1. Edena dala ai Satani be labana tauna bamona?

LABANA tauna ena ura badana be, animal do ia dogoatao eiava ia alaia. Ia ese tarapu idauidau do ia gaukaralaia, bona Iobu ena tura koikoina ta ese unai ia herevalaia danu. (Iobu 18:8-10) Edena dala ai labana tauna ese animal ia koia, tarapu lalonai ia vareai totona? Ia ese animal ena kara ia stadilaia namonamo. Edeseni ia lao? Dahaka gaudia ia ura henia? Edena tarapu namona ia gaukaralaia diba? Satani be unai labana tauna bamona. Ia ese ita ia stadilaia namonamo. Ita lao gabudia bona ita ura henia gaudia ia itaia. Bena ita hegaegae lasi neganai, ita ia tarapua. To, Baibel ese ita ia hagoadaia, Satani ena tarapu amo ita raka siri diba. Bona Baibel ese unai tarapu lalonai do ita moru lasi dalana ia hadibaia danu.

2. Satani ese ia gaukaralaia tarapu rua be dahaka?

² Satani ese ia gaukaralaia momo tarapu rua be hekokoroku bona mataganigani karana. * Lagani tausen lalonai, Satani ese unai ia gaukaralaia bona ia kwalimu. Ia be manu tarapua tauna bamona, ia ese tarapu eiava reke ia gaukaralaia manu ia abia totona. (Sal. 91:3) To Satani ena tarapu lalonai do ita moru lasi, badina Iehova be ita dekenai Satani ena koikoi karadia ia hadibaia vadaeni.​—2 Kor. 2:11.

3. Dahaka dainai Iehova ese Baibel ai hekokoroku bona mataganigani taudia edia sivarai ia torea?

³ Iehova ese mauri sivaraidia ia gaukaralaia, hekokoroku bona mataganigani karana ita dadaraia dalana ia hadibaia totona. Unai sivarai haida amo do ita itaia, Satani ese Iehova idia hesiai henia lo Keristani taudia haida ia tarapua  danu. Anina be ita danu be do ita moru, a? Lasi! Iehova ese unai sivarai be Baibel lalonai ia torea, ita ia “hadibaia totona.” (1 Kor. 10:11) Ia diba unai sivarai ese ita do idia durua, Satani ena tarapu amo ita raka siri totona.

4. Bema ita hekokoroku dahaka do ia vara?

⁴ Satani ia ura do ita hekokoroku. Ia diba bema ita hekokoroku, ita be ia bamona do ita lao bona mauri hanaihanai do ita abia lasi. (Aon. 16:18) Unai dainai, aposetolo Paulo ia gwau, namo lasi ta “ia hekokoroku bena Diabolo ese ia abia hahemaoro ia abia.” (1 Tim. 3:6, 7) Herevana hari sibona eiava lagani momo Iehova ita hesiai henia, to ita dekenai unai ia vara diba.

5. Hadibaia Tauna 7:16, 20 hegeregerena, edena dala ai ta ia hekokoroku diba?

⁵ Hekokoroku taudia be sibona idia laloa bada. Hekwakwanai ita davaria neganai, Satani ia ura ita sibona ita laloa, to Iehova ita laloaboio. Hegeregere, ta ese oi ia samania koikoi, a? Eiava ta ese emu lalona ia hahisia, a? Satani ia ura Iehova eiava emu tadikaka oi badu henidia. Ia ura do oi laloa unai hekwakwanai be sibona emu ura dalanai do oi hamaoromaoroa, to Iehova ena hakaua daladia oi dadaraia.​—Hadibaia Tauna 7:16, 20 duahia.

