1. Pwata sia tongeni aléllééi Satan ngeni emén chón ssárei man?

EMÉN chón ssárei man a mochen liapeni are nieló emén man. A tongeni áeá sókkopaten ssár usun chék met emén me lein ekkewe tipitipin chón oururu Hiop a fós usun. (Hiop 18:8-10) Ifa usun emén chón ssárei man a otupwaalong emén man lón an we ssár? A kan káéfichi napanapen ewe man. Ia a kan ló ie, met a kan sani, me met epwe paapa. Satan a usun ena chón ssárei man. A káéfichi napanapach, a silei ia sia ló ie, me met sia sani. Mwirin a féri an we ssár, me a áneánei pwe epwe liapenikich lón ewe atun sise fen tepereni. Iwe nge, ewe Paipel a erenikich pwe ika sia ttup sia chúen tongeni sú. A pwal áiti ngenikich ifa usun sipwe túmúnúkich pwe site ttup lón ekkena ssár.

2. Ikkefa án Satan kewe ruu ssár mi kon ngiir?

² Lamalamtekia me tipemmóng, ikkena án Satan kewe ruu ssár mi kon ngiir. * Ren fitengeréú ier, Satan a fen sópwéch le áeá ekkena napanap mi ngaw. A usun emén chón ssár mi otupwaalong ekkewe machchang lón an we nikáttup. (Jer. 5:26) Nge sia tongeni túmúnúkich seni án Satan ssár. Ifa usun? Jiowa a fen pwár ngenikich met ekkewe Satan a kan áeá le otupu aramas.​—2 Kor. 2:11.

3. Pwata Jiowa a apachaalong lón ewe Paipel pwóróusen chókkewe iir mi ttup lón ewe ssárin lamalamtekia me tipemmóng?

³ Jiowa a áiti ngenikich úkúkún efeiengawen lamalamtekia me tipemmóng ren an erenikich met a fis ngeni ekkóch néún kewe chón angang. Ina popun, sia tongeni túmúnú pwe site  pwal usur. Sipwe ppii ifa usun Satan a tufichin otupu pwal mwo nge ekkóch néún Jiowa kewe chón angang iir mi fen angang ngeni ren fansoun langattam. A itá wewe ngeni pwe ese tufich ach sipwe túmúnú pwe site lamalamtekia are tipemmóng? Aapw, esap ina. Jiowa a apachaalong ekkena pwóróus lón ewe Paipel pwe epwe eú minen ‘awewe fän itach.’ (1 Kor. 10:11) A silei pwe sia tongeni káé seniir me túmúnú are sú seni án Satan kana ssár.

4. Met a tongeni fis ngenikich ika sia lamalamtekia?

⁴ Satan a mochen ach sipwe lamalamtekia. A silei pwe ika sia mut ngeni lamalamtekia an epwe nemenikicheló, iwe sipwe usun, me epwe péút senikich ach ápilúkúlúkún manaw esemuch. (SalF. 16:18) Ina popun, ewe aposel Paulus a éúréúrakich pwe emén a tongeni “lamalamtekia o tolong lon kapwüng usun än ewe Tefil küna kapwüng.” (1 Tim. 3:6, 7) Ena mettóch a tongeni fis ngenikich meinisin, ese lifilifil ika kich minefélóng lón ewe enlet, are sia fen angang ngeni Jiowa ren fansoun langattam.

5. Me ren Än Salomon Afalafal 7:16, 20, met a pwári ika emén a lamalamtekia?

⁵ Aramas mi lamalamtekia ra achéchééi pwisin iir. Satan a sótun efisi ach sipwe achéchééi pwisinkich lap seni Jiowa, nge ákkáeúin atun a wor ach osukosuk. Áwewe chék, emén a fen tipimwáál ngonuk? Are emén a fen eáni féffér ese pwúng ngonuk? Satan epwe pwapwa ika ka tipimwáál ngeni Jiowa are pwiium kewe. Ewe Tefil a mochen óm kopwe ekieki pwe kataween chék óm kewe osukosuk, ina óm féri wóón pwisin óm, nge esap ren óm fiti án Jiowa kewe emmwen lón an we Kapas.​—Álleani Än Salomon Afalafal 7:16, 20.

