1. Satana onladdanihedheliwani na namatota?

NAMATOTA ona efunelo modha—ya ottidda obe opa enama entameliye. Wi ejo epadduwe, iyene onolabihedha mirega dhottiyana-ttiyana, jijuwene yonile marho mmodha wa Job. (Job 18:8-10) Txini enkosa namatota wi akwekwettele enama vamuregani vaye? Onroma osunza enamaya. Iyene onovivuza: Onviretxa wuvi? Onziveliwa elobo gani? Txini egamuttiddile morurumutxa? Satana oli ninga namatota oddu. Onroma onisunza. Iyene onowang’ana muneddihu vina esile dhinziveliwihu. Venevo, onowetteka murega wi anittiddena. Masiki bili dhawene, Bibilia ononikuluveliha wi nigamageya vamuregani wa Satana enowodheya otatuleyavo. Ottiya ejo Bibilia ononisunziha mukalelo onwodhihu orabela mirega eso.

2. Mirega minli dhinlabihedha pama Satana sivi?

² Dhihikalawo mirega minli dha Satana dhinlabiyena pama, ovittukulela na nrima. * Satana onolabihedha dhovonya esi dhomaningo mwa vyaka dhinjidhene mundduni. Iyene oli ninga namatota onkwekwettela enama vamuregani obe vamulabani. (Masal. 91:3) Mbwenye iyo kaninfwanyela ovittiya ottiddiwa na Satana. Sabwaya? Sabwani Yehova ohiniziwiha mirega dhinlabihedha Satana.—2 Kor. 2:11.

3. Yehova wikelemo nni mBibiliani dhotagiha dha attu ena?

³ Yehova ononisunziha mukalelo worabela ogwela mmiregani wa ovittukulela na nrima. Mukalelo mmodha bwa olabihedha dhotagiha dha attu. Mwari mwa nsunzo ntti ninele wona dhotagiha dhing’onovi. Weyo onele wona wi Satana ohiwodha wakwekwetta attu adhile amulabelaga Yehova vawale. Eji  entapulela wi iyo nittongeliwa ohipembera mirega dha Satana? Nne. Sabwani Yehova ohikamo dhotagiha esi mBibiliani wi ‘anitxenjerihe.’ (1 Kor. 10:11) Iyene onoziwa wi dhotagiha esi dhinodha onikamihedha ohigwela mmiregani mwa Ddiabo.

4. Txini enapadduwe nigakala attu ovittukulela?

⁴ Satana onfuna wi iyo nikale attu ovittukulela. Iyene ohiziwa wi nigakala attu ovittukulela ninele okala ninga iyene, nanda baniyelela egumi yamukalakala. (Gano 16:18) Nona murumiwi Paulo waloga wi enodha opadduwa muttu ‘ovittukulela nanda badha ofwanyiwa okoniwa wakene ottongeliwe Satana.’ (1 Tim. 3:6, 7) Ejo enodha onipadduwela, kintanala akala nili aswa mwibaribarini obe nidhile nimulabelaga Yehova vawale.

5. Ninga munlogela Kohelét 7:16, 20, muttu agalagihile dhavi ovittukulela?

⁵ Ovittukulela onokosa mpaddi wa ovigwarula. Satana onotamela onikosiha okala attu ovigwarula. Iyene onfuna wi iyo nivizuzumelege nanya ottiya omuzuzumela Yehova, ttabwattabwa nigafwanyiwa makattamiho. Motagiha, wahimagedhiwaga elobo ehikosiliwe? Obe wahiromaga weddihiwa na mukalelo wohiligana? Satana agahiziveliwa vaddiddi wuwona ommagedhaga Yehova obe abali omuyani. Ddiabo onfuna wi okosege dhilobo ofwaraga mubuwelo wawo ottiya ofwara magano a Yehova ali mu Nzuni naye.—Kengesa Kohelét 7:16, 20.

