1. Ngaa masiling naton nga pareho sa isa ka mangangayam si Satanas?

GUSTO sang isa ka mangangayam nga makasiod ukon makapatay sang sapat. Mahimo sia maggamit sang lainlain nga mga siod pareho sang mabasa sa Biblia. (Job 18:8-10) Ano ang ginahimo sang mangangayam para masiod ang sapat? Ginapanilagan niya sing maayo ang sapat. Halimbawa, diin ini pirme makita? Ano ang gusto sini kaunon? Ano nga klase sang siod ang maayo nga gamiton? Si Satanas daw pareho man sa sini nga mangangayam. Ginapanilagan niya kita. Kabalo sia kon diin kita nagakadto kag kon ano ang mga gusto naton. Dayon mangita sia sang paagi nga siuron kita nga indi naton matalupangdan. Pero ginapasalig kita sang Biblia nga kon masiod kita, puede kita makapalagyo. Ginatudluan man kita sini kon ano ang mga dapat naton himuon para indi kita masiod.

2. Ano ang duha sa pinakaepektibo nga mga siod ni Satanas?

² Ang duha sa pinakaepektibo nga mga siod ni Satanas amo ang bugal kag ang kakagod. * Linibo na ka tuig nga ginagamit ni Satanas ining duha ka indi maayo nga mga kinaiya. Pareho sia sa isa ka manugpamispis nga nagagamit sang epektibo nga paon para masiod ang gusto niya nga pispis. (Sal. 91:3) Pero malikawan naton nga masiod ni Satanas. Ngaa masiling naton ini? Bangod ginpabalo sa aton ni Jehova ang mga pamaagi ni Satanas sa pagsiod sa mga tawo.—2 Cor. 2:11.

3. Ngaa ginsigurado ni Jehova nga masulat sa Biblia ang mga natabo sa pila ka alagad niya sang una nga nangin bugalon kag makagod?

³ Ginapaandaman kita ni Jehova parte sa bugal kag kakagod. Ginsugid niya sa aton ang parte sa mga natabo sa pila niya ka alagad sang una nga may amo sini nga mga kinaiya para indi naton sila pag-ilugon. Binagbinagon naton ang ginahimo ni Satanas  para masiod bisan pa ang mga madugay na nga nagaalagad kay Jehova. Buot bala silingon nga indi gid naton malikawan ang siod sang bugal kag kakagod? Malikawan naton ini. Ginsigurado ni Jehova nga masulat sa Biblia ang mga natabo sa pila ka alagad niya sang una bilang “paandam sa aton.” (1 Cor. 10:11) Kabalo sia nga may matun-an kita sa sini para malikawan naton ang mga siod sang Yawa ukon para makapalagyo kita sa sini.

4. Ano ang matabo sa aton kon bugalon kita?

⁴ Gusto ni Satanas nga mangin bugalon kita. Kabalo sia nga kon may amo kita sini nga kinaiya, mangin pareho kita sa iya kag wala na kita sing paglaum nga mabuhi sing wala sing katapusan. (Hulu. 16:18) Gani nagpaandam si apostol Pablo nga posible ‘magpahambog ang isa ka tawo kag makabaton sia sing paghukom kaangay sang paghukom nga nabaton sang Yawa.’ (1 Tim. 3:6, 7) Mahimo ini matabo sa bisan sin-o sa aton, bag-uhan man kita ukon madugay na nga nagaalagad kay Jehova.

5. Suno sa Manugwali 7:16, 20, ano ang ginahimo sang isa ka tawo nga bugalon?

⁵ Kon bugalon ang isa ka tawo, ang iya lang kaugalingon ang iya ginapamensar. Gusto ni Satanas nga magpokus kita sa aton kaugalingon imbes nga kay Jehova, ilabi na kon may problema kita. Halimbawa, ginpasibangdan ka bala ukon ginhimuan sang indi maayo? Gusto ni Satanas nga basulon mo si Jehova ukon ang imo mga kauturan. Kag gusto sang Yawa nga papatihon ka nga ang ginahunahuna mo nga solusyon amo ang pinakamaayo nga himuon, indi ang panuytoy ni Jehova halin sa iya Pulong.—Basaha ang Manugwali 7:16, 20.

