil lata siti, an oan lata faam. “Di chroo Gaad mi bles ahn.” (2 Chron. 26:3-7, 10) Di Baibl seh:“Bot az soon az ih mi geh powaful, ih haat geh prowd. Dis mi leed ahn tu ih oan dischrokshan.” Jehoava mi koman dat onli di prees dehn mi fi aafa insens da di templ. Bot King Yuzaiya gaan da di templ an aafa insens eevn doa hihn neva ga di rait fi du dat. Jehoava mi geh beks wid ahn an ih giv ahn leprosi. Hihn mi ga leprosi fi di res a ih laif.—2 Chron. 26:16-21.

8. How 1 Korintyanz 4:6, 7 ku help wi fi noh geh prowd?

⁸ Yu tink wi ku geh prowd an sin laik Yuzaiya? Noatis weh mi hapm tu José. Hihn da-mi wahn gud bizniz man ahn wahn gud elda eena di kangrigayshan. Hihn yoostu gi taak da di asembli an kanvenshan dehn an eevn serkit oavaseeyaz yoostu aks ahn fi advais. Bot hihn seh: “Ah mi chros mi oan skilz an mi oan ekspeeryens. Ai neva pen pahn Jehoava, Ah mi tink dat Ai schrang, soh Ah neva lisn tu di waanin ahn kongsl weh Jehoava gi mi.” José mi komit wahn seeryos sin an ih mi geh disfeloship. Wahn fyoo yaaz agoa ih mi kohn bak eena di chroot. Now  ih seh: “Jehoava teech mi dat di pozishan weh wi ga noh impoatant, di impoatant ting da fi du weh hihn aks wi fi du.” Soh, mek wi memba dat eni talent weh wi gat er eni privilij weh wi gat eena di kangrigayshan kohn fahn Jehoava. (Reed 1 Korintyanz 4:6, 7.) If wi prowd, Jehoava noh wahn ga no yoos fi wi.

9. Weh Saytan an Eev mi du sayka greedi?

⁹ Saytan da praabli di greediyis persn weh yu ku tink bowt. Wen hihn da-mi wahn aynjel, ih mi praabli ga wahn lata nais privilij. Bot ih neva satisfai wid weh ih mi gat, hihn mi waahn moa. Hihn mi waahn peepl wership hihn insteda wership Jehoava. Saytan waahn mek wi bee jos laik hihn, soh ih chrai mek wi ga di dizaiya fi aalwayz waahn moa tu. Di fers taim ih mi chrai dat, da-mi wid Eev. Jehoava mi gi Eev an ih hozban aal kaina food fi eet. Hihn tel dehn dat dehn kuda mi eet “fahn evri chree weh deh eena di gyaadn” eksep wan. (Gen. 2:16) Stil, Saytan mi chrik Eev fi mek shee tink dat shee mi need fi eet fahn da wan chree weh ih neva sopoaz tu eet fram. Eev neva apreeshiayt weh ih mi gat; shee mi waahn moa. Ahn wee noa weh hapm sayka dat. Shee mi sin ahn den ih ded.—Gen. 3:6, 19.

10. Weh mi hapm wen King Dayvid mi geh greedi?

¹⁰ Jehoava mi gi Dayvid lata tingz, inkloodin moni, pozishan, an vikchri oava lata ih enimi dehn. Dayvid ihself mi seh dat di gif dehn fahn Jehoava da-mi “tu moch fi mek ih tel evribadi!” (Ps. 40:5) Bot Dayvid mi geh greedi, an ih mi waahn moa dan weh Jehoava mi gi ahn. Eevn doa Dayvid mi ga lata waif, hihn mi alow di rang dizaiya fi waahn wahn nada man waif fi groa eena ih haat. Di uman da-mi Bat-sheeba, an ih hozban da-mi Yuraiya di Hitait. Dayvid mi ga seks wid Bat-sheeba, an shee mi geh pregnant. Az if dat neva bad inof, Dayvid mi aalso set op Yuraiya fi mek dehn kil ahn! (2 Sam. 11:2-15) How Dayvid kuda mi du sohnting laik dat? Weh hihn mi-di tink, dat Jehoava neva mi wahn si ahn? Eevn doa Dayvid mi serv Jehoava fi wahn lang taim, hihn mi geh greedi an sayka dat ih  mi sofa wahn lat. Laytaraan, Dayvid mi kanfes ih sin an ih ripent. Hihn mi veri tankful dat Jehoava fergiv ahn!—2 Sam. 12:7-13.

11. Akaadn tu Ifeezhanz 5:3, 4, weh ku help wi fi noh bee greedi?

¹¹ Weh wi laan fahn Dayvid egzampl? Wi laan dat if wi noh waahn bee greedi, wi haftu bee tankful fi aal weh Jehoava gi wi. (Reed Ifeezhanz 5:3, 4.) Wi haftu satisfai wid weh wi gat. Wen wi staat stodi di Baibl wid sohnbadi, wi mait teech dehn fi tink bowt wan blesin weh Jehoava gi dehn ahn tank ahn far it. If sombadi du dat evri day fi wan week, dat meenz dehn wahn pray fi sevn difrent blesinz weh dehn get fahn Jehoava. (1 Tes. 5:18) Yoo eva chrai dat? If yu meditayt pahn weh aal Jehoava don du fi yu, dat wahn help yu fi bee tankful. Ahn wen yu tankful, yu satisfai wid weh yu gat. Ahn wen yu satisfai, yu noh wahn bee greedi.

