1. Soitanak eka xikareak kiteak sor kela?

EK XIKARI zonvarak dhorunk vo marunk veg-veglle toreche fas uzar korta. Hea vixim Jobak buzvonn diunk ailʼlea tachea khottea ixttamnim pasun sanglolem. (Job 18:8-10) Tor, ek xikari eka zonvarak aplea fasant sampddaunk kitem korta? To tea zonvara vixim bariksannen zannam zata. Tem zonvar khoim voita, taka kitem avoddtta ani kitem korun taka okosmat fasant ghalunk zata tea vixim to zannam zata. Soitanui tea xikarea sarko asa. Ami khoim voitat, amkam kitem avoddtta, hem to bariksannen polloita. Uprant, to oxea ritin fas manddtta ki ami tantunt kollonastana poddonk xoktat. Punn, ami Soitanachea fasant poddlim zalear pasun ami tantuntlean bhair soronk zata mhunn amkam Bible khatri dita. Toxench, ami hea fasantlean koxem pois ravonk zai tem-ui Bible amkam xikoita.

2. Amkam fosounk Soitan kosle don fas uzar korta?

² Soitan uzar korta te don fas mhunnttlear, gorv ani as. * Ani he don-ui fas hozaramnim vorsam thaun to uzar korit aila. To eka xikarea sarko amkam hea donui fasant sampddaunk sodhta. (St. 91:3) Punn, Soitan amkam fosounk kosle fas uzar korta tem Jehovan amkam poilinch sanglam dekhun ami tachea fasantlean pois ravonk xoktat.​—2 Kor. 2:11.

3. Jehovan amchea pasot Bible-ant thoddim udharonnam kiteak boroun dovorleant?

³ Jehova Dev amkam gorvan fulona zaunk vo as korina zaunk xittkaita. Tannem Bible-ant oslea munxam vixim  boroun dovorlam jim hea fasant poddlim. Tanchim udharonnam ami polloit zalear amkam kollon ieta ki zaitim vorsam Devachi seva kortat tim munxam pasun gorvixtt zali vo tankam as zali. Tor hacho orth oso kai, ki ami pasun gorv ani as hea fasant poddttolim? Na, toxem nhoi. Jehova Devan him udharonnam “amkam xittkaunchem khatir” Bible-ant boroun dovorleant. (1 Kor. 10:11) Hea udharonnam thaun xikon ami Soitanachea fasam thaun pois ravlolim vo tantuntlim bhair sorlolim Jehovak zai.

4. Ami gorvan bhorlim zalear kitem zatolem?

⁴ Soitanak ami gorvan fulʼlolim zai. Ami oxem kelear tache bhaxen zatolim ani sasnachem jivit hogddaitolim. (Mho. 16:18) Ani hea vixim apostl Paulun pasun xittkailolem, ki ami ‘gorvan fulon devcharachea khastichea formonnak sampddonk’ xoktat. (1 Tim. 3:6, 7) Tor, ami khub vorsam thaun Jehovachi seva kortat astolim vo halinch tachea vixim xiktat astolim. Tori pasun ami gorvan fulonk xoktat.

5. Upodexok 7:16 ani 20-ant dakhoilʼlea pormonnem, ek munis gorvixtt asa mhunn koxem kolltta?

⁵ Ek gorvixtt munis Jehova poros apleach vixim chodd chinta. Chodd korun konnui tacher boglantt ghalta vo tacher onʼneai korta tednam, Jehovachem margdorxon gheunchea bodlek, to apleak zai te bhaxen ti somosia suttavi korunk sodhta. Toxench, to soglo arop Jehovacher vo bhav-bhoinnancher ghalta. Ani tannem oxench kelolem Soitanak zai.​—Upodexok 7:16, 20 vachat.

