EKICWEKA C’OKWEGA 24
Nobasa kuhunga emitego ya Sitaane!
‘Baruge omu mutego gwa Sitaane.’—2 TIM 2:26.
ECESHONGORO CA 36 Niturinda Omutima Gwaitu
EMPINYE *
1. Ni bata oku Sitaane ari nk’omuhigi?
OMUHIGI naba ayine entego emwe kusha y’okukwata eki ahigire ninga shi akakita. Nabasa kukoresa emitego myingi nk’oku Bibuli eri kukigamba. (Yob 18:8-10) Ni bata oku omuhigi ari kubihabiha enyamishwa kugira ngu agikwate? Nayega aha nyamishwa. Nagezaho kumanya ahu ziri kuba ziri, ebi ziri kukunda, n’emitego eri kuzikwata. Sitaane na we ari nk’ogo muhigi. Natwegaho. Nareba ahu turi kukunda kuba turi n’ebi turi kukunda. Bwanyima natega omutego ogu ari kumanya ku guri kubasa kutukwata tutakimanyire. Konka na bwo, Bibuli netugambira ku n’obu twakugwa omuri ogo mutego, nitubasa kuguhunga. Nambwenu netugambira oku turi kubasa kwerinda kugwa omuri eyo mitego yona.
Okwetungura n’omururu ni byo ebi Sitaane ari kukoresa kandi akagira eki yahikaho (Reba paragurafu ya 2) *
2. Ni eha mitego ibiri eyi Sitaane ari kukunda kukoresa?
2 Emitego ibiri eyi Sitaane ari kukunda kukoresa ni okwetungura n’omururu. * Sitaane yamara emyaka myingi ari kukoresa eyo mitego kandi akagira eki yahikaho. Ari nk’abategi b’enyonyi. (Zab 91:3) Konka titushemerire kugwa omu mitego ya Sitaane. Ahabw’enki? Ahabw’okuba Yehova akatwereka emitego yona eyi Sitaane ari kukoresa.—2 Kor 2:11.
Nitubasa kwegera aha byokureberaho ebiri kurabura kitume twahunga emitego y’Omuregi (Reba paragurafu ya 3) *
3. Ahabw’enki Yehova yatire ebyokureberaho ebiri kurabura omuri Bibuli?
3 Yehova natwegesa akabi k’okwetungura n’omururu birabire aha byokureberaho by’abahereza beye b’omu bwire bwa kare. Twaza kureba oku Sitaane yategire n’abahereza ba Yehova abakuzire omu by’omwika. Eco shi nikimanyisa ku tutari kubasa kuhunga okwetungura n’omururu? Ingaha mazima. Yehova akata ebyo byokureberaho omuri Bibuli ngu biturabure. (1 Kor 10:11) Namanya ku ebyo byokureberaho biri kutwegesa oku turi kubasa kuhunga emitego y’omubi.
OMUTEGO G’OKWETUNGURA
Reba paragurafu ya 4
4. Ni enki ekiri kutubaho twayetungura?
4 Sitaane nayenda ngu twetungure. Namanya ngu twayetungura nituba nka we, rero tuferwe amagara agatahwaho. (Enf 16:18) Ni yo nshonga entumwa Pawulo yagambire ku omuntu ari kubasa ‘kwetungura, akagwa, akacwerwa orubanja nk’oru Sitaane yacwerirwe.’ (1 Tim 3:6, 7) Eco twena nikibasa kutuhikaho twaba tumazire obwire buce ninga shi obwire bwingi turi kuhereza Yehova.
5. Nk’oku kiri kugambwa omu Mubuurizi 7:16, 20, ni enki ekiri kwereka ku omuntu ari kwetungura?
5 Abantu abari kwetungura nibekunda. Sitaane nagezaho kutuma twayekunda kituma twayetekatekaho munonga twaba twine ebizibu. Ecokureberaho: Mbehi barakubeherireho? Mbehi barakutwarize kubi? Sitaane nashemererwa twata orubanja ahari Yehova ninga aha kitongore ceye. Kandi Omuregi nayenda ngu otekateke ku ori kubasa kukora ebintu oku ori kweyendera omu mwanya g’okukuratiza obuhabuzi bwa Yehova bw’omu Kigambo ceye.—Shoma omu Mubuurizi 7:16, 20.
