1. Nganong ikakomparar nato si Satanas sa usa ka mangangayam?

ANG mangangayam dunay usa lang ka tumong—ang pagdakop o pagpatay sa iyang biktima. Mogamit tingali siyag lainlaing lit-ag o bitik, sama sa giingon sa usa sa mga nagpakaaron-ingnong maghuhupay ni Job. (Job 18:8-10) Unsay buhaton sa mangangayam aron malit-agan ang usa ka hayop? Iyang obserbahan ang hayop. Asa ni gaadto? Unsay ganahan ani? Unsa kahay pinakamaayong lit-ag para niini? Si Satanas parehas niana nga mangangayam. Iya tang ginaobserbahan. Bantayan niya kon asa ta moadto ug kon unsay atong hilig. Dayon mogamit siyag lit-ag ug manghinaot siya nga mabitik ta niana nga dili ra makabantay. Bisan pa niana, ang Bibliya nagpasalig nato nga kon malit-agan ta, puwede gihapon tang makaikyas. Nagtudlo sab ni kanato kon unsay atong himoon aron dili gyod ta malit-agan.

2. Unsa ang duha sa pinakaepektibong mga lit-ag ni Satanas?

² Ang duha sa pinakaepektibong mga lit-ag ni Satanas mao ang garbo ug kahakog. * Sa libolibo na ka katuigan, malamposong gigamit ni Satanas kining ngil-ad nga mga kinaiya. Sama siyag tiglit-ag ug langgam nga magdani sa iyang biktima ngadto sa bitik o laang. (Sal. 91:3) Pero makalikay ta sa lit-ag ni Satanas. Ngano? Tungod kay gipadayag ni Jehova kanato ang mga taktika nga gigamit ni Satanas.—2 Cor. 2:11.

3. Nganong gipasulat ni Jehova sa Bibliya ang mga pananglitan niadtong nalit-agan ni Satanas?

³ Ang usa sa mga paagi nga si Jehova nagpasidaan nato bahin sa garbo ug kahakog mao ang pagdasig nato nga konsiderahon  ang nahitabo sa pipila niya ka alagad, sa ingon, malikayan nato ang mga sayop nga ilang nahimo. Diha sa mga pananglitan nga atong hisgotan, matikdi nga nalit-agan ni Satanas bisan ang dugay nang mga alagad ni Jehova. Nagpasabot ba ni nga segurado na gyod tang malit-agan? Wala. Gipasulat ni Jehova kini nga mga pananglitan diha sa Bibliya ingong “pasidaan kanato.” (1 Cor. 10:11) Nahibalo siya nga makakat-on tag leksiyon gikan sa maong mga pananglitan, ug sa ingon, makalikay o makalingkawas ta sa mga lit-ag sa Yawa.

4. Unsay mahitabo kon mapasigarbohon ta?

⁴ Gusto ni Satanas nga mahimo tang garboso. Nahibalo siya nga kon mahimo tang garboso, mahisama ta niya, ug dili nato maangkon ang kinabuhing walay kataposan. (Prov. 16:18) Busa, si apostol Pablo nagpasidaan nga ang usa posible nga mahimong “mapasigarbohon ug makadawat sab sa paghukom nga nadawat sa Yawa.” (1 Tim. 3:6, 7) Puwede nang mahitabo kang bisan kinsa kanato, bag-o man ta sa kamatuoran o dugay nang nag-alagad kang Jehova.

5. Base sa Ecclesiastes 7:16, 20, sa unsang paagi tingali ikapakita sa usa nga siya garboso?

⁵ Ang tawong garboso hakog. Naningkamot si Satanas nga mahimo tang hakog pinaagi sa pag-impluwensiya kanato aron magpokus ta sa atong kaugalingon imbes kang Jehova, ilabina sa dihang mag-atubang tag mga problema. Pananglitan, ikaw ba sayop nga giakusahan? O gitratar ka ba nga dili patas? Gusto ni Satanas nga basolon nimo si Jehova o ang mga igsoon. Ug gusto sa Yawa nga maghunahuna ka nga ang bugtong solusyon sa problema mao ang paghimo sa mga butang sa imong paagi imbes sundon ang giya ni Jehova diha sa iyang Pulong.—Basaha ang Ecclesiastes 7:16, 20.

