1. Satan cu ramvaimi pa he zeicah kan tahchunh khawh?

RAMVAIMI pa nih a rap ah saram kha i foih hna sehlaw thi hna seh ti a duh. Anih nih Job a hmaan loin a hnemtu hna lak i pakhat bantuk hmanhin rap a phunphun kha a hman men lai. (Job 18:8-10) Ramvaimi pa nih a rap ah saram pawl an i foih nakhnga zeitindah coktarh a hman? Saram pawl kong kha a hlathlainak thawngin a si. Saram pawl cu khoika ah dah an kal? Zeidah an duh? Zei rap hman ah dah a ṭhat bik lai? Satan cu mah ramvaimi pa bantuk a si. Kan kong kha a hlathlai i kan kalnak hmun le kan duhmi thil kha a hngalh. Cun rap kha a hmanh i mah rap ah kan i foih lai tiah aa ruahchan. Asinain mah rap i kan i foih hmanhah luat khawh a si ko tiah Baibal nih a ti. Cun Baibal nih mah rap hrial khawh ning kong zong kha a kan cawnpiak.

2. Satan i a hlawh a tling bikmi rap pahnih cu zeidah an si?

² Satan i a hlawh a tling bikmi rap pahnih cu porhlawtnak le hakkauhnak an si. * A luancia kum thong tampi lioin Satan cu mah a ṭha lomi ziaza hmannak ah a hlawh a tling tuk. Anih cu a rap ah coktarh a hmanhtu ngatlaitu pa bantuk a si. (Salm 91:3) Asinain kannih cu Satan rap ah kan i foih kho lai lo. Zeicah? Jehovah nih Satan hmanmi rap kha a kan hmuhsak caah a si.—2 Kor. 2:11.

3. Jehovah nih aa porhlawmi hna le a hak a kaumi hna kong kha zeicah Baibal ah a ṭial?

³ Jehovah nih porhlawtnak le hakkauhnak kong he aa tlaiin ralrin a kan pek ning lamkhat cu a cang taktakmi hmuhtonnak  in cawn awkah tha a kan peknak thawngin a si. Caan saupi chung Jehovah a bia cangmi hna hmanh Satan rap ah zeitindah an rak i foih timi kong kha kan theih hna lai. Porhlawtnak le hakkauhnak hrial cu a si kho lo tinak a si maw? A si lo. Jehovah nih mah hna kong Baibal ah a ṭialmi cu “kan i ralrinnak ding caah” a si. (1 Kor. 10:11) Jehovah nih ralrin awk a simi hna kong in kan cawn khawh, kan hrial khawh asiloah Satan rap in kan luat kho ti kha a hngalh.

4. Kan i porhlawt ahcun kan cungah zeidah a cang kho?

⁴ Satan nih porhlawtnak lungput ngei hna seh ti a kan duh. Cun kan i porhlawt ahcun amah bantuk kan si lai i zungzal nunnak kan sung lai ti zong kha a hngalh. (Ptb. 16:18) Cucaah Paul nih mi pakhat cu “a hnar a puar sual lai i khuachia kha sualphawt a rak si bantuk khan sualphawt a si ve sual lai” tiah ralrin a kan pek. (1 Tim. 3:6, 7) Cucaah biatak a theika asiloah Jehovah a biaknak caan saupi a si cangmi kan si hmanhah cu bantuk thil cu kan dihlak cungah a cang kho.

5. Phungchimtu 7:16, 20 ningin mi pakhat nih porhlawtnak kha zeitindah a langhter khawh?

⁵ Porhlawtnak cu mah zawnruahnak phunkhat a si. Cucaah Satan nih a hleiin zuamcawhnak kan ton tikah Jehovah nakin kanmahle kanmah kha biapi deuh ah i chiah in mahzawn lawng aa ruatmi kan si nakhnga aa zuam. Tahchunhnak ah, a hmaan loin sualpuh na si bal maw? Asiloah a ding loin tah pehtlaih na si bal maw? Satan nih Jehovah asiloah na unau cungah na thin a hunmi kha hmuh a duh. Na tonmi buaibainak kong he aa tlaiin Satan nih Jehovah pekmi Baibal lamhruainak zulhnak nakin keimah tein tawnghtham khawh a si ko timi ruahnak tu kha ngei seh ti aan duh.—Phungchimtu 7:16, 20 rel.

