1. ¿Ñobätä Satana ye abokän ni muntiaka ye kwrere?

NI MUNTIAKA jökrä: ye töta nemen jondron kai kö okwäte aune kämikai. Akwa yekäre tä kö okwä bätäkä ngwarbe mike ni jiete, ñodre ja ketamuko ngwarbe Jobkwe käkwe kädekaninte erere (Job 18:8-10). Akwa, ¿tä dre nuainne ne kwe jondron nire ye rakadre kö okwäte ie? Tä miketari ñärärä kwin ne kwe medene ta tä näin, dre tuin kwin ie aune drebiti raba nakain jäme ie ye mikakäre gare jai. Satana tä kukwe ye erere nuainne arato. Medene ta nita näin, dre tuin kwin nie, ye niarata tä miketari ñärärä kwin biti tä kö okwä mike ni jiete ne kwe ni rakadre jäme ie. Akwa, yebiti ta ni raba dre nuainne ne kwe ni ñaka rakadre kö okwä yete ye mikata gare Bibliakwe aune ni rakadre kö okwä yete ngwane ni raba dre nuainne rabakäre kwäre mikata gare arato.

2. ¿Kö okwä ketebu medenbiti Satana tä sribire kwin krubäte?

² Kö okwä ketebubiti Satana tä sribire kwin krubäte ye abokän bika kri aune ni töta nemen jondron tuai krubäte jakwe. * Aune yebiti mekerabe nükebe kä nengwane nitre kwati nakanina kö okwäte ie. Niara ye abokän ni nukwä muntiaka erere, ñobätä ñan aune tä ni näkwite ja kokwäre ne kwe ni rakadre kö okwäte ie (Sal. 91:3). Akwa, kö okwä meden meden mikata kwe, ye Jehová tä driere nie, aisete ni ñan rabadre ja ngökamana ie (2 Cor. 2:11).

3. Nitre bikaka kri aune ja töi mikani kwetre jondron tuai krubäte jakwe, ¿ye ñobätä Jehovakwe tika mananbare Bibliabätä?

³ Bika kri aune ni töta nemen jondron tuai krubäte jakwe ye ñaka kwin ni kräke, ¿ye Jehová tä mike gare ño nie? Kirabe kukwe nakaninkä ye niarakwe tika mananbare ne kwe nikwe kukwe mikadre garebätä jai. Yete, nitre Jehová mikaka täte aune kukwe nämäne  gare krubäte ietre akwa nakani kö okwä Satanakwe yete ye nikwe mikai gare jai. Aisete, ¿ni ñaka raba nemente kwäre jire ye meden gärätä? Ñakare. Jehovakwe kukwe ye tika mananbare Bibliabätä “ja töi kräke nie” (1 Cor. 10:11). Ñobätä ñan aune kukwe raba nemen gare nie aune ye köböire ni ñaka raba nakain kö okwä Satanakwe yete aune ni raba nemente kwäre ye gare Jehovai.

4. ¿Bika kri ye köböite dre raba nemen bare nibätä?

⁴ Nikwe bikadre kri ye ie Satana tö. Töbikata kore ye käkwe ni gobrain ngwane, nikwe ja ngwain niara erere aune ja nire käre ye riaite nikän ye gare ie (Prov. 16:18). Ye medenbätä, nirekwe bikai kri ye mikai ja “ngie nuen” Satana erere niebare Pablokwe (1 Tim. 3:6, 7). Kukwe ye erere raba nemen bare ni jökräbätä, ni niena mekerabe kukwebätä aune nita bitinkä kukwebätä yebätä arato.