6. Unsay imong nakat-onan sa eksperyensiya sa usa ka sister sa Netherlands?

⁶ Tagda ang eksperyensiya sa usa ka sister sa Netherlands kinsa naglagot sa ubang igsoon tungod sa ilang kasaypanan. Nakadesisyon siya nga dili na makig-uban kanila. “Naguol kaayo ko ug dili nako sila mapasaylo,”  siya miingon. “Giingnan nako ang akong bana nga kinahanglan ming mobalhin sa laing kongregasyon.” Dayon gitan-aw sa sister ang Marso 2016 nga programa sa JW Broadcasting^®. Ang programa naghatag ug pipila ka sugyot kon unsaon pag-atubang ang kasaypanan sa uban. Ang sister miingon: “Nakita nako nga kinahanglang matinud-anon ug mapainubsanon nakong susihon ang akong kasaypanan, imbes sulayan nga usbon ang mga igsoon sa kongregasyon. Ang programa nakatabang nako nga magpokus kang Jehova ug sa iyang pagkasoberano.” Nasabtan ba nimo ang punto? Kon duna kay problema, padayong magpokus kang Jehova. Hangyoa siya nga tabangan ka nga isipon ang uban sama sa iyang pag-isip kanila. Nakita sa imong langitnong Amahan ang ilang kasaypanan, pero andam siyang mopasaylo kanila. Gusto niya nga sundogon nimo siya.—1 Juan 4:20.

7. Unsay nahitabo kang Haring Uzzias?

⁷ Tungod sa garbo, si Haring Uzzias sa Juda wala modawat sa tambag ug mihimo sa butang nga dili niya angayng buhaton. Si Uzzias daghag nalampos. Malamposon siya sa pagpakiggubat, sa pagpanukod ug mga siyudad, ug sa pagpanguma. “Ang matuod nga Diyos naghimo kaniyang mauswagon.” (2 Cron. 26:3-7, 10) ‘Apan dihang gamhanan na siya, siya nahimong mapahitas-on nga miresulta sa iyang kadaot,’ ang Bibliya nag-ingon. Una pa niana, si Jehova nagsugo nga mga saserdote lang ang puwedeng maghalad ug insenso diha sa templo. Pero si Haring Uzzias miadto sa templo aron maghalad ug insenso bisag wala siyay katungod sa paghimo niana. Si Jehova wala malipay ug gihampak niyag sanla ang maong mapahitas-ong tawo. Si Uzzias nagpabiling sanlahon hangtod sa iyang kamatayon.—2 Cron. 26:16-21.

8. Base sa 1 Corinto 4:6, 7, sa unsang paagi malikayan nato ang pagkahimong garboso?

⁸ Posible ba nga mahimo tang garboso ug malit-agan sama kang Uzzias? Tagda ang nahitabo kang José. Siya malamposon kaayo nga negosyante ug nag-alagad ingong tinahod nga ansiyano sa kongregasyon. Mohatag siyag mga pakigpulong diha sa mga asembliya ug kombensiyon, ug ang mga tigdumala sa sirkito mangayog tambag niya. “Pero misalig ko sa akong kaugalingong katakos ug eksperyensiya,” siya miangkon. “Wala ko mosalig kang Jehova. Abi nakog lig-on ko busa wala ko maminaw sa mga pasidaan ug tambag ni Jehova.” Si José nakahimog  seryosong sala ug na-disfellow. Pipila ka tuig kanhi, siya napasig-uli. Karon, siya miingon: “Si Jehova nagtudlo nako nga dili posisyon ang importante, kondili ang pagtuman sa iyang gipabuhat kanato.” Atong hinumdoman nga kang Jehova gikan ang bisan unsang katakos nga atong nabatonan ug ang bisan unsang pribilehiyo nga atong nadawat diha sa kongregasyon. (Basaha ang 1 Corinto 4:6, 7.) Kon mapahitas-on ta, dili ta gamiton ni Jehova.

9. Tungod sa kahakog, unsay gihimo ni Satanas ug Eva?

⁹ Kon maghisgot tag kahakog, tingali si Satanas nga Yawa ang atong mahunahunaan. Ingong usa sa mga anghel ni Jehova, seguradong si Satanas daghag nindot nga mga pribilehiyo. Pero gusto niyag labaw pa. Gusto niya ang pagsimba nga angay lang ihatag kang Jehova. Gusto ni Satanas nga maparehas ta niya, busa naningkamot siya aron dili ta makontento sa atong nabatonan. Una nâ niyang gihimo dihang nakigsulti siya kang Eva. Si Jehova mahigugmaong nagtagana kang Eva ug sa iyang bana ug daghang makapatagbawng pagkaon—“gikan sa tanang kahoy sa tanaman,” gawas sa usa ka kahoy. (Gen. 2:16) Bisan pa niana, gilimbongan ni Satanas si Eva sa paghunahuna nga kinahanglan kining mokaon sa bunga sa gidili nga kahoy. Si Eva wala makontento sa iyang nabatonan; gusto niyag labaw pa. Nahibalo ta kon unsay sunod nga nahitabo. Si Eva nakasala ug ngadtongadto namatay.—Gen. 3:6, 19.

