1. Mumu liaka mutuhasa kutesa Satana ni umwe yanga?

YANGA kakwete nyonga limuwika—kukwata hanji kushiha kashitu. Mba achilinge, iye kakuzachisa makambwila hanji miheto yeka ni yeka ngwe chize anayisolola mu Mbimbiliya. (Yombi 18:8-10) Yika yanga akulinga mba oze umwe kashitu? Iye kakufupa kunyingika kashitu wacho. Kashika akulihula ngwenyi: Kulihi mapalikila? Yika kashitu wacho akuzanga? Muheto uka upema uze nguhasa kuzachisa hanga ngumwoze kawashi? Satana kapwa ngwe yanga wa mutapu au. Iye kakufupa kutunyingika kanawa. Kakutala kuze twakuya ni yize twakuzanga. Mba mata muheto ni kushimbwila hanga atwoze chakuhona kunyingika. Chipwe chocho, Mbimbiliya yinatwehe shindakenyo ngwo, chipwe ngwe mutufwa mu muheto wa Satana, nihindu mutuhasa kulitusulamo. Chikwo nawa, yinatulongesa chize mutuhasa kwehuka kufwa mu miheto yacho.

2. Miheto yika yaali ya Satana yize yakukalakala kanawa?

² Kuli miheto yaali ya Satana yize yakukalakala kanawa, kulizata ni kuzo. * Satana waputukile kulu kuzachisa yitanga yino yipi. Iye kali ngwe umwe mukwa-kutela tujila yoze wakusa yimwe hanga tujila afwe mu muheto hanji ha wanda. (Samu 91:3) Alioze, yetu kutwafupiwile kufwa mu muheto wa Satana. Mumu liaka? Mumu Yehova hanatusolwela mana waze Satana akuzachisa hanga oze atu mu miheto yenyi.—2 Kori. 2:11.

3. Mumu liaka Yehova asele mu Mbimbiliya yilweza ya atu waze afwile mu muheto wa kulizata ni wa kuzo?

³ Yehova kakutulongesa chize mutuhasa kwehuka kufwa mu muheto wa kulizata ni wa kuzo, ha kutulweza yize yalingiwile  kuli amwe tuvumbi twenyi ni chize mutuhasa kwehuka yuma yacho. Chakutalilaho, ha mutwe uno, mutumonaho chize Satana ahashile kwoza chipwe tuvumbi a Yehova waze te ajama. Shina chino chinalumbunuka ngwo, kutuchi kuhasa kwehuka muheto wa kulizata ni wa kuzo? Ka, hi chocho ko. Mumu Yehova kasele yilweza yino mu Mbimbiliya hanga “yitukanyamise.” (1 Kori. 10:11) Iye kananyingika ngwenyi, yilweza yino muyihasa kutukwasa kwehuka hanji kuchina kufwa mu miheto ya Ndiapu.

4. Yika muyihasa kulingiwa kuli yetu nyi twapwa akwa-kulizata?

⁴ Satana kanazange chinji hanga tupwe akwa-kulizata. Iye kananyingika ngwenyi nyi twapwa akwa-kulizata, mutupwa ngwe iye nawa mututokesa kutalatala cha mwono wa mutolo. (Yishi. 16:18) Kashika postolo Paulu atowezele ngwenyi: Mukwa-kulizata mahasa “kulimbukila mu uhie wa Ndiapu.” (1 Timo. 3:6, 7) Chino muchihasa kulingiwa kuli hita umwe wa kuli yetu, chipwe ngwe tuli aha mu umwenemwene hanji twakulingila Yehova ha miaka yinji.

