1. Etɛwu mǐ ka sixu jlɛ́ Satáan dó gběnyatɔ́ ɖé wu?

NǓ ÐOKPO géé gbé wɛ gběnyatɔ́ ɖé nɔ nya; enɛ wɛ nyí ɖɔ é na wlí kanlin ɖé alǒ hu. É sixu zán mɔ vovo lɛ kaka jɛ ee xó gbɔdónúmɛtɔ́ enyíì Jɔbu tɔn lɛ ɖokpo ɖɔ é jí. (Jɔb. 18:8-10) Nɛ̌ gběnyatɔ́ ɖé ka sixu bló gbɔn kaka bɔ kanlin ɖé na jɛ mɔ tɔn mɛ? É nɔ kpɔ́n kanlin ɔ tlítlí. Fitɛ é ka nɔ yì? Etɛ é ka nɔ yí wǎn na? Mɔ ɖagbe hugǎn tɛ è ka sixu ɖó n’i? Satáan cí gběnyatɔ́ enɛ ɖɔhun. É nɔ ba dò nú mǐ. É nɔ ɖ’ayi fí e mǐ nɔ yì lɛ é, kpo nǔ e mǐ nɔ yí wǎn na lɛ é kpo wu. Enɛ gudo ɔ, é nɔ ɖó mɔ e é lin ɖɔ mǐ na jɛ mɛ ɖò manywɛ mɛ é ɖé nú mǐ. É ɖò mɔ̌ có, Biblu na ganjɛwu mǐ ɖɔ enyi mǐ jɛ mɔ tɔn lɛ mɛ ɔ, mǐ sixu kpéwú bo tɔ́n sín mɛ. É lɛ́ kplɔ́n mǐ lee mǐ sixu nyi alɔ nú mɔ enɛ lɛ gbɔn é.

2. Ðɔ wlɛnwín e Satáan nɔ zán b’ɛ nɔ w’azɔ̌ hugǎn lɛ é we.

² Satáan sín mɔ e nɔ w’azɔ̌ ganji lɛ é we wɛ nyí goyiyi kpo nukúnkɛ́ndidó kpo. * Nú xwè afatɔ́n mɔ̌kpan ɔ, Satáan zán wlɛnwín baɖabaɖa enɛ lɛ b’ɛ kpa ɛ. É cí xɛgbényatɔ́ e nɔ hɛn ayi dó dɔn xɛ ɖé dó mɔ, alǒ aja mɛ é ɖé ɖɔhun. (Jel. 5:26) Amɔ̌, mǐ ɖó na lɔn bɔ Satáan na wlí mǐ dó mɔ tɔn mɛ ǎ. Etɛwu? Ðó Jehovah ɖè wlɛnwín e Satáan nɔ zán lɛ é xlɛ́ mǐ wutu.—2 Kɔ. 2:11.

3. Etɛwu Jehovah ka bló bɔ kpɔ́ndéwú ɖé lɛ ɖò Biblu mɛ?

³ Ali e nu Jehovah nɔ gb’akpá nú mǐ dó goyiyi kpo nukúnkɛ́ndidó kpo wu ɖè lɛ é ɖokpo wɛ nyí ɖɔ, é nɔ dó wusyɛn lanmɛ nú mǐ ɖɔ mǐ ni nɔ kpɔ́n nǔ dó nǔ e jɛ dó mɛsɛntɔ́  emitɔn ɖé lɛ wu é wu dó wà nǔ. Ðò kpɔ́ndéwú ɖěɖee mǐ na gbéjé kpɔ́n lɛ é mɛ ɔ, ɖ’ayi wu ɖɔ Satáan kpéwú bo ɖó mɔ nú mɛsɛntɔ́ Jehovah tɔn ɖěɖee tlɛ zin lɛ é. Enɛ xlɛ́ ɖɔ mǐ kún sixu ɖu ɖò Satáan jí gbeɖé ó wɛ à? Ðebǔ ǎ. Jehovah bló bɔ kpɔ́ndéwú enɛ lɛ ɖò Biblu mɛ “bo na dó kplɔ́n nǔ mǐ.” (1 Kɔ. 10:11) É tuùn ɖɔ kpɔ́ndéwú akpágbánúmɛ tɔn enɛ lɛ sixu kplɔ́n nǔ mǐ, bɔ mɔ̌ mɛ ɔ, mǐ na nyi alɔ nú mɔ awoví tɔn lɛ, alǒ tɔ́n sín ye mɛ.

