1. Pine nemene matre hna aceitunë Satana memine la ketre atre weje öni?

 AME la aja ne la atre weje öni, tre, troa humuth la ketre öni. Celë hi matre, nyimutre la itre hnö hnei angeic hna huliwan, tune la hna qaja ngöne la tusi Iobu. (Iobu 18:8-10) Tune kaa? Angeic a pane goeëne la itre götran hna tro kow hnene la öni, me itre aja ne ej, me thele la aqane troa humuthe ej. Ame fe Satana, angeic a goeëne hnyawa la aqane ujë së, me itre hne së hna ajan, me itre götran hne së hna majemine tro kow. Thupene lai, angeic a asesëkötrë së me tra thethi së. Ngo Tusi Hmitrötr a amamane laka, ijije hi tro sa utretr qa ngön la itre hnö i Satana. Nge ej a ini së la aqane troa neëne itre ej.

2. Nemene la lue hnö i Satana?

² Hnei Satana hna huliwane la lue hnö, ene la pi tru me meciun. * Jëne la lue thiina cili ka ngazo, angeic a tra thethine la itre atr. Hna aceitunë angeic memine la atre hnö ka thele tha. (Sal. 91:3) Ngo ijije hi tro sa utretr qa ngöne la itre hnö i angeic ke, Iehova a qaja amamane la itre nyinyithiina i angeic.—2 Kor. 2:11.

3. Pine nemene matre Tusi Hmitrötr a qaja la tulu ne la itre ka pi tru me meciun?

³ Iehova a hmekë së qa ngöne la pi tru me meciun, jëne  la tulu ne la itre xaa hlue i Nyidrëti e hnine la Tusi Hmitrötr. Tro sa ce wang la tulu ne la itre xan ka kei kowe la lue hnö cili, ngacama ekö hë angatre nyihlue i Iehova. Hapeu, kolo kö lai a hape, thatreine kö së troa utretr qa ngöne la itre hnö i Diabolo? Waea. Hnei Iehova hna aijijëne troa cinyihane la itre hna melën ekö “nyine hmekë së.” (1 Kor. 10:11) Atre hi Nyidrëti laka, tro sa xomi ini qa ngön, matre atreine së troa utretr me neën la itre hnö i Satana.

4. Nemene la ethan e tro sa pi tru?

⁴ Satana a ajane tro sa pi tru. Atre hi angeic laka, maine tro sa pi tru, tro hë sa tui angeic, nge tha tro hë sa hetrenyi la mele ka pë pun. (Ite edomë 16:18) Öni Paulo aposetolo, ame la ka “pi tru . . .  tro angeice a kei kowe la iameköti hna hnëkën koi Diabolo.” (1 Tim. 3:6, 7) Haawe, ijije hi tro sa kei kowe la hnö cili, ngacama ekö hë së nyihlue i Iehova.

5. Thenge la Ate Cainöj 7:16, 20, nemene la hna kuca hnene la atr ka pi tru?

⁵ Ame la ka pi tru ke, angeice hi a sipu meku angeic. Ame la easa cile kowe la ketre jol, Satana a thele matre tro sa pane kuca la sipu aja së nge pine pë hë la aja i Iehova. Hapeu, hetre ka upezö epuni kö maine ka kuca koi epun la ketre ewekë ka tha meköti kö? Satana a ajane tro sa elëhni koi Iehova me kowe la organizasio i Nyidrë. Aja i angeic tro sa mejiune kowe la sipu inamacane së, me tha trongëne la itre trepene meköti Iehova.—E jë la Ate Cainöj 7:16, 20.

