1. Apay a maibagatayo a ni Satanas ket kas iti maysa a mangnganup?

MAYMAYSA ti panggep ti mangnganup—ti panangtiliw wenno panangpapatayna iti biktimana. Mabalin nga agusar iti nadumaduma a silo wenno palab-og, a kas iti imbaga ti maysa kadagiti saan a napudno a nangliwliwa ken Job. (Job 18:8-10) Kasano a ti mangnganup maallukoyna ti maysa nga animal a mapan iti silona? Ad-adalenna dayta nga animal. Sadino ti pappapananna? Ania dagiti pagay-ayatna? Ania ti kasayaatan a silo iti dayta? Ni Satanas ket kas iti dayta a mangnganup. Ad-adalennatayo. Kitkitaenna no pappapanantayo ken no ania dagiti pagay-ayattayo. Kalpasanna, mangipakat iti silo bareng no matiliwnatayo a ditay mapupuotan. Ngem no natiliwnatayo, ipasigurado ti Biblia a mabalintayo ti lumapsut ken isurona met no kasanotayo nga interamente a maliklikan dagita a silo.

2. Ania ti dua kadagiti kaepektibuan a silo ni Satanas?

² Ti dua kadagiti kaepektibuan a silo ni Satanas ket ti kinapannakkel ken kinaagum. * Rinibu a tawenen a sibaballigi nga us-usarenna dagita a dakes a kababalin. Isu ket kas iti agtiltiliw iti billit nga agusar iti silo wenno mangipakat iti iket tapno matiliwna ti biktimana. (Sal. 91:3) Ngem ditay koma ipalubos a matiliwnatayo ni Satanas. Apay? Gapu ta impakaammo kadatayo ni Jehova dagiti taktika nga us-usaren ni Satanas.—2 Cor. 2:11.

3. Apay nga impaisurat ni Jehova iti Biblia ti dadduma a pagarigan?

³ Pakpakdaarannatayo ni Jehova maipapan iti kinapannakkel ken kinaagum. Ti maysa a pamay-an ket ti panangparegtana kadatayo nga agsursuro kadagiti pudpudno a kapadasan. Kadagiti  pagarigan nga usigentayo, paliiwenyo ta nasiluan ni Satanas uray dagiti nataengan iti naespirituan nga adipen ni Jehova. Kayatna kadi a sawen a ditay pulos maliklikan dagiti silona? Saan. Impaisurat ni Jehova iti Biblia dagita a pagarigan kas “pakdaar kadatayo.” (1 Cor. 10:11) Ammona a makasursurotayo kadagiti mamakdaar a pagarigan tapno maliklikan wenno makalapsuttayo kadagiti silo ti Diablo.

4. Ania ti mapasamak kadatayo no napannakkeltayo?

⁴ Kayat ni Satanas nga agpannakkeltayo. Ammona a no agpannakkeltayo, agbalintayo a kas kenkuana ket saantayo nga agbiag nga agnanayon. (Prov. 16:18) Dayta ti rason nga imbaga ni apostol Pablo a ti maysa a tao ket mabalin nga “agtangsit ken agpannakkel ket maukom a kas iti pannakaukom ti Diablo.” (1 Tim. 3:6, 7) Mabalin a mapasamak dayta iti asinoman kadatayo, kabbarotayo man iti kinapudno wenno adun a tawen nga agserserbitayo ken Jehova.

5. Kas ipakita ti Eclesiastes 7:16, 20, kasano a mabalin nga agpannakkel ti maysa a tao?

⁵ Ti kinapannakkel ket maysa a kita ti panagimbubukodan. Padpadasen ni Satanas nga impluensiaannatayo nga agbalin a managimbubukodan ken ad-adda nga agpokus iti bagitayo imbes a ken Jehova, nangruna no adda problematayo. Kas pagarigan, napadasam kadin ti napadpadakes wenno di nainkalintegan a pannakatrato? Maay-ayatan ni Satanas no makitanaka a pabasolem ni Jehova wenno dagiti kapammatiam. Kayat met ti Diablo a panunotem a ti laeng solusion ket aramidem ti kaykayatmo imbes a surotem ti panangiwanwan nga ipapaay ni Jehova babaen ti Saona.—Basaen ti Eclesiastes 7:16, 20.