6. Txini esunzile weyo na yotagiha ya murogora wa elabo ya Holanda?

⁶ Koona empadduweli murogora dhahi onkala elabo ya Holanda. “Iyene wahisilidheya na dhovirigana dha abali a mmulogoni.” Nona wahigana ohivilela. Iyene ohiloga: “Miyo ddaviwoona meka vina kaddawodha otxinja mukalelo waga. Ddahifiyedha omwaddela mamunaga wi nimwalele mulogo mwina.” Venevo, iyene woona porogarama ya JW Broadcasting^® ya mweri wa Marsu 2016. Porogramaya ahivaha malago mang’onovi a owanana ohiligana wa attu ena. Murogoraya ohenjedhedha: “Ddahoona wi ddanfanyela oviyeviha ottiya otamelaga otxinja merelo  na dhubuwelo dha abali a mmulogoni, ottiya ejo ddanfanyela wang’ana dhovonya dhaga vina wubuwela wi miyo ddamuttegi. Porogarama ejile ya Broadcasting eddikamihedha omukuluvela Yehova vina ozuzumela onddimuwa waye.” Ohinonelamo yosunzihaya? Ogagumanana makattamiho, ompange Yehova. Omulele iyene wi awukamihedhe wawoonaga attu ena ninga munawonela iyene. Ovenyana wirimu Babihu Yehova onowona dhovonya dha attu otene masiki dhawene, onolevelela. Iyene onfuna wi weyo okose yakakene.—1 Jo. 4:20.

7. Txini epadduwile na Mwene Oziya?

⁷ Sabwa ya ovittukulela Mwene Oziya wa elabo ya Judá kavuruwanile malago, sabwa ya ejuwene wahikosa elobo yahattomeliwiye. Oziya wali muttu wa eziwelo vaddiddi. Iyene wampembera mukoddoni, wahilagiha mittette dhinji vina wahikana mindda dhowinjiva. ‘Nabuya wansogoriha dhaye dhotene.’ (2 Map. 26:3-7, 10) Mbwenye Bibilia onloga dhahi: “Moneliye omwene waye wimelapwi, oroma opanela; ejiyá emutotela otolowa.” Yehova wahibaza olebiha munlamuloni wi arumelihiwa omuddumeya lubani mumparhani ali anamakutta bahi. Mbwenye sabwa ya opanela Mwene Oziya wahivolowa mumparhani wi amuddumeye lubani. Yehova kaziveliwe sabwa yovittukulela wa Oziya vina wahimugwihedha maranya. Oziya wahikaanavi maranya mpaka okwa waye.—2 Map. 26:16-21.

8. Mowiwanana na 1 Korinto 4:6, 7, txini enanikamihedhe ohikala attu ovittukulela?

⁸ Koddi ovittukulela onodha onikalela murega dhahene ninga epadduwile na Oziya? Koona yotagiya ya José. Iyene wampurelamo na marhondda akosiye, vina wali munddimuwa wa mulogo warihiwa. Wankosa madiskursu mmatugumanoni a ttattamwa, a mirudda vina mmulogoni, mudhidhi mwina nameddelela milogo wanimutamela wi amukumbirhe malago. José ohiloga dhahi sabwa ya dhovonya dhaye: “Miyo ddakuluveletxa ewodhelo yaga vina sabwa yokala mudhidhi mwinjene ddikosaga mabasa akakene.” “Ddahimudduwala Yehova. Miyo ddavona ninga muttu woliba, kaddavuruwana malago na dhoruma dha Yehova.” José wahikosa yottega enddimuwa ofiyedha oburutxiwa mmulogoni. Wiyelihedhiwe mmulogoni vyaka dhing’onovi mundduni. Iyene ohiloga: “Yehova ohiddisunziha  wi elitxi ya ttima kahiye okuweliwa na nzina nettomo, eli yattima ku okosa efunelo yaye.” Txipo kanidduwaleni wi ttotto enihuna vina ewodhelo ya mabasa attomeliwihu dhetene esi mivaho dha Yehova. (Kengesa 1 Korinto 4:6, 7.) Nigakala attu ovittukulela, Yehova txipo kananilabihedhe.

9. Nrima nattukuleli Satana na Eva okosa eni?

⁹ Nigobuwela nzu ntti nrima, txino onnidhela muyubuweloni ddi Satana, Ddiabo. Vowi iyene vina wali mungelo mmodha wa Yehova, txino wahikana ettomo. Mbwenye Satana wanfunavi ettomo yina. Iyene wafuna webedhiwa okwene oninfwanyela Yehova bahi. Satana onfuna wi iyo nikale ninga iyene nona ononikwekwettela ohikana wagalala na esile dhinihuna. Dila yoroma elabihedhile Satana murega obu bumudhidhi ologiliye na Eva. Yehova wahavaha Eva na mamunaye dhoja dhoziva vaddiddi. Yehova wahattiya oja—‘milima dha miri dhetene dhali muddebe mpule’ yakoddihiwe oja milima dha muri mmodha bahi. (Wita 2:16) Masiki dhawene, Satana wahimukwekwettela Eva oja mulima obule wakooddihiwe. Eva kavahile ttima ejile yaniyena nona wanfunavi. Iyo ninoziwa edhile opadduwa. Eva wahikwekwetteliwa okosa yottega, omamalelowa ohikwa.—Wita 3:6, 19.

