1. Ida liña genegegua lan Satanási luma aban agaliruhati?

LE LABUSENRUBEI aban agaliruhati: lun lárügüdüni o láfaruni líliru hilagubei. Lun libihini, gayaraati layusurun ámuñegueinarügü sádara, kéiburi to liridúboun aban hádangiñe lumadagu Hobu le yeebei (Hob. 18:8-10). Ida liñati ladügün lun labürüha animaalu tidoun lisadaran? Lau laturiahani, idan liña lan lamufurun, ka lan hínsiñebei lun luma ida luba lan lárügüdüni sin líchugun fe. Ligiaméme ladügübei Satanási. Téniti woun ani aturiaha lumutiwa giñe lun lasubudiruni ida liña lan wámufurun luma lun lasubudiruni le hínsiñebei woun. Ábanti líchugun aban sádara wabá sin wíchugun fe. Íbini ítara, ariñagatu Bíbülia woun kaba lan wadüga lun mábürühan wamá tidoun lisadaran. Ánhawa ábürüha, kaba wadüga lun wesefurun tídangiñe.

2. Katoun san bián sádara to layusuruboun Satanási?

² Bián tídangiñe sádara tótima layusuruboun Satanási anaaguni unguaü luma igaaduaü. * Barühali saragu milu irumu adügei ani buiti lidin lun. Ítara liña kei aban agaliruhati dunuru le achawahabaliña líliru tidoun sádara aramudaguatu (Sal. 91:3). Lau sun mígiraguagüdün wamá woungua lun lanügün Mafia lúgaaru wawagu tau lisadaran, arufuda larun Heowá woun ka lan burí lisadaraboun (2 Ko. 2:11).

3. Ka uagu lígira Heowá lun labürüdün tidan Bíbülia hawagu gürigia ha ígiraguagüdübaña houngua lun anaaguni unguaü luma lun igaaduaü?

³ Ka aban lídangiñe igaburi le ídanbei leweridirawa Heowá luagu anaaguni unguaü luma igaaduaü? Lau lígiruni bürüwañu le hásügürübei amu lun wafurendeirun lídangiñe. Warihibei, ibiha lan Satanási lun héiguadun lubúeingu Heowá ha barühañabaña saragu dan eseriwida lun Heowá tidoun lisadaran. Mini lan san le máraninaali  lan hawaguti? Ua. Ígirati Heowá lun lerederun sügǘ burí le bürüwañu tidan Bíbülia “keisi eweridihani woun” (1 Ko. 10:11). Subudi lumuti gayara lan wafurendeirun lídangiñe, lun wounigirún tuéi lisadaran Mafia o lun mábürüha wamá tidoun.

4. Ka idoun gayara lan lanügüniwa anaaguni unguaü?

⁴ Busenti Mafia lun warufudun anaaguni unguaü. Subudi lumuti, ánhawa lan ígiraguagüda woungua lun igaburi le, ábanme ítara wama kei ligía, ani ábame giñe weferidiruni ibagari magumuchaditi (Ari. 16:18). Ligía leweridihanbei Pábulu, anhein lan ígiraguagüda aban gürigia lungua lun anaaguni unguaü, ábame lábürüha “lidoun íñarawaguni le gádanbalin Mafia” (1 Tim. 3:6, 7). Gayaraati giñe lasuseredun katei le lun furumiñe guánarügü wádangiñe, meberesenga anhein lǘhadiwa lubéi o málügidiwa lan eseriwida lun Heowá.

5. Kei lariñaguni Apurichihati 7:16, 20, ida liña lóuserun aban gürigia le barüguabei ungua?

⁵ Gürigia le barüguabei ungua luouguounrügüñein lasaminara. Áfaaguati Satanási lun wasaminarun wawouguounrügü lubaragiñe wasaminarun luagu Heowá, dántima le gaturobulin wamá. Kei hénpulu, rúaali san duru huagun, luagu adügaadün lan somu katei le mama hadügün? Óuseraadün san lau marichaü lidan somu dan? Gúndaabei hamuga Satanási lun wíchuguni duru luagu Heowá o hawagu wábirigu. Lanwoun lira, busenti giñe lun wasaminarun buídutimabei lan wadügüni katei lau wagaburi sügǘ luéi waransehani katei según tadundehan Lererun Heowá (aliiha huméi Apurichihati 7:16, 20).