5. Kulita ni Chilumbununyi 7:16, 20, kuchi umwe mutu mahasa kusolola ngwo kakulizata?

⁵ Mutu yoze wakulizata kakunyonga wika hali mwene. Nawa Satana kakuzanga kutupwisa atu a mutapu wacho. Kanazange hanga tulihulikile chinji hali yetwene kuhiana hali Yehova, chipi-chipi muze mutupalika mu umwe kapinda. Chakutalilaho, shina hanakulamikiza ha chuma chize kuwalingile? Nyi hanji hanakulinga yuma yipi? Satana mazanga chinji nyi mulamikiza Yehova ni mandumbu je ha yize unapalika. Nawa Ndiapu kanazange hanga unyonge ngwe jila yimwe yakuhwishilamo kapinda wacho, yili kulinga yuma kulita ni manyonga je hi kulita ko ni usongwelo wa Yehova uze uli mu Liji lienyi.—Tanga Chilumbununyi 7:16, 20.

6. Yika walilongesa ha chilweza cha umwe pangi ku Holanda?

⁶ Tutalenu yize yalingiwile kuli umwe ndumbu wa pwo ku Holanda. Iye kevwile uli mumu lia uhenge wa mandumbu mu chikungulwila. Hachino, yecha kuliendela ni mandumbu jacho. Iye yamba ngwenyi: “Te nakulivwa chinji ukawami nawa te kuchishi kuhasa kwalumuna nyonga liami. Hachino, yingulweza mukwetu-lunga  hanga tuye mu chikungulwila cheka.” Chocho yatala JW Broadcasting^® ya Março 2016. Ha Broadcasting yacho, yawanaho yikuma yize yamukwashile kupwa ni nyonga lialita hakutwala ku uhenge wa mandumbu. Mwene yamba ngwenyi: “Nanyingikine ngwami, te ngunafupiwa kupwa mukwa-kulikehesa ni kutala kanawa ha uhenge wami, shimbu ngufupe kwalumuna yitanga ya mandumbu mu chikungulwila. Broadcasting yangukwashile kulihulikila hali Yehova ni ha wata wenyi.” Shina wamona yize yamukwashile? Nyi unapalika mu umwe kapinda, lihulikile hali Yehova. Liumbe kuli iye akukwase kumona akwenu ngwe chize iye akwamona. Yehova kakuhasa kumona uhenge wa atu eswe, chipwe chocho kakwakonekena. Nawa kanazange hanga ni yena uchilinge.—1 Yoa. 4:20.

7. Yika yalingiwile kuli Mwanangana Uzia?

⁷ Mumu lia kulizata, Mwanangana Uzia wa mu Yunda yahona kupanjika yiyulo, nawa yalinga chuma chize te keshi ni ulite wakuchilinga. Uzia kalingile yuma yinji yipema. Iye kakumbile jita jinji, katungile mambonge anji nawa kalimine minda yinji. Mbimbiliya yinambe ngwo: “Zambi wamuwahishile.” (2 Sango 26:3-7, 10) Alioze yinambe nawa ngwo: “Muze hatakama mbunge yenyi yiyilifuza alinge uhenge.” Kupalikila mu shimbi, Yehova kasolwele zwalala ngwo asasendote wika e apwile ni ulite wa kuhana insensu mu tembele. Alioze mumu lia kulizata, Mwanangana Uzia yanjila mu tembele ni kuhana insensu. Yehova kakawahililile ni yize lunga yono mukwa-kulizata alingile, chocho yamwasa mbumba. Uzia kayijile musongo wa mbumba ku mwono wenyi weswe.—2 Sango 26:16-21.