6. Netherlands-ant ravpi eke bhoinni thaun ami kitem xikonk zata?

⁶ Atam ami Netherlands-ant ravpi eke bhoinnichem udharonn polloum-ia. Bhav-bhoinnincheo chuki polloun tika khub rag ietalo. Hem tichean sosunk zaunchem na oxem tika dislem. Ti mhunntta: “Tea bhav-bhoinnank bhogsunk mhaka kotthin zalem. Ani mhaka eksurponn bhogonk  laglem. Hanvem mhojea ghovak, ami dusrea sobhent ia mhunn sanglem.” Uprant, tea bhoinnin Mars 2016-cho JW Broadcasting^® polloilo. Ami dusreancheo chuki polloitat tednam ami kitem korunk zata tea vixim tantunt sanglolem. Ti mhunntta: “Hanvem khaltikai dakhounk zai ani dusreanchea nhoi punn mhojea chukincher dhean diunk zai. Ani Jehova teo somosia suttaveo kortolo mhunn hanvem patieun ravonk zai mhunn mhaka kollon ailem.” Tor, ami tea bhoinni thaun kitem xikonk zata? Amkam konnui dukhoita zalear ami Jehovacher patieun ravonk zai ani tanchea chukincher dhean dinastana tankam bhogsunk Jehovachi modot magonk zai.​—1 Juanv 4:20.

7. Gorvak lagon Uzzia Razachea jivitant kitem ghoddlem?

⁷ Amkam gorv asa zalear ami dusreancho solʼlo gheunchim nant ani ami amchea odhikara bhair voitolim. Hem koxem zaunk xokta tem Uzzia Razachea udharonnantlean ami polloum-ia. Uzzia Raza zaitim zhuzam jiklolo ani tannem zaitim borim kamam kelʼlim. Ani tantunt taka ies mellʼllem karonn “Devan taka mozot keli.” (2 It. 26:3-7, 10) “Punn ek pavtt to mozbut zatoch, tacho mod itlo chodd zalo ki to sokla poddlo.” Jehovan iadnikank dhump bhettoupachi zobabdari dilʼli. Punn Uzzia apunn dhump bhettounk Dev mondirant gelo. Hem Jehovak avoddonk na dekhun tannem taka koddachi pidda dili. Ani to moro poriant ek koddkar zaun urlo.​—2 It. 26:16-21.

8. Ami gorvan fulona zaunk, 1 Korintkarank 4:6, 7 amkam koso modot korta?

⁸ Uzziak jem ghoddlem tem konnakui ghoddonk xokta. Atam ami Jose nanvachea bhavachem udharonn polloum-ia. Tacho veapar-dhondo boro choltalo, to sobhent vhoddil aslo ani zomatimnim ani odhivexonamnim bhaxonnam ditalo. Toxench, sorkittachi dekhrekh korpi pasun tache koddlean solʼlo ghetale. To mhunntta: “Hanv Jehovacher patieun ravchea bodlek svotacher patieun ravlo. Tor, Jehova dita tea margdorxonachi mhaka goroz na oxem mhaka dislem.” Uprant, Jose-an ek vhodd patok adarlem ani taka lagon taka sobhentlean bhair ghatlo. Punn, atam to sobhent porot ieun zaitim vorsam zaleant. To mhunntta: “Fokot zobabdari asop gorjechem nhoi, punn Jehova tuka kitem sangta tem  korop gorjechem mhunn hanv xiklo.” Tor, amkam ji kola asa vo amkam ji zobabdari mellʼllea ti Jehova thaun asa mhunn ami ugddas dovrum-ia. (1 Korintkarank 4:6, 7 vachat.) Ani ami gorvixtt zalim zalear, Jehova Dev amkam aplea sevent uzar korcho na.

9. Axek lagon Soitan ani Eve kitem korunk pavlim?

⁹ As hea utra vixim ami chintat tednam poilim amchea monant Soitan ieta. To ek boro ainz aslo ani taka zaiteo zobabdareo asleo. Tori astana, taka Jehovak favo aslolea bhoktechi as zali. Aiz Soitan amkam-i heach fasant ghalunk sodhta. Taka, ami amchea lagim asa tantunuch dhadoxi ravlolim naka, punn tachea bhaxen zalolim zai. Oxem korunk tannem sogleant poilim Eve-k vinchli. Jehova Devan Adanv ani Evek fokot ekuch zhadd soddun “bhagent aslolea sogllea rukhanchim follam” tannim khaunk zata mhunn sanglolem. (Ut. 2:16) Punn, Jehovan khainaka mhunn sanglolea zhaddachem foll khaunk Soitanan Evechea monant as ghatli. He axek lagon, Jehovan apnnak dilam tea pasot Eve dhadoxi asonk na. Hacho porinnam, tinnem patok adarlem ani tika moronn favo zalem.​—Ut. 3:6, 19.