10. Mwene David omageyile dhavi na murega wa nrima?

¹⁰ Sabwa ya nrima, Mwene David wahidduwala dhotene dhanvahile Yehova: Mafumo, ovuwa vina opemberha mukoddoni. David wanziwa wi mivaho dhanvahile Mulugu ‘dhahithabwa winjiva kagawodhile welega’ vina wantamaalela vaddiddi! (Masal. 40:5) Mbwenye nsaka dhahi, David wahidduwala esile dhanvahile Yehova. Iyene kana wagalala na esile dhaniyena; wanfunavi dhina. Masiki vaniyena ayana ena, David wahiroma wunuwiha mmurimani efunelo yabure na muyana wa mulobwana mwina. Muyanaya wali Betsabé, mamune wali Uriya, mukadda Het. Opanela wahimuttukulela David omugoniha Betsabé vasogorhova wahikana yari. Ottiya yottega yamararuwo yatatamuliye, David wahigwiha nlamulo wi Uriya apiwe! (2 Sam. 11:2-15) Txini yobuwela David? Iyene obuwela wi Yehova koona dhotene dhapadduwa? Mudhari oddule wororomeleya wa Yehova wahivittiya okwekwettiwa na nrima vina opanela nanda ejo yahimudhelana makattamiho menjene. Yowagalaliha jowi, David kavubile dhottega dhaye vina wahitxinuwa  na murima wotene. S’ewaganyedha iyene wahitamalela venjene sabwa ya Yehova omulevelela!—2 Sam. 12:7-13.

11. Mowiwanana na Éfeso 5:3, 4, txini enanikamihedhe ohigwela vamuregani wa nrima?

¹¹ Txini ensunzihu na yotagiha ya David? Mukalelo mmodha wa orabela ohigwela vamuregani wa nrima, ku okala attu anziwa otamalela dhilobo dhotene dhinivahile Yehova. (Kengesa Éfeso 5:3, 4.) Ninofwanyela wagalala na dhilobo dhinihuna. Nigaroma omusunziha muttu Bibilia, ninonvahaga malago namasunzaya wi valaboni obuwelege nruriho ninakeliye wa Yehova vina amutamaalelege. Mwari mwa sumana agakosaga ejuwene, omamalelo wa sumana onelege olobelela dhilobo tanu na bili dhottiyana. (1 Tes. 5:18) Weyo onkoddelani okosa yakakene? Otanalela dhotedhene dhinukosela Yehova, onele wukamihedha okala muttu wotamaalela. Ogakala muttu wotamaalela, onele wagalala na dhilobo dhinna weyo. Nanda ogahagalala na dhilobo dhiniwena, kunagwele vamuregani wa nrima.

12. Nrima nimuttukuleli Juda Iskariote okosa nni?

¹² Nrima nihimuttukulela Juda Iskariote okala namasadduwela. Mbwenye iyene vamaromo kali dhawene. (Lk. 6:13, 16) Yezu wamusakulile ninga murumiwi. Juda wali muttu wapama vina wokuluveleya, wahifiyedha okuluveliwana kasha ya kobiri. Yezu na arumiwi aye alabihedha kobiri ejuwene wi ezuzumelegena dhofuneya agakala mmabasani a olaleya. Na mukalelo mwina, kobiri yamukashani mpule yali ninga mivaho dhimperekelihu masaka abano mabasa a Omwene ankosiwa orugunuwa elabo yotene. Mbwenye mwa ovira wa mudhidhi, Juda wahiroma wiyamo kobiriya, masiki vamwiweye Yezu alogaga dila dhinjene wopiya olivo wa okala muttu a nrima. (Mk. 7:22, 23; Lk. 11:39; 12:15) Juda wahipwaza dhaddeliwiye.

