1. Ịyẹ tị́ du kahị ka jẹ́-ẹ chụ Olegu Onyobyi kaka pwoku ọmwụkpẹ?

IRYA ookpokpo ọlẹ ká ọmwụkpẹ la ri ọ-ka wu iyo lee ọ-ka nwọọ. Ọ ka kpa iri lee ánya ịdatị-datị myị́, jaabwọ ká ọngọhẹ nya angị kpụ́ iJobu ẹjẹ nya ọnọọkịla ya. (Job. 18:8-10) Ányị ọmwụkpẹ à tị́ ka bwu pịrị iyo ju ka ẹpwụ nya ụ́nya nyamwụ myị́? Ọ kaa kpa ẹhị ba abwẹla nya iyo ọọwa. Ale ọ tị́ kaa ga ri ka? Ịyẹ à tị́ kaa họ́ọ? Ụ́nya ụma ọlanyị ọ tị ka jẹ́ ka? Olegu Onyobyi lala ọmwụkpẹ ọwẹ. Ọ kaa kpa ẹhị ba abwẹla nyahị. Ọ kaa ya ẹhị reeji nya ẹga ọlẹ kahị kaa ka bala ang ịlẹ kị kaa kpụhị ịpyọ. Ọọwa lẹ ọ kaa da ụ́nya ọlẹ kọ jẹ́ nyori nyị ka wuhị la ọ-yahị me kaka lẹlẹ. Kpọkpọọkpọ, ịBayịbụụ tị ya ahị ọ-dahile hahị nyori kori ká ụ́nya nyị wuhị, ahị nyị ka jẹ́-ẹ be myị́. Ọ myị́myị́ mẹjẹẹhị jaabwọ kahị dọmwụ ka cheji ba hi ánya ịịwa wuu.

2. Ánya imiiye iyina à tị́ kaa họ ụkụrwọ ha Olegu Onyobyi gụ wuu?

² Ánya imiiye ịlẹ kị kaa họ ụkụrwọ ha Olegu Onyobyi gụ wuu ri ọbọọchẹ ohihi bala ehị ọ-chị nyanya. * Ọ la ẹka ụnọ ịmanyị tị́ ká Olegu Onyobyi kaa kpa abwẹla ịtịpyọ ịwẹ họ ụkụrwọ yẹẹyẹẹ lẹ. Ọ lala ọngọ da urwe ọlẹ kọ kaa pịrị iyo ju ka ẹpwụ nya ụ́nya lee ọ-da ori woo. (Eje. 91:3) Ma ọ́ chịla ká Olegu Onyobyi ka jẹ́-ẹ wuhi ka. Ịyẹ à tị́ du? Chajị iJihova ya ang ịlẹ ká Olegu Onyobyi kaa kpa wu angịnyị jehi.​—2 Kọr. 2:11.

3. Ịyẹ à tị́ du ká iJihova ya oja nya angị hị ọbọọchẹ bala ọ-chị ẹhị nyanya juwa ị-ịBayịbụụ?

³ Ụgbẹyị ọhẹ ọlẹ ká iJihova kaa dahị ọna u-uhye nya ọbọọchẹ ohihi bala ẹhị ọ-chị nyanya ri o-juhi ọhụ nyọka jẹ́ ang bwu ẹpwụ nya ẹla ọlẹ kọ họ tọ anchẹ nyamwụ ịhye. Ahị ka yẹ abwọlẹ ká Olegu Onyobyi jẹ́ da ụ́nya wu angịhyẹ ịlẹ kị dọmwụ gbịgba ha iJihova lụka ọtata lẹ. Ọọwa ri ahị-ị́ ka jẹ́-ẹ cheji ba hi ọbọọchẹ ohihi  bala ẹhị ọ-chị nyanya kaka ịnyị? Ọ́ lịnyị kpong-kpong ka. IJihova ya oja ịlịnyị juwa ẹ-ẹpwụ nya ịBayịbụụ chajị kị ka “ri ọna ọdada hahị.” (1 Kọr. 10:11) Ọ jẹ́ nyori ahị nyị ka jẹ́-ẹ jẹ́ ang bwu ẹpwụ nya oja ịlịnyị u-uhye nya abwọlẹ kahị ka cheji ba lee o-be hi ánya nya Olegu Onyobyi.