6. Ano ang matun-an mo sa eksperiensia sang isa ka sister sa Netherlands?

⁶ Binagbinaga ang eksperiensia sang isa ka sister sa Netherlands nga naugot sa mga kaluyahon sang iban. Pamatyag niya, indi na gid niya ini maagwanta. Nagsiling sia: “Nasubuan gid ako kag indi madula ang akon kaugot. Gani ginsilingan ko ang akon bana nga masaylo na lang kami sa iban nga kongregasyon.” Dayon gintan-aw niya ang Marso 2016 nga programa sa  JW Broadcasting^®. Ginbinagbinag sa sini kon ano ang mga puede naton himuon kon naugot kita sa mga kaluyahon sang iban. Ang sister nagsiling: “Narealisar ko nga dapat ako mangin mapainubuson kag dapat ako magpokus sa pagbag-o sa akon mga kaluyahon imbes nga sa mga kaluyahon sang mga kauturan. Nabuligan ako sang programa sa Broadcasting nga magpokus kay Jehova kag sa iya pagkasoberano.” Ano ang matun-an mo sa sini? Kon may problema ka, magpokus kay Jehova. Pangabaya sia nga buligan ka nga tamdon ang iban pareho sang iya pagtamod sa ila. Nakita sang aton Amay sa langit ang ila mga sala, pero ginapatawad niya sila. Gusto niya nga amo man sini ang imo himuon.—1 Juan 4:20.

7. Ano ang natabo kay Hari Uzias?

⁷ Bangod nangin bugalon si Hari Uzias sang Juda, wala niya ginpamatian ang laygay sang iban kag ginhimo niya ang indi niya dapat paghimuon. Madamo sing ginhimo nga maayo si Uzias. Nagdaug sia sa madamo nga inaway, nagpatindog sia sang madamo nga siudad, kag madamo sia sang uma. “Ginpakamaayo sia sang matuod nga Dios.” (2 Cron. 26:3-7, 10) “Apang, sang mabakod na sia, nangin matinaastaason ang iya tagipusuon kag nakahalit ini sa iya,” siling sang Biblia. Nagsugo si Jehova nga mga saserdote lang ang makahalad sang incienso sa templo. Pero nagkadto si Hari Uzias sa templo kag naghalad sia sang incienso bisan pa wala sia sang kinamatarong nga himuon ini. Gani naakig si Jehova kag ginsilutan niya sing aro ang bugalon nga si Uzias. Nangin aruon sia asta nga napatay sia.—2 Cron. 26:16-21.

8. Suno sa 1 Corinto 4:6, 7, paano naton malikawan nga mangin bugalon?

⁸ Posible man bala nga mangin bugalon kita kag makasala pareho kay Uzias? Binagbinaga ang halimbawa ni José. Maayo sia sa negosyo kag ginarespeto sia sa kongregasyon bilang isa ka gulang. Nagapamulongpulong sia sa mga asembleya kag mga kombension, kag ginapamangkot sia sang mga manugtatap sang sirkito parte sa iya mga opinyon kag panugda. Pero nagsiling sia: “Wala ako nagsalig kay Jehova. Mas nagsalig ako sa akon mga ikasarang kag mga eksperiensia. Abi ko mabakod ako, gani wala ko ginpamatian ang mga paandam kag laygay ni Jehova.” Nakahimo si José sang serioso nga sala kag na-disfellowship sia. Mga pila ka tuig na ang nagligad, nakapanumbalik sia. Nagsiling sia: “Gintudluan ako ni Jehova nga indi ang pribilehiyo ang importante, kundi ang pagtuman  sa mga ginapahimo niya sa aton.” Tandaan naton nga ang aton mga ikasarang kag mga pribilehiyo sa kongregasyon naghalin kay Jehova. (Basaha ang 1 Corinto 4:6, 7.) Kon bugalon kita, indi kita paggamiton ni Jehova.

9. Ano ang ginhimo ni Satanas kag ni Eva bangod sang ila kakagod?

⁹ Kon parte sa kakagod ang topiko, mahimo nga madumduman naton dayon si Satanas nga Yawa. Isa sia sa mga anghel ni Jehova, gani posible gid nga madamo sia sang pribilehiyo. Pero sobra pa sa sini ang gusto niya. Gusto niya nga simbahon sia bisan pa nga si Jehova lang ang dapat simbahon. Ginatinguhaan ni Satanas nga mangin indi man kita kontento pareho sa iya. Una niya ini nga ginhimo kay Eva. Mahigugmaon gid si Jehova kay ginhatagan niya si Eva kag ang iya bana sang madamo nga pagkaon. Kay man, makapaayaw sila sa pagkaon sa “bunga sang tanan nga kahoy sa hardin,” magluwas lang sa isa. (Gen. 2:16) Pero, napapati ni Satanas si Eva nga dapat sia magkaon sang bunga sang kahoy nga gindumilian sa ila nga kaunon. Ginhandum ni Eva ang wala ginhatag sa iya kay wala sia nakontento. Kabalo kita kon ano ang masunod nga natabo. Nasulay si Eva nga maghimo sang sala kag napatay sia sang ulihi.—Gen. 3:6, 19.