6. Nemene la hna ini së hnene la ketre trejine föe qaa Pays-Bas?

⁶ Hnene la ketre trejine föe qa Pays-Bas hna elëhni pine la aqane ujë ne la itre xaa trejin. Öni eahlo: “Eni caasi palahi, nge thatreine hë ni xomihnine la itre trejin. Öning kowe la föeng, ‘ka loi tro nyiso a saze ekalesia.’ ” Ngo hnei eahlo hna goeëne la video ngöne JW Télédiffusion ne Maac 2016. Kola amamane  la aqane troa xomihni itre xan ngacama ngazo la aqane ujë i angatr. E cili, öni eahlo: “Trotrohnine hë ni laka, loi e tro ni a hetre hni ne ipië. Tha tro kö ni a thele troa saze la itre trejin. Ketre, loi e tro ni a canga meku Iehova me sajuëne la musi cile i Nyidrë.” Nemene la ini koi së? Loi e tro sa meku Iehova ngöne la easa cile kowe la ketre jol. Loi e tro fe a sipo iele Nyidrë matre xatua së troa goeë itre xan ceitu me Nyidrë. Öhne asë hi Iehova la itre tria i angatr, ngo Nyidrëti pe a nue la itre ngazo i angatr. Iehova a ajane tro sa nyitipu Nyidrë.—1 Ioane 4:20.

7. Nemene la ka traqa koi Uzia joxu?

⁷ Hnei Uzia, joxu ne Iudra, hna pi tru ngöne la kola haji angeic. Hnei angeic hna kuca la ketre ewekë ngacama tha hnëqa i angeice kö. Nyipici laka, nyimutre la itre ewekë hna atreine kuca hnei Uzia; hnei angeic hna ngaane la itre ithupëjia, me xupe la itre traon, me kuca la itre ewekë thatraqane la huliwa ne eënyi ngöne la nöj. Öni Tusi Hmitrötr: “Hnei Akötesieti hna amanathithinyi nyidë.” (2 A. l. ite jo. 26:3-7, 10) Ngazo pe, kolo fe a qaja ka hape: “Nge catë hë [Uzia], nyidëti a pi tru mate hnëjinepi; ke nyidëti a thina ka ngazo.” Eje hi, hnei Iehova lo hna amekötin laka, tro hmekuje hi la itretre huuj a dreu sinöe ka pui loi e hnine la uma ne hmi. Ngo hnei Uzia joxu hna pi tru me tha idrei, matre hnei Iehova hna elëhni me lepi angeic hnei lepera uti hë la angeic a mec.—2 A. l. ite jo. 26:16-21.

8. Thenge la 1 Korinito 4:6, 7, nemene la ka troa xatua së matre tha tro kö sa pi tru?

⁸ Hapeu, ijije kö tro sa tui Uzia me pi tru? Hanawang la ka traqa koi José, ketre qatre thup hna metrötrën. Nyidrëti a huliwa ngöne biero matre lolo la mele i nyidrë. Ketre, hna sipo nyidrëti palahi troa cile fë cainöj ngöne la itre asabele. Nge ame itre xaa ijin, itre atre thupëne la sirkoskripsio a sipo ixatua koi nyidrë. Öni José: “Ngazo pe, tha hnenge kö hna mejiune koi Iehova, ngo kowe la sipu inamacaneng me itre hnenge hna atrein. Ame koi ni, ka loi hi ni, matre tha hnenge kö hna drengethenge la itre hna amekötin qaathei Iehova.” Ame la pun, hnei José hna kei kowe la ngazo nge hna upetröneë  nyidrë. Itre macatre thupen, nyidrëti a bëeke hmaca koi Iehova. Öni nyidrë: “Hnei Iehova hna amamai ni laka, ame la ka sisitria ke, tha ene kö la hnëqa së. Ame la ka sisitria, tre, troa drengethenge Nyidrë.” Tha tro kö sa thëthëhmine laka, qaathei Iehova la itre hnëqa së me itre hne së hna atreine kuca. (E jë la 1 Korinito 4:6, 7.) Maine tro sa pi tru, tha tro jë kö Iehova a hamë hnëqa koi së.

9. Nemene la hna kuca hnei Satana me Eva pine la meciun?

⁹ Ame la easa qeje meciun, easa canga meku Satana. Maine jë, nyimutre la itre hnëqa i angeic ngöne lo angeic palakö a nyihlue i Iehova. Ame pe, hnei Satana hmaca kö hna thele troa atrunyi angeic, ngacama Iehova hmekuje hi la nyine tro sa atrun. Matre aja i Satana tro sa tui angeic me piine la itre xan. Hanawang la ka traqa e Edrena. Tru la ihnimi Iehova koi Adramu me Eva, matre hnei Nyidrëti hna aijijë nyidro troa xeni qa ngöne la “nöjei sinöe asëjëihë ngöne la hlapa.” Ngo caasi hi la sinöe hna wathebon. (Gen. 2:16) Ngazo pe, hnei Satana hna iaö Eva troa xeni la wene sinöe hna wathebon. Pine laka, tha ijiji Eva kö la itre hna hamëne hnei Iehova, matre hnei angeic hna kei kowe la ngazo. E cili, meci la pune koi angeic.—Gen. 3:6, 19.