13. Nrima na Juda noneyile mudhidhi gani?

¹³ Nrima na Juda nidhile woneya malabo mang’onovi Yezu ahinakwa. Yezu na anamafwara aye otaganyiha na Maria na murogoriye, Marta, ahiwobeliwe vatakulu va Simoni, waromoliwa muliba maranya. Mudhidhi walani vameza ajaga, Maria wahimususela Yezu bammiminela vamusorho makura onukela a muttengo munddimuwene. Juda na anamafwara ena ahisilidhiwa venjene. Awene obuwela wi egahikala yapama kogulihiwa nanda kobiriya elabihedhiwa mmabasani a olaleya. Mbwenye Juda wahikana monelo mwina wottiyana. Iyene ‘wali mbava’ vina wafuna wi kobiriya yikiwemo mukashani wi eyemo. Sabwa ya nrima, musogorhomwa Juda wahimuguliha Yezu na muttengo onguliwana mudhari.—Jo. 12:2-6; Mt. 26:6-16; Lk. 22:3-6.

14. Atelani dhahi alabihedhile dhavi malago anfwanyeya va Luka 16:13?

¹⁴ Yezu wahawubutxedha anamafwara aye ebaribari ya ttima: ‘Nyuwo muhikale adhari a Mulugu vina a dhorela.’ (Kengesa Éfeso 5:3, 4.) Ebaribari eji napanovi enolaba. Koona mukalelo olabihedhi atelani dhahi a elabo ya Romênia nlago na Yezu. Awene ahifwanya gari ya olaba elabo yoreliwa, wattambirege awene kobiri yowinjiva. Awene ahiloga dhahi: “Iyo nahikaana mangau menjene aganittukuleli mudhidhi mwinjene nipitxaga obanko, vamaromo noona ninga ganyo ejile yali mareliho a Yehova.” Mbwenye vahikala makani, ganyo ejo egahizuzumiha mabasa amukoselihu Yehova. Noona atelani abale ahengesa A Sentinela de 15 de Agosto de 2008, wana mutoma “Mantenha a Lealdade com um Coração Unificado.” Mutoma obu wahakamihedha okosa dhogana dhapama. Atelaniya ahiloga: “Akala yogana yehu ya odhowa olaba elabo yina yali ya ogumela kobiri yinjene ejo egahinikosiha ottiya omarho wehu na Yehova  vamburoni vanawili. Iyo nanziwa wi nigahiputtuleya mpaddi womuyani.” Sabwa ya ejuwene awene ahikoodda mabasaya. Txini edhile opadduwa? Mulobwanaya wahifanya ganyo elabo yawa yattambiriye kobiri yafunani. Muyanaya ohiloga: “Mono wa Yehova txipo kunkiva.” Atelani abale ahagalala vaddiddi sabwa ya omusakula Yehova ottiya kobiri.

15. Txini ennivaha ebaribari wi jowodheya ohigwela mmiregani dha Satana?

¹⁵ Txini enakosihu nigoona wi nihigwela vamuregani wa ovittukulela obe wa nrima? Enowodheya ofuruleyavo! Paulo ologa wi abale “azingeyile na murega” wa Ddiabo enowodheya otapuleya vamureganiva. (2 Tim. 2:26) Jijuwene yampadduweli David. Iyene wahirumela osaddeyiwa na Natan, nanda wahitxinuwa sabwa ya opanela waye vina wahikalavi mandano aye na Yehova. Kudduwale: Yehova ddwaguru opitta Satana. Nona, nigarumeela nikamihedho na Yehova, ninele owodha orabela ogwela murega-muregani onanettekele Satana osogorho wehu.

16. Txini enanikamihedhe ohigwela mmiregani dha Satana?

¹⁶ Elitxi yamakamaka ohigwela mmiregani dha Satana. Iyo ninwodha okosa ejuwene nigakaana nikamihedho na Mulugu. Mbwenye kanifwase! Sabwani ahikalawo attu adhile vawale amulabelaga Yehova mbwenye ahidha okala anamavittukulela vina aliba nrima. Nona labo na labo kamunlele Yehova wi awukamihedhe oziwa akala dhubuwelo dhawo na mereloya dhihipattiwa na mikalelo esi dhabure. (Masal. 139:23, 24) Txipo kuttiye omageya na ovittukulela obe nrima!

17. Txini enapadduwe na mwiddanihu Satana?

¹⁷ Vanovira vyaka dhinjidhene Satana alabaga ninga namatota. Mohigonela iyene onele omagiwa vina musogorhomwa onele otolotxiwa. (Ovuh. 20:1-3, 10) Ninojedhela ofiya wa siku ntto. Ninofwanyela okalela txenjewa mirega dha Satana. Kavilibihedhe wi nrima na ovittukulela ninawukwekwette. Kala womala-nawale wi ‘omukodde Satana, iyene onele wuttawa.’—Tia. 4:7.