4. Etɛ mɛ goyiyi ka sixu dɔn mɛ dó?

⁴ Satáan ba ɖɔ mǐ ni huzu goyitɔ́. É tuùn ɖɔ enyi mǐ huzu goyitɔ́ ɔ, mǐ na cí emiɖɔhun, bo na ba nukúnɖiɖó gbɛ̀ mavɔmavɔ ɔ tɔn kpo. (Nǔx. 16: 18) Enɛ wu ɔ, mɛsɛ́dó Pɔlu gb’akpá nú mɛ ɖɔ ‘goyiyi sixu wá byɔ lanmɛ nú mɛɖé bɔ Mawu na ɖó hwɛ n’i lee é ɖó hwɛ nú Awoví gbɔn é.’ (1 Tim. 3:6, 7) Enɛ sixu jɛ dó mǐ mɛ ɖebǔ wu, mǐ na bo nyí mɛ yɔyɔ̌ ɖò nǔgbo ɔ mɛ, alǒ ko ɖò Jehovah sɛn wɛ sín xwè mɔ̌kpan ɖíe ɔ nɛ.

5. Lee Nǔnywɛtɔ́xó 7:16, 20 xlɛ́ gbɔn é ɔ, nɛ̌ mɛɖé ka sixu ɖexlɛ́ ɖɔ emi nyí goyitɔ́ gbɔn?

⁵ Cejɛnnabinɔ wɛ nyí goyitɔ́ lɛ. Satáan nɔ tɛ́n kpɔ́n, bo na sísɛ́ mǐ bonu mǐ na huzu cejɛnnabinɔ, lobo na nɔ sɔ́ ayi ɖó mǐɖée jí hugǎn Jehovah jí, taji ɔ hwenu e mǐ ɖò wuvɛ̌ ɖé mɛ é. Ði kpɔ́ndéwú ɔ, è ka ko dóhwɛ agɔ we kpɔ́n à? Alǒ, è ka ko wà nǔ xá we ɖò ali agɔ nu kpɔ́n à? Satáan nɔ ba ɖɔ a ni nɔ dóhwɛ Jehovah, alǒ nɔví towe lɛ. Gɔ́ na ɔ, Awoví ba ɖɔ a ni mɔ ɖɔ nǔ ɖokpo e na ɖeɖɛ tagba lɛ é wɛ nyí ɖɔ hwi ni wɔn ya nú alixlɛ́mɛ ɖěɖee Jehovah na we ɖò Xó tɔn mɛ lɛ é, bo wà nǔ lɛ lee hwiɖesunɔ jló gbɔn é.—Xà Nǔnywɛtɔ́xó 7:16, 20.

6. Etɛ nǔ e jɛ dó nɔví nyɔnu e nɔ nɔ Pays-Bas é ɖé jí é ka sixu kplɔ́n we?

⁶ Lin tamɛ dó kpɔ́ndéwú nɔví nyɔnu e nɔ nɔ Pays-Bas é ɖé tɔn jí. Agɔ e mɛ ɖevo lɛ jɛ dó è é d’akpɔ n’i, b’ɛ wá gbeta ɔ kɔn ɖɔ emi kún sɔ́ na nɔ zán hwenu ɖó kpɔ́ xá mɛ enɛ lɛ ó. É ɖɔ: “Un mɔ ɖɔ un ɖò nyiɖokponɔ tawun, bo kún sɔ́ sixu jlá lee nǔ cí nú mì é  ɖó ó. Un ɖɔ nú asú ce ɖɔ mǐ ɖó na sɛ̀ tɛn yì agun ɖevo mɛ.” Enɛ gudo ɔ, nɔví nyɔnu ɔ kpɔ́n tuto Televiziɔn JW^® tɔn mars 2016 tɔn. È ɖè wě ɖé lɛ xá mɛ dó lee è sixu ɖí xwi xá nǔwanyido mɛ ɖevo lɛ tɔn gbɔn é wu ɖò tuto enɛ mɛ. Nɔví nyɔnu ɔ ɖɔ: “Un mɔ ɖɔ un ɖó na sɔ́ nyiɖée hwe, bo sɔ́ ayi ɖó nǔwanyido ce lɛ jí hú ɖɔ ma tɛ́n kpɔ́n bo ɖyɔ nɔví e ɖò agun ɔ mɛ lɛ é. Tuto ɔ d’alɔ mì bɔ un sɔ́ ayi ɖó Jehovah kpo Nǔbǐwukpétɔ́ e é nyí é kpo jí.” A ka ɖ’ayi nǔkplɔnmɛ ɔ wu à? Enyi mɛtɛnkpɔn ɖé kpannukɔn we hǔn, kpò ɖò ayi sɔ́ ɖó Jehovah jí wɛ. Savo n’i ɖɔ é ni d’alɔ we bonu a na nɔ kpɔ́n mɛ ɖevo lɛ lee é nɔ kpɔ́n ye gbɔn é. Tɔ́ towe jixwé tɔn ɔ nɔ mɔ nǔwanyido yetɔn lɛ có, é ka nɔ ɖò gbesisɔmɛ bá sɔ́ hwɛ kɛ ye. É ba ɖɔ hwi lɔ ni nɔ wà nǔ ɖokpo ɔ.—1 Jaan 4:20.