10. Pine nemene matre hnei Dravita joxu hna meciun?

¹⁰ Hnei Iehova hna amanathithi Dravita. Hnei Nyidrëti hna aijijë angeic troa trenamo me hlemu. Hnei Nyidrëti fe hna xatua Dravita troa ngaane la itre ithupëjia, matre öni Dravita ka hape, “kösaue it’ eje tha nune e kö!” (Sal. 40:5) Ngo hnei Dravita hna meciun, nge tha ijiji angeice hë la itre hnei Iehova hna hamën. Ngacama nyimutre la itre föe i Dravita, ngo hnei angeic hna piine la föe i Uria, atre Heth. Hnei angeic hna ce meköl me Batheseba, matre hna upune hnei Batheseba. E cili, hnei Dravita hna kuca matre troa humuthi Uria! (2 Sam. 11:2-15) Hapeu, tha öhne kö Iehova la itre hna kuca hnei Dravita? Hnei Dravita hna meciun me kei kowe la ngazo, ame hna hetre ethan kowe la mele i angeic. Eloine  pe, hnei Dravita hna canga ietra me saze. Tru la madrine i Dravita ke, hnei Iehova hmaca hna kepe angeic!—2 Sam. 12:7-13.

11. Thenge la Efeso 5:3, 4, nemene la ka troa xatua së matre tha tro kö sa meciun?

¹¹ Nemene la ini hne së hna xom qa ngöne la hna melën hnei Dravita? Maine tro palahi sa amamane la hni ne ole së kowe la hna hamën hnei Iehova, tha tro hë sa meciune la itre xaa ewekë. (E jë la Efeso 5:3, 4.) Ketre, loi e tro sa mejihnine la hne së hna hetreny. Ame la easa nyiqaane ini tusi memine la ketre atr, easa ini angeic troa hetre hni ne ole koi Iehova e nöjei drai. E cili, traqa koi sevene lao ewekë hnei angeic hna olene koi Iehova ngöne la wiik. (1 Thes. 5:18) Tune kaa fe së? Maine tro sa mekun la itre hnei Iehova hna kuca koi së, tha tro hë sa meciune la itre xaa ewekë. Ngo tro pe sa amamane la hni ne ole së koi Nyidrë me mejihnine la hna hetreny.

12. Nemene la hna kuca hnei Iudra pine la meciun?

¹² Hnei Iudra Isakariota hna meciun me wanaxoeë Iesu, ngacama ketre atr ka loi thiina angeic ekö. (Luka 6:13, 16) Eje hi, hnei Iesu lo hna ië angeic troa ketre aposetolo ke, ka huliwa catre angeic. Ketre, hnei nyidrëti hna mejiune koi angeic me upi angeic troa thupëne la trengene manie. Ceitune hi la manie cili memine la itre ahnahna hne së hna kuiën thatraqane la huliwa ne cainöj. Iesu me itre aposetolo a xome la manie cili thatraqane la itre hnei angatr hna ajane ngöne la kola cainöj. Ngacama hnei Iesu hna anyimua hmekëne la itre atr göne la meciun, ngo hnei Iudra hna nyiqaane atrekënö. (Mar. 7:22, 23; Luka 11:39; 12:15) Hnei Iudra hna wangacone la itre trengewekë i Iesu.

13. Eu la ijine kola mama laka, ketre atr ka meciune Iudra?

¹³ Qëmekene tro Iesu a mec, hna mama cile koi nöjei atr la aqane meciune i Iudra. Hnei Simona lo ka lepera hna könë Iesu troa xen, me itretre drei nyidrë, me Maria me Maretha. E cili, hnei Maria hna nenge la oel ka pui lolo nge ka tru thupen hune la he i Iesu. Tha madrine kö Iudra memine la itretre dreng. Ame la itretre dreng, hnei angatr hna mekun troa salemëne la oel me hamëne la manie kowe la itre ka pë ewekë. Ngo ame Iudra, ketre “atrekënö angeic,” hnei angeic hna piine lai manie. Pine laka, hnei Iudra hna meciun me pi aja mo, matre hnei angeic hna wanaxoeë Iesu me salemë nyidrë koi 30 lao mani sileva, kolo thupene la ketre hlu.—Ioane 12:2-6; Mat. 26:6-16; Luka 22:3-6.