10. David Razak as zali tednam tannem kitem kelem?

¹⁰ David ek Raza aslo ani tachea lagim zaiti girestkai asli. Toxench, to zaitim zhuzam jiklolo. Him soglim “ucharum-nozo titlim” dennim Jehovan taka dileant mhunn to zannam aslo. (St. 40:5) Punn eka vellar Jehovan taka kitem dilam tem soglem to visorlo. To dhadoxi naslo. Taka anik zai aslem. Taka zaiteo bailo asleo. Tori astana, taka dusreachea bailechi as zali. Tannem Urias-achi bail Bathsheba lagim kuddicho sombond kelo ani ti gorbest zali. Titlench nhoi, tannem tichea ghovak jivexim marunk pasun sanglem. (2 Sam. 11:2-15) Tor polloiat, David eka vellar Jehovak visvaxi aslo. Punn axek lagon, tannem hem vhodd patok adarlem ani tacho taka porinnam bhogcho poddlo. Punn uprant, tannem tachi chuk manun ghetli ani poschatap kelo. Ani Jehovan apnnak bhogxilem tem polloun to khub khuxal zalo. ​—2 Sam. 12:7-13.

11. Efezkarank 5:3, 4-a pormonnem, as pois korunk ami kitem korunk zai?

¹¹ David-achea udharonnantlean ami kitem  xikonk zata? Amchea lagim jem asa tantunt ami dhadoxi asonk zai. Toxench, Jehovan amkam jem kitem dilam tacher niall korun ami magnneant tache upkar attounk zai. (Efezkarank 5:3, 4 vachat.) Ani oxem korunk ami amchea Bible videartheank pasun urba diunk zai. Oxem kelʼlean, dor disa Jehovan dilʼlea ek besanvacho tim ugddas kortat tednam sumanachea satui disank, sat veg-vegllea besanvam pasot tim Jehovacho upkar attounk xiktolim. (1 Tes. 5:18) Tor, ami Jehovache upkari aslear ami dhadoxi astolim. Ani tednam ami patok korunk pavchimnant.

12. Axek lagon Judas Iskariot-an kitem kelem?

¹² Judas Iskariot-ak Jezun aplo apostl mhunn vinchlolo. (Lukas 6:13, 16) Aiz sonvsarbhor zata tea porgottnnechea kama pasot denngim ektthaim korun uzar kortat toxim, Jezu ani tache apostl porgottnnechea kama pasot denngim ektthaim kortale. Tor, Judas ek patieupa sarko munis aslo dekhun he poixe samballpachem kam taka dilʼlem. Punn taka as zali ani to chori korunk laglo. Khorem mhunnttlear, Jezun aplea xisank ap-svarti zaunchem nhoi vo as korchi nhoi mhunn zaite pavtti xittkailʼlem. (Marku 7:22, 23; Lukas 11:39; 12:15) Punn, Judasan hea xittkaunneancher dhean diunk na. Tor, tachi as itli vaddli ki to Jezucho ghat pasun korunk pavlo.

13. Judasachea kallzant as asli mhunn anik koxem dison ieta?

¹³ Judas axecho aslo mhunn amkam anik eka ghoddnnentlean kollon ieta. Ek dis Simanv koddkaran, Jezuk ani tachea xisank apnnager jevnnak apoilem. Thoim Mari ani Marta pasun asli. Jevnnachea vellar, Marien Jezuchea mathear mharog ani pormollit tel ghatlem tem polloun, Judas ani her xis bejar zale. Tem pormollit tel, Jezuchea mathear otouchea bodlek tem vikun je poixe mellttat, tem porgottnnechea kamant uzar korunk zata aslem oxem tankam dislem. Punn, Judas “chor aslo” ani taka te poixe chorunk mellttole mhunn tannem toxem sanglem astolem. Uprant, fokot 30 nanneanchea axek lagon tannem Jezuk vikun dilo.​—Juanv 12:2-6; Mt. 26:6-16; Lukas 22:3-6.