7. Etɛ ka jɛ dó Axɔ́su Oziyasi wu?

⁷ Goyiyi sísɛ́ Judáa Xɔ́su Oziyasi bɔ é gbɛ́ wěɖexámɛ mɛ ɖevo lɛ tɔn, bo wà nǔ e é ma ɖó acɛ tɔn ǎ é. Oziyasi wà nǔ ɖagbe gegě. Ahwankpá tɔn ɖó ɖuɖeji gegě, é gbá toxo gegě, bo lɛ́ ɖó gle lɛ kɔn nyi kpɔ́. “Mawu nɔ bló bɔ é wà nǔɖe ɔ, é nɔ mɔ nu tɔn.” (2 Tan 26:3-7, 10) Biblu ɖɔ: “Loɔ, ee acɛkpikpa tɔn jinjɔn ayǐ mɔ̌ ɔ, é jɛ gò yí jí, bo sɔ́ éɖée nyi gbě.” Jehovah ka ko dó sɛ́n wá yì ɖɔ vɔsanúxwlémawutɔ́ lɛ kɛɖɛ wɛ è na gbè bɔ ye na nɔ dó zalinkpɔ́n zo ɖò tɛmpli ɔ mɛ. É ɖò mɔ̌ có, Axɔ́su Oziyasi syɛn ta, bo byɔ tɛmpli ɔ mɛ bo na dó xwlé zalinkpɔ́n Jehovah. É nyɔ́ Jehovah nukúnmɛ ǎ bɔ é dó guduzɔn nya goyitɔ́ enɛ. Gudu ɔ nɔ Oziyasi wu nú gbɛhwenu tɔn e kpò é bǐ.—2 Tan 26:16-21.

8. Sɔgbe xá 1 Kɔlɛntinu lɛ 4:6, 7 ɔ, nɛ̌ mǐ ka sixu nyi alɔ nú goyiyi gbɔn?

⁸ Goyiyi ka sixu zɔ́n bɔ mǐ zɔn mɔ e mɛ Oziyasi zɔn é ɖɔhun mɛ à? Ðǒ ayi kpɔ́ndéwú José tɔn wu. Ajɔ̌watɔ́ e ajɔ̌ tɔn ɖò yiyi wɛ ganji é ɖé wɛ n’i, b’ɛ lɛ́ nyí mɛxo agun tɔn e è nɔ ɖó sísí na é ɖé. É nɔ xwlé xóɖiɖɔ lɛ mɛ ɖò kpléɖókpɔ́ lɛ jí, bɔ nukúnkpénuwutɔ́ lɛdo tɔn lɛ nɔ wá ba wěɖexámɛ ɖò gɔ̌n tɔn. É ɖɔ: “Amɔ̌, un ganjɛ nǔwukpíkpé ce lɛ kpo nǔ e un ko mɔ kpɔ́n lɛ é kpo wu, bo sɔ́ nɔ ɖeji dó Jehovah wu ǎ. Un lin ɖɔ agbɔ̌n ɖò wǔ yè, enɛ wu ɔ, un sɔ́ nɔ ɖótó akpágbánúmɛ Jehovah tɔn lɛ kpo wěɖexámɛ tɔn lɛ kpo ǎ.” José hu hwɛ syɛnsyɛn ɖé, bɔ è ɖè è sín agun mɛ. Xwè mɔ̌kpan gudo ɔ, è wá yí i dó agun ɔ mɛ. É ɖɔ dìn ɖɔ:  “Jehovah kplɔ́n mì ɖɔ nǔ e ɖò taji é wɛ nyí tɛn e mɛ è ɖè é ǎ, loɔ, nǔ e É byɔ mǐ é wiwa wɛ ɖò taji.” Mi nú mǐ ni nɔ hɛn d’ayi mɛ ɖɔ Jehovah wɛ na nǔwukpíkpé e mǐ ɖó lɛ é kpo wǔjɔmɛ e mǐ ɖó ɖò agun ɔ mɛ lɛ é kpo bǐ mǐ. (Xà 1 Kɔlɛntinu lɛ 4:6, 7.) Enyi mǐ nyí goyitɔ́ ɔ, Jehovah na zán mǐ ǎ.