6. Netherland i unaunu pakhat hmuhtonnak in zeidah na cawn khawh?

⁶ Midang tlinlonak ruangah thinhung in a ummi Netherland i unaunu pakhat kong hi ruathmanh. Anmah pawl he caan hmanṭi lo awkah bia ka khiah. Cucaah hitin a ti: “Ka li a leng tuk ko nain ka lungput kha ka thleng kho lo. Cucaah ka vapa kha Khrihfabu dang ah kan  i ṭhial lai tiah ka ti.” Mah hnuah 2016, March thla Broadcasting^® kha a zoh. Mah video ah midang tlinlonak tawnghtham ning kong he aa tlaiin ruahnak cheuhnak cheukhat aa tel. Mah tikah unaunu nih hitin a ti: “Khrihfa unau pawl thlen i zuam canah keimah palhnak tu kha toidor tein cohlan a hau ti kha ka hun hngalh. Mah ka zohmi nih Jehovah le a liannganhnak kong kha biapi ah chiah dingin a ka bawmh.” Mah in zeidah na cawn khawh? Buaibainak na ton tikah Jehovah kong kha ruat peng. Jehovah sinah amah bantukin midang kha na hmuh khawh ve hna nakhnga bawmhnak hal. Vancung na Pa nih an palhnak kha a hmuh, asinain lungtho tein a ngaihthiam hna. Nang zong cutin tuah ve seh ti aan duh.—1 Johan 4:20.

7. Siangpahrang Uzziah cungah zeidah a rak cang?

⁷ Siangpahrang Uzziah cu a hun i porhlawt caah midang ruahnak cheuhnak kha a ngai lo i amah nih tuahnak nawl a ngeih lomi thil cheukhat kha a rak tuah. Uzziah cu thil a ti kho ngaimi pa a si. Ral tampi a tei hna, khuapi tampi zong a dirh i lo tampi zong a ngei. “Pathian nih khua awng a pemhter.” (2 Chan. 26:3-7, 10) “Sihmanhsehlaw a hung ṭhawn tikah aa rawhnak ding ah a hun i porhlaw” tiah Baibal nih a ti. A hmasa ah Jehovah nih tlangbawi pawl lawng kha biakinn ah zihmui khanghthawinak nawl a pek hna. Asinain Siangpahrang Uzziah nih tuahnak nawl a ngeih lomi zihmui khanghthawinak kha pek awkah biakinn ah a kal. Jehovah cu a cungah aa lawm lo i mah aa porhlawmi pa kha thinghmui zawtnak in dan a rak tat. Cucaah Uzziah cu a thih tiang thinghmui zawtnak a rak ngei.—2 Chan. 26:16-21.

8. Porhlawtnak kha 1 Korin 4:6, 7 ningin zeitindah kan hrial khawh?

⁸ Porhlawtnak nih Uzziah bantukin sualnak a kan tuahter kho ve maw? Unaupa José kong hi ruathmanh. Anih cu chawlehnak ah a hlawh a tling ngaimi le Khrihfabu ah upat ngaimi Khrihfa upa pakhat a si. Civui le civuipi hna ah phung a chim i peng zohkhenhtu hmanh nih a sinah ruahnak cheuhnak a hal. Hitin a ti: “Asinain keimah ka hmuhtonnak le ka thil ti khawhnak kha kaa bochan i Jehovah kha kaa bochan lo. Keimahle keimah a thlaraulei ṭhawng ngaimi in kaa ruah caah Jehovah ralrin peknak le ruahnak cheuhnak kha ka rak ngai lo.” José cu sualnak nganpi a tuah i bu chungin chuah a rak si. Kum tampi a rauh hnuah Khrihfabu chungah a rak kir ṭhan. Atuu ahcun hitin a ti cang: “Jehovah nih a biapimi thil cu  kan dirhmun kha si loin amah nih tuah awkah a kan halmi thil tuah a si ti kha a ka cawnpiak.” Cucaah kan thil ti khawhnak kha i cinken peng hna u sihlaw Khrihfabu ah kan hmuhmi zei bantuk tinvo sung paoh kha Jehovah sinin a rami in hmu hna u sih. (1 Korin 4:6, 7 rel.) Kan i porhlawt ahcun Jehovah nih a kan hmang lai lo.

9. Hakkauhnak nih Satan le Evi kha zeidah a rak tuahter hna?

⁹ Hakkauhnak kong kan ruah tikah Satan khuachia kha kan lung ah a hung chuak men lai. Jehovah i vanchungmi pakhat in Satan cu tinvo sung tampi a ngei. Asinain mah nakin tam deuh ngeih a rak duh. Jehovah lawng nih hmuh awkah aa tlakmi biakmi si kha a rak duh. Santan nih kannih zong amah bantukin si ve hna seh ti a kan duh. Cucaah kan ngeihmi ah lungsinak kan ngeih nakhnga lo aa zuam. Satan nih Evi sin i bia a chim lioah a hmasa bik cutin a rak tuah. Jehovah nih Evi le a vapa kha thingkung pakhat dah ti lo cu “dum chung i a ummi thingkung vialte” i a thei kha ei awkah a rak pek hna. (Gen. 2:16) Asinain Evi nih thlauhmi thingthei pakhat kha ei duhnak a ngeih nakhnga Satan nih a rak hlen. Cucaah Evi cu a ngeihmi ah a lung a rak si ti lo i tam deuh in ngeih a rak duh. A hnuah zeidah a cang ti kha kan hngalh. Evi nih sualnak a tuah i a hnuah a rak thi.—Gen. 3:6, 19.

