1. Ngatta megitta si Satanas ta tadday nga gumangnganu?

TADDAY laman i gakkag na gumangnganu. Kayàna nga magafu onu mapatay i puntiriana. Mangusa yayya tu nadduruma nga silu kagitta na mabibbig tam ta Biblia. (Job 18:8-10) Kunnasi nga ilogo na tadday nga gumangnganu i ayam tapenu mataga yatun ta siluna? Obserbanna labbi yatun nga ayam. Sitaw kari i kanayun nga angngayanna? Anni i kakayàna? Anni i kakastan nga meyusa tapenu masiluan yayya? Megitta si Satanas tatun nga gumangnganu. Oobserbanna ittam. Sifi-sifutanna i angngayattam anna nu anni i kakayà tam. Tapus mangipay yayya tu silu nga ariattam nga ekspektan. Ngem ipasiguradu na Biblia nga makatammang ittam nu angngariganna tu masiluan ittam. Ituddu gapa natun nu kunnasi tam nga malillitan i masiluan.

2. Anni i dua ta pinaka-efektibo nga silu ni Satanas?

² I pappakatannang anna i pakkakkam * i dua ta pinaka-efektibo nga silu ni Satanas. Rinivu dagun ngana nga malalaki i pangusana tatun ira nga marake nga ugali. Megitta yayya ta tadday nga gumangnganu nga gakkagna nga magafu i mammanu ta silu nga nipena. (Sal. 91:3, NW) Ngem malisiattam i silu ira ni Satanas. Ngatta? Dati ngana nga kinagi ni Jehova nittam nu anni ira i taktika nga usu-usan ni Satanas.​—2 Cor. 2:11.

3. Ngatta nipetura ni Jehova ta Biblia i angngarigan danuri na nappakatannang anna nakkakkam?

³ Tudduan ittam ni Jehova nu kunnasi kadelikadu i pappakatannang anna i pakkakkam. Inabisowanna ittam ta nesimmu ta karuan nga aripanna tapenu malillitattam nga kuan i nakaliwatadda ira. Sifutan nga ta angngarigan ira nga gigiammuattam,  nasiluan gapa ni Satanas maski danuri nabayag ngana nga massesserbi kani Jehova. Ikaya kari kagian natun nga imposible nga malillitattam i pappakatannang anna i pakkakkam? Ari. Nipetura ni Jehova danatun nga angngarigan ta Biblia tapenu “pamappalan” ta nittam. (1 Cor. 10:11) Ammuna gare nga makagigiammu ittam tatun ira nga angngarigan tapenu malillitan anna matammangngattam i silu ira na Diablo.

4. Anni i mesimmu nittam nu mappakatannang ittam?

⁴ Kayà ni Satanas nga mappakatannang ittam. Ammuna gare nga nu mappakatannang ittam, mabbalin ittam tu kagittana anna mawawattam i chansa nga mattolay tu mannanayun. (Prov. 16:18) Yayya nga inabisowan ittam ni apostol Pablo nga i tolay “nu mapparayag, ay makastigo lallagu kagitta na nakua ta Demonio.” (1 Tim. 3:6, 7) Posible nga mesimmu yatun ta maski sinni nittam, bagu ittam man ta kinakurug onu nabayag ngana nga massesserbi kani Jehova.

5. Base ta Eclesiastes 7:16, 20, anni i kukukuan na tolay nga minappakatannang?

⁵ I minappakatannang nga tolay ay makasarili. Pabbalinan ittam ni Satanas nga makasarili nu mas nakafokus ittam ta baggi tam anne kani Jehova, mas ngana nu egga ira i problema tam. Angngariganna, naakusakka kari ngana? Onu ari tu patas i nikatratum? Kayà ni Satanas nga paliwatammu si Jehova onu i organisasionna. Kayàna gapa nga nonopammu nga masolusionan laman i problemam nu kuammu lagapa i kayà mu imbes nga tuttulan i pangigiya ni Jehova ta Uvovugna.​—Bibbigan i Eclesiastes 7:16, 20.