9. Etɛ nukúnkɛ́ndidó ka sísɛ́ Satáan kpo Ɛvu kpo bɔ ye wà?

⁹ Enyi è ɖò nukúnkɛ́ndidó xó ɖɔ wɛ ɔ, Satáan Awoví wɛ nɔ yawǔ wá ayi mɛ nú mɛ. Ðó Satáan nyí wɛnsagun Jehovah tɔn ɖé wutu ɔ, é ɖó na ko ɖó wǔjɔmɛ ɖaaɖagbe gegě. Amɔ̌, enɛ lɛ kpé è ǎ. É nɔ ba ɖɔ è ni sɛn emi; Jehovah ɖokpo géé wɛ é ka jɛxa ɖɔ è ni sɛn. Satáan ba ɖɔ mǐ ni cí emi ɖɔhun, enɛ wu ɔ, é nɔ tɛ́n kpɔ́n bo na bló bonu mǐ na nɔ jló nǔ zɛ xwé wu. Hwenu e é ɖɔ xó nú Ɛvu é wɛ nyí azɔn nukɔntɔn e é tɛ́n kpɔ́n bo wà mɔ̌ é. Kpo wanyiyi kpo wɛ Jehovah sɔnǔ nú nǔɖuɖu ɖaaɖagbe gegě nú Ɛvu kpo asú tɔn kpo, bɔ ye sixu “ɖu atín e ɖò jikpá ɔ mɛ é bǐ sín sínsɛ́n,” ɖokpo jɛn ma ɖ’emɛ ǎ. (Bǐ. 2:16) É ɖò mɔ̌ có, Satáan blɛ́ Ɛvu bɔ é mɔ ɖɔ emi ɖó na ɖu atín sínsɛ́n e è gbɛ́ é. Nǔ e Ɛvu ɖó é jɛmɛ n’i ǎ; é lɛ́ kpò ɖò biba d’eji wɛ. Mǐ tuùn nǔ e enɛ jì é. Ɛvu hu hwɛ, bɔ wǎgbɔ tɔn ɔ, é kú.—Bǐ. 3:6, 19.