10. Siangpahrang David cu a hak a hun kauh tikah zeidah a rak cang?

¹⁰ Hakkauhnak nih Siangpahrang David kha rumnak, minthannak le ral tampi teinak i telin Jehovah pekmi thil pawl kha a rak philhter. David nih Pathian pekmi laksawng cu ‘chim cawk a si lo’ ti kha a hngalh. (Salm 40:5) Asinain David nih voikhat cu Jehovah nih a pekmi thil kha a rak philh. David cu a ngeihmi ah aa lungsi ti lo i tam deuh in ngeih a rak duh. Nupi tampi a ngei ko nain Jehovah nih a palh tiah a timi midang nupi kha a rak duh. Mah minu cu Bath-sheba a si i a vapa cu Hit mi Uriah a si. David cu Bath-sheba he nupa sualnak an tuah i Bath-sheba cu fa a rak pawi. David nih mah a ṭha lomi thil lawng kha si loin a ṭha lo chinchinmi thil zong a rak tuah. Mah cu Uriah thah dingin a timhtuahmi kha a si. (2 Sam. 11:2-15) David nih zeitindah a rak ruah? Mah kha Jehovah nih a hmu lo tiah a ruat maw? David cu Jehovah rian a ṭuannak caan saupi a si cang ko nain hakkauhnak nih harnak tampi a rak tonter.  Asinain lunglawmh awk ngai a simi cu David nih sualnak ka tuah ti kha a hun hngalh i aa ngaichih. Jehovah nih a ngaihthiam ṭhanmi cu zeitluk lunglawmh awk dah a si.—2 Sam. 12:7-13.

11. Efesa 5:3, 4 ningin hakkauhnak doh awkah zeinihdah a kan bawmh khawh?

¹¹ David kong in zeidah kan cawn khawh? Kan cawn khawhmi cu Jehovah nih a kan pekmi thil vialte cungah kan i lawmh peng ahcun hakkauhnak kha kan doh khawh lai ti kha a si. (Efesa 5:3, 4 rel.) Cucaah kan ngeihmi ah kan i lungsi awk a si. Mi pawl he Baibal cawnpiaknak kan thawk tikah Jehovah nih a kan pekmi thil ṭha pakhat kong ruah awk le mah caah lawmhnak bia chim awkah kan cawnpiak khawh hna. Baibal na cawnpiakmi nih zarhkhat chung cutin a tuah ahcun aa lo lomi a kong pa sarih kha a cam khawh lai. (1 Thes. 5:18) Cu bantuk thil cheukhat kha na tuah kho maw? Jehovah nih aan tuahpiakmi thil kong kha na ruah ahcun mah nih lawmhnak bia chim awkah aan bawmh lai. Cun naa lawmh ahcun lungsinak na hun ngei lai i lungsinak na hun ngeih ahcun hakkauhnak kha na hloh khawh lai.

12. A hak a hun kauh caah Judas nih zeidah a rak tuah?

¹² Hakkauhnak nih Judas Iskariot kha a ṭhalo tukmi rawitu pakhat a hung siter. Asinain anih cu miṭhalo a rak si zungzal lo. (Luka 6:13, 16) Jesuh nih a zultu pakhat in a rak thimmi a si. Cun a zumh caah tangka bawm kha a rak kenter. Jesuh le a zultu pawl nih mah tangka kha phungchim rianṭuannak i a herhmi caah an rak hman. Phundang in cun tuchan i vawleicung pumpi rianṭuannak caah thawhlawm pekmi bantuk a si. Asinain Jesuh nih hakkauhnak kong he aa tlaiin atule atu ralrin a pekmi hna kha a theih ko nain caan tlawmpal hnuah Judas cu mifir a hung si. (Mar. 7:22, 23; Luka 11:39; 12:15) Judas nih mah ralrin peknak kha zei ah a rak rel lo.