4. Ịyẹ à tị́ ka họ myị́ kori kahị kaa hi ọbọọchẹ?

⁴ Olegu Onyobyi tịtọ kahị ka hi ọbọọchẹ. Ọ jẹ́ nyori kori kahị nyị ya iwe da ká ọbọọchẹ o-pwoku ka á yehi la lẹ aalẹ, ọhịhị ogboyi myị́ oyi ka nyịhị lala ọwọwa lẹ. (Etu 16:18) Ịnyị à dudu ká ọlẹrụ ịPọlụ dọna eji nyori ọngịnyị nyị ka “kpa ịlọmwụ ka uhye ngana-ngana ẹ-ẹpwụ nya ọbọọchẹ ohihi jaabwọ ká Ohe Onyobyi họ, du ká eje owuwu nya Ohe Oluhye [ka] wẹ uhye nyamwụ” myị́ lẹ. (1 Tim. 3:6, 7) Ọọwa ka họ ta ọng myị́ ọng nyahị myị́, kori kahị ri angị inyeewe ẹ-ẹpwụ nya ẹlịlẹhị lee ahị kaa gbịgba ha iJihova ẹ-ẹpwụ nya ẹka lụmẹ-lụmẹ lẹ.

5. Jaabwọ ká ụpwụ nya Ọngọlirya 7:16, 20 ya, ányị ọngịnyị à tị́ ka mẹjẹ nyori ọ hi ọbọọchẹ?

⁵ Angị hi ọbọọchẹ kaa yẹ ịlaa-ịlaa kem. Olegu Onyobyi kaa maga nyọka họ kahị ka yẹ ịlọhị-ịlọhị bwula ọ-kụ irya u-uhye nya ịlọhị gụ abwọlẹ kahị kaa kụ irya u-uhye iJihova, ọgụgụ ri ụka kahị ji ẹpwụ nya akama. Ọ-chụ pwokwita, ị chị ẹla bang ododu ẹnẹhẹ lẹ? Lee ọngọhẹ họng ẹla ọkịrọrọ ẹnẹhẹ lẹ? Ọ ka há Olegu Onyobyi ká ka kpụ iJihova lee aanang abyị. Olegu Onyobyi tịtọ ká ka kụ irya nyori ụgbẹyị ọlẹ ká ka jẹ́-ẹ bwu myị́ akama ọwẹ kem ri ọ-ka họ ẹla ụ-ụgbẹyị ọlẹ kọ háng ọkọkọ nyọka ba ẹla ọlẹ ká iJihova wẹẹ mẹjẹ́ẹhị bwu ẹpwụ nya Omyi Ẹla nyamwụ jẹ.​—Wa Ọngọlirya 7:16, 20.

6. Ịyẹ a tị́ jẹ́ bwu ẹla ọlẹ kọ họ ta ọọnahị ọnyang ọhẹ ịị Netherlands?

⁶ Kụ ẹhị yẹ ẹla ọlẹ kọ họ ta ọọnahị ọnyang ọhẹ ịị Netherlands ọlẹ kọ kaa ju agbama u-uhye nya ọ-jẹ́ họ ka nya angịkịla wẹẹ. O ya ọwa nyị́ ka jẹ́-ẹ yẹ jula angịkịla ẹnẹnẹhẹ kaka. O yẹkẹẹ: “M̀ la ịlọm nwee, ḿ tị jẹ́ tụụbwọ hi ga ha aanahị ịwẹ ka. “M̀ byi ọrụm nyori ahị rụ ka ọjịra-jịra ọkịla mẹ.” Ọọwa lẹ ọ tị yẹ iprogram nya JW Broadcasting^® nya Ọya Ọhata nya 2016 lẹlẹ. IProgram ọwa gba  irya ịhyẹ kpehe u-uhye nya abwọlẹ ká ọngịnyị ka bwu bọhụ ẹ-ẹga nya ọ-la ọkpẹẹkpẹẹ-ka nya angịkịla. Ọọnahị ọnyang ọwẹ yẹkẹẹ: “M̀ yẹ nyori m̀ baba nyọka kpa ịlọm keji kam ka kụ irya u-uhye nya ọ-jẹ́ họ ka nya ịlọm ọkọkọ nyọka yẹ aanahị alẹng bala anyang da ẹ-ẹpwụ nya ọjịra-jịra. IProgram ọọwa dam ụbwọ nyọka yẹhị rịrị ẹ-ẹga nya iJihova bala eji ọkpakpa nyamwụ.” À yẹ wẹ lẹẹ? Ụka ká juwa ẹ-ẹpwụ nya akama, kịnyaa la ọ-kụ irya u-uhye nya iJihova. Bịlọọ nyọka dang ụbwọ ká ka yẹ angịkịla la ẹhị ọlẹ kọ kaa kpa yaa. Adang olepwoohe yẹ ọ-jẹ́ họ ka nyaa; ọ tị kaa hịnyọhi haa. Ọ tịtọ ká ka họ ịnyị ịnyịnyị.​—1 Jọn. 4:20.