10. Nɛ̌ nukúnkɛ́ndidó ka huzu mɔ ɖé nú Axɔ́su Davidi gbɔn?

¹⁰ Nukúnkɛ́ndidó zɔ́n bɔ Axɔ́su Davidi wɔn nǔ e Jehovah na ɛ lɛ é. Dɔkun, susu, kpo ɖuɖeji e é ɖó ɖò kɛntɔ́ tɔn lɛ gegě jí é kpo ɖò nǔ enɛ lɛ mɛ. Kpo nǔsumɛnukúnmɛ kpo wɛ Davidi yí gbè ɖɔ nǔnina Mawu tɔn lɛ ‘sukpɔ́ bo gégé, bɔ emi kún sixu jlɛ́ ó.’ (Ðɛh. 40:6) Amɔ̌, é wá sù hweɖenu bɔ Davidi wɔn nǔ e Jehovah na ɛ lɛ é. Nǔ enɛ lɛ sɔ́ wá kpé è ǎ, bɔ é jɛ biba d’eji jí. Davidi ɖó asì gegě có, é jó éɖée dó bɔ jlǒ masɔgbe ɖiɖó nú mɛ ɖevo sín asì dó ɖɔ dò ɖò ayi tɔn mɛ. Bɛtisabe wɛ nyɔnu ɔ nɔ nyí, bɔ asú tɔn nɔ nyí Ulíi; Hititinu wɛ nú Ulíi. Cejɛnnabi sísɛ́ Davidi bɔ é ɖó xó xá Bɛtisabe, bɔ é mɔ xò. Nǔ nyanya enɛ e Davidi wà é kpé è ǎ, bɔ é lɛ́ bló tuto bonu è na hu Ulíi. (2 Sam. 11:2-15) Etɛ lin wɛ Davidi ka ɖè? É lin ɖɔ Jehovah kún sixu mɔ emi ó wɛ à? Mɛsɛntɔ́ Jehovah tɔn enɛ e ko nɔ gbeji wá yì é jó éɖée dó nú nukúnkɛ́ndidó bo ka sè xɔxɔ tɔn. Nukɔnmɛ ɔ, Davidi wá  yí gbè nú nǔwanyido tɔn lɛ, bo lɛkɔ sín hwɛ tɔn lɛ gudo. É na ko sù nukún tɔn mɛ tawun ɖɔ nǔ tɔn lɛ́ nyɔ́ Jehovah nukúnmɛ!—2 Sam. 12:7-13.

11. Sɔgbe xá Efɛzinu lɛ 5:3, 4 ɔ, etɛ ka sixu d’alɔ mǐ bɔ mǐ na ɖu ɖò nukúnkɛ́ndidó jí?

¹¹ Etɛ kpɔ́ndéwú Davidi tɔn ka kplɔ́n mǐ? Mǐ kplɔ́n ɖɔ enyi nǔ ɖěɖee Jehovah na mǐ lɛ é bǐ nɔ sù nukún mǐtɔn mɛ ɔ, mǐ sixu ɖu ɖò nukúnkɛ́ndidó jí. (Xà Efɛzinu lɛ 5:3, 4.) Nǔ e mǐ ɖó é ɖó na nɔ kpé mǐ. Enyi mǐ jɛ Biblu kplɔ́n xá mɛ lɛ jí ɔ, mǐ sixu kplɔ́n ye ɖɔ ye ni lin tamɛ dó nǔ ɖěɖee Jehovah na ye lɛ é ɖokpo jí, bo dókú n’i ɖó enɛ wu. Enyi mɛɖé nɔ wà mɔ̌ gbè bǐ gbè nú aklunɔzán gbla ɖokpo ɔ, enɛ xlɛ́ ɖɔ é xoɖɛ dó nǔ vovo tɛnwe takúnmɛ nɛ. (1 Tɛ. 5:18) A ka nɔ wà mɔ̌ à? Enyi a nɔ lin tamɛ dó nǔ ɖěɖee Jehovah ko wà nú we lɛ é bǐ jí ɔ, enɛ na d’alɔ we bɔ a na nɔ dókú n’i; mɔ̌ mɛ ɔ, nǔ e a ɖó é na kpé we. Enɛ ɔ, nukúnkɛ́ndidó sɔ́ na mɔ tɛn ɖò wǔ we ǎ.

12. Etɛ mɛ nukúnkɛ́ndidó ka dɔn Judasi Isikaliɔti dó?

¹² Nukúnkɛ́ndidó sísɛ́ Judasi b’ɛ wà nǔ e nyla tawun é ɖé, lobo sà Jezu. Amɔ̌, ɖò bǐbɛ̌mɛ ɔ, Judasi nyí mɛ nyanya ɖé ǎ. (Luk. 6:13, 16) Jezu sɔ́ ɛ, bɔ é nyí mɛsɛ́dó tɔn. É ɖò wɛn ɖɔ, Jezu nɔ ɖeji dó wǔ tɔn, ɖó é wɛ nɔ hɛn akwɛgbá ɔ. Jezu kpo mɛsɛ́dó lɛ kpo nɔ zán akwɛ enɛ lɛ dó sú nǔ e nɔ hudo ye ɖò wɛnɖagbejijlazɔ́ ɔ mɛ lɛ é sín dò. Ðò ali ɖé nu ɔ, akwɛ enɛ lɛ cí akwɛ e è nɔ na dó nɔ gudo nú yɛhwexɔ́suɖuto ɔ sín azɔ̌ e wà gbɔn gbɛ̀ ɔ bǐ mɛ wɛ è ɖè égbé lɛ é ɖɔhun. Judasi nɔ sè bɔ Jezu nɔ gb’akpá nú ye hwɛhwɛ dó nukúnkɛ́ndidó wu có, é wá jɛ hweɖenu bɔ é jɛ alɔ dó akwɛ ɔ mɛ jí. (Mak. 7:22, 23; Luk. 11:39; 12:15) Judasi dóvɛ̌ nú akpágbánúmɛ enɛ lɛ.