14. Tune kaa la aqane trongëne la lue trefën la hna qaja hnei Iesu ngöne Luka 16:13?

¹⁴ Öni Iesu kowe la itretre dreng: “Thatreine kö nyipunie troa ce nyihlue i Akötresie me Mani.” (E jë la Luka 16:13.) Ka lolo mina fe koi së enehila la trepene meköti celë. Hanawang la hna melën hnene la lue trefën qaa Roumanie. Hna upi nyidro troa huliwa ngöne la ketre nöj ka tru. Öni nyidro: “Tru la gufa i nyio ngöne baak, matre ame lo xötrei, öni nyio ka hape, ketre manathithi lai qaathei Iehova.” Ngo maine tro nyidroti a kapa la huliwa, tha tro hë nyidroti a hetre traem koi Iehova. Hnei nyidroti hna e la tane mekun ngöne la Ita Ne Thup ne 15 Ogas 2008 hna hape, “Loi e Tro Sa Nyipici Cememine La Hni Ka Pexej.” E cili, öni nyidro: “Maine tro ju nyio troa huliwa ngöne la ketre nöj göi manie, tro hë lai a hetre ethane kowe la aqane  imelekeu i nyio me Iehova.” E cili, hnei nyidroti hna nue lai huliwa. Nemene hë la ka traqa? Hnene la trejin trahmanyi hna öhnyi huliwa e Roumanie, thatraqane la mele i nyidro. Önine la trejine föe: “Tha xoxopatre kö la ime i Iehova troa xatuane la itre hlue i Nyidrë.” Madrine catre la lue trefën ke, hnei nyidroti hna ië Iehova ngo tha manie kö.

15. Pine nemene matre ijije hi tro sa utretr qa ngöne la itre hnö i Satana?

¹⁵ Nemene la nyine tro sa kuca ngöne la easa öhne laka, easa pi tru me meciun? Öni Paulo, ijije hi tro la itre “hna jel” hnei Satana a canga utretr qa ngöne la hnö. (2 Tim. 2:26) Hnei Dravita ekö hna dreng la ihaji Nathana me ietra, matre lolo hmaca la aqane imelekeu i angeic me Iehova. Haawe, tha tro kö sa thëthëhmine laka, catrecatre kö Iehova hui Satana. Maine tro sa sipo ixatua koi Nyidrë, tro hë sa utretr qa ngöne la nöjei hnö i Satana.

16. Drei la ka atreine troa xatua së matre neëne la itre hnö i Satana?

¹⁶ Maine tha ajane kö së troa jötr ngöne la itre hnö i Satana, nyipiewekë tro sa canga neëne itre ej, me sipo ixatua koi Iehova. Nyidrëti hmekuje hi la ka atreine troa xatua së. Eje hi, tha tro kö sa mejiune kowe la sipu trengecatre së. Ame la itre xaa hlue i Iehova ka hekö hë ngöne la nyipici, hnei angatr hna pi tru me meciun. Celë hi matre, maine easa öhne laka, kola cia the së la lue thiina cili, loi e tro sa sipo iele Iehova o drai troa xatua së. (Sal. 139:23, 24) Ketre, tro fe sa canga xometrije la lue thiina cili qa kuhu hni së!

17. Nemene hë la pun koi Satana?

¹⁷ Satana palahi a thele tha. Ngo calemi hë la ijine troa othi angeic me humuthi angeic. (Hna ama. 20:1-3, 10) Easa lapa treqene la ijine cili! Ngo eje hi, nyipiewekë palakö tro sa isi matre neëne la itre hnö i angeic. Haawe, thupëne kö së wanga tro sa pi tru me meciun. Catre pi së “icilekeu me Diabolo, nge tro hë angeic a ananyi [së].”—Iako. 4:7.