6. Met ka tongeni káé seni pwóróusen ewe fefin Chón Kraist seni Netherlands?

⁶ Iei pwóróusen emén fefin Chón Kraist lón Netherlands sia tongeni káé seni. A mángaw ren féfférún ekkewe ekkóch lón ewe mwichefel ese sani. Ese chúen mochen chiechi ngeniir. A erá: “Ua fókkun tipitipingaw me use mochen omusereló. Ua ereni  pwúlúwei we pwe aupwele mwékút ngeni pwal eú mwichefel.” Iwe a katol ewe JW Broadcasting^® minen March 2016. A wor ekkóch kapasen emmwen lón ena Broadcasting wóón ifa usun sipwe likiitú ngeni apwangapwangen ekkewe ekkóch. Ena Chón Kraist fefin a erá: “A lamot ai upwe tipetekison me ekieki pwisin mwáálli kewe lap seni ai sótun siwili napanapen pwii kewe lón ai we mwichefel. Ena Broadcasting a álisiei le nefótófót wóón Jiowa me an pwúngún nemenem.” Met ka káé seni? Lupwen ka tolong lón eú sóssót, kopwe nefótófót wóón Jiowa. Sié ngeni an epwe álisuk le eáni an ekiek usun ekkewe ekkóch. Semom we lón láng a kúna ar kewe apwangapwang, nge a tipemecheres le omusereló. Iwe, a pwal mochen óm kopwe ina usun.​—1 Joh. 4:20.

7. Met a fis ngeni King Usia?

⁷ Pokiten Usia ewe Kingen Juta a lamalamtekia, iwe ese aúseling ngeni éúréúraen ekkewe ekkóch. Me a féri eú mettóch ese mumu ngeni an epwe féri. Usia emén mwán mi fókkun sipeéch. A win lón chómmóng maun, aú chómmóng telinimw, me a chómmóng an watteen atake. “Ewe Samol mi Lapalap a afeiöchü.” (2 Kron. 26:3-7, 10) Ewe Paipel a apasa: “Nge lupwen Usia a pöchökülela, a lamalamtekia pwe a tolong lon feiengau.” Jiowa a fen allúkú pwe ekkewe chék souasor a mumu ngeniir ar repwe keni ewe appach mi pwokkus lón ewe imwenfel. Nge King Usia a lamalamtekia le tolong me keni ewe appach mi pwokkus lón ewe imwenfel. Iwe, Jiowa ese pwapwa ren met a féri me a esemweni ena mwán mi lamalamtekia ren eú keinepan. Usia a keinepan lón unusen manawan.​—2 Kron. 26:16-21.

8. Ifa usun 1 Korint 4:6, 7, a álisikich pwe site lamalamtekia?

⁸ Lamalamtekia a pwal tongeni ssárekich usun chék an ssárei Usia? Iei pwóróusen José, i emén businessman mi fókkun win, nge pwal i emén mwán mi ásimaw lón ewe mwichefel. A kan eáni afalafal lón ekkewe mwichelap, me ekkewe chónemmwen mi wisen sáifetál ra kan kútta emmwen seni. José a erá: “Ua lúkúlúk wóón pwisin tufichi me wóón sileei. Use lúkúlúk wóón Jiowa. Tittipei pwe ua péchékkúl lón pekin ngún, ina popun use aúseling ngeni án Jiowa kewe kapasen éúréúr me emmwen.” José a ttur lón eú tipis mi fókkun watte, iwe a katowu. Lón ekkewe ier, a liwinsefál. Iwe iei alon: “Jiowa a fen áiti ngenikich pwe ach wiseni  eú wis, esap ina met a lamot, nge fen ina ach féri met a erenikich ach sipwe féri.” Sipwe chemeni pwe ekkewe tufich sia eáni me ekkewe wis sia wiseni lón ewe mwichefel, ra feito seni Jiowa. (Álleani 1 Korint 4:6, 7.) Ika sia lamalamtekia, Jiowa esap néúnéú kich.

9. Met tipemmóng a efisi ngeni Satan me Efa ar repwe féri?

⁹ Lupwen sia ekieki ewe napanap tipemmóng, a cheme ngenikich Satan, ewe Tefil. Pokiten i emén me lein néún Jiowa kewe chónláng, ese mwáál a chómmóng wisan mi aúchea. Nge a pwal mochen ekkóch. A mochen angei seni Jiowa ewe fel mi chék fich ngeni. Satan a mochen ach sipwe usun, iwe a sótun ámmeef ngenikich ach sipwe menemenemmang ren met mi wor rech. A féri ena atun a fós ngeni Efa. Fán tong, Jiowa a awora ngeni Efa me pwúlúwan we ener mi chómmóng ‘seni irän ewe tanipi meinisin’ chilóón chék efóch. (Ken. 2:16) Nge Satan a otupu Efa an epwe ekieki pwe a lamot ngeni an epwe ocheei uwaan ena irá mi pinepin. Efa ese menemenéch ren met a fen wor ren, nge a pwal mochen pwal ekkóch. Iwe, sia silei sópwólóón. Efa a tipis, me mwirin a máló.​—Ken. 3:6, 19.