6. Taihu ta ena ekspiriens amo dahaka oi dibaia?

⁶ Netherlands ai taihu ta ena ekspiriens mani ita laloa. Ia be tadikaka taihu haida edia kerere dainai ia badu, bona ia ura lasi idia ia bamoa. Ia gwau: “Lau mamia lau be turana lasi bona lau ura lasi edia dika lau gwauatao. Egu adavana lau hamaoroa kongrigeisen ma ta dekenai do ai lao.” Bena March 2016 JW Broadcasting^® ena program ia itaia. Unai amo ia laloparara ena be haida be mai edia kerere, to dala maorona ai ia kara henidia be namo. Ia gwau: “Lau laloparara namona be lau manau bona lau abia dae lau danu be mai egu kerere, bona namo lasi tadikaka taihu edia kara lau haidaua toho. Unai program ese lau ia durua Iehova bona ena  hakaua dalana lau laloa dobu totona.” Iena ekspiriens amo dahaka oi dibaia? Hekwakwanai ta oi davaria neganai, namona be Iehova ena kara oi laloa noho. Dirava oi guriguri henia, oi do ia durua ma haida oi laloa Ia ese idia ia laloa bamona. Emu guba Tamana ese edia kerere ia itaia, to ia ura idia ia gwauatao, bona ia ura unai oi karaia danu.​—1 Ioa. 4:20.

7. King Usaia dekenai dahaka ia vara?

⁷ Iuda ena King Usaia be hekokoroku tauna, unai dainai ma haida edia sisiba ia dadaraia, bona ia maoro lasi do ia karaia gauna ia karaia. Usaia be gaukara karaia namonamo tauna. Tuari momo dekenai ia kwalimu, siti momo ia haginidia, bona uma gabu badadia ia karaia danu. “Dirava momokanina ese ia hanamoa.” (2 Siv. 26:3-7, 10) To Baibel ia gwau: “Ena goada ia bada neganai, ena kudouna ai ia hekokoroku bona sibona ia hadikaia.” Guna Iehova ena taravatu ia gwau, hahelaga taudia sibona ese dubu helaga lalonai bonana namo muramura do idia gabua. To, King Usaia be mai hekokoroku ida dubu helaga lalonai ia vareai bonana namo muramura ia gabua totona. Iehova ia moale lasi bona unai hekokoroku tauna dekenai lepera gorerena ia henia, bona ia gorere ela bona ia mase.​—2 Siv. 26:16-21.

8. Korinto Ginigunana 4:6, 7 hegeregerena, edena dala ai hekokoroku karana ita dadaraia diba?

⁸ Ita be Usaia bamona ita hekokoroku bona kara dika diba, a? Mani José ena haheitalai ita laloa. Ia be mai ena bisinesi bona kongrigeisen ai idia matauraia elda ta. Ia be hebouhebou maragidia bona badadia dekenai tok ia henia, bona sekit naria taudia be sisiba abia totona ia dekenai idia lao. Ia gwau: “Lau be egu diba bona aonega dekenai lau tabekau, to Iehova dekenai lau tabekau lasi. Lau laloa lau goada dainai, Iehova ena hadibaia herevadia bona sisiba lau kamonai lasi.” José be kara dika badana ta ia karaia bona kongrigeisen amo idia atoa siri, bena lagani haida gunanai idia abia-vareai-lou. Hari José ia gwau: “Iehova ese lau ia hadibaia dagi badana abia karana be anina lasi, to mai anina bada gauna be Iehova ese ita ia hamaoroa ita karaia gaudia do ita karaia.” Namona be ita laloatao, iseda diba bona kongrigeisen lalonai ita abia asainmen idauidau be Iehova ese ia henia. (1 Korinto 4:6, 7 duahia.)  Bema ita hekokoroku, Iehova ese ita do ia gaukaralaia lasi.

9. Mataganigani karana dainai Satani bona Heva be dahaka idia karaia?

⁹ Mataganigani karana ita laloa neganai, Satani Diabolo ita laloatao. Ia be Iehova ena aneru ta dainai mai ena gaukara namodia momo, to ia dekenai unai be hegeregere lasi. Satani ia ura ia do ita tomadiho henia, ena be Iehova sibona ita tomadiho henia be maoro. Satani ia ura ena kara ita tohotohoa, unai dainai iseda lalona ia veria gau ma haida ita ura henia totona. Heva ia hereva henia negana be nega ginigunana unai ia karaia. Iehova ese mai lalokau ida Heva bona ena adavana dekenai aniani momo ia henia. Idia ese “uma ai idia noho au ibounai edia huahua” idia ania diba, to au tamona ena huahua do idia ania lasi. (Gen. 2:16) To, Satani ese Heva ia koia, unai amo ia ura Dirava ese ia taravatua au ena huahua ia ania. Ia laloa Dirava ese ia dekenai ia henia gaudia be hegeregere lasi, ia ura gau ma haida ia abia. Vadaeni ia kara dika bena ia mase.​—Gen. 3:6, 19.