6. Ni enki eki ori kubasa kwegera aha byahikire aha munyanyazi w’omuri Nezalandi?
6 Reba ecokureberaho ca munyanyazi otwire omuri Nezalandi owagwirwe kubi ahabw’okutahikirira kw’abandi. Akasharamu kwetantara abo bantu. Akagira ati: “Nkahurira ndi nyenka kandi ntari kubasa kuhindura enyehurira zange. Nkagambira omushija wange ngu tufurukire omu kindi kibina.” Bwanyima ogu munyanyazi akareba ekiganiro c’okwezi c’Okwakashatu 2016®. Eco kiganiro kikagamba ebi turi kubasa kukora kugira ngu twehanganire okutahikirira kw’abandi. Ogo munyanyazi akongeraho ati: “Nkareba ku nshemerire kwecureza kandi nkatekateka aha nshobe zange omu mwanya g’okugezaho kuhindura benetata na banyanyazi b’omu kibina. Eco kiganiro kikankwasa kuta omutima ahari Yehova n’aha bushoborozi bweye.” Ebyo nibitwegesa ki? Wabugana ekigezo nk’eco, guma otire omutima ahari Yehova. Mushabe akukwase kureba abandi nk’oku ari kubareba. Tata w’omu iguru nareba enshobe zabo, konka naba ayetegwire kubasaasira. Eco ni co ari kwenda ngu n’iwe okore.—1 Yoh 4:20.
Reba paragurafu ya 7
7. Ni enki ecahikire aha Mugabe Uziya?
7 Okwetungura kukatuma Omugabe Uziya wa Yuda yayanga obuhabuzi kandi yakora omurimo ogutari ogweye. Uziya akakora ebintu byingi birungi. Akasingura entaro nyingi, yayombeka etawuni myingi kandi akaba ayine emisiri myingi. “Ruhanga akamuha omugisha.” (2 Bus 26:3-7, 10) Bibuli negira eti: ‘Konka ku yaherize kuhama, yagira amaryo, gamwita.’ Yehova akaba yaragire ngu abatambi babe ari bo abayosya obubane omuri hekalu. Konka Omugabe Uziya akarenga ahari eco kiragiro yaza omuri hekalu yabwosya. Yehova akitirwa ekiniga ogo mushija owabire ari kwetungura, yamuteza ebibembe. Uziya akaguma ayine ebibembe kuhisya obu yafire.—2 Bus 26:16-21.
8. Nk’oku biri kugambwa omu 1 Bakorinso 4:6, 7, ni bata oku turi kubasa kwerinda okwetungura?
8 Mbehi n’itwe okwetungura nikubasa kutuma twagwa omu mutego nk’ogu Uziya yagwiremu? Reba ecokureberaho ca José. Akaba ari omushubuzi w’amani kandi ari omuzehe ori kuhebwa ekitinisa omu kibina. Akaba nahereza toku omu biterane kandi abareberezi abari kutayayira ebibina bakaba nibamuronderaho obuhabuzi. Akagira ati: “Konka, nkatandika kweyesiga ekirenga. Nkaba ntacarondera obuhabuzi ahari Yehova. Nkatekateka ngu ngumire omu by’omwika catuma ntashuba kuhurira okurabura kwa Yehova n’obuhabuzi bweye.” José akakora ekibi c’amani kandi yabingwa omu kibina. Bwanyima y’emyaka myingi akagarurwa. Akagamba ati: “Yehova akanyegesa ku eki ari kureba nk’ec’omugasho atari omwanya ogu twine omu kibina, ahobwe ku ni okukora ebi ari kutushaba.” Nimureke tugume twijuke ku ebiconco byona ebi twine n’emirimo eyi twine omu kibina biri kuruga ahari Yehova. (Shoma omu 1 Bakorinso 4:6, 7.) Twaba turi kwetungura, Yehova tarije kutukoresa.
OMUTEGO G’OMURURU
Reba paragurafu ya 9
9. Omururu gukatuma Sitaane na Eva bakora ki?
9 Sitaane Omuregi nitumumanya nk’omunyamururu. Ahakuba yabire ari marayika murungi wa Yehova, nabasa kuba yabire ayine emirimo mirungi. Konka akaba ari kwenda eri kukira ahari eyo. Akaba ari kwenda ngu abantu bamuramye kandi Yehova ari we oshemerire kuramibwa. Sitaane nayenda ngu tube nka we, obwe rero nagezaho kutuma tutamarwa n’ebi twine. Akatandika kukikora obu yabihabihire Eva. Yehova akaba yahire Eva n’omushija weye ebyokurya ebiri kubamara ‘omu muti gona g’omu kibanja,’ oyihireho ekiti kimwe kusha. (Kut 2:16) Konka, Sitaane akabihabiha Eva yatuma yarya aha kiti eki babire bazibirwe kuryaho. Eva taramazirwe n’ebi yabire ayine, ahobwe akaba ari kwenda ebiri kukiraho. Ecabireho bwanyima nitukimanya. Eva akacumura kandi bwanyima yafa.—Kut 3:6, 19.