10. Met a fis atun King Tafit a tipemmóng?

¹⁰ Tipemmóng a efisi án King Tafit epwe ménúkaaló met Jiowa a fen ngeni, kapachelong wéún, itetekian, me an win lón chómmóng maun. Tafit a fókkun kilisou ren met Jiowa a fang ngeni pwe ra ‘chomong seni an epwe tongeni aleaniir.’ (Kölf. 40:5) Nge lón eú atun, Tafit a ménúki met Jiowa a fen fang ngeni. Ese chúen menemenéch, me a mochen pwal ekkóch. Ikaamwo a fen chómmóng pwúlúwen Tafit, nge a poputá le mocheniaiti emén fefin mi fen pwúpwúlú inaamwo ika Jiowa a apasa pwe ese pwúng ena féffér. Ena fefin, ina i Patsipa me pwúlúwan we Uria, ewe re Hit. Tafit a lisowumwáál ngeni Patsipa, iwe a pwopwo me wóón. Minne Tafit a féri a fókkun ngaw, nge a fen pwal féri eú tipis mi kon fen ngaw seni ena. Tafit a akkóta ninniilóón Uria! (2 Sam. 11:2-15) Met Tafit e kan ekieki, e ekieki nge Jiowa ese kúna? Inaamwo ika Tafit a fen angang ngeni Jiowa ren fite ier, nge a tipemmóng me a efisi ngeni chómmóng riáfféú. Mwirin, Tafit a pwári tipisin me a aier. A ifan me kilisoun ren án Jiowa omusaaló!​—2 Sam. 12:7-13.

11. Me ren Efisos 5:3, 4, ifa usun sia tongeni okkufu tipemmóng?

 ¹¹ Met sia tongeni káé seni pwóróusen Tafit? Ika sia chék kikkilisou ren meinisin met Jiowa a fen fang ngenikich, iwe sia tongeni okkufu tipemmóng. (Álleani Efisos 5:3, 4.) A lamot ach sipwe menemenéch ren met mi wor rech. Atun sia kerán káé ngeni emén ewe Paipel, eli sipwe áiti ngeni an epwe ekieki eú mettóch Jiowa a fen fang ngeni, me epwe kilisou ngeni ren. Ika emén a féri ena iteiten rán lón eú wiik, weween pwe a tongeni ióteki fisu sókkun mettóch. (1 Tes. 5:18) Ka pwal féri ena sókkun? Ika ka ekilonei meinisin met Jiowa a fen féri fán itom, epwe álisuk le chék kikkilisou. Me ika ka chék kikkilisou, iwe kopwe menemenéch. Me atun ka menemenéch, tipemmóng esap nemenuk.

12. Met Jutas Iskariot a féri atun a tipemmóng?

¹² Atun Jutas Iskariot a poputá le tipemmóng, a féri eú mettóch mi fókkun ngaw me a afangemá Jesus. Nge esap ina usun me lepoputáán. (Luk. 6:13, 16) Jesus a fili pwe epwe emén néún aposel. Ese mwáál, Jutas emén mi alúkúlúk me lipwákéch, pún Jesus a lúkú ngeni an epwe wisen túmúnú ewe moni. Jesus me ekkewe aposel ra néúnéú ena moni le ataweei ar kewe osupwang lón ewe angangen afalafal. Ena moni, a usun ewe monien álillis lón ei fansoun mi álisatá ewe angang wóón unusen fénúfan. Nge mwirin, Jutas a poputá le soláái ena moni inaamwo ika a fen róng fán fite án Jesus éúréúra aramas pwe resap tipemmóng. (Mark. 7:22, 23; Luk. 11:39; 12:15) Jutas ese aúseling ngeni ekkena kapasen éúréúr.

13. Ineet atun a pwáló pwe Jutas a tipemmóng?

¹³ A pwá pwe Jutas a tipemmóng me mwen ewe atun Jesus epwele ninniiló. Jesus me néún kewe chón káé kapachelong Maria me pwiin we Marta, ra wasélato lón imwen Simon ewe mi keinepan. Atun ar mwéngéfengen, Maria a útá me ninatiw wóón mékúren Jesus ewe lé pwokkus mi fókkun mémmóng. Jutas me ekkewe ekkóch chón káé ra fókkun mángaw. Nge ekkóch ekkewe chón káé, eli ra meefi pwe a fen éch ar repwe néúnéú méén ena lé lón ewe angangen afalafal. Nge Jutas a mángaw ren pwal eú popun. “I eman chon solä” me a mochen soláái ewe moni. Me pokiten Jutas a tipemmóng, a afangemá Jesus fán iten moni.​—Joh. 12:2-6; Mat. 26:6-16; Luk. 22:3-6.