7. Ịyẹ à tị́ họ ta Adịrahụ Usiya?

⁷ Ọbọọchẹ ohihi dudu ká Adịrahụ Usiya nya ala iJuda á myị ke ụrụ wo ẹla ọlẹ kị mẹjọ́ọ ka gbee kọọ kaka họ ẹla ọlẹ kọ la ọngịrị nyọka họ ka. Usiya ri ọngọ jẹ́-ẹ họ ang yẹẹyẹẹ. Ọ kụrụ ẹwụ lụmẹ-lụmẹ, ọ nwụ́ epweji lụmẹ-lụmẹ, bala ọ-wu ẹrụ yẹẹyẹẹ ịnyịnyị. “Ohe Oluhye wahị kụrwọọ” yẹẹyẹẹ. (2 Ego. 26:3-7, 10) ỊBayịbụụ tị yẹkẹẹ: “Ụka ká Usiya Adịrahụ la ọngịrị ịnyị lẹ, ọ hi ọbọọchẹ lẹlẹ. Ọọwa-à ju ọmwụ nya ayịreji ọtata nyamwụ lẹ.” IJihova da ehile neeji ene nyori angịkiliya kem nyaa ka kiliya nya itangare u-ube ịgọgọ lẹ. Ma Adịrahụ Usiya họ ang ọlẹ kọ la ọngịrị nyọka họ ka bwula ọ-ka ube ịgọgọ kaka kịla iya nya ịtangare. IJihova wẹẹjẹ ta ọlẹng ọ-kpa ịlọmwụ ka uhye ọwẹ bala ọ-jwọọ ẹdụrụ nya ekpo. Ẹdụrụ nya ekpo ọwẹ jụwa ị-ịnyịrọ nya Usiya gbee da ahyẹẹnụ ọlẹ kọọ gbu.​—2 Ego. 26:16-21.

8. Ányị ọ-kpa ẹla ọlụpwụ nya 1 Ala ịKọrịntị 4:6, 7 họ ụkụrwọ à tị́ ka dahị ụbwọ nyọka cheji ba hi ịlọhị ọ-kpa ka uhye?

⁸ Ọbọọchẹ ohihi ka kpahị ju ka ẹpwụ nya ụ́nya ụma nya ọlẹ kọ wu Usiya myị́? Kụ irya nya ọ-chụ pwokwita nya José wẹẹ. Ọ ri ọlọhị ọtụka-ọtụka, ọ tị ri ọngọgbahị nya ọjịra-jịra ọlẹ kị kaa ju ihi yẹẹyẹẹ ịnyịnyị. Ọ kaa họ ụpa nya ẹla ọyaya ọọjịra-jịra ọtụka bala ịnya isekut. Angị kpẹhị rịrị isekut dọmwụ kaa ka ẹga nyamwụ nyọka jwaa irya. Ọ tị yẹkẹẹ: “Ma m̀ kpụnịrọ ang ọlẹ kam ka jụ họ myị́ bala ẹla ọjẹ́jẹ nya ịlọm ọkọkọ nya iJihova. M̀ me nyori m̀ la giri-giri, lẹ ḿ ke ụrụ wo la ọna ọdada bala ẹla ọmẹjẹ nya iJihova ka.” José họ ọhọbịrị ọtụka ọhẹ kpụ ị gbọọ hi ogu. Ị yoo tịrịkpẹ ẹka ịmanyị-ịmanyị kẹkpẹ lẹ. Ọ ya lẹẹlẹẹ yẹkẹẹ: “IJihova mẹjẹ́m nyori ẹ-ẹnyị ọlala à ri ang ọlẹ kọ baba gụ ka, ma ọ-ka họ ang ọlẹ kọ byihi nyị họ ịnyị.” Ahị kpịtịya nyori āhị ọhẹ-lọhẹ kahị la lee  iwe-ahụrụ ọnyị myị́ ọnyị kị ya hahị bwu ẹga nya iJihova ịnyị. (Wa 1 Ala ịKọrịntị 4:6, 7.) Kori kahị kpa ịlọhị ka uhye, iJihova á myị-ị kpahị họ ụkụrwọ ka.