10. Sa unsang paagi nalit-agan si Haring David sa kahakog?

¹⁰ Tungod sa kahakog, si Haring David nakalimot kon unsay gihatag ni Jehova kaniya, apil ang bahandi, pagkainila, ug kadaogan batok sa iyang mga kaaway. Mapasalamatong giila ni David nga ang gihatag ni Jehova kaniya “dili . . . masugid sa kadaghan!” (Sal. 40:5) Pero dihay higayon nga nalimot si David kon unsay gihatag ni Jehova kaniya. Wala na siya makontento; gusto niyag labaw pa. Bisag daghan nag asawa si David, gitugotan niya nga maugmad sa iyang kasingkasing ang sayop nga tinguha para sa asawa sa laing tawo. Ang babaye mao si Bat-seba, ug ang iyang bana mao si Urias nga Hitihanon. Tungod sa kahakog, si David nakigsekso kang Bat-seba ug namabdos kini. Daotan kaayo ang gihimo ni David, pero mihimo siyag grabe pa niana. Iyang gihikay nga  mapatay si Urias! (2 Sam. 11:2-15) Nganong nahimo man to ni David? Nagtuo ba siya nga di siya makita ni Jehova? Bisag dugay na siyang nag-alagad kang Jehova, nadaog siya sa kahakog ug tungod niana nag-antos siya. Pero, makapalipay nga giangkon ra ni David ang iyang sala ug naghinulsol siya. Mapasalamaton kaayo siya nga gipasaylo siya ni Jehova!—2 Sam. 12:7-13.

11. Sumala sa Efeso 5:3, 4, unsay makatabang nato nga masuklan ang kahakog?

¹¹ Unsang leksiyon ang atong makat-onan sa nahitabo kang David? Atong makat-onan nga masuklan nato ang kahakog kon magmapasalamaton ta sa tanan nga gihatag ni Jehova kanato. (Basaha ang Efeso 5:3, 4.) Kinahanglang magmakontento ta sa atong nabatonan. Ang bag-ong mga Bible study gidasig nga maghunahuna ug usa ka espesipikong panalangin ug pasalamatan si Jehova niana. Kon himoon nâ sa usa ka tawo kada adlaw sulod sa usa ka semana, nagpasabot nga pito ka lainlaing butang ang iyang gipasalamatan kang Jehova. (1 Tes. 5:18) Ginahimo ba sab nâ nimo? Kon mamalandong ka sa tanan nga gihimo ni Jehova para kanimo, makatabang nâ nimo nga magmapasalamaton. Ug kon mapasalamaton ka, mahimo kang kontento. Dihang kontento ka, dili ka madaog sa kahakog.

12. Tungod sa kahakog, unsay gibuhat ni Judas Iskariote?

¹² Tungod sa kahakog, gibudhian ni Judas Iskariote si Jesus. Pero dili siya daotan sa sinugdan. (Luc. 6:13, 16) Gipili siya ni Jesus ingong apostol. Dayag nga si Judas may katakos ug kasaligan, kay siyay gipiyalan sa kahon sa kuwarta. Si Jesus ug ang mga apostoles naggamit sa maong kuwarta para sa ilang mga galastohan sa buluhatong pagsangyaw. Makaingon ta nga susama ni sa mga donasyon karon para sa tibuok kalibotang buluhaton. Pero paglabay sa panahon, si Judas misugod sa pagpangawat, bisan pag kadaghan niya nadungog ang pasidaan ni Jesus bahin sa kahakog. (Mar. 7:22, 23; Luc. 11:39; 12:15) Gibalewala ni Judas ang maong mga pasidaan.