6. Ka larufudahabei le asuseredubei tun aban íbiri to lídangiñetu Ageiraü burí ǘnabuti woun?

⁶ Ariha waméi le asuseredubei tun aban íbiri to lídangiñeboun Ageiraü burí ǘnabuti to mawandunbalin hachara burí íbirigu. Darí lun mabusenrun tan terederun harugabu íbirigu hagía. Ariñagatu: “Aba nasandiragun nungua nábuguarügüñadina lan. Güreweiti meha nun lun narihiniña lidan amu igaburi. Ábanti nariñagun lun nani weiriei mosu lan wasansirun damuriguaü”. Ábanti tarihini programa le lánina JW  Broadcasting^®, le lánina ǘrüwa-hati irumu 2016, ñein lubéi láfuacha adundehani luáguti ida luba lan warihini hachara amu. Ani ariñagatu: “Aba níchugun fe lunti lan ǘnabugu nan luma lun nasubudiruni nichara, lubaragiñe náluaha lun íbirigu ban lan ha lídanbaña damuriguaü asansira. Íderagua lumutina programa lun nasaminarun luagu Heowá luma luagu liricha lun larúeiha”. Furanguti ariñahani le: dan le gaturobulin wamá, mabulieidagun wamá luéi Heowá; ayumuragua wamá lun, lun líderaguniwa arihaña íbirigu kei ligaburi larihiniña. Ariha lumuti Wáguchi le siélubei hachara; íbini ítara, aranseñu liña lun feruduna lanün, ani busenti giñe lun wadügüni ligiaméme (1 Huan 4:20).

7. Ka meha asuseredubei lun urúei Usíasi?

⁷ Adügati anaaguni unguaü lun lamahadún Usíasi, le lurúeite Hudá, lun ererehóuni luma lun ladügün aban katei le úati yu lan lun lun ladügüni. Aban meha wügüri gabafuti. Óudaraguati, saragu súdaragu, bunaguati burí muna adüga ligía aransehani lun lábunawagun nadü. “Ruti Wabungiute lubuidun dan lun” (2 Kro. 26:3-7, 10). Ariñagatu Bíbülia, “aba lanaagun lungua, ligíati katei ligía agünrinchagubalin”. Ariñagaali meha Heowá fádirirügübaña lan águdaha kupali tidan ténpulu. Aniha meha katei le láluahabei urúei Usíasi le barüguabei ungua ladügün. Ábati lagañidun Heowá luma, aba ladügün lun ladagarun lépüra luagu. Rédeiti lubeiti urúei Usíasi lau lépüra darí weyu le lóunwenbei (2 Kro. 26:16-21).

8. Ida liña líderaguniwa 1 Korintuna 4:6, 7 lun mábürüha wama lidoun anaaguni unguaü?

⁸ Gayaraati funa san wéiguadun lidoun lisadaran anaaguni unguaü, luma lun wadügün aban figóu wéiriti, ítara kei meha ladüga Usíasi? Ariha waméi lani Hosé hénpulu, buiti meha lidin lun lidan bísinisi ani aban meha wéiyaali lidan afiñeni ligía ani inebewati. Ruti meha yanu lidan adamurini, ani anihein burí meha dan álügüdagua hamuti óunigirutiña sirkuitu dan le ibidiñe lan somu katei houn. Lau sun lira ariñagati: “Afiñetina meha luagu le niyaraabei adüga luma le winwan naalibei. Aba níchuguni nanagan luagu Heowá. Saminatina yebe derebugulá nafiñen, ligía madügün nubéi gasu lau ererehóuni ni lau adundehani le ñǘbuinbei lúmagiñe Heowá”. Aba labugún Hosé ladüga ladügün aban figóu wéiriti. Fiu irumu guentó lúmagiñe lagiribudun lidoun inarüni. Ariñagati: “Arufudahaali Heowá nun súdinitimati lan lun ladügüniwa le lamuriahabei, mama iri le weresibirubei”. Aritagua waméi sun lan iyaraani le wawagubei luma  burí buligasion le weresibirubei lidan damuriguaü lúmagiñe lan Bungiu liabin (aliiha huméi 1 Korintuna 4:6, 7). Ánhawa anaagua woungua, mayusu lubadiwa Heowá.

9. Dandu Satanási kei Ewa ka hadügübei ladüga igaaduaü hamá?

⁹ Dan le wayanuhan luagu igaaduaü, másiñati wasaminaruña lan luagu Satanási. Sun meha aban lan hádangiñe lani Heowá ánheli ligía, chóuruti gunda lan lau saragu lubuidun chansi le lúmabei. Gama lumoun, busengili meha lanwoun. Ayumahati leresibiruni áhuduraguni le yuubei lun Heowá. Busenti Mafia lun ítara wamá kei ligía, ligía láfaagunbei lun magundan wamá lau le wámabei. Tun Ewa ladügei lira furumiñeti wéiyaasu. Lau ínsiñeni, ígirati Heowá lun teigin Ewa luma tani weiriei tídangiñe sun tídibu wewe to lídanboun fuluri-agei luéidigia tídangiñe aban, lun meigin hamá (Agu. 2:16). Gama lumoun, aba leyeedunu Satanási Ewa ani aba ladügün lun tafiñerun gayara lan teigin lídangiñe tin tídibu wewe to uáguboun lariñaga Bungiu lun meigin tan. Meteingirun tumuti Bungiu lau le rulaalibei tun; busentün meha lanwoun. Subudi wamuti ida liña lan lagumuchun sügǘ le: afigouhatu ani lau lásügürün dan aba tounwen (Agu. 3:6, 19).