10. King Davida ia mataganigani dainai dahaka ia vara?

¹⁰ Iehova ese Davida ia hanamoa, hegeregere taga bona king dagina ia henia, bona tuari momo lalonai ia kwalimu. Davida ia gwau Dirava ena harihari gaudia be ‘momo herea, ia duahia diba lasi.’ (Sal. 40:5) To Davida be ia mataganigani, bona ia laloa Iehova ese ia dekenai ia henia gaudia be hegeregere lasi, bona ia ura gau ma haida. Davida ena adavana be momo, to ia ese tau ma ta ena adavana ia ura henia, ena be Iehova ia gwau unai be kerere. Unai hahine be Bataseba, bona ena adavana be Hiti tauna, Uria. Davida be Bataseba ida ia heudahanai, bona Bataseba ia rogorogo. Davida ese unai kerere badana sibona ia karaia lasi, to ia ese Uria ena mase dalana ia karaia danu! (2 Sam. 11:2-15) Dahaka dainai Davida be unai ia karaia? Ia laloa Iehova ese ia itaia lasi, a? Ena be lagani momo lalonai Davida be mai abidadama ida Iehova ia hesiai henia, to ia mataganigani bona unai ese hekwakwanai momo ia havaraia. To gabeai, Davida be ena kara dika ia gwauraia hedinarai bona ia helalo-kerehai. Davida ia moale badina Iehova ese ena kara dika ia gwauatao!​—2 Sam. 12:7-13.

11. Efeso 5:3, 4 hegeregerena, dahaka ese oi do ia durua mataganigani karana oi dadaraia totona?

 ¹¹ Davida ena sivarai amo dahaka ita dibaia? Ita dibaia gauna be, bema Iehova ese ita dekenai ia henia gaudia ita laloa bada, mataganigani karana ita dadaraia diba. (Efeso 5:3, 4 duahia.) Namona be do ita laloa, ita dekenai idia noho gaudia be hegeregere. Ta ida Baibel ita stadilaia neganai, ita hadibaia Iehova ese ia dekenai ia henia gau namona ta do ia laloa, bona Iehova do ia tanikiu henia. Bema wiki ta lalonai dina ta ta ai unai bamona ia karaia, ia be gau idauidau 7 dainai Iehova do ia tanikiu henia. (1 Tes. 5:18) Oi danu be unai bamona oi karaia, a? Bema Iehova ese oi totona ia karaia gaudia oi laloa dobu, unai ese oi do ia durua Ia oi tanikiu henia totona. Unai amo do oi mamia oi dekenai idia noho gaudia be hegeregere, bona mataganigani karana oi dadaraia diba.

12. Mataganigani karana dainai Iuda Iskariote be dahaka ia karaia?

¹² Iuda Iskariote be ia mataganigani dainai, Iesu ena mase dalana ia karaia. To, matamanai ia be tau namona bona Iesu ese ia abia hidi aposetolo tauna ta. (Luka 6:13, 16) Iesu ese ia abidadama henia dainai, ia be moni mauana ia naria. Iesu bona ena aposetolo taudia ese unai moni idia gaukaralaia, edia haroro gaukara durua totona. Unai be hari tanobada ibounai gaukarana ia durua kontribusen moni hegeregerena. Daudau lasi murinai, Iuda ia henaohenao matamaia, ena be nega momo ia kamonai Iesu ena hadibaia herevadia lalonai mataganigani karana ia gwauraia dika. (Mar. 7:22, 23; Luka 11:39; 12:15) Iuda be unai hadibaia herevadia ia dadaraia.