8. Kulita ni 1 A-Korindu 4:6, 7, yika muyihasa kutukwasa hanga tuchine kupwa akwa-kulizata?

⁸ Shina kulizata muchihasa kupwa muheto kuli yetu ngwe chize chapwile kuli Uzia? Tutalenu chilweza cha José. Iye kapwile mwata wa milimo mupema nawa mukulwana wa mu chikungulwila yoze eswe te akusa vumbi. Kapwile ni kuhanjika pande ha kukunguluka cha mbonge ni cha mambonge, nawa chipwe kalayi wa mbonge te kakumwita yiyulo. Alioze, José mwene yamba ngwenyi: “Yami te nakujikijila chinji ha utotombo ni ha yinyingi yami, te chishi kujikijila muli Yehova. Napwile ni kulimona ngwe ngunajame chinji, kashika te kuchishi kwivwa utowezo ni yiyulo ya Yehova.” José yalinga shili yinene, chocho yamusolola mu chikungulwila. Hakupalika cha miaka, iye yafuna mu chikungulwila. Haliapwila José kakwamba ngwenyi: “Yehova kangulongesele  ngwenyi chuma chilemu hi lufuma ko, alioze kulinga yize iye anatwite.” Kutwatambile kuvulama ngwetu, utotombo ni yiteli yize tuli nayo mu chikungulwila, yakukatuka kuli Yehova. (Tanga 1 A-Korindu 4:6, 7.) Nyi twapwa akwa-kulizata, Yehova keshi keza katuzachisa nilimwe tangwa.

9. Yika kuzo yatwalile Satana ni Eva kulinga?

⁹ Muze twakunyonga hali akwa-kuzo, kota twakunyonga chitangu hali Satana Ndiapu. Amu apwile mungelo wa Yehova, Satana kota kapwile ni yiteli yinji. Alioze iye kazangile kupwa ni yiteli yikwo kuhiana yize apwile nayo. Kafupile hanga atu amuwayile, chuma chize te chatela wika Yehova. Satana kanazange tupwe ngwe iye, kashika akweseka kututwala hanga tuzange kupwa ni yuma yinji kuhiana yize tuli nayo. Ha chisuho chitangu chize Satana azachishile muheto uno, chapwile muze ahanjikile ni Eva. Yehova kahanyine kulia chinji chipema kuli Eva ni mukwo-lunga. Ayo te mahasa kulia “mitondo yeswe ya mu munda” kuchizako mutondo umuwika. (Uputu. 2:16) Chipwe chocho, Satana yatwala Eva anyonge ngwo, te kanafupiwa kulia muhuko uze amukanjishile. Eva kakalemesele yuma yize apwile nayo, chocho yazanga kupwa ni yuma yikwo. Nawa tulieswe tunanyingika yize yalingiwileko. Eva yavulumuna, chocho yafwa.—Uputu. 3:6, 19.

10. Kuchi Mwanangana Ndawichi afwile mu muheto wa kuzo?

¹⁰ Mumu lia kuzo, Mwanangana Ndawichi yavulama yuma yeswe yize Yehova amuhele, upite, lufuma ni jita jize apwile ni kukumba. Ndawichi kanyingikine ngwenyi, yawana yize atambwile kuli Zambi yapwile “yinji” nawa te kakusakwilila ha yawana yacho! (Samu 40:5) Alioze ha mashimbu amwe, Ndawichi yavulama yeswe yize Yehova amuhele. Iye yecha kuwahilila ni yize apwile nayo, yazanga kupwa ni yuma yikwo. Chipwe ngwe kapwile ni mapwo anji, nihindu Ndawichi yaputuka kuzanga pwo liambala. Pwo wacho te Mbate-Shipa, mukwo-lunga Uriya Ka-Hete. Mumu lia kuzo, Ndawichi yalisumbakenya ni Mbate-Shipa, chocho Mbate-Shipa yaka ufumba. Chuma chize Ndawichi alingile chapwile chipi, alioze yalinga nawa chimwe chuma chipi chinji kuhiana—kushihisa Uriya ku jita! (2 Samue. 11:2-15) Yika Ndawichi anyongene? Shina iye kanyongene ngwenyi Yehova keshi kungumona? Chipwe ngwe, Ndawichi kanakalingila Yehova ha miaka yinji, nihindu yapwa ni kuzo, chocho chino yichimunehena lamba linji. Kulutwe, Ndawichi  yasolola shili yenyi ni kulikonyeka. Iye kanakasakwilila chinji muze Yehova amukonekenene!—2 Samue. 12:7-13.