Reba paragurafu ya 10
10. Ni bata oku Omugabe Dawudi yagwire omu mutego g’omururu?
10 Omururu gukatuma Omugabe Dawudi yayebwa ebintu ebi Yehova yabire amuhire harimu obutungi, ekitinisa, n’okusingura abangi beye. Dawudi akaba namanya ku ebiconco bya Ruhanga ‘bitari kubasa kubarwa!’ (Zab 40:5) Konka, hine obu Dawudi yayebirwe ebi Yehova yabire amuhire. Akaba atacamarwa n’ebi yabire ayine, ahobwe akaba ari kwenda ebiri kukiraho. N’obu Dawudi yabire ayine abakazi abarengire ahari omwe, akikiriza ecetenge c’okukunda omukazi w’abandi caza omu mutima gweye. Ogo mukazi akaba ari Batisheba, kandi omushija weye akaba ari Uriya Omuhiti. Dawudi akanyama na Batisheba, rero Batisheba yagira enda. Dawudi akakora ekibi c’obushambani kandi yashuba yayitisa Uriya! (2 Sam 11:2-15) Ni enki eki Dawudi yabire ari kutekateka? Mbehi akatekateka ngu Yehova tari kubasa kumureba? N’obu yabire amazire emyaka myingi ari kuhereza Yehova omu bwesigwa, akagira omururu kandi camurugiramu obusaasi bwingi. Ekiri kushemeza ni oku Dawudi yayikirize ekibi ceye kandi akehana. Kikatuma Yehova yamusaasira!—2 Sam 12:7-13.
11. Tukuratize ebiri omu Baefeso 5:3, 4, ni enki ekirije kutukwasa kusingura omururu?
11 Ni enki eki turi kwegera ahari Dawudi? Nitusingura omururu twagumizamu kumwarwa na byona ebi Yehova yatuhire. (Shoma omu Baefeso 5:3, 4.) Tushemerire kumarwa n’ebi twine. Abegi ba Bibuli basya nitubahiga kutekateka aha migisha eyi Yehova ari kubaha kandi bakamusima. Omuntu yakora eco buri izoba, omu sande yona naba yamusimira ebintu mushanju ebitari kushushana. (1 Tes 5:18) Mbehi n’iwe okikoraga? Watekateka aha bintu byona ebi Yehova yakukorire, nikituma wamusima. Kandi waba ori omuntu ori kusima, nomarwa n’ebi oyine. Kandi wamarwa n’ebi oyine, torije kuba omunyamururu.
Reba paragurafu ya 12
12. Ni enki eki Yuda yakozire ahabw’omururu?
12 Omururu gukatuma Yuda Isikariyota yagambanira Yesu. Konka Yuda akaba atashangirwe ari omuntu mubi. (Luk 6:13, 16) Yesu akaba yamutorine nk’entumwa yeye. Yuda akaba ari omwesigwa ahakuba akaba nareberera akashanduku k’esente. Yesu n’entumwa zeye bakaba nibakoresa ezo sente omu kubona ebintu ebi babire bari kwetenga omu murimo g’okuburira. Zikaba ziri nk’esente z’okuyamba omurimo g’okuburira ezi turi kuhayo omuri obu bwire. Konka hine obu Yuda yabire nayiba ezo sente n’obu yabire ari kumanya okurabura oku Yesu yabire abagambire aha bikwatirine n’omururu. (Mak 7:22, 23; Luk 11:39; 12:15) Yuda akehuza oko kurabura.
13. Ni ryari obu omururu gwa Yuda gwarebekire?
13 Omururu gwa Yuda gukakizaho kurebeka hari kuburayo kace ngu Yesu ayitwe. Yesu n’abegi beye harimu Mariya, n’omurumuna weye Marita, bakatayayira Simoni omubembe. Ku babire nibarya, Mariya akashuka aha mutwe gwa Yesu amajuta g’obuguzi bwingi. Yuda n’abandi begi ba Yesu tibarakisimire. Abandi begi ba Yesu nibabasa kuba batekatekire ku ezo sente zabire zishemerire kukoresibwa omu murimo g’okuburira. Konka Yuda akaba ayine ekindi kitekateko. ‘Akaba ari omushuma,’ kandi akaba ari kwenda kwiba ezo sente omu kashanduku. Bwanyima, omururu gukatuma Yuda yagambanira Yesu aha sente nce.—Yoh 12:2-6; Mat 26:6-16; Luk 22:3-6.