10. Ida liña léiguadun urúei Dawidi tidoun lisadaran igaaduaü?

¹⁰ Ariha waméi likesin urúei Dawidi. Ruti meha Heowá saragu katei lun, kei burí irisini, uéiriguni luma lagañeiruniña saragu láganigu. Seremei lumuti meha Dawidi Heowá luagu sun le líchubei lun (Sal. 40:5). Ani ariñagati, sun lan le líchugubei Bungiu lun lóugiñe lan le gayara lubéi abahüda. Aba lebelurun igaaduaü lun Dawidi ani aba labulieiduni sun le ru lan linbei Heowá lun. Busengili meha lanwoun. Íbini meha gibe hamá lánigu weiriou, aba lagumeserun ayumaha aban würi, to lani amu wügüri weiriou aban meha katei le mínsiñebei lun Heowá. Betüsawé meha tíribei würi tuguya ani Uríasi meha líribei tani weiriei aban wügüri Etüna. Luouguounrügü Dawidi lasaminara, aba lagabaraha tuma Betüsawé ani aban tadageinadun. Lanwoun lira, aba ladügün aransehani lun láfaragüdüni Uríasi hilagubei (2 Sam. 11:2-15). Ka san uagu lasaminara? Masaminarunti san aríagu liña lan Heowá lun sun le ladügübei? Lárigiñe saragu dan úaragu lun Heowá, aba lígiraguagüdün lungua lun igaaduaü, ani wuribati lidin lun. Lau lásügürün dan aba lagufeseruni Dawidi  lifigoun ani aba lasaküriha. Ma lugundan ladüga feruduna lani Heowá lichara (2 Sam. 12:7-13).

11. Según Éfesuna 5:3, 4, ka láranibei igaaduaü?

¹¹ Ka wafurendeirubei lídangiñe le asuseredubei lun urúei Dawidi? Le láranibei igaaduaü weteingiruni Heowá súnwandan luagu le rula linbei woun (aliiha huméi Éfesuna 5:3, 4). Lunti gunda wamá lau le wámabei. Arufudahatiwa houn gürigia ha únbaña wíchiga aturiahani tídangiñe Bíbülia lun hasaminarun luagu somu katei buiti lidan habagari o lárigiñe aba heteingiruni Heowá luagu. Anhein hadüga le luagun aban dimaasu, danme hagumuchun ayanuhaadün luagu sedü ámuñegueinarügü katei (1 Tesa. 5:18). Ítara liña san wadügüni? Ánhawa araramagua asaminara luagu sun le adüga láalibei Heowá wawagun, geteingiradi báadiwa ani gunda báadiwa lau sun le wámabei. Ligíati méiguadun báadiwa tidoun lisadaran igaaduaü.

12. Ka san ladügübei Húdasi Isükarióte ladüga igaaduaü?

¹² Ayanuha wamá guentó luagu Húdasi Isükarióte. Buiti meha lumene Húdasi, gama lumoun aba lagarabaagun luagu lumaisturun (Luk. 6:13, 16). Mabulieida waméi, ligía lan meha aban hádangiñe lánigu Hesusu apostolugu. Chóuruti, afiñe lan meha luagu, lugundun lúmañoun meha gafu to ñein lubéi lareidahóua seinsu le ayusurúbei lun lapurichihóun. Gayaraati wariñagun budagia lan le ayusurúbei lun lapurichihóun lidan sun ubóu uguñe weyu. Súnwandan meha leweridihan Hesusu lun lan hóunigiragun houngua luéi igaaduaü (Mar. 7:22, 23; Luk. 11:39; 12:15). Gama lumoun, madügünti Húdasi gasu ani lau lásügürün dan, aba lagumeserun íweruha.

13. Ka dan larufudei Húdasi anihein lan igaaduaü tidan lanigi?

¹³ Murusun dan lubaragiñe lounwen Hesusu arufuda laali meha Húdasi beluha lan meha igaaduaü tidoun lanigi. Aba meha lagunbirahani Simón le gawagubei lépüra, Hesusu hama lánigu disipulugu eiga lúbiñoun, ani haganagua anuhein meha María tuma Marta to tíbugaña. Sun añahán lan eiga, aba tásaarun María aba téserun ibiñein séruti lábulugun Hesusu. Húdasi hama ha híbiri disipulugu magundantiña luagu katei le. Saminatiña disipulugu gayara lan yebe layusurun seinsu le lun apurichihani. Gama lumoun magundanti Húdasi ladüga: “híweru lan” ani busenti meha líweruhani seinsu tídangiñe gafu. Murusun dan lárigiñe, aba ladügün igaaduaü lun laluguruni Húdasi, Hesusu lau lebegi aban idamuni (Huan 12:2-6; Mat. 26:6-16; Luk. 22:3-6).