14. Lukas 16:13-nt aslolo solʼlo eka zoddpean koso apnnailo?

¹⁴ Jezun aplea xisank sanglolem: “Tumchean Devachim ani borabor Girestkaiechim gulamam zaum nozo.” (Lukas 16:13 vachat.) Him utram aiz amkam-i lagu zatat. Udharonnak, Romania-ntlea eka zoddpean him utram koxim apnnailim tem atam ami polloum-ia. Tankam thoddea tempa khatir dusrea desant ek borem kam mellʼllem. Tim mhunnttat: “Hea kamak lagon amchem soglem rinn farik zatolem aslem. Tor, Jehovanuch hem kam amkam dilam oxem amkam dislem. Punn chodd poixe zoddunk ami dusrea desant gelim zalear, ami amchea jivitant Jehovachi seva korop poilea zagear dovrina oxem zatlem aslem. Ani ami hollu-hollu korun Jehova thaun pois pavonk xoktalim mhunn amkam kollʼllem.” Tor, ami tem kam gheunk na. Ho nirnnoi gheunk tankam koxi modot zali? Tannim Agost 15, 2008, hea Watchtower-antlo “Maintain Loyalty With a Unified Heart ” ho lekh vachlo. Uprant, tichea ghovak tim asat teach desant ek borem kam mellʼllem. Tea udexim tim aplem rinn farik korunk pavlim ani toxench tancheo her gorzo-i purnn zaleo. Tachi bail mhunntta: “Jehova aplea sevokank modot kortach.” Chodd poixe zoddunk voichea poros Jehovachi seva korunk vinchlem mhunn hem zoddpem aiz khuxal asa.

15. Ami Soitanachea fasantlean suttonk xoktat mhunn amkam kiteak khatri asa?

¹⁵ Amchea kallzant as asa vo ami gorvixtt zaleant oxem amkam dista zalear ami hea fasantlean suttonk xoktat kai? Hoi. Karonn zankam Soitanan aplea fasant ‘dhorleant’ tim suttonk xoktat mhunn Paulun sanglem. (2 Tim. 2:26) Toxench, Davidak as zali tednam Nathan provadea udexim dilʼlo Jehovacho solʼlo tannem apnnailo, poschatap kelo ani Jehova sangata apli ixttagot porot ghott keli. Tea vorvim to-ui Soitanachea fasantlo suttonk xoklo. Tor ami sodanch ugddas dovrum-ia, ki Jehova Soitana poros khub bollixtt asa. Ani to dita ti modot ami ghetlearuch Soitanachea fasantlean ami suttonk xoktolim.

16. Ami Soitanachea fasant poddona zaunk ami kitem korunk zai?

¹⁶ Ami Soitanachea hea fasant poddona zaunk fokot Jehova Devuch amkam modot korunk xokta. Punn ami hea fasant kednanch poddchimnant oxem ami chintchem nhoi. Karonn zaitim vorsam Jehovachi seva kortat tim pasun gorvixtt zaleant vo tankam as zalea. Tor, amchem chintop ani amchim kamam topasunk modot kor mhunn ami sodanch Jehova lagim magnnem korunk zai. (St. 139:23, 24) Ani amchea kallzant gorv ani as utpon zata oxem amkam dista tednam ami ti rokddich kaddun uddounk zai.

17. Beginuch Soitanachem kitem zatolem?

¹⁷ Hozaramnim vorsam thaun Soitan ek xikari koso lokank aplea fasant fosoupacho proitn korit asa. Punn beginuch Jezu taka bandun dovortolo ani uprant tacho nas kortolo. (Prok. 20:1-3, 10) Ani tea vellachi ami vatt polloitat. Tor, to vell ie-i poriant Soitanachea fasant sampoddna zaunk chotur ravat. Gorv ani as pois korunk zata titlo proitn korat. Tumi ‘Soitanacho virodh kelo zalear to tumchea thaun pollun voitolo.’​—Jak. 4:7.