10. Ano ang natabo kay Hari David bangod nangin makagod sia?

¹⁰ Madamo sang ginhatag si Jehova kay David. Ginhatagan niya sia sang madamo nga manggad, ginhimo niya sia nga hari, kag ginbuligan niya sia nga magdaug sa madamo nga inaway. Ginpasalamatan gid ni David ang Dios, kag nagsiling sia nga ‘indi niya masarangan nga isugid’ ang tanan nga ginhatag sang Dios sa iya bangod tam-an ini ‘kadamo.’ (Sal. 40:5) Pero nangin makagod si David kag gusto niya nga sobra pa sa ginhatag ni Jehova ang mabaton niya. Bisan pa madamo na sang asawa si David, ginhandum pa niya si Bat-seba nga asawa ni Urias nga Hethanon. Naghulid si David kay Bat-seba, kag nagbusong si Bat-seba. Malain gid ang ginhimo ni David, pero may ginhimo pa gid sia nga mas malain pa sa sini. Naghimo si David sang plano para mapatay si Urias. (2 Sam. 11:2-15) Daw indi mapatihan ang ginhimo ni David. Nalipat bala sia nga makita sia ni Jehova? Madugay na nga nagaalagad si David kay Jehova, pero nangin makagod sia gihapon gani nag-antos gid sia. Sang ulihi, maayo lang kay gin-aku ni David  ang iya sala kag naghinulsol sia. Nagpasalamat gid sia kay ginpatawad sia ni Jehova.—2 Sam. 12:7-13.

11. Suno sa Efeso 5:3, 4, ano ang makabulig sa aton para malikawan naton nga mangin makagod?

¹¹ Ano ang matun-an naton sa halimbawa ni David? Malikawan naton nga mangin makagod kon pirme naton ginapasalamatan si Jehova sa tanan nga ginahatag niya sa aton. (Basaha ang Efeso 5:3, 4.) Dapat kita mangin kontento. Indi bala nga ginapalig-on naton ang aton Bible study nga pamensaron niya ang isa ka pagpakamaayo nga nabaton niya halin kay Jehova kag pasalamatan niya si Jehova? Kon ginahimo niya ini kada adlaw sa sulod sang isa ka semana, buot silingon nga indi magnubo sa pito ka beses nga nangamuyo sia kay Jehova para pasalamatan sia sa lainlain nga mga pagpakamaayo. (1 Tes. 5:18) Ginapamalandungan mo man bala ang tanan nga ginahimo ni Jehova para sa imo? Kon himuon mo ini, mapalig-on ka sini nga pirme sia pasalamatan. Kag kon pirme ka nagapasalamat, mabuligan ka sini nga mangin kontento. Kon kontento ka, malikawan mo nga mangin makagod.

12. Ano ang ginhimo ni Judas Iscariote bangod sang iya kakagod?

¹² Bangod sang kakagod, nakahimo si Judas Iscariote sang malain kag nagtraidor sia kay Jesus. Pero sa umpisa, indi man malain nga tawo si Judas. (Luc. 6:13, 16) Ginpili pa gani sia ni Jesus nga mangin apostol niya. May salig sa iya si Jesus kay sia ang ginpakapot sang kahon sang kuarta. Ginagamit ni Jesus kag sang mga apostoles ini nga kuarta para sa ila pagbantala nga hilikuton. Subong, daw pareho ini sa mga donasyon para sa bug-os kalibutan nga hilikuton. Pero pagligad sang pila ka tion, ginakawatan na ni Judas ini nga kahon, bisan pa madamo nga beses nga nabatian niya si Jesus nga ginapaandaman ang mga tawo parte sa kakagod. (Mar. 7:22, 23; Luc. 11:39; 12:15) Ginbalewala ni Judas ini nga paandam.

13. San-o nangin maathag nga makagod gid si Judas?

¹³ Sang lapit na lang patyon si Jesus, nangin maathag nga makagod gid si Judas. Ara sadto si Jesus sa balay ni Simon nga aruon, kag upod niya ang iya mga disipulo, pati si Maria kag ang iya utod nga si Marta. Samtang nagakaon sila, ginpalapitan ni Maria si Jesus kag ginbubuan niya ang ulo ni Jesus sang malahalon kag mahamot nga lana. Naakig gid si Judas kag ang iban nga disipulo. Para sa iban nga disipulo, mas maayo kuntani kon ginbaligya na lang ang lana kag gamiton ang kuarta para ibulig sa mga imol. Pero lain ang motibo ni Judas. “Kawatan” sia kag gusto niya nga kawaton ang kuarta sa kahon. Sang ulihi, bangod sang kakagod ni Judas, ginbaylo niya si Jesus sa kuarta nga katumbas lang sang bili sang isa ka ulipon.—Juan 12:2-6; Mat. 26:6-16; Luc. 22:3-6.