13. Hwetɛnu nukúnkɛ́ndidó Judasi tɔn ka jɛ wě?

¹³ Táan klewun ɖé jɛ nukɔn nú kú Jezu tɔn ɔ, nukúnkɛ́nnɔ e Judasi nyí é jɛ wě. Jezu kpo ahwanvu tɔn lɛ kpo, kaka jɛ Mali kpo nɔví tɔn nyɔnu Mata kpo jí yì ba Sinmɔ́ɔ gudunɔ ɔ kpɔ́n. Ee ye ɖò nǔ ɖu wɛ é ɔ, Mali site bo kɔn célu wǎnɖagbenɔ axivɛ́nú ɖé dó Jezu ta. É vɛ́ Judasi kpo mɛsɛ́dó ɖě lɛ kpo wu tawun. Mɛsɛ́dó ɖě lɛ sixu ko mɔ ɖɔ é na nyɔ́ hugǎn ɖɔ è ni zán akwɛ enɛ dó d’alɔ mɛ e ɖò hudo mɛ lɛ é. Amɔ̌, hwɛjijɔ vo wu wɛ Judasi sin xomɛ. “Ajotɔ́ wɛ n’i,” bɔ é ba na fin akwɛ ɖò akwɛgbá ɔ mɛ. Nukɔnmɛ ɔ, nukúnkɛ́ndidó sísɛ́ Judasi bɔ é sà Jezu yí akwɛ e è nɔ dó sà kannumɔ ɖé na é.—Jaan 12:2-6; Mat. 26:6-16; Luk. 22:3-6.

14. Nɛ̌ asú kpo asì kpo ɖé ka zán nǔkplɔnmɛ e ɖò Luki 16:13 mɛ é gbɔn?

¹⁴ Jezu flín nǔgbo dodónú tɔn elɔ ahwanvu tɔn lɛ: “Mi sixu sɛn Mawu, bo lɛ́ sɛn dɔkun ǎ.” (Xà Luki 16:13.) Xó enɛ kpò ɖò nǔgbo nyí wɛ. Mǐ ni kpɔ́n lee asú kpo asì kpo e nɔ nɔ Roumanie é ɖé yí gbè nú xó Jezu tɔn lɛ, bɔ é wà ɖagbe nú ye gbɔn é. È xwlé azɔ̌ hwenu klewun ɖé tɔn ye ɖò tò e jɛ dɔkun tawun é ɖé mɛ. Ye yí gbè ɖɔ: “Mǐ ɖu axɔ́ ɖaxó ɖé dó akwɛsɛxwetɛn ɖé, bo ɖó na sú; enɛ wu ɔ, ɖò bǐbɛ̌mɛ ɔ, mǐ lin ɖɔ azɔ̌ enɛ ɔ, Jehovah wɛ hun ali tɔn.” É ka ɖò mɔ̌ có, xó kpò. Azɔ̌ ɔ na ɖó dogbó nú sinsɛnzɔ́ e wà nú Jehovah wɛ ye ɖè é. Ee ye xà xóta, “Hẹn Nugbonọ-Yinyin Go po Ahun Dopo Po” ee tɔ́n ɖò Atɔxwɛ (Gungbe) 15 août 2008 tɔn mɛ é gudo é ɔ, ye wá gbeta yetɔn kɔn. Ye ɖɔ: “Enyi akwɛ gegě ɖuɖu wɛ na zɔ́n bɔ mǐ na yì wà azɔ̌ ɖò tò ɖevo mɛ ɔ, kancica e mǐ ɖó xá Jehovah é sɔ́ ɖò tɛn nukɔntɔn ɔ mɛ ǎ nɛ. Mǐ mɔ nǔ jɛ wu ɖɔ kancica e mǐ ɖó xá Jehovah é na jɛ axɔ́ nu.” Enɛ wu ɔ, ye gbɛ́ azɔ̌ ɔ. Nɛ̌ nǔ lɛ ka wá yì gbɔn? Asú tɔn mɔ azɔ̌ ɖé dó tò e mɛ ye ɖè é, bɔ é nɔ sú hudo yetɔn lɛ sín dò. Asì ɔ ɖɔ: “Jehovah nɔ d’alɔ  mɛsɛntɔ́ tɔn lɛ hwebǐnu.” Xomɛ hun asú kpo asì kpo enɛ ɖɔ Jehovah wɛ ye sɔ́ dó ɖó Gǎn yetɔn, b’ɛ kún nyí akwɛ ó.