14. Ni bata oku omushija n’omukazi weye batire omu nkora ebiri kugambwa omuri Luka 16:13?
14 Yesu akijusya abakurasi beye amazima agari kugira ngu: ‘Timuri kubasa kuhereza Ruhanga [n’eby’obutungi].’ (Shoma omuri Luka 16:13.) Ago gacari amazima n’omuri obu bwire. Reba oku omushija n’omukazi b’omuri Romaniya batire omu nkora obwo buhabuzi bwa Yesu. Bakahebwa omurimo g’obwire buce omu ihanga ry’erigiga. Bakagira bati: “Tukaba twine amabanja mingi ahari banka, obwe rero omu kubanza tukatekateka ngu ni ekiconco eki Yehova yabire atuhire.” Konka, gukaba guri omutego. Ogo murimo gukaba gurije kushisha obwire obu babire nibamara bari kukorera Yehova. Bwanyima y’okushoma ekicweka ekiri kugira ngu, Gumizamu kuba omwesigwa n’omutima gumwe, omu Munara g’Omurinzi gw’aha kiro ca 15 Okwamunana, 2008, bakakora ensharamu. Bakagira bati: “Kuri twagire omu ihanga erindi kugira ngu tukore esente, tukaba tutarije kuta obunywani bwitu na Yehova omu mwanya g’okubanza. Tukahika turi kumanya ku obunywani bwitu na Yehova bwabire burije kushishikara.” Obwe rero bakanga ogo murimo. Ni enki ecabireho bwanyima? Omushija akatunga omurimo omu ihanga ryeye ogwabire nigubaha ebi bari kwetenga. Omukazi akagira ati: “Omukono gwa Yehova ti mugufu.” Hati bine okushemererwa ahakuba bakata Yehova omu mwanya g’okubanza omu mwanya gw’esente.
YERINDE EMITEGO YA SITAANE
15. Ahabw’enki turi kwesiga tutari kubanganisa ku turi kubasa kuhunga emitego ya Sitaane?
15 Ni enki eki turi kubasa kukora twashanga turi kwetungura ninga turi abanyamururu? Nitubasa kugira ebi twahindura! Pawulo akagamba ku abu Sitaane ‘yakwasire’ bari kubasa kuruga omu mutego gweye. (2 Tim 2:26) Eco ni co Dawudi yakozire, ahakuba akahurira obuhabuzi bwa Nasani, yayehana omururu gweye kandi yashuba yagira obunywani na Yehova. Otariyebwa ku Yehova ayine amani agari kukira aga Sitaane. Obwe rero twayikiriza obuyambi bwa Yehova, nitwija kuhunga emitego y’Omuregi.
16. Ni enki ekirije kutukwasa kwerinda emitego ya Sitaane?
16 Mazima, nikiba kirungi twayerinda okwetungura n’omururu. Eco nitukibasa ahabw’obuyambi bwa Ruhanga. Konka titushemerire kweyesigwa ekirenga! N’abahereza ba Yehova abamukorire emyaka myingi bakagwa omu mutego g’okwetungura n’omururu. Obwe rero, shaba Yehova kugira ngu akukwase kureba yaba watandikire kugira eyo mitwarize mibi omu bitekateko n’omu bikorwa. (Zab 139:23, 24) Otariyikiriza kugira eyo mitwarize!
17. Ni enki ekiri hihi kuhika aha mwangi witu, ari we Omuregi?
17 Sitaane akamara emyaka myingi ari omuhigi. Konka juba aha nayija kusibwa kandi acwecerezibwe. (Kush 20:1-3, 10) Tutegerize n’ekihika obwo bwire. Konka butakahikire, gumizamu kuhunga emitego ya Sitaane. Tamu amani kugira ngu otagira omutwarize g’okwetungura n’omururu. Maririra ‘kurwanisa Sitaane, aryakuhunga.’—Yak 4:7.
ECESHONGORO CA 127 Oku Nshemereire Kutwaza
^ par. 5 Sitaane ari nk’omuhigi w’obwenge. Nagezaho kututega, obwire bwona obu twakuba tumazire turi kuhereza Yehova. Omuri eki kicweka, twaza kwega oku Sitaane ari kukoresa okwetungura n’omururu kugira ngu ashishe obunywani bwitu na Ruhanga. Nambwenu twaza kureba abantu bamwe abagwire omu mutego g’okwetungura n’omururu kandi turebe oku turi kubasa kwerinda eyo mitego.
^ par. 2 EBIGAMBO EBISHOBORWIRWE: Eki kicweka nikigamba munonga aha kwetungura, ni okugamba omuntu kuhurira ari kukira abandi, n’omururu, ni okugamba omuntu kuhurira ari kwetengera kimwe esente nyingi, ekitinisa n’ebindi.
^ par. 53 EKISHUSHANI: Mwenetata yayanga obuhabuzi ahabw’okwetungura. Omunyanyazi oyine ebintu byingi, konka ari kwenda ebiri kukiraho.
^ par. 55 EKISHUSHANI: Marayika wa Ruhanga aketungura kandi n’Omugabe Uziya na we ni ko okwe. Omururu ni go ogwatumire Eva yarya aha kiti eki yabire ezibirwe kuryaho, Dawudi yashambana na batisheba, kandi Yuda yayiba esente.