14. Paano gin-aplikar sang isa ka mag-asawa ang Lucas 16:13?

¹⁴ Ginpahanumdom ni Jesus ang iya mga sumulunod: “Indi kamo makapaulipon sa Dios kag sa Manggad.” (Basaha ang Lucas 16:13.) Matuod gid ini asta subong. Binagbinaga kon paano gin-aplikar sang isa ka mag-asawa sa Romania ang ginsiling ni Jesus. Gintanyagan sila sang temporaryo nga obra sa isa ka manggaranon nga pungsod. “Sa umpisa, ginhunahuna namon nga pagpakamaayo ni Jehova ang gintanyag sa amon nga obra kay may daku kami nga utang sa bangko,” siling nila. Pero kon batunon nila ini nga obra, mabuhinan ang ila tion sa pag-alagad kay Jehova. Pagkatapos nila mabasa ang artikulo nga “Hupti ang Pagkamainunungon sing Bug-os Tagipusuon” sa Agosto 15, 2008, nga Ang Lalantawan, nagdesisyon sila. Nagsiling sila: “Kon magsaylo kami sa iban nga pungsod bangod sa obra nga daku ang sueldo, ginapakita namon nga indi ang amon kaangtanan kay Jehova  ang pinakaimportante sa amon kabuhi. Sigurado kami nga maapektuhan gid ang amon espirituwalidad.” Gani wala nila ginbaton ang gintanyag sa ila nga obra. Ano dayon ang natabo? Nakakita ang bana sang obra sa ila pungsod, kag ang iya sueldo bastante gid sa ila mga kinahanglanon. Ang asawa nagsiling: “Pirme gid ginabuligan ni Jehova ang iya mga alagad.” Nalipay gid ini nga mag-asawa nga si Jehova ang ginhimo nila nga Agalon, indi ang kuarta.

15. Ngaa sigurado kita nga makapalagyo kita sa siod ni Satanas?

¹⁵ Ano ang himuon naton kon natalupangdan naton nga nangin bugalon na kita ukon makagod? Puede pa kita magbag-o. Nagsiling si Pablo nga puede pa makapalagyo sa siod sang Yawa ang iya mga ‘nadakpan nga buhi.’ (2 Tim. 2:26) Amo ini ang natabo kay David. Ginbaton niya ang pagsabdong ni Natan, naghinulsol sia bangod nangin makagod sia, kag ginpabakod niya liwat ang iya kaangtanan kay Jehova. Indi gid pagkalimti nga mas gamhanan si Jehova sangsa kay Satanas. Gani kon magpabulig kita kay Jehova, makapalagyo kita sa bisan ano nga siod sang Yawa.

16. Ano ang makabulig sa aton para malikawan naton ang mga siod ni Satanas?

¹⁶ Malipay gid kita kon makapalagyo kita sa mga siod ni Satanas, pero mas maayo pa gid kon indi gid kita masiod. Mahimo naton ini kon magpabulig kita sa Dios. Pero indi gid kita magkompiansa. Bisan ang madugay na nga mga alagad ni Jehova nangin bugalon ukon makagod. Gani mangamuyo kay Jehova kada adlaw nga buligan ka nga usisaon ang imo mga ginahunahuna kag ginahimo, kay basi naimpluwensiahan ka na sining indi maayo nga mga kinaiya. (Sal. 139:23, 24) Indi gid magpasiod sa bugal ukon kakagod.

17. Ano ang matabo sa Yawa sa indi na lang madugay?

¹⁷ Linibo na ka tuig nga nagapangayam si Satanas. Pero sa indi na lang madugay, gapuson sia kag laglagon. (Bug. 20:1-3, 10) Gusto na gid naton ini nga matabo. Pero samtang ginahulat naton ini nga matabo, dapat mangin alisto kita pirme sa mga siod ni Satanas. Panikasugi gid nga indi ka mangin bugalon ukon makagod. Himua ang imo bug-os nga masarangan nga ‘pamatukan ang Yawa, kag magapalagyo sia sa imo.’—Sant. 4:7.