6. Anni i magigiammum ta sister nga taga-Netherlands?

⁶ Nallussaw i sister nga taga-Netherlands ta pakkamalian na wawwaragi. Megafu tatun, manakina ngana i makikavulu ta nira. “Ari ngà nga magayayya anna marigatan ngà nga pakoman ira,” kunna. “Kinagì paga ta atawà nga magali kami ngana ta tanakuan nga kongregasion.” Ngem giniraw natun nga sister i Marso 2016 nga JW Broadcasting^®. Egga ira i suhestion natun nga programa nu anni i kuattam  ta pakkamalian ira na tanakuan. Istorian na sister: “Nagigiammù nga mawag ku i mappakalinno anna nonopakku i mismu ira nga liwa ku, imbes nga fuersakku nga manguli i wawwaragi ta kongregasion. Noffunannà gapa natun nga programa nga maffokus kani Jehova anna ta soberaniana.” Nala mu kari i punto? Nu egga i problemam, maffokus ka kani Jehova. Ipakimemallo mu nisa nga uffunan naka nga parigan i paninganna ta tanakuan. Masingi-singan na nelangitan nga Yamam i liwi-liwada ngem sigga-paran yayya nga pakoman ira. Kunnatun gapa i kayàna nga kuammu.​—1 Juan 4:20.

7. Anni i nesimmu kani Patul Uzias?

⁷ Megafu ta pappakatannang, ari nga inalawa ni Patul Uzias na Juda i tabarang anna kingnguana i gannug nga ari tu mepappangngo nga kuanna. Kurug tu malalaki si Uzias. Nangaffu yayya ta aru nga gerra, namataddag tu aru nga siudad, anna aru i komanna. “Pinarriku yayya na kurug nga Dios.” (2 Cro. 26:3-7, 10) Ngem kagian na Biblia nga “turi ta nabbalin ngana yayya nga makapangngua, nappakatannang i futuna nga yatun i nakadaralanna.” Nibilin ni Jehova nga i papari laman i mepamavulun nga manuggi tu insensu ta templo. Ngem kingngua ni Patul Uzias i gannug nga awan tu kepangngattanna nga kuan. Minay yayya ta templo tapenu manuggi tu insensu. Megafu tatun, napporay si Jehova anna pinallepprosona yatun nga minappakatannang nga lalaki. Ari vuluvuga nga nammapia yatun nga taki ni Uzias.​—2 Cro. 26:16-21.

8. Kunnasi nga makoffun nittam i 1 Corinto 4:6, 7 tapenu ari ittam nga mappakatannang?

⁸ Masiluan kari ittam gapa na pappakatannang kagitta na nikasilu ni Uzias? Ikonsidera i ekspiriensa ni Jose. Malalaki yayya nga negosiante anna respetadu yayya nga elder ta kongregasion. Mappalappa gapa yayya ta asembli anna ta kombension ira anna makitabarang paga nisa i manangngal ira ta sirkito. Ngem inaminna: “Nattalo ngà ta abilidad ku anna ta ekspiriensà. Ari ngà nga nattalo kani Jehova. Abbo ku nu masikan i espiritualidad ku, yayya nga ariakku nagginna ta abiso anna ta tabarang ira ni Jehova.” Megafu tatun, nakangngua si Jose tu madammo nga liwa anna nadisfellow yayya. Netoli gabbalaman yayya piga ragun ngana i nappasa. Kinagina: “Sinudduannà ni Jehova nga ari tu i kapeggan tu pribilehio i importante, nu ari, i pangngua ta ipakuana nittam.” Daddammattam  nga naggafu kani Jehova i maski anni nga abilidad onu pribilehio tam. (Bibbigan i 1 Corinto 4:6, 7.) Nu minappakatannang ittam, ari ittam nga usan ni Jehova.

9. Anni i kingngua ni Satanas anna ni Eva megafu ta pakkakkam?

⁹ Baka si Satanas nga Diablo i manono tam nu mapabbiridan i pakkakkam. Tadday yayya ta anghel ira ni Jehova yatun ta magga aru i makasta ira nga pribilehiona. Ngem ari yayya nga nakontentu tatun. Kayàna paga apan i dayaw nga mepangngo laman nakuan kani Jehova. Kayàna nga mabbalin ittam tu kagittana, yayya nga tentanna ittam tapenu ari ittam makontentu ta egga ira nittam. Kingnguana yatun kani Eva. Meddu nga niyawa ni Jehova kani Eva anna ta atawana i napakaru nga masingngo nga makan. Puededa nga kanan “i vunga na kada kayu ta hardin” fuera laman ta tadday. (Gen. 2:16) Ngem nilogo ni Satanas si Eva tapenu nonopanna nga mawagna paga nga kanan i vunga na tattadday nga kayu nga negamma. Ari nga inappresia ni Eva nu anni ngana i egga sa. Kayàna i mas aru paga. Ammu tam i narresultan natun. Nataga si Eva ta liwa tapus natay yayya.​—Gen. 3:6, 19.