12. Weh Joodas Iskariyat mi du sayka greedi?

¹² Joodas Iskariyat mi geh greedi an sayka dat ih mi bichray Jeezas. Bot Joodas neva aalwayz stan laik dat. (Look 6:13, 16) Jeezas mi pik hihn fi bee wan a ih apasl. Fi wahn taim, Joodas da-mi wahn rispansabl persn, hihn mi in chaaj a di moni baks. Jeezas an ih apasl yoostu yooz da moni fi sopoat dehn preechin werk. Soh da moni da laik fi wee doanayshan tu di werlwaid werk tudeh. Bot afta wahn wail, Joodas mi staat tu teef fahn di moni baks, eevn doa hihn mi aalwayz hyaa Jeezas di waan peepl noh fi bee greedi. (Maak 7:22, 23; Look 11:39; 12:15) Joodas neva lisn tu dehndeh waanin.

13. Wen Joodas mi staat tu shoa dat hihn mi-di geh greedi?

¹³ Joodas mi staat tu shoa dat ih mi-di geh greedi noh tu lang bifoa Jeezas mi ded. Saiman weh yoostu bee wahn lepa, mi invait Jeezas an ih disaipl dehn da ih hows fi eet. Mayri ahn Marta mi dehdeh wid dehn. Ahn wail dehn mi-di eet, Mayri mi get op ahn poar ekspensiv perfyoom pahn Jeezas hed. Joodas ahn di ada disaipl dehn mi geh beks. Maybi di ada disaipl dehn mi-di tink dat dehn kuda mi sel da perfyoom ahn yooz di moni fi sopoat dehn preechin werk. Bot Joodas mi geh beks fi wahn difrent reezn. Hihn “da-mi wahn teef” an ih mi waahn tek di moni fahn di moni baks. Laytaraan, bikaaz ih mi greedi, Joodas mi bichray Jeezas fi moni.—Jan 12:2-6; Mach. 26:6-16; Look 22:3-6.

14. How wahn kopl mi fala di kongsl da Look 16:13?

¹⁴ Jeezas mi tel ih falowaz: “Unu kyaahn slayv fi Gaad ahn fi Richiz saym taim.” (Reed Look 16:13.) Da kongsl stil chroo tudeh. Noatis weh wahn kopl fahn Romania mi du fi fala Jeezas kongsl. Dehn mi geh wahn chaans fi goh werk da wahn nada konchri wehpaat dehn kuda mi mek moa moni. Dehn seh, “Wee mi oa di bank wahn lata moni, soh fers wee mi tink dat dis jab da-mi wahn blesin fahn Jehoava.” Bot di prablem da-mi if dehn tek di jab, dehn wuda mi ga les taim fi serv Jehoava. Soh dehn reed di aatikl “Stay Laayal tu Jehoava Wid Aala Yu Haat” eena Di Wachtowa a Aagas 15, 2008, ahn den dehn disaid weh dehn mi wahn du. Dehn seh: “If wee mi moov tu da neks konchri jos fi mek moa moni, wi wuda di put wi rilayshanship wid Jehoava sekant plays. Ahn wee mi noa fi shoar dat wi rilayshanship wid Jehoava mi wahn sofa.” Soh dehn neva tek di jab. Weh mi  hapm? Di hozban mi fain wahn jab eena ih hoam konchri weh mi pay inof fi gi dehn weh dehn need. Di waif seh: “Jehoava aalwayz help fi hihn peepl.” Dis kopl hapi dat dehn chooz fi serv Jehoava insteda goh afta moni.

15. Wai wi ku bee shoar dat ih pasabl fi eskayp fahn Saytan chrap dehn?

¹⁵ Weh wi shuda du if wi jrap eena Saytan chrap a praid ahn greed? Wee ku eskayp! Paal mi seh dat enibadi weh di Devl kech ku stil eskayp. (2 Tim. 2:26) Dat da weh mi hapm wid Dayvid, hihn mi lisn tu di schrang kongsl weh Naytan mi giv ahn. Ih mi ripent, an ih mi fiks ih frenship wid Jehoava. Aalwayz memba dat Jehoava schranga dan Saytan. Soh if wi aksep Jehoava help, wi wahn ku eskayp fan eni chrap weh di Devl set fi wee.

16. Weh wahn help wi fi noh geh kech eena Saytan chrap dehn?

¹⁶ Ih gud dat yu ku eskayp fahn Saytan chrap dehn, bot ih wuda bee moch beta if yu noh geh kech ataal. Wi ku onli du dat wid Gaad help. Bot wi neva waahn tink dat wee soh schrang dat wi wuda neva geh prowd er greedi! Eevn peepl weh serv Jehoava fi wahn lang taim mi geh prowd er greedi. Soh bayg Jehoava evri day fi help yu fi si if dehnya oagli kwalitiz di afek how yu tink ahn weh yu du. (Ps. 139:23, 24) Chrai yu bes fi noh geh prowd er greedi!

17. Weh wahn soon hapm tu wi enimi, di Devl?

¹⁷ Fi towznz a yaaz, Saytan di hont. Bot soon hihn wahn geh chayn op an ih wahn geh dischrai. (Rev. 20:1-3, 10) Wi kyaahn wayt fi di day dat hapm. Til da day kohn, kip pahn yu gyaad gens Saytan chrap dehn. Werk haad fi noh geh prowd er greedi. Mek op yu main fi “stan op gens di Devl, an ih wahn ron fahn yu.”—Jay. 4:7.