11. Kulita ni A-Efwesu 5:3, 4, yika muyitukwasa hanga tuchine kufwa mu muheto wa kuzo?

¹¹ Yika twalilongesa ha chilweza cha Ndawichi? Twalilongesa ngwetu, yize muyitukwasa hanga tuhone kufwa mu muheto wa kuzo, yili kununga ni kusakwilila Yehova ha yeswe yize akutwaha. (Tanga A-Efwesu 5:3, 4.) Twatamba kuwahilila ni yuma yize tuli nayo. Alongi aha a Mbimbiliya, twakwakolweza hanga anyonge ha yiwape ya Yehova yize mazuka hita tangwa ni kumusakwilila ha yiwape yacho. Nyi longi machilinga ha poso yimuwika, kusongo lia poso iye mahasa kulemba ni kusakwilila ha yuma shimbiali yalisa. (1 Tesa. 5:18) Shina ni yena muhasa kama kuchilinga? Nyi mupukuna ha yeswe yize Yehova akukulingila, chino muchikukwasa hanga upwe ni kumusakwilila. Nyi wapwa ni kumusakwilila, muwahilila ni yeswe yize uli nayo. Nyi wawahilila ni yeswe yize uli nayo, kuuchi kufwa mu muheto wa kuzo.

12. Yika Yundase alingile mumu lia kuzo?

¹² Mumu lia kuzo, Yundase Ka-Keriote yalinga chuma chipi chinji nawa yakunjika Yesu. Alioze ku uputukilo iye kakapwile chocho. (Luka 6:13, 16) Mumu Yesu kamusakwile hanga apwe postolo. Yundase kota kapwile umwe wa kuli waze Yesu te akujikijila chinji, kashika amuhele chiteli cha kufunga mbongo. Yesu ni apostolo jenyi te kakuzachisa mbongo jacho ha yize te akufupiwa mu mulimo wa kwambujola. Mbongo jacho japwile ngwe milambu yize twakuhana musono hanga tukwase mulimo wa kwambujola hashi heswe. Alioze ha mashimbu amwe, Yundase yaputuka kwiya mbongo jacho, chipwe ngwe kapwile ni kwivwa utowezo wa Yesu hakutwala ku kuzo. (Marku 7:22, 23; Luka 11:39; 12:15) Yundase kalengulwile utowezo wacho.

13. Ha shimbu lika kuzo ya Yundase yasolokele zwalala?

¹³ Kuzo ya Yundase yasolokele zwalala ha limwe shimbu muze Yesu te kanda achifwa. Yesu ni tumbaji twenyi hamwe ni Maria ni ndumbwenyi Marta kaasanyikine ku zuwo lia Semone mukwa-mbumba. Muze te anali, Maria yakatuka yazujila maji a vumba lipema mu mutwe wa Yesu waze te akufwika mbongo jinji. Yundase ni tumbaji akwo yevwa uli unji. Tumbaji akwo kota kanyongene ngwe, te muchilita kuzachisa mbongo jacho mu mulimo wa kwambujola. Alioze Yundase kapwile ni nyonga lieka. Iye “kapwile mwiji” nawa te kanazange kwiya mbongo ja milambu jize te akufunga. Kulutwe mumu lia kuzo, Yundase yakunjika Yesu ni mbongo jize te akulanda najo umwe kapinji.—Yoa. 12:2-6; Mateu 26:6-16; Luka 22:3-6.