6. Ania ti masursurom iti kapadasan ti maysa a kabsat idiay Netherlands?

⁶ Usigentayo ti kapadasan ti maysa a kabsat idiay Netherlands a masuron idi kadagiti pagkamkamalian ti sabsabali. Dina kano idan maanusan. Imbagana: “Nalidayanak unay ken diak kayaten ti makikadua kadakuada. Imbagak ken lakayko nga umakarkamin  iti sabali a kongregasion.” Idi kuan, binuyana ti Marso 2016 a JW Broadcasting^®. Nangted dayta a programa iti sumagmamano a suhestion no kasano nga ibturan dagiti pagkamkamalian ti sabsabali. Insalaysay ti kabsat: “Naamirisko a masapul a napudnoak iti bagik ken sipapakumbaba a panunotek dagiti pagkamkamaliak imbes a padasek a balbaliwan dagiti kakabsat iti kongregasion. Tinulongannak ti programa nga agpokus ken Jehova ken iti kinasoberanona.” Nakitayo kadi ti punto? No maipasangoka iti pakasuotan, agpokuska ken Jehova. Ipakaasim a tulongannaka a mangtulad iti panangmatmatna iti sabsabali. Makitkita ti nailangitan nga Amam dagiti pagkamkamalianda; ngem sidadaan a mangpakawan kadakuada. Kayatna a kasta met koma ti aramidem.—1 Juan 4:20.

7. Ania ti napasamak ken Ari Uzias?

⁷ Gapu iti kinapannakkel ni Ari Uzias ti Juda, dina impangag ti balakad ket nagtignay a sidadarasudos. Nagadu ti naaramidan ni Uzias. Adu a gubat ti nangabakanna, adu a siudad ti imbangonna, ken nagadu ti talonna. “Binendisionan ti pudno a Dios.” (2 Cron. 26:3-7, 10) “Ngem idi nabilegen, timmangsit ti pusona a dayta ti nakadadaelanna,” kuna ti Biblia. Nabayagen nga imbilin ni Jehova a dagiti laeng papadi ti maipalubos a mangidaton iti insienso iti templo. Ngem sidadarasudos ni Ari Uzias a napan idiay templo tapno agidaton iti insienso. Saan a naragsakan ni Jehova isu a pinagkukutelna dayta a napannakkel a lalaki. Nagtalinaed ni Uzias nga agkukutel agingga iti ipapatayna.—2 Cron. 26:16-21.

8. Maitunos iti 1 Corinto 4:6, 7, kasanotayo a maliklikan ti kinapannakkel?

⁸ Mabalin ngata a masiluannatayo ti kinapannakkel a kas iti napasamak ken Uzias? Usigentayo ti napasamak ken José. Nakabalballigi a negosiante ken mararaem idi a panglakayen iti kongregasion. Agpalpalawag kadagiti asamblea ken kombension, ken agpabpabalakad kenkuana dagiti manangaywan iti sirkito. “Ngem nagtalekak iti abilidadko ken iti kapadasak,” inaminna. “Saanak a nagpannuray ken Jehova. Impagarupko a kayak ti amin a banag, isu a saanko nga impangag dagiti pakdaar ken balakad ni Jehova.” Nakaaramid ni José iti nadagsen a basol isu a nailaksid. Ngem naisublin sumagmamano a tawenen ti napalabas. Kastoy ti kinunana: “Insuro kaniak ni Jehova a ti napateg ket saan a ti posision, no di ket ti panangaramid iti kidkiddawenna  nga aramidentayo.” Laglagipentayo koma a naggapu ken Jehova ti aniaman nga abilidadtayo ken ti aniaman a pribilehio a maawattayo iti kongregasion. (Basaen ti 1 Corinto 4:6, 7.) No napannakkeltayo, dinatayto usaren ni Jehova.

9. Gapu iti kinaagum, ania ti inaramid da Satanas ken Eva?

⁹ No panunotentayo ti kinaagum, malagiptayo la ketdi ni Satanas a Diablo. Kas maysa kadagiti anghel ni Jehova, sigurado nga adu ti nagsayaat a pribilehio ni Satanas. Ngem kayatna ti ad-adu pay. Kayatna ti panagdaydayaw a maikari laeng ken Jehova. Kayat ni Satanas a tuladentayo isuna, isu a padpadasenna nga iparikna a ditay mapnek iti addan kadatayo. Ti damo a panangaramidna iti dayta ket idi inasitganna ni Eva. Sidudungngo nga impaayan ni Jehova ni Eva ken ti asawana iti aglaplapusanan a makapnek a taraon—dagiti bunga ti “tunggal kayo iti hardin” malaksid iti maysa. (Gen. 2:16) Ngem naallilaw latta ni Satanas ni Eva. Pinanunot ni Eva a masapul a kanenna ti bunga ti maiparit a kayo. Dina inapresiar ti addan kenkuana; kayatna ti ad-adu pay. Ammotayo ti nagtungpalan dayta. Nagbasol ni Eva ket natay idi agangay.—Gen. 3:6, 19.