5. Eclesiastés 7:16, 20 tä niere ye erere, ¿ni bikaka kri ye abokän tä ja ngwen ño?

⁵ Ni bikaka kri ye tä töbike ja aibebätä. Nikwe töbikadre ja aibebätä aune nikwe ñaka töbikadre Jehovabätä ye ie Satana tö aune bärira jire nita ja tuin kukwe tare ben ye ngwane. Ñodre, ¿kukwe ngwarbe nie tärä mäbätä? ¿Kukwe ñaka kwin nuain tärä mäbätä? Ye ngwane, mäkwe ngite kitadre Jehovabiti aune ja mräkätrebiti ye ie Satana tö. Ne madakäre, kukwe tuin ño nie ye ererebätä nikwe kukwe ükadrete ye bäri kwin aune nikwe ñaka ja jie ngwandre kukwe tikani Jehovakwe Bibliabätä yebiti, ye ie Satana töta nemen (ñäkädre Eclesiastés 7:16, 20 yebätä). *

6. Meri testiko nünanka Países Bajos yebätä dre namani bare, ¿ye tä dre driere nie?

⁶ Meri testiko nünanka Países Bajos yebätä, dre namani bare yebätä ani blite. Ja mräkätre mada nämäne ja mike ngite, ye ñaka nämä mate kwinbätä, aisete niara ñaka tö namani ja tuai ja mräkätre ye ken. Niara tä niere: “Ja nämä nemen ruin kaibe tie. Tikwe ja töi mikadre kwin ja mräkätre ye kräke ye ñaka nämä nemen nuäre ti kräke. Aisete nunkwe ja kwitadre konkrekasion madate ye tikwe ribeba ti muko ie”. Akwa niarakwe JW Broadcasting^® 2016 marzo kräke ye tuani,  yete nitre mada tä ja mike ngite ye ñaka tä mate kwin nibätä ngwane, dre raba ni dimike yebätä blita nämä yete. Meri testiko ye tä mike gare: “Ti ñaka rabadre ja mräkätre mike ja dibiti ja töi kwite, ñakare aune tikwe ja töi mikadre bobre aune tita ja mike ngite arato, ye tikwe ngwandre törö jai ye rükaba gare tie. Broadcasting ye käkwe ti dimikaba ja töi mike kwatibe Jehovabätä aune gobrainta ño kwe yebätä”. ¿Kukwe meden mika tö gare? Kukwe ñaka nuäre tädre ni kisete ngwane, nikwe ñaka Jehová käi kwitadrekä jabiti, ja mräkätre ye tuin ño Jehovai ye erere nikwe mikadre tuin jai, ye nikwe ribedre Jehovai. Ja mräkätre ye ngite ye tuin ni Rün Jehová ye ie, akwa niara tä juto biarebe, ngite juankäre ta bititre, aune nikwe ja töi mikadre niara ye erere yei niara tö (1 Juan 4:20).

7. ¿Dre namani bare rei Uzías yebätä?

⁷ Rei Judá, Uzías, ye jatani bike kri yebätä mäträbarebätä ngwane ñaka kani ngäbiti kwe aune kukwe ñaka nuaindre kwe ye erere nuainbare kwe. Niara ye abokän sribikä kwin krubäte. Ñobätä ñan aune rü ganainbare krubäte kwe, juta keta kabre sribebare kwe aune tire namani ere kwe. “Jehovakwe kukwe kwin mikani nemen bare kräke” (2 Crón. 26:3-7, 10). Akwa Biblia tä niere, “niara namani dite ye ngwane, brukwä namani bikabätä kri aune kukwe tare mikani nemen akwle ja kisete kwe”. Sacerdote aibe rabadre jondron rämane bien templote ye Jehovakwe niebare. Akwa rei Uzías ye nämäne bike kri aisete kukwe ye erere nuainbare kwe. Ye medenbätä, Jehovakwe mikani ja ngie nuin lepra yebiti. Lepra nämänebätä nememe niara krütadre ye ngwane (2 Crón. 26:16-21).

8. ¿1 Corintios 4:6, 7 ye raba ni dimike ño ñaka bike kri?