14. Kuchi mandumbu wano alimbata akawile chiyulo chili ha Luka 16:13?

¹⁴ Yesu kewulwile tumbaji twenyi umwenemwene uno ulemu ngwo: “Kunwahashile kulingila Zambi ni kulingila upite.” (Tanga Luka 16:13.) Umwenemwene wacho kuwalumukine. Tutalenu chize umwe lunga ni pwo ku Romênia akawile maliji wano a Yesu. Ayo kaasanyikine hanga aye ni kukalakala mu chifuchi cheka chize chikwete upite unji. Ene yamba ngwo: “Twapwile ni mukuli unene ku banco uze te kanda tuchifweta. Kashika twamwene ngwetu, mulimo wacho uli chiwape cha kuli Yehova.” Alioze kwapwile umwe kapinda. Nyi ayo te matayiza mulimo wacho, te kechi kupwa ni mashimbu anji a kulingila Yehova. Ayo yakwata chimwe chiyulo hanyima lia kutanga chikuma, “Nunga ni Kushishika ni Mbunge Yeswe” ha Kaposhi wa Kutalila wa 15 ya Agosto 2008. Ayo yamba ngwo: “Nyi nyonga lietu lia kukalakalila mu chifuchi cheka lili kupwa ni mbongo jinji, chino te muchisolola ngwo usepa wetu ni Yehova kuushi ha chihela chitangu. Te tunanyingika pundu ngwetu, nyi twalinga mulimo wacho  usepa wetu ni Yehova mupihia.” Chocho yalituna mulimo wacho. Mba yika yalingiwileko? Lunga yawana mulimo mu chifuchi cho kuze apwile ni kumufweta mbongo jize ayo te anafupiwa. Pwo yamba ngwenyi: “Yehova nihindu kakukwasa tuvumbi twenyi.” Ayo kakuwahilila chinji ha kusakula Yehova ngwe Mwene wo kuhiana mbongo.

15. Mumu liaka tuli ni shindakenyo ngwetu mutuhasa kutusuka mu miheto ya Satana?

¹⁵ Yika mutulinga nyi mutunyingika ngwetu, twafwa mu muheto wa kulizata hanji wa kuzo? Mutuhasa kutusukamo! Paulu kambile ngwenyi, waze mafwa mu “kambwila lia Ndiapu mahasa kutusukamo.” ( 2 Timo. 2:26) Yino ye yalingiwile kuli Ndawichi. Iye yapanjika chiyulo cha Natane yalikonyeka, chocho yapwa nawa ni usepa upema ni Yehova. Kanda twiza kavulama ngwetu, Yehova kali ni ndundo jinji kuhiana Satana. Hachino, nyi mututayiza ukwaso wa Yehova, mutuhasa kutusuka mu muheto weswawo Satana matutela.

16. Yika muyitukwasa hanga tuchine kufwa mu miheto ya Satana?

¹⁶ Chuma chipema chize chinahiane kulitusula mu miheto ya Satana, chili kuhona kufwamo. Chino mutuhasa kuchilinga wika ni ukwaso wa Zambi. Alioze, kutwatambile kunyonga ngwetu twajama chinji kutuchi keza kafwa mu muheto wa kulizata hanji wa kuzo! Chipwe atu waze te akulingila Yehova ha miaka yinji, no kalizachile hanji kupwa akwa-kuzo. Kashika, lemba kuli Yehova matangwa eswe akukwase kuhengwola manyonga ni yitanga ye hanga umone nyi uli ni ndako jino jipi. (Samu 139:23, 24) Hachino, linga yeswayo muhasa hanga uchine kufwa mu muheto wa kulizata hanji wa kuzo!

17. Yika muyikalingiwa kuli mukwa-kole yetu Ndiapu?

¹⁷ Hikwapalika miaka yinji chize haze Satana aputukile kuta miheto. Alioze kwasala hakehe mamukwata ni kumushiha. (Uso. 20:1-3, 10) Tangwa liacho lie tunashimbwila. Amu kanda lichiheta, twatamba kukeya hanga tuchine kufwa mu miheto ya Satana. Kashika sako tachi hanga wehuke kulizata ni kuzo. Nunga ni “kulimika ni Ndiapu mba iye makuchina.”—Tia. 4:7.