13. Kanus-a nadayag ang kahakog ni Judas?

¹³ Nadayag ang kahakog ni Judas sa usa ka hitabo dihang hapit nang mamatay si Jesus. Si Jesus ug ang iyang mga tinun-an, apil na si Maria ug ang igsoon niini nga si Marta, maoy mga bisita ni Simon nga sanlahon. Samtang nangaon, si Maria mitindog ug iyang gibubo sa ulo ni Jesus ang humot ug mahal kaayo nga lana. Puwerteng sukoa ni Judas ug sa ubang tinun-an. Gibati tingali sa ubang tinun-an nga mas maayong ibaligya ang lana ug ang halin gamiton diha sa ministeryo. Pero lahi ang hinungdan sa kasuko ni Judas. “Siya kawatan,” ug gusto niyang mangawat ug kuwarta gikan sa kahon. Sa ulahi, tungod sa kahakog, gibudhian ni Judas si Jesus baylo sa bili sa usa ka ulipon.—Juan 12:2-6; Mat. 26:6-16; Luc. 22:3-6.

14. Sa unsang paagi gipadapat sa usa ka magtiayon ang tambag sa Lucas 16:13?

¹⁴ Gipahinumdoman ni Jesus ang iyang mga sumusunod niini nga kamatuoran: “Dili mahimo nga magpaulipon mo sa Diyos ug sa Bahandi.” (Basaha ang Lucas 16:13.) Tinuod gihapon nâ karon. Tagda kon giunsa pagpadapat sa usa ka magtiayon sa Romania ang giingon ni Jesus. Gitanyagan silag temporaryong trabaho didto sa mas dato nga nasod. “Dako mig bayranan nga utang sa bangko, busa sa sinugdan naghunahuna mi nga kini nga trabaho panalangin ni Jehova,” sila miingon. Pero, dihay problema. Ang trabaho makababag sa ilang pag-alagad kang Jehova. Human nila mabasa ang artikulong “Magpabiling Maunongon Pinaagi sa Paghupot ug Bug-os nga Kasingkasing,” sa Agosto 15, 2008 nga isyu sa Bantayanang Torre, nakadesisyon sila. Sila miingon:  “Kon moadto mi sa laing nasod aron mokitag mas dako, wala na namo himoang prayoridad si Jehova. Segurado mi nga madaot ang among relasyon kaniya.” Busa, gibalibaran nila ang maong tanyag. Unsay nahitabo? Ang bana nakakitag trabaho sa ilang kaugalingong nasod nga makasapar sa ilang mga panginahanglan. Ang asawa miingon: “Dili gyod mubo ang kamot ni Jehova.” Kini nga magtiayon malipayon kay gihimo nila si Jehova nga ilang Agalon imbes ang kuwarta.

15. Nganong makaseguro ta nga posibleng makaikyas ta sa mga lit-ag ni Satanas?

¹⁵ Komosta kon atong mamatikdan nga nahimo na tang garboso o hakog? Puwede tang magbag-o! Si Pablo miingon nga kadtong “nadakpang buhi” sa Yawa makaikyas gihapon sa lit-ag. (2 Tim. 2:26) Mao nay nahitabo kang David. Siya naminaw sa bug-at nga tambag ni Natan, naghinulsol sa iyang sala, ug naningkamot nga mapasig-uli ang iyang maayong relasyon kang Jehova. Ayaw gyod kalimot nga si Jehova mas gamhanan kay kang Satanas. Busa kon dawaton nato ang tabang ni Jehova, makaikyas ta sa bisan unsang lit-ag o bitik sa Yawa.

16. Unsay makatabang nato aron malikayan ang mga lit-ag ni Satanas?

¹⁶ Siyempre, imbes maningkamot nga makaikyas sa mga lit-ag o bitik ni Satanas, mas maayong likayan gyod nato kana. Mahimo lang nato kana sa tabang sa Diyos. Pero dili ta angayng mokompiyansa! Bisan ang dugay nang mga alagad ni Jehova nahimong garboso o hakog. Busa hangyoa si Jehova kada adlaw nga tabangan ka sa pagsusi kon ang maong dili maayong mga hiyas nagsugod na sa pag-impluwensiya sa imong hunahuna ug mga lihok. (Sal. 139:23, 24) Ayaw gyod pagpadaog niana!

17. Unsay hapit nang mahitabo sa atong kaaway, ang Yawa?

¹⁷ Sulod sa linibo na ka tuig, si Satanas ang mangangayam. Pero sa dili madugay, siya gaposon ug ngadtongadto laglagon. (Pin. 20:1-3, 10) Naghinamhinam ta nianang adlawa. Pero samtang wala pa nâ moabot, pagbantay sa mga lit-ag ni Satanas. Paningkamot nga dili ka madaog sa garbo o kahakog. Magmadeterminado nga ‘suklan ang Yawa, ug siya mokalagiw gikan kanimo.’—Sant. 4:7.