14. Ida liña hayusuruni aban feru maríeitiña dimurei le lídanbei Lúkasi 16:13?

¹⁴ Aritaguagüda lumutiña Hesusu lánigu disipulugu luagu inarüni le: “Siñati leseriwidun aban gürigia houn bián iyubudirigu” (aliiha huméi Lúkasi 16:13). Ani húugili adundehani le uguñe weyu. Ariha waméi le hadügübei aban feru maríeitiña rumaniana lau hayusuruni dimurei le lariñagubei Hesusu dan le líchugubei aban wadagimanu houn lidan aban ageiraü rísiti. Ariñagatiña: “Mosu meha wafayeihan saragu seinsu le meha wafuredehabei tidan banku. Ligíati warihinbalin wadagimanu le kei aban abinirúni lúmagiñeti Heowá”. Gama lumoun, anihein aban turobuli: lagidarubei meha wadagimanu le hadaani luéi heseriwidun lun Heowá. Lárigiñe haliihani fánreinti le gíribei “Mantengámonos leales con un corazón unificado”, tídangiñe Garüdia Awisahatu to lánina 15 lidan widü-hati 2008, aba harihin kaba lan hadüga. Ariñagatiña: “Anhein wagañeirun lubéi saragu seinsu lébunabei wáguyun lidoun amu ageiraü, wíchuguñein wamadagua luma Heowá lidan libiaman lúgaaru. Chouru wamuti lagadeirubei lan meha katei le wamadagua luma Bungiu”. Ligía máhawabei wibihini wadagimanu ligía. Ka asuseredubei? Aba ladarirun aban wadagimanu lageira le gayaraabei ladügün lun lagañeihani  le lemegeirunbei. Ariñagatu lani weiriou: “Machatiti lúhabu Heowá”. Biángubei hagía gúndaatiña lau Heowá lan hayubudiribei mama lan seinsu.

15. Ka uagu chouru wabalin gayara lan wadisedun tuéi lisadaran Mafia?

¹⁵ Ánhawa íchiga fe abürühaadiwa lan tidoun lisadaran anaaguni unguaü luma igaaduaü, gayaraabei san wáfuridun ñéingiñe? Chóuruti gayaraabei lan? Ladüga ariñagati Pábulu ha lan éiguadubaña tidoun sádara to wínwanñu, gayara lan háfuridun tídangiñe (2 Tim. 2:26). Ligía ladügübei Dawidi: adügati gasu dan ladeinha Natán lun, aba lasaküriha aba lígiruni igaaduaü ani ábaya libihini lubuidun lumadagua luma Heowá. Mabulieida waméi wéiritimati lan lubafu Heowá luéi Satanási. Ánhawa ánhara lun lídehan Heowá, gayaraabei wanuraha tuéi furumiñeguarügü sádara to líchuguboun Mafia wabá.

16. Kaba íderaguawa lun mábürühan wamá tidoun lisadaran Satanási?

¹⁶ Ligíati, lubaragiñe wadisedun tuéi lisadaran Mafia, buítimati hamuga lun mayarafadun wama tun. Láurügübei lídehan Bungiu wibihei le. Gama lumoun, mafiñera wama wawougua. Íbini lubúeingu Heowá ha barühañabaña saragu dan eseriwida lun ígiraguagüdaaña houngua lun lebelurun anaaguni unguaü luma igaaduaü tidoun hanigi. Ligíati amuriaha waméi lídehan Heowá sagü weyu lun warihini anhein beluhali lubéi umenei burí le lidoun wasaminan luma tidoun wanigi (Sal. 139:23, 24). Houcha wamá lun méiguadun wamá tidoun burí sádara to.

17. Kaba asusereda yarafa madise lun Satanási le wágani?

¹⁷ Barühali Satanási saragu milu irumu éibaaha. Gama lumoun, yarafa madise lagürawaguba, laume lásügürün dan lagünrinchawaguba (Aruf. 20:1-3, 10). Busenhadiwa lachülürün weyu ligía! Sunme awanha lan agurabahei weyu ligía agagudúañu wamá lun mábürüha wamá tidoun lisadaran Satanási. Adüga waméi sun wayaraati lun mábürüha wamá lidoun anaaguni unguaü luma lun magumadirun lániwa igaaduaü. Aranse wamá lun gaganbadi wamá lun adundehani le: “Gagibugua humá luma Mafia, ábame lanurahan huéi” (Sant. 4:7).