13. Judas nih a hak a hun kauh kha zeitikah dah a rak langhter?

¹³ A hak a hun kauh kha Judas nih Jesuh a thih lai ah a rak langhter. Mary le Martha i telin Jesuh le a zultu pawl cu thinghmui Simon inn ah an rak tlung. Zanriah an ei lioah Mary nih a man a fak ngaimi zihmui kha Jesuh ke ah a rak toih. Mah tikah Judas le a dang a zultu pawl cu an thin a hung tuk. A dang zultu pawl nih cun mah tangka kha phungchim rianṭuannak ah ṭha deuh in kan hman khawh lai tiah an ruah men lai. Asinain Judas nih cun cutin a ruat lo. Anih cu “mifir” a si i tangka bawm chungin tangka kha fir a duh caah a si. A hnuah Judas cu a hak a hun kau i Jesuh kha tangka in a rak rawi.—Johan 12:2-6; Matt. 26:6-16; Luka 22:3-6.

14. Nuva tuahkhat nih Luka 16:13 i ruahnak cheuhnak kha zeitindah an rak zulh?

¹⁴ Jesuh nih a zultu pawl kha mah a hrampi biatak hi a hngalhter ṭhan hna. “Pathian le chawva cu nan bawi ah an pahnih in nan i ser kho hna lai lo.” (Luka 16:13 rel.) Mah cu tuchan tiang a hmaan rih. Romania ah a ummi nuva tuahkhat nih mah Jesuh bia an zulh ning kong kha ruathmanh. Annih cu ram ṭha deuh ah chikkhat rian ṭuan dingin sawm an rak si. Hitin an ti: “Bank ah cham ṭhan dingmi tangka kan ngeih caah a hmasa ahcun mah rian cu Jehovah sinin a rami thluachuah a si tiah kan ruah.” Asinain mah cu rap a si. Mah rap kha an cohlan ahcun Jehovah rian ah caantling in an i tel kho ti lai lo. 2008, August 15, Vennak Innsang “Zumhawktlak Sinak Kha Lungthin Dihlak In Hmunhter” timi capar an rel hnuah biakhiahnak an rak tuah. Hitin an ti: “Tangka tam deuh hmuh awkah ramdang i kan i ṭhial ahcun kan caah Jehovah rian ṭuan kha a har lai. Cun Jehovah he kan i pehtlaihnak zong kan nunnak ah a biapi bik a si kho ti lai lo. Mah lengah Jehovah he kan i pehtlaihnak zong a rawk lai ti  kha kan hngalh.” Cucaah mah rian kha an rak al. Zeidah a rak cang? A vapa nih an herhmi caah a za dingmi rian kha an ram ah a rak hmuh. A nupi nih hitin a ti: “Jehovah kut cu a tawi bal lo.” Mah nuva hna cu tangka nakin Jehovah kha an Bawi in an siter caah an i nuam tuk.

15. Satan rap in luat khawh a si ti kha zeicah kan zumh khawh?

¹⁵ Porhlawtnak le hakkauhnak kan ngei ti kha kan hngalh ahcun zeitin? Mah rap in kan luat kho ko. Paul nih Khuachia rap ah “aa foihmi hna” cu mah rap khan an luat lai tiah a ti. (2 Tim. 2:26) Cutin David cung ah a rak cang. Nathan nih a rak chimhhrinh tikah a ngaih i a hakkauhnak he aa tlaiin aa ngaichih. Mah tikah Jehovah he a ṭhami pehtlaihnak a rak ngei ṭhan. Satan nakin Jehovah cu a ṭhawng deuh ti kha zeitikhmanh ah philhhlah. Cucaah Jehovah bawmhnak kan cohlan ahcun Khuachia hmanmi zei bantuk rap paoh in kan luat kho lai.

16. Satan rap hrial awkah zeinihdah a kan bawmh lai?

¹⁶ Satan rap in luat nakin Satap rap vialte hrial cu a ṭha deuhmi a si ti cu a fiang ko. Pathian bawmhnak thawng lawngin cutin kan tuah khawh. Asinain mah lawngin kan i lungsi awk a si lo. Jehovah an biaknak caan saupi a si cangmi hna hmanh porhlawtnak le hakkauhnak an hun ngei kho. Cucaah nifatin na ruahnak le na tuahsernak i dothlat awkah Jehovah sinah bawmhnak hal. (Salm. 139:23, 24) Cun porhlawtnak le hakkauhnak ngeih lo awkah na si khawh chungin i zuam.

17. A rauh hlanah kan ral Khuachia nih zeidah a ton lai?

¹⁷ Satan cu ramvaimi pa a sinak kum thong tampi a si cang. Asinain a rauhhlan ah tlaih a si lai i a donghnak ah hrawh a si cang lai. (Biat. 20:1-3, 10) Mah ni kha kan i ngaih tuk. Mah nih a phanh hlan tiang Satan rap kha i ralring peng u. Porhlawtnak le hakkauhnak ngeih lo awkah fakpi in i zuam u. “Khuachia kha doh awkah biakhiak u law aan zamtak ko hna lai.”—Jeim 4:7.