⁸ ¿Ni raba kite bike kri aune ja mike ngite Uzías ye erere? Dre namani bare Josebätä ye ani mike gare jai. Niara jatani nemen jondron bökäne, nämäne ji ngwanka konkrekasionte aune mika nämäne ütiäte jai. Nämäne kukwe kädriere gätä krite aune ni circuito tuabitikä nämäne kukwe ngwentari krubäte ie. Niara tä mike gare: “Dre nuain nämä gare tie aune kä nuäi te ti nämä nuainne yebätä ti nämä tö ngwen akwle jai aune ti ñan jatabara Jehová mike ütiäte krubäte jai. Ti nämä dite krubäte kukwe ja üairebiti rababa ruin tie, yebätä Jehová nämä mäträre tibätä aune nämä ti mike mokre ye ti ñaka nämä kukwe nuin”. José ja mikani ngite krubäte aune kitaninkä kukwebätä. Kä nikanina ruäre ta yete niara namaninta testiko. Niara tä mike gare: “Sribi meden tä ni kisete ye ñan bäri ütiäte Jehová kräke, ñakare aune niara tä dre niere nie ye nikwe mikadre täte ye ie niara tö ye nükanina gare tie”. Dre nuain gare nie aune sribi meden tä nikwe konkrekasionte,  ye Jehová tä bien nie ye nikwe ngwandre törö käre jai (ñäkädre 1 Corintios 4:6, 7 yebätä). Nita bike kri ngwane, Jehovakwe ñaka sribi mikai ni kisete.

9. ¿Satana bätä Eva tö namani jondron tuai krubäte jakwe ye köböite dre nuainbare kwetre?

⁹ Ni töta nemen jondron tuai krubäte jakwe yebätä nita töbiketari ngwane, Satana tä nüke ni töite. Niara nämäne ángel Jehovakwe ngwane, jondron keta kabre kwin namani kwe. Akwa Jehová mikata ño täte ye erere niara tö namani ja mikamana täte. Nikwe ja ngwandre niara erere yei niara tö yebätä tä ja di ngwen ne kwe jondron meden tä nikwe ye käi ñaka rabadre juto nibätä. Kukwe ye erere nuainbare kena kwe Eva yebätä. Jehová nämäne Adán bätä Eva tarere yebätä kri ngokwä keta kabre raba kwete niebare kwe ie akwa dati ñäkäibare kwe ietre (Gén. 2:16). Kri ngokwä ñäkäibare Jehovakwe ye Eva nämäne ribere jai kwetakäre yebätä Satana Eva töi mikani aune yebiti ngökani kwe. Dre dre nämäne Evakwe yebätä ñaka debe biani kwe, ñakare aune tö namani jondron tuai bäri jakwe. Aisete, dre namani barebätä ye niena gare nie. Niara ja mikani ngite biti krütani (Gén. 3:6, 19).

10. ¿Ñokänti David jatani ja töi mike jondron tuabätä krubäte jakwe?

¹⁰ Dre namani bare Davidbätä ye ani mike gare jai. Jehovakwe jondron keta kabre biani David ie, ñodre mikani gobrane kwe, mikani ütiäte kwe aune mikani ganane rübätä kwe. Dre dre biani Jehovakwe David ie yebätä nämäne debe bien krubäte. Aisete ye ñan raba nemen tändre jökrä ie niebare kwe (Sal. 40:5). Akwa, ye bitikäre David ja töi mikani jondron tuabätä bäri jakwe aune dre dre biani Jehovakwe ie ye käi kwitaninkä kwe jabiti. Aune tö namani jondron tuai bäri jakwe. David muko nämänena kwati, akwa meri ni brare madakwe ye niara tö namani tuai jakwe aune kukwe ye ñäkäi nämäne Jehovakwe. Meri ye kädeka nämäne Bat-Seba aune muko kwe hitita kädeka nämäne Urías. David töbikabare ja aibebätä, ja mikani ngite kwe Bat-Seba ben aune mikani murore kwe. Akwa ye ñan ngöräbe, niarakwe kukwe känänbare Urías murie ketakäre (2 Sam. 11:2-15). ¿David töi nämäne medente? ¿Dre nuain nämäne kwe ye ñan nämä tuin Jehovai nütü nämä kwe? David käkwe ja ngwani metre kä kwati krubäte te, akwa ye bitikäre jatani töbike ja aibebätä, tö namani jondron tuai krubäte jakwe, ye köböite kukwe tare namani barebätä. Akwa, kä nikani ta ye bitikäre ja mikani ngite kwe ye mikani gare kwe aune ja töi kwitani kwe. ¡Jehovakwe ngite  juani tabiti yebätä namani debe bien krubäte! (2 Sam. 12:7-13).