14. Ifa usun eú pean pwúpwúlú ra apwénúetá ewe lesen lón Lukas 16:13?

¹⁴ Jesus a áchema ngeni néún kewe chón káé, ei pwóróus mi enlet: “Ousap tongeni angangepök ngeni Kot me wöün fanüfan.” (Álleani Lukas 16:13.) A chúen weneitikich ena wokisin. Áwewe chék, sipwe káé ifa usun eú pean pwúpwúlú seni Romania ra apwénúetá alon Jesus na. A suuk ngeniir eú angang ren ekis fansoun lón eú fénú mi wéúéch. Iei met ra erá. “A watte ám liwinimmang lón bank aupwe omusa. Ina popun, me lepoputáán, aua ekieki pwe ena angang ina eú feiéch me ren Jiowa.” Iwe nge a wor osukosukan, pwe ika ra etiwa ena angang, epwe ekisikisaaló ar fansoun le angang ngeni Jiowa. Ra filatá met repwe féri mwirin ar álleani ewe lesen itelapan, “Akkamwöchü Om Tuppwöl Ren Letip Eü” lón Ewe Leenien Mas minen August 1, 2008. Ra erá: “Ika aua mwékút ngeni pwal eú fénú pwe aupwe alapaaló néúm moni, nge a áweiresi ám angang ngeni Jiowa, iwe ám riri ngeni Jiowa esap ina ewe mettóch mi kon aúchea lón manawem. Aua wesen lúkú pwe epwe ta ám ririéch ngeni Jiowa.” Ina popun rese etiwa ena angang. Iwe met a fis? Ewe mwán a kúnékún an angang lón pwisin fénúer  we, peioffun mi chék naf ngeni ar kewe osupwang. Ewe fefin a erá: “Jiowa epwe chék ákkálisi néún kewe chón angang.” Ena pean pwúpwúlú ra pwapwa, pún ra néúni Jiowa Masta, nge esap fen moni.

15. Pwata sia tongeni lúkú pwe mi tufich ach sipwe sú seni án Satan kewe ssár?

¹⁵ Met a lamot ach sipwe féri? Ika sia esilla pwe sia fen lamalamtekia are tipemmóng, sia tongeni okkufu! Paulus a apasa pwe chókkewe ewe Tefil a fen “liapeniir” ra chúen tongeni sú seni an ssár. (2 Tim. 2:26) Ina met a fis ngeni Tafit. A aúseling ngeni án Natan apwúngúchowu, a aier seni an tipemmóng, me ririéchsefál ngeni Jiowa. Sisap fókkun ménúki pún Jiowa a péchékkúl lap seni Satan. Ina popun, ika sia etiwa án Jiowa álillis, iwe sia tongeni sú seni sókkun ssár, are nikáttup ewe Tefil a áeá le ssárekich.

16. Met epwe álisikich le túmúnúkich seni án Satan kewe ssár?

¹⁶ Ewer a fókkun éch ach sisap lamalamtekia me tipemmóng. Sia chék tongeni féri ena ren án Kot álillis. Nge sisap ekieki pwe sia fókkun péchékkúl lón pekin ngún, iwe sisap fókkun tongeni lamalamtekia are tipemmóng! Pwal mwo nge néún Jiowa kewe chón angang mi fen angang ngeni ren fansoun langattam, ra ttur lón ssárin lamalamtekia are tipemmóng. Ina popun, kopwe sié ngeni Jiowa iteiten rán pwe epwe álisuk le esilla ika ekkena napanap mi ngaw ra poputá le etipetipa ekiekum me féfférum. (Kölf. 139:23, 24) Achocho úkúkún óm tufich óm kosap lamalamtekia are tipemmóng!

17. Ekiseló chék met epwe fis ngeni ewe chón oputakich, ewe Tefil?

¹⁷ Satan a fen emén chón elliapa aramas ren fitengeréú ier. Nge ekiseló chék epwe kalapus, me ló, ló, ló, epwe ninniiló. (Pwär. 20:1-3, 10) Sia atapwala ena rán. Nge ren mwo iei, sipwe túmúnúkich seni án Satan kewe ssár. Achocho óm kosap lamalamtekia are tipemmóng. Tipeppós le ‘ü ngeni Tefil, iwe, epwe sü sonuk.’​—Jas. 4:7.