15. Etɛwu mǐ ka sixu kúdeji ɖɔ è sixu tɔ́n sín mɔ Satáan tɔn lɛ mɛ?

¹⁵ Enyi mǐ nɔ mɔ ɖɔ mǐ nɔ yí gò, alǒ mǐ nɔ dó nukúnkɛ́n ɔ ka lo? Mǐ sixu ɖyɔ! Pɔlu ɖɔ ɖɔ mɛ ɖěɖee Awoví “wlí [gbɛɖe]” lɛ é sixu lɛ́ tɔ́n sín mɔ tɔn mɛ. (2 Tim. 2:26) Gudo mɛ ɔ, Davidi ɖótó wěɖexámɛ Natáan tɔn, bo jó nukúnkɛ́ndidó dó, lobo vɔ́ kancica e é ɖó xá Jehovah é jlaɖó. Nɔ flín hwebǐnu ɖɔ Jehovah ɖ’agbɔ̌n tawun hú Satáan. Enɛ wu ɔ, enyi mǐ nɔ yí gbè nú alɔdó Jehovah tɔn ɔ, mǐ sixu tɔ́n sín mɔ, alǒ fɛ́ca e Awoví nɔ ɖó nú mɛ lɛ é bǐ mɛ.

16. Etɛ ka sixu d’alɔ mǐ bɔ mǐ na hɔn nú mɔ Satáan tɔn lɛ?

¹⁶ Nǔgbo ɔ, é na nyɔ́ hugǎn ɖɔ mǐ ni nyi alɔ nú goyiyi kpo nukúnkɛ́ndidó kpo. Alɔdó Mawu tɔn kɛɖɛ jɛn sixu nyí tɔn, bɔ mǐ kpé enɛ wu. Amɔ̌, mǐ ɖó na nɔ lín ɖɔ mǐ kún sixu huzu goyitɔ́, alǒ nukúnkɛ́nnɔ gbeɖé ó ǎ! Mɛ e tlɛ ko ɖò Jehovah sɛn wɛ bɔ xwè ko jɛ dó é ɖé lɛ wá huzu goyitɔ́, alǒ nukúnkɛ́nnɔ. Enɛ wu ɔ, nɔ savo nú Jehovah gbè bǐ gbè, ɖɔ é ni d’alɔ we nú a na tuùn nú jijɔ baɖabaɖa enɛ lɛ ko ɖò nǔ wà dó linlin kpo nǔwalɔ towe lɛ kpo wu wɛ à jí. (Ðɛh. 139:23, 24) Má lɔn gbeɖé nú ye mɔ tɛn ɖò wǔ we ó!

17. Etɛ ka na jɛ dó kɛntɔ́ mǐtɔn Awoví wu ɖò malin-malin mɛ?

¹⁷ Sín xwè afatɔ́n mɔ̌kpan ɖíe wɛ Satáan ko nyí gběnyatɔ́ ɖé. Amɔ̌ zaanɖé dìn ɔ, è na dó wlɔ ɛ, bo na wá sú kún tɔn dó. (Nǔɖe. 20:1-3, 10) Mǐ ɖò nukún ɖó azǎn enɛ wɛ vɛnavɛna. Amɔ̌, kaka jɛ hwe enɛ nu ɔ, nɔ cɔ́ hwiɖée dó mɔ Satáan tɔn lɛ wu. Wà nǔ e wu a kpé é bǐ, bonu goyiyi, alǒ nukúnkɛ́ndidó ma wà nǔ dó wǔ we ó. Kánɖeji bo na “lodǒ ɖò Awoví nukɔn, enɛ ɔ, é na hɔn yì zɔ nú [we].”—Ja. 4:7.