10. Kasano a nasiluan ni Ari David iti kinaagum?

¹⁰ Gapu iti kinaagum, nalipatan ni Ari David dagiti impaay kenkuana ni Jehova, a pakairamanan ti kinabaknang, kinalatak, ken panagballigina iti adu a kabusorna. Siyayaman ni David a nangbigbig a dagiti sagut ti Dios ket ‘dina masaggaysa gapu iti kinaaduda!’ (Sal. 40:5) Ngem adda idi tiempo a nalipatan ni David dagiti impaay kenkuana ni Jehova. Saanen a kontento; kayatna ti ad-adu pay. Uray no adda idin sumagmamano nga asawa ni David, impalubosna nga agtubo iti pusona ti di umiso a tarigagay para iti asawa ti sabali. Dayta a babai ket ni Bat-sheba, ket ni Urias a Heteo ti asawana. Managimbubukodan ni David ta nakidenna ken Bat-sheba, a nagresulta iti panagsikogna. Nagdakesen ti inaramid ni David a pannakikamalala, ngem adda pay dakdakes nga inaramidna: implanona ti pannakapapatay ni Urias! (2 Sam. 11:2-15) Ania idi ti pampanunoten ni David? Impagarupna ngata a saan a makitkita isuna ni Jehova? Dayta a dati a matalek nga adipen ni Jehova ket nagbalin a managimbubukodan ken nagsagaba iti nakaro gapu iti dayta. Imbag laengen  ta inamin ni David ti basolna ket nagbabawi. Anian a yamanna ta nagun-odanna manen ti pabor ni Jehova!—2 Sam. 12:7-13.

11. Sigun iti Efeso 5:3, 4, ania ti makatulong kadatayo a manglaban iti kinaagum?

¹¹ Ania dagiti masursurotayo kadagiti kapadasan ni David? Kayatayo a labanan ti kinaagum no kanayon nga agyamantayo iti amin nga ipapaay kadatayo ni Jehova. (Basaen ti Efeso 5:3, 4.) Masapul nga agbalintayo a kontento kadagiti addan kadatayo. Maiparparegta kadagiti baro a mayad-adalan iti Biblia a mangpanunotda iti maysa nga espesipiko a bendision ken agyamanda ken Jehova gapu iti dayta. No aramiden dayta ti maysa a tao iti kada aldaw, kaipapananna nga iti makalawas, adda pito a nagduduma a banag a pagyamananna. (1 Tes. 5:18) Kasta met kadi ti ar-aramidem? No kanayon a panunotem ti amin a naaramidanen ni Jehova para kenka, dayta ti makatulong tapno agbalinka a managyaman. Ket no managyamanka, agbalinkanto a kontento. Ket no kontentoka, malabanamto ti kinaagum.

12. Ania ti inaramid ni Judas Iscariote gapu iti kinaagum?

¹² Gapu iti kinaagum, nakaaramid ni Judas Iscariote iti nakadakdakes ket trinaidorna ni Jesus. Ngem saan a dati a kasta. (Luc. 6:13, 16) Ni Jesus ti nangpili kenkuana kas apostol. Nalawag a mapagtalkan ken mapangnamnamaan idi ni Judas, ta isu ti paraiggem iti kahon ti kuarta. Inusar ni Jesus ken dagiti apostolna dagita a pondo para iti paggastosanda iti trabaho a panangasaba. No ar-arigen, dagita ket kas kadagiti donasion ita para iti sangalubongan a trabaho. Ngem adda idi tiempo a rinugianen ni Judas ti agtakaw nupay nangngegnan ti namin-adu a pakdaar ni Jesus maipapan iti kinaagum. (Mar. 7:22, 23; Luc. 11:39; 12:15) Saan nga inkankano ni Judas dagita a pakdaar.

13. Kaano a nalawag a nakita ti kinaagum ni Judas?

¹³ Nalawag a nakita ti kinaagum ni Judas di nagbayag sakbay a napapatay ni Jesus. Ni Jesus ken dagiti adalanna, a pakairamanan ni Maria ken ti adingna a ni Marta, ket bisita idi ni Simon nga agkukutel. Bayat ti pannangan, timmakder ni Maria ken imbukbokna iti ulo ni Jesus ti nabanglo ken nakanginngina a lana. Nasuron unay ni Judas ken ti dadduma nga adalan. Para iti dadduma nga adalan, nasaysayaat koma no nausar ti kuarta iti panangasaba. Ngem sabali ti motibo ni Judas. Isu ket “mannanakaw,” ken kayatna a takawen ti kuarta iti kahon. Idi agangay, gapu iti kinaagum, trinaidorna ni Jesus iti gatad ti maysa nga adipen.—Juan 12:2-6; Mat. 26:6-16; Luc. 22:3-6.