10. Anni i nesimmu kani Patul David megafu ta nakkakkam yayya?

¹⁰ Megafu ta pakkakkam, nattaman ni Patul David i neyawa ngana ira ni Jehova nisa. Nelagum tatun i kinariku, kinaprominente, anna pavviktoria kontra ta kalabanna ira. Ammu ni David nga ‘arianna makua ngamin nga uvovugan’ anna ipappabalo i regalu ira sa na Dios. (Sal. 40:5) Ngem egga i tiempo nga nattaman ni David i niyawa ira sa ni Jehova. Ari ngana yayya kontentu anna kayàna i mas aru paga. Angngariganna, aru ngana i atawana ngem kinaragatanna paga si Bat-seba nga atawa ngana ni Urias nga Hiteo. Nabbalin tu makasarili si David. Sinaddena si Bat-seba tapus nabussi yayya. Kitaddake yatun nga kingngua ni David ngem egga paga i mas marake nga kingnguana. Nipapatena si Urias. (2 Sam. 11:2-15) Fugurammu yatun nga kingngua ni David! Ninonona kari nga ari masingan ni Jehova i kukukuanna? Maski nu nabayag ngana nga massesserbi si David kani Jehova, nabbalin yayya tu kakkam. Yatun ta aru nga problema i narresultan natun sa. Ngem pia ngana laman ta inamin  gabbalaman ni David i nakaliwatanna ira anna nabbabawi yayya. Siguradu nga mappabalo yayya ta pamakoma ni Jehova!—2 Sam. 12:7-13.

11. Base ta Efeso 5:3, 4, anni i kuattam tapenu ari ittam mabbalin tu kakkam?

¹¹ Anni i magigiammu tam kani David? Ari ittam nga mabbalin tu kakkam nu kanayun ittam nga mappabalo ta ngamin nga iyawa ni Jehova nittam. (Bibbigan i Efeso 5:3, 4.) Kontentu ittam ngana nakuan nu anni ira i egga nittam. Angngariganna, nu egga i Bible study tam ituddu tam nisa nga mannono yayya tu tadday nga espesipiko nga bendision ni Jehova nisa tapus ipappabalona yatun. Nu kadaggaw nga kuanna yatun ta interu nga ligguan, kayàna kagian nga egga i pitu nga nadduruma nga gannug nga nipakimallona. (1 Tes. 5:18) Kukukuammu kari gapa yatun? Makoffun nu pannonopammu i ngamin nga kingngua ni Jehova para nikaw tapenu mabbalikka tu minappabalo. Nu minappabalo ka, mabbalikka tu kontentu. Tapus nu kontentu ka, ari ka mabbalin tu kakkam.

12. Anni i kingngua ni Judas Iscariote megafu ta pakkakkam?

¹² Megafu ta nabbalin tu kakkam si Judas Iscariote, nangngua yayya tu kitaddake anna trinaydorna si Jesus. Ngem ari tu dati nga marake si Judas. (Luc. 6:13, 16) Tadday yayya ta pinili ni Jesus nga mabbalin tu apostolna. Egga i pattalo ni Jesus nisa megafu ta yayya i manammi ta kuartu. Inusa ni Jesus anna na apostolesna yatun nga kuartu para ta paggastuadda ira ta pallayyagayya. Megitta gafu yatun ta donasion ira sangawe para ta interu-mundo nga trabahu tam. Ngem nabbalin tu minakkoko si Judas maski nu namippiga nga naginnana i tabarang ni Jesus kontra ta pakkakkam. (Mar. 7:22, 23; Luc. 11:39; 12:15) Ari nga ginigginna ni Judas danatun nga tabarang.