11. Efesios 5:3, 4 tä mike gare erere, ¿dre raba ni dimike ñaka ja töi mike jondron tuabätä krubäte jakwe?

¹¹ ¿Kukwe namani bare Davidbätä yebätä dre raba nemen gare nie? Jondron jökrä bianta Jehovakwe nie yebätä ni rabadre debe bien ie ye käkwe ni dimikai ñaka ja töi mike jondron tuabätä krubäte jakwe (ñäkädre Efesios 5:3, 4 yebätä). Dre dre tä nikwe ye käi tädre juto nibätä. Ni ja tötikaka ye käkwe kukwe känändre köbö kwatire kwatire kräke debe biankäre Jehovai. Ye erere nuaindi kwe bämän kratibe te ngwane, kukwe keta kükübätä debe biain kwe Jehovai orasionte (1 Tes. 5:18). ¿Ni tärä ye erere nuainne? Dre dre bianta Jehovakwe nie yebätä nikwe töbikaitari ngwane, nikwe debe biain aune dre dre tä nikwe ye käi rabai juto nibätä. Nikwe ye erere nuaindi ngwane yekwe ni dimikai ñaka ja töi mike jondron tuabätä krubäte jakwe.

12. Judas Iscariote käkwe ja töi mikani jondron tuabätä krubäte jakwe ye köböite, ¿dre nuainbare kwe?

¹² Ani blite Judas Iscariote yebätä mada. Niara namani ni kita ngisekä erere ye gare nie, akwa käne ñaka ja ngwani kore kwe (Luc. 6:13, 16). Jesús käkwe niara dianinkä rabakäre apóstol kwe. Aune, tö ngwan raba ie ñobätä ñan aune kaja te ngwian nämäne ye Jesukwe mikani ngibiarebiti aune ngwian ye nämä niaratre dimike kukwe driekäre. Ye abokän, kä nengwane nita ngwian bien sribi Ngöbökwe nuainkäre ye erere nie raba. Niaratre ja ngübadrebiti ne kwe ñaka ja töi mikadre kwetre jondron tuabätä krubäte jakwe ye Jesukwe niebare bä kabre ietre (Mar. 7:22, 23; Luc. 11:39; 12:15). Akwa Judas Iscariote ñaka kukwe ye ngwani törö jai, yebätä jatani gore.

13. Judas ye abokän töi nämäne jondron tuabätä krubäte jakwe, ¿ye ñongwane bämikani kwe?

¹³ Judas ye abokän töi nämäne jondron tuabätä krubäte jakwe ye bämikani bati kwe. Simón abokänbätä lepra nämäne ye käkwe Jesús aune nitre ja tötikaka kwe ye nübaibare ja gwirete, yete María aune eteba kwe Marta ye nämäne siba arato. Niaratre nämäne mröre ngwane, María nikani aceite rämane aune kabre krubäte ye keke Jesús dokwäbiti. Ye ngwane nitre ja tötikaka ye namani rubun krubäte. Ñobätä ñan aune, ngwian ye kitadrekä kukwe driebätä näre namani ruin ietre. Aune Judas namani rubun krubäte arato akwa kukwe madabätä: niara ye abokän ni gokä aune tö namani ngwian kajate ye goi. Ye bitikäre, Judas töi nämäne ja tuabätä jondron bökäne krubäte yebätä ja töi mikani kwe Jesús kite ngise, ngwian bian nämäne ni klabore ütiäre ye närebätä (Juan 12:2-6; Mat. 26:6-16; Luc. 22:3-6).