13. Iuda be edena nega ai mataganigani karana ia hahedinaraia?

¹³ Iesu ena mase ia kahirakahira negana ai, Iuda be ena mataganigani karana ia hahedinaraia. Iesu, ena hahediba taudia, Maria bona ena kakana Mareta be guna lepera tauna Simona ena ruma dekenai idia lao. Idia aniani noho lalonai, Maria ese dava bada dehoro ia abia bona Iesu ena kwarana dekenai ia bubua. Iuda bona hahediba taudia ma haida be idia badu. Reana idia laloa unai dava bada dehoro idia hoihoilaia, bona ena moni be ogogami taudia idia durua diba. To Iuda ia moale lasi ena badina be idau. Ia be “henaohenao tauna,” bona ia ura maua ena moni do ia henaoa. Oibe, Iuda be ia mataganigani dainai, moni totona Iesu ena mase dalana ia karaia.​—Ioa. 12:2-6; Mat. 26:6-16; Luka 22:3-6.

14. Tadikaka ta bona ena adavana be edena dala ai Luka 16:13 ena hereva idia badinaia?

¹⁴ Iesu be ena murinai idia raka taudia dekenai inai hereva momokani ia gwauraia: “Dirava bona Taga be nega tamona umui hesiai henia diba lasi.” (Luka 16:13 duahia.) Hari danu, unai hereva be momokani. Hegeregere, Romania ai Witnes tau bona ena adavana be Iesu ena hereva idia badinaia dalana mani ita itaia. Idia be taga tanona ta ai moni gaukara namona ta idia davaria. Idia gwau: “Ai be banika dekenai mai emai abitorehai badana, unai dainai matamanai ai laloa unai gaukara be Iehova amo ia mai hahenamo ta.” To, hekwakwanai be inai: Bema unai moni gaukara idia abia dae, idia be nega lasi Iehova idia hesiai henia totona. Idia ese August 15, 2008 Gima Kohorona ena atikol ladana, “Kudouna Ibounai ida Dirava Oi Badinaia” idia duahia murina, abia hidi idia karaia. Idia gwau: “Bema moni momo abia totona tano ma ta dekenai ai lao, emai hetura karana Iehova ida do ia dika.” Unai dainai unai moni gaukara idia abia dae lasi. Dahaka ia vara? Tadikaka be edia tano ai moni gaukara ta ia davaria bona unai amo edia abitorehai  idia haloua diba. Taihu ia gwau: “Iehova be hanaihanai ena hesiai taudia ia durua.” Idia moale, badina Iehova be edia Biaguna ai idia halaoa, to moni idia dadaraia.

15. Dahaka dainai ita diba Satani ena tarapu amo ita raka siri diba?

¹⁵ Bema ita itaia ita be hekokoroku eiava mataganigani karana ita hahedinaraia, dahaka ita karaia be namo? Iseda kara do ita haidaua! Paulo ia gwau Diabolo ese “ia tarapua” taudia be iena tarapu amo idia raka siri diba. (2 Tim. 2:26) Oibe, Davida be Natana ena sisiba aukana ia kamonai, mataganigani karana ia rakatania, bona ena hetura karana Iehova ida ia hanamoa lou. Laloaboio lasi, Iehova ena goada be bada herea. Unai dainai, bema Iehova ena heduru ita abia dae, Diabolo ena tarapu idauidau amo ita raka siri diba.

16. Dahaka ese ita do ia durua Satani ena tarapu idauidau ita dadaraia totona?

¹⁶ Momokani, hekokoroku eiava mataganigani karana ita dadaraia be namo. Dirava ena heduru amo unai ita karaia diba. To, namo lasi ita laloa ita goada dainai, hekokoroku eiava mataganigani karana ita dadaraia diba! Lagani momo lalonai Iehova idia hesiai henia taudia be unai kara dekenai idia moru danu. Unai dainai, dina ta ta ai Iehova oi guriguri henia, oi ia durua emu lalohadai bona kara oi tahua namonamo totona, unai amo hekokoroku eiava mataganigani karana oi dadaraia diba!​—Sal. 139:23, 24.

17. Kahirakahira iseda inai tauna Diabolo dekenai dahaka do ia vara?

¹⁷ Lagani tausen momo lalonai, Satani be labana tauna bamona ia gaukara, to kahirakahira ia do idia guia bona hamasea. (Apok. 20:1-3, 10) Unai nega ita naria noho lalonai, Satani ena tarapu idauidau dainai do ita gima noho. Ita gaukara goada hekokoroku eiava mataganigani karana ita dadaraia totona. Iseda lalona do ita hadaia, ‘Diabolo ita inai henia, bona ita amo do ia heau siri.’​—Iam. 4:7.