9. Ịyẹ ọbọọchẹ ohihi bala ẹhị ọ-chị nyanya à tị́ kpa Olegu Onyobyi bala Iivu kaka họ?

⁹ Ụka kahị ja kụ irya u-uhye nya ẹhị ọ-chịnyanya, ahị kaa kpịtịya nya Olegu Onyobyi. Nyọlẹ ká Olegu Onyobyi ri ọngọhẹ nya alegu-ẹrụ nya iJihova ene-ene wẹẹ, ọ́ ka dayi la ọ-la iwe-ahụrụ ịnyịịla-ịnyịịla ịhyẹ kaka. Ma ịịwa á tị nwọọ ka. Ọ tịtọ nya ịgba ọgbagba ọlẹ ká iJihova kem à chịla nyọka ye. Olegu Onyobyi tịtọ kahị ka lala ọwọwa, lẹ ọ kaa maga nyọka họ kahị ka kụ irya nyori ang ịlẹ kahị la wẹ nyị nwà lẹka. Ụka ọhọhẹ ọlẹ kọ maga nyọka họ ịnyị rị ụka kọ ka ẹga nya Iivu. IJihova bwula ọháha ya ang oriri ịdatị-datị ha Iivu bala ọrụmwụ nyọka ri​—“egbe nya ekeji myị ekeji ịlẹpwụ nya ẹrụ” ọọwa wuu datị kaka hi ookpokpo. (Ọmwụ. 2:16) Kpọkpọọkpọ, Olegu Onyobyi pịrị Iivu ju nyọka kụ irya nyori ọ baba nyọka ri ugbe nya okoji ookpokpo ọlẹ kị chọọ ịgọ nyamwụ. Ang ịlẹ ká Iivu la á myọọ lẹhị ka; ọ tịtọ nya ọkịla dọọ. Ahị jẹ́ ang ọlẹ kọ họ u-uhye nya ọọwa. Iivu kpa ẹpwụ nya ọhọbịrị du ko ri igu họọ.​—Ọmwụ. 3:6, 19.

10. Ányị ẹhị ọ-chị nyanya à tị́ ri ụ́nya ha Adịrahụ iDevidi?

¹⁰ Ẹhị ọ-chị nyanya du ká Adịrahụ iDevidi deeri nya ang ịlẹ ká iJihova ya họọ, ang lala ụdụ ọ-kpụkpụ, ehe ọlala, bala ọkụrụ-kụrụ u-uhye nya aluji nyamwụ lụmẹ-lụmẹ. Āhị nya Ohe Oluhye myị iDevidi lẹhị gbee kọọ ya nyori nyị “ju iru kịlọnụ!” (Eje. 40:5) Ma ọ tị pwụ ụka ohẹ, iDevidi deeri nya ang ịlẹ ká iJihova ya họọ. Ang ịịwa á myọọ lẹhị kaka; ọ tịtọ nya ịkịla da ịịwa. IDevidi ye ịhụ ịmanyị-ịmanyị ịnọ, ma ọ dọmwụ nyọka tịtọ nya ahụ nya ọngọkịla, nanana nyọlẹ ká iJihova ya nyori ọọwa nyị tịpyọ. Ọnyang ọọwa à ri ịBatịchẹba lẹ, ọrụmwụ à tị ri Uriya ọla iHiiti lẹ. Ẹhị ọ-chị nyanya dudu ká iDevidi nọ ta ịBatịchẹba, ọọwa lẹ ọ kpẹnyị lẹlẹ. Lala o-ri ụya ọwẹ nyị́ nwà lẹka, ọ myịmyị me obyi nya abwọlẹ kị ka bwu nwụ Uriya! (2 Sam. 11:2-15) Ẹlịyẹ iDevidi à tị́ wẹẹ kụ irya? Ọ me irya nyori iJihova nyị́ yọyị ka ịnyị? Ịnọ iDevidi gbịgba ha iJihova ẹ-ẹpwụ nya ẹka lụmẹ-lụmẹ, ọ tị wẹ ka chị ẹhị nyanya dudu kọ yẹ akama u-uhye nya ọọwa. Ahị tị chị ọkẹkẹnị chajị nyori ụka ohyẹẹkpẹ, iDevidi ya ọhọbịrị nyamwụ dodehe bala ọ-yẹdạ. Ọ chị ọkẹkẹnị  nya ịlẹhị-ịlẹhị nyọlẹ ká iJihova hịnyọhi họọ!​—2 Sam. 12:7-13.