13. Kanni nga nasingan nga nabbalin tu kakkam si Judas?

¹³ Ari nabbayag, nige nga natay si Jesus, egga i nesimmu nga nangipasingan tu talaga kakkam si Judas. Egga si Jesus, i disipulosna, si Maria anna i wagina nga si Marta ta balay ni Simon nga mallepproso bi. Durante nga kuman ira, limikka si Maria tapus nivuvvuna ta ulu ni Jesus i bangug na nardo nga kitangngina. Nadismaya si Judas anna i karuan nga disipulo megafu tatun. Awayyana nga nanono na karuan nga disipulo nga mas makasta nakuan nu neyusa ta ministerio i karuan nga nallakuan tatun nga bangug. Ngem tanakuan i motibo ni Judas. “Minakkoko” yayya anna kayàna nga kokotan i kuartu nga tammina. Turi kua, megafu gabbalaman ta pakkakkam, trinaydor ni Judas si Jesus katali na balor na tadday nga melaku nga aripan.​—Juan 12:2-6; Mat. 26:6-16; Luc. 22:3-6.

14. Kunnasi nga niyaplika na tadday nga magatawa i Lucas 16:13?

¹⁴ Niperaddam ni Jesus ta tagatuttulna ira yaw nga importante nga kinakurug: “Arian na nga awayya tu maggiddan i pangaya ta Dios anna pangaya ta kuartu.” (Bibbigan i Lucas 16:13.) Kurug yatun magadde sangawe. Niyaplika yatun na magatawa nga taga-Romania. Neyofer nira i tadday nga temporario nga trabahu ta mas mariku nga nasion. Aminadda: “Egga i daka-dakal nga loan mi ta bangku. Yayya nga abbo mi bi nga bendision ni Jehova yaw nga trabahu.” Ngem egga i problema. Nu alawatadda yatun nga trabahu, mas baddi ngana i tiempoda ta passerbi kani Jehova. Kabalidda nga binibbig i artikulo nga “Manatiling Tapat Taglay ang Pinagkaisang Puso” ta Agosto 15, 2008 nga isyu na Ang Bantayan, naddesision ira. Istoriadda: “Nu magali kami ta tanakuan nga nasion tapenu makaleg tu mas aru nga kuartu ngem marigatakkami ta passerbi  mi kani Jehova, ipasa-pasingammi nga ari tu i passerbi mi kani Jehova i pinaka-importante ta pattolemi. Ammu mi gapa nga mafektan natun i espiritualidad mi.” Yayya nga pinammanakitadda yatun. Anni gafu i nesimmu nira? Nakaleg gabbalaman i brother tu trabahu ta diadda nga makalanno para ta pakawagadda ira. Kagian gapa na atawana: “Ari vuluvuga nga ababba i lima ni Jehova.” Magayayya yatun nga magatawa megafu ta pinabbalidda nga Yafuda si Jehova imbes tu i kuartu.

15. Ngatta siguradu ittam nga matammangngattam i silu ira ni Satanas?

¹⁵ Kunnasi nu nasiluan ittam ngana na pappakatannang onu pakkakkam? Awayya tam paga i makatammang! Kinagi ni Pablo nga makatammang ta silu ira na Diablo danuri ‘nagafuna.’ (2 Tim. 2:26) Nesimmu yatun kani David. Ngem nagginna yayya ta pangitunung ni Natan ta nisa. Nabbabawyanna i pakkakkamna anna netolina i relasionna kani Jehova. Daddammattam nga mas masikan si Jehova anne kani Satanas. Nu mappoffun ittam kani Jehova, matammangngattam i maski anni nga silu na Diablo.

16. Kunnasi tam nga malillitan i silu ira ni Satanas?

¹⁶ Siempre, mas makasta nu ari ittam vuluvuga masiluan ni Satanas ta pappakatannang onu pakkakkam. Makua tam laman yatun ta uffun na Dios. Ngem ari ittam nakuan nga makkampante! Nappakatannang onu nakkakkam maski danuri nabayag ngana nga massesserbi kani Jehova. Makimallo ka gafu kani Jehova kadaggaw tapenu moffunan naka nga usitakkan i appana-panono anna agguyu-guyum. (Sal. 139:23, 24) Ari ka mappasilu tatun ira nga marake nga ugali!

17. Anni i aranni ngana nga mesimmu ta kalabattam nga Demonio?

¹⁷ Rinivu dagun ngana nga mangnganu si Satanas. Ngem aranni ngana yayya nga magafu anna mapatay. (Nep. 20:1-3, 10) Iinnaggattam yatun nga tiempo. Ngem nige duttal yatun, sigga-alerto ittam nakuan ta silu ira ni Satanas. Ariattam nakuan vuluvuga ipamavulun nga mabbalin ittam tu minappakatannang onu kakkam. Determinadu ittam nakuan nga ‘tubangan i Demonio, ay tu arayyuanna ittam.’—Sant. 4:7.