14. Kukwe nieta Lucas 16:13 yete, ¿ye ja mräkätre gure käkwe mikani ño täte?

¹⁴ Jesús käkwe kukwe ütiäte ne ngwani törö nitre ja tötikaka kwe yei: “Ni klabore ñakare jire abko rabadre sribire bkänkä nibukrä” (ñäkädre Lucas 16:13 yebätä). Kukwe ye täbe ütiäte kä nengwane arato. Ja mräkätre ja mäkäninte nünanka Rumania ye ie sribi ütiäte driebare juta madate, ye käkwe kukwe ne mikani täte yebätä ani blite. Niaratre tä mike gare: “Rürübän ütiä nämä nunkwe bancote. Aisete Jehovakwe kukwe ütiäte ne mikani nemen bare nun kräke rababa ruin nunye”. Akwa kukwe keteiti nämäne niaratre kisete, ñobätä ñan aune sribi ye köböite kä ñaka raba nemente krubäte ietre sribi Jehovakwe nuainkäre. Ye bitikäre, niaratre käkwe ñäkäbare kukwe kädekata “Mantengámonos leales con un corazón unificado”, tä La Atalaya 15 agosto 2008 yebätä, ye köböire kukwe diani nuaindre kwetre jai. Niaratre tä niere: “Nunkwe ja töi mikadre niken juta madate sribikäre ne kwe ngwian rabadre ere nunkwe ngwane, nunta ja kete Jehovabe ye nunkwe ñaka mikadre bäri ütiäte jai. Nun ñaka rabai kwin kukwe ja üairebiti ye nämä gare metre nunye”. Aisete niaratre ñaka sribi ye ka ngäbitibare. ¿Aune dre namani bare? Juta te niaratre nämä nüne yete sribi kwani ja mräkä brare yei, abokänbiti dre dre ribe nämä kwetre jai ye niaratre raba ütiä bien. Muko kwe tä niere: “Ni Jehová mikaka täte ye niara ñaka tuainmetre kaibe  jai”. Ngwian ñaka niaratre gobraine ñakare aune tätre sribire Jehová kräke ye käi juto bätätre.

15. Ni raba ngitie kö okwä Satanakwe yebätä, ¿ye ñokänti gare metre nie?

¹⁵ Ni kite bike kri aune ni tö jondron tuai krubäte jakwe ye nikwe gadre jabätä ngwane, ¿ni raba dre nuainne? ¿Ni raba ngitiebätä? Jän, ñobätä ñan aune nire rakadre kö okwä Satanakwe yete ye raba ngitie niebare Pablokwe (2 Tim. 2:26). Aune David käkwe kukwe ye erere nuainbare: David tö namani jondron tuai krubäte jakwe ye ngwane Jonatán käkwe töi ükaninte ye ngwane, niarakwe ja töi kwitani aune namaninta ja kete kwin Jehovabe. Jehová ye abokän bäri dite Satana kräke ye nikwe ñaka käi kwitadrekä jire jabiti. Jehovata ni dimike ye nikwe kai ngäbiti ngwane kö okwä medente ni rakai Satana ie ngwane, ni raba ngitiebätä.

16. ¿Dre käkwe ni dimikai ñaka rakakäre kö okwä Satanakwe yete?

¹⁶ Akwa ni ñaka rakadre kö okwäte Satana ie yekäre, kenanbe nikwe ja ngübadrebitibätä. Aune Jehová ye aibe diebiti raba nemen bare nie. Ni ñaka tö ngwandre akwle jai. Nitre nämäne Jehová mike täte kä kwati krubäte te akwa jatani bike kri aune tö namani jondron tuai krubäte jakwe. Ye medenbätä, nita töbike ño aune nita dre nuainne yebiti nita bike kri aune ni tö jondron tuai krubäte jakwe ye nita bämike o ñakare, ye Jehovakwe mikadre gare nie ye nikwe ribedre ie (Sal. 139:23, 24). Nikwe ja di ngwandre ñaka rabakäre jire kö okwä Satanakwe yete.

17. ¿Dre köböra nemen bare ni rüe Satana yebätä?

¹⁷ Mekera nükebe kä nengwane Satana ye abokän tä ni muntiaka erere. Akwa kä nebera braibe käne ne kwe niara mäkädrete aune biti gaite kärekäre (Apoc. 20:1-3, 10). ¡Ni tö kukwe ye tuai nemen bare! Akwa gwä ngwane, nikwe ja ngwandre mokre ne kwe ni ñaka rakadre kö okwä Satanakwe yete. Nikwe ja di ngwandre krubäte ne kwe bika kri aune ni tö ja tuabätä jondron bökäne krubäte ye ñaka rabadre ni gobraine. Aune nikwe ja töi mikadre kwatibe kukwe ne mike täte: “Munkwe nünanka dite jabtä rükäre diablu Satana rüere angwane, gitiadi munbtä” (Sant. 4:7).