11. Jaabwọ ká ụpwụ nya Ala Efesọsị 5:3, 4 ya, ịyẹ à tị́ ka dahị ụbwọ nyọka ma ụya ta ẹhị ọ-chị nyanya?

¹¹ Ẹlịyẹ ahị tị́ jẹ́ bwu ọ-chụ pwokwita nya iDevidi? Ahị jẹ́ nyori ahị ka jẹ́-ẹ ma uya ta ẹhị ọ-chị nyanya myị́ kori ká ang ịlẹ wuu ká iJihova ya hahị á myịhị lẹhị. (Wa Ala Efesọsị 5:3, 4.) O ri opyii ká ang ịlẹ kahị la ka nwahị ba ụ-ụwa. Ụka kahị dọmwụ nyọka mẹ ịBayịbụụ jẹ ọngịnyị, ahị kaa mẹjáa nyọka kụ irya u-uhye nya ang ọnyịịla ọhẹ ọlẹ ká iJihova họ haa bala ọ-ka joo obe chajị nyamwụ. Kori ká ọngịnyị á họ ịnyị ẹnụ myị́ ẹnụ ẹ-ẹpwụ nya epwihi lẹ aalẹ, ọ raabwọ u-uhye nya ẹla ịdatị-datị irwiye lẹ (1 Tes. 5:18) À kaa họ ẹla ọlịnyị-ịnyị? Ọ-kụ irya u-uhye nya ang ịlẹ wuu ká iJihova họ hang ka dang ụbwọ nyọka myị̀ la obe ojiji. Ụka ká tị myị̀ la obe ojiji, ang ịlẹ ká la kaa nwang ba ụ-ụwa. Ụka ká ang ịlẹ ká la á nwang ba ụ-ụwa, à ka kụrụ ẹhị ọ-chị nyanya.

12. Ịyẹ ẹhị ọ-chị nyanya à tị́ kpa iJudsị kaka họ?

¹² Ẹhị ọ-chị nyanya nya ang dudu ká iJudasị Isikarọtụ họ ang ọlẹ kọ tịpyọ kpoye bala ọ-pịrị iJisọsị ha. Ọ́ tị la ịịwẹ bwu ọmwụ ọdada ka. (Luk. 6:13, 16) IJisọsị chwọọ nya ọngọhẹ nya alẹrụ nyamwụ. IJisọsị dahịhilọọ, chajị ọwa à kaa kpa akpa nya okpoko nyaa lẹ. IJisọsị bala alẹrụ nyamwụ kaa kpa okpoko ịịwa họ ịbaba nyaa ẹ-ẹpwụ nya ụkụrwọ nya ẹrụ ọnyịịla ọ-kpa pyẹ. Okpoko ịịwa lala o-hu ha ịlẹ kị kaa kpa da ụkụrwọ nya ẹrụ ọnyịịla ọ-kpa pyẹ ụbwọ odehe wuu alẹ. Ma nyọlẹ kọ pwụ́ arịrị ọhẹ iJudasị dọmwụ nyọka hu okpoko ihye yoyi, nanana nyọlẹ kọ wo ká iJisọsị kaa da angịnyị ọna ụka lụmẹ-lụmẹ u-uhye nya ẹhị ọ-chị nyanya. (Mak. 7:22, 23; Luk. 11:39; 12:15) IJudasị á tị myị ke ụrụ wo ọna ọdada ọọwa ka.