14. Kasano nga inyaplikar ti maysa nga agassawa ti nasursuroda iti Lucas 16:13?

¹⁴ Impalagip ni Jesus kadagiti pasurotna daytoy a napateg a kinapudno: “Diyo mapaggiddan ti agserbi iti Dios ken iti Kinabaknang.” (Basaen ti Lucas 16:13.) Pudno pay laeng dayta agingga ita. Usigentayo no kasano nga inyaplikar dayta ti maysa nga agassawa idiay Romania. Adda offer kadakuada a temporario a trabaho iti nabakbaknang a pagilian. “Adda dakkel nga utangmi iti banko a masapul a bayadanmi, isu nga idi damo, impagarupmi a bendision ni Jehova daytoy a trabaho,” inaminda. Nupay kasta, adda problema. Ti trabaho ket makalapped iti panagserbida ken Jehova. Binasada ti artikulo nga “Agtalinaedkayo a Nasungdo Buyogen ti Nagkaykaysa a Puso” iti Pagwanawanan nga Agosto 15, 2008. Kalpasanna, nagdesisionda. Insalaysayda: “No ti panagbirok iti ad-adu a kuarta ti motibomi nga agtrabaho iti sabali a pagilian, saanmi no kuan nga ipangpangruna ti relasionmi ken Jehova. Kombinsidokami nga agsagaba ti espiritualidadmi.” Isu a dida inawat ti offer. Ania ti napasamak? Nakasarak ti asawa a lalaki iti trabaho  iti mismo a pagilianda a makaanay a mangsuporta kadagiti kasapulanda. Kinuna ti asawa a babai: “Saan a pulos nga ababa ti ima ni Jehova.” Naragsak daytoy nga agassawa ta pinagbalinda ni Jehova kas Apoda imbes a ti kuarta.

15. Apay a masiguradotayo a posible a makalapsuttayo kadagiti silo ni Satanas?

¹⁵ Kasanon no nasiluannatayon ti kinapannakkel wenno kinaagum? Kabaelantayo ti lumapsut! Imbaga ni Pablo a dagidiay “natiliw [ti Diablo] a sibibiag” kabaelanda pay ti lumapsut iti silona. (2 Tim. 2:26) Kasta ti napasamak ken David. Dimngeg iti pannubngar ni Natan, pinagbabawyanna ti kinaagumna, ken inkagumaanna nga isubli ti pannakigayyemna ken Jehova. Ditay liplipatan a nabilbileg ni Jehova ngem ni Satanas. Isu a no awatentayo ti tulong ni Jehova, makalapsuttayo iti aniaman a silo wenno palab-og ti Diablo.

16. Ania ti makatulong kadatayo a mangliklik kadagiti silo ni Satanas?

¹⁶ Siempre, nasaysayaat a liklikantayo dagiti silo wenno palab-og ni Satanas ngem iti ilalapsuttayo kadagita. Maaramidtayo laeng dayta iti tulong ti Dios. Ngem masapul a saantayo nga agbalin a kampante! Uray dagidiay nabayagen nga agserserbi ken Jehova ket nagbalin a napannakkel wenno naagum. Isu nga inaldaw nga ipakaasim ken Jehova a tulongannaka a mangilasin no maim-impluensiaanen ti isip ken tigtignaymo kadagita a naalas a kababalin. (Sal. 139:23, 24) Dimo ipalubos nga agbalinka a napannakkel wenno naagum!

17. Ania ti dandanin mapasamak iti kabusortayo, ti Diablo?

¹⁷ Rinibu a tawenen a mangan-anup ni Satanas. Ngem dandanin makawaran ket inton agangay, madadaelen. (Apoc. 20:1-3, 10) Padpadaanantayo dayta nga aldaw. Ngem bayat nga agur-uraytayo, agtalinaedtayo nga alerto kadagiti silo ni Satanas. Ikagumaam a liklikan ti kinapannakkel wenno kinaagum. Determinadoka koma a ‘mangbusor iti Diablo, ket panawannakanto.’—Sant. 4:7.