13. Ụka oyina ẹhị ọ-chị nyanya nya iJudasị à tị́ chehe gede-gede?

¹³ Ẹhị ọ-chị nyanya nya iJudasị chehe gede-gede ụka ká ẹla ọhẹ họ lụka okpii ene kị lẹẹ nwụ iJisọsị. IJisọsị bala angịjụgbẹyị nyamwụ tụ iMeri bala ọnyịnamwụ ịMata, juga ẹ-ẹpwa nya ịSayịmọn olekpo. Ụka kị wẹẹ kpa ang oriri ri, iMeri wuleji lẹ ọ ya ida ọ-chị oru kwọkwọ ọlẹ kọ la ịnya yẹẹyẹẹ hụ iJisọsị e-egbeju lẹlẹ. IJudasị bala angịjụgbẹyị ịkịla wẹẹjẹ nya ịlẹhị-ịlẹhị u-uhye nya ọọwa. Ọ ka la angịjụgbẹyị ịkịla myị́ nyori nyị ka há gụ kori kị nyị ya okpoko ọwẹ da ụkụrwọ nya ẹrụ ọnyịịla ọ-kpa pyẹ ụbwọ ịnọ. Ma irya nya iJudasị ọwa tị datị. “Ọwa ayịdang ri oloyi,” lẹ ọ kaa tịtọ nyọka hu okpoko yoyi bwu ẹpwụ nya akpa. Ụka ohyẹẹkpẹ, ẹhị ọ-chị nyanya dudu ká iJudasị pịrị iJisọsị ra la ịnya nya okpoko nya ọnyọhị.​—Jọn. 12:2-6; Mat. 26:6-16; Luk. 22:3-6.

14. Ányị ahụ bala ọrụ ọhẹ à tị́ kpa ẹla ọlụpwụ nya iLuku 16:13 họ ụkụrwọ?

¹⁴ IJisọsị kpụ angịjụgbẹyị nyamwụ ịtịya nya ẹlịlẹhị ọkpọnchị ọlẹ: “Ánụ́ ka jẹ́-ẹ juwa myị ẹrụ ha ụdụ nya odehe ọlẹ lala ọnchẹ, anụ ka myịmyị jẹ́-ẹ juwa ju Ohe Oluhye ihi kpẹẹkpẹẹ myị́ kpong-kpong kaka.” (Wa iLuku 16:13.) Ẹla ọwẹ ri ịnyịlẹhị wẹẹ. Yẹ ọ-chụ pwokwita nya ahụ bala ọrụ ọhẹ ịị Romania ịlẹ kị kpa ẹla ọlẹ ká iJisọsị ya wẹ họ ụkụrwọ wẹẹ. Ị ya ụkụrwọ haa kị ka họ lụka okpii ẹ-ẹpwụma ọhẹ ka okpoko ji yẹẹyẹẹ. Ị yẹkẹẹ: “Ahị kpa uri ọtụka-ọtụka ọhẹ ị-ịbankị kahị baba nyọka nwụ̀, lẹ ụka nya ọgbanyẹ ahị me nyori ụkụrwọ ọwẹ ri ahị ọwawa bwu ẹga nya iJihova.” Ma, akama tị juwa. Ụkụrwọ ọọwa ka chaa ochuchuu la ọ-ka gbịgba ha iJihova. Nyọlẹ kị wa ang ọjẹ́jẹ ọlẹ ká egbeju nyamwụ ri “Maintain Loyalty With a Unified Heart” ẹ-ẹpwụ nya Ẹpwang ọ-Kụ Gbeji nya ahyẹẹnụ 15 nya Ọya Ọhaneku, 2008 kpá lẹ, ị cheje ha ịlaa lẹlẹ. I yẹkẹẹ: “Ó ri irya nyọka la okpoko gụ ọlene ko dudu kahị ka rụ ka họ ụkụrwọ ẹ-ẹpwụma ọkịla aalẹ, ahị-ị́ hu igu oriri nyahị bala iJihova nya ang ọhọhẹ lẹka. Ahị jẹ́  myịmyị nyori igu oriri nyahị bala iJihova ka yẹ akama.” Ọọwa lẹ ị pwa la o-ye ụkụrwọ ọọwa lẹlẹ. Ịyẹ à tị́ họ mẹ? Ọrụ ye ụkụrwọ ọlẹ kị kaa nwọọ uri ọlẹ kọ ka họ ịbaba nyaa myị́ ụ-ụwa ẹ-ẹpwụma nyaa. Ahụ yẹkẹẹ: “Ụbwọ nya iJihova á la kpii ẹnẹnẹhẹ ka.” Ahụ bala ọrụ ọwẹ chị ọkẹkẹnị nyọlẹ kị hu iJihova nya Ayịbaba nyaa ọkọkọ nya okpoko.

15. Ịyẹ tị du kahị jẹ́ myị̀myị̀ nyori ahị ka jẹ́-ẹ be bwu ẹpwụ nya ánya nya Olegu Onyobyi myị́?

¹⁵ Ọ́ ti ri kahị kaa hi ọbọọchẹ lee ọ-chị ẹhị nyanya ene lẹ bẹẹ? Ahị ka jẹ́-ẹ yẹda myị́! ỊPọlụ ya nyori angịlẹ kịị nyị “ji ẹpwụ nya eri owuwu nya Ohe Onyobyi” nyị ka jẹ́-ẹ be bwu ẹpwụ nya ụ́nya ọọwa myị́. (2 Tim. 2:26) Ịnyị ọ la ẹ-ẹga nya iDevidi lẹ. Ọ ke ụrụ wọ la ẹga ọchịchị nya ịNatan bala ọ-nwụla igu oriri nyamwụ bala iJihova. A deeri ẹnẹnẹhẹ ka, iJihova la ọngịrị gụ Olegu Onyobyi. Lẹ kori kahị ye ụbwọ ọdada nya iJihova myị, ahị ka jẹ́-ẹ be bwu ẹpwụ nya ụ́nya lee ori ọhẹ-lọhẹ ká Ohe Onyobyi-í da myị́.

16. Ịyẹ à tị́ ka dahị ụbwọ nyọka cheji ba hi ánya nya Olegu Onyobyi?

¹⁶ Ẹlịlẹhị ri, ọkọkọ nyọka be bwu ẹpwụ nya ánya nya Olegu Onyobyi lẹ, ọ há gụ nya ahị ọ-ka cheji ba hyaa gbang-gbang. Bwula ụbwọ ọdada nya iJihova kem ahị ka jẹ́-ẹ họ ịnyị myị́ lẹ. Ma ahị tị dahịhile ịlọhị kpoye ka! Anchẹ nya iJihova ịlẹ kị dọmwụ gbịgba họọ lụka ọtata lẹ ka dọmwụ nyọka hi ọbọọchẹ lee ọ-chị ẹhị nyanya myị́. Lẹ bịlẹ iJihova ẹnụ myị́ ẹnụ nyọka dang ụbwọ wụla ọkịlẹtụ bala abwẹla nyang yẹ. (Eje. 139:23, 24) Maga jaabwọ ká ka họ ba myị́ ká ka hi ọbọọchẹ lee ọ-chị ẹhị nyanya ka!

17. Ịyẹ à tị́ ka họ ta Ohe Onyobyi oluji nyahị lụka okpii?

¹⁷ Ọ la ẹka ụnọ ịmanyị tị ká Olegu Onyobyi wẹẹ da urwe lẹ. Ma lụka okpii ị ka woo ju agba ene kị ka myịmyị-ị tọọ ayịreji. (Ọwụ. 20:1-3, 10) Ọ tahị ta ká ụka ọwẹ ka pweeji wuu lẹ. Gbee da ụka ọọwa, ahị kịnyaa la ọ-yẹhị reeji nya ánya nya Olegu Onyobyi mẹ. Maga nya ịlẹhị-lẹhị nyọka ya iwe da ká ọbọọchẹ ohihi lee ẹhị ọ-chị nyanya ka yeng la ka. Cheje nyọka “tụ Ohe Onyobyi pyịpyị mẹ aalẹ, Ohe Onyobyi ka rụnyẹ rụ [hing] lẹ.”​—Jem. 4:7.