1. Satan hpe jau gawng langai hte hpa majaw shingdaw lu ai kun?

JAU gawng langai a yaw shada lam gaw, dusat ni hpe rim na matu (sh) sat na matu re. Shi gaw mahkam amyu myu hpe akyu jashawn ai. Chyum Laika hta tsun da ai hte maren sha re. (Yob 18:8-10) Jau gawng wa gaw shi a mahkam de dusat du wa na matu, gara hku hkalem ai kun? Dai dusat hpe shi yu nga ai. Gara de sa ai, hpa ni ra sharawng ai hpe chye na matu shi hkan yu ai. Gara hku galaw yang, kaja na hpe myit ai. Satan gaw dai jau gawng wa hte bung ai. Anhte hpe yu nga ai. Anhte gara de sa ai, hpa ni myit lawm ai hpe chye hkra galaw ai. Dai hpang anhte n myit mada da ai mahkam ni hte rim la lu hkra galaw ai. Anhte rim hkrum tim pyi, lawt lu na ngu Chyum Laika hta tsun da ai. N rim hkrum hkra gara hku koi lu na lam hpe mung tsun dan da ai.

2. Tang du dik htum Satan a mahkam lahkawng gaw hpa rai kun?

² Grai tang du nga ai Satan a mahkam lahkawng gaw gumrawng ai hte lawhpa ai myit re. * Ndai n htap htuk ai myit jasat hpe akyu jashawn nna, Satan awng dang wa ai gaw shaning hkying hku na sai. U hkam ai wa gaw shi a mahkam kata hta, shahpa bang nna hkam ai zawn, Satan mung dai hte maren galaw ai. (Shk 91:3) Raitim, Satan anhte hpe rim lu na n re. Hpa majaw kun? Satan akyu jashawn ai mahkam ni hpe Yehowa tsun dan da ai majaw re.​—2 Ko 2:11.

3. Chyum Laika hta kaja wa byin ai lam ni hpe Yehowa hpa majaw shalawm da ya ai kun?

³ Gumrawng ai hte lawhpa ai hte seng nna, Yehowa anhte hpe sadi jaw ai lam langai gaw, prat labau ni kaw na sharin la na matu n-gun jaw ai hku nna re. Yehowa a kung hpan ai mayam ni hpe pyi Satan hkalem wa ai lam ni hpe bawngban mat wa na  re. Anhte mung Satan hkalem ai hta hkrat sum mat na ngu tsun mayu ai kun? N re. Anhte hpe “shadum shahprang” na matu dai lam ni hpe Chyum Laika hta Yehowa shalaw da ya ai re. (1 Ko 10:11) Dai lam ni kaw na anhte sharin la nna, Satan a mahkam ni hpe koi lu na (sh) lawt lu na hpe chye ai majaw re.

4. Gumrawng ai gaw hpa byin shangun ai kun?

⁴ Satan gaw anhte hpe gumrawng wa shangun mayu ai. Anhte gumrawng ai nga yang shi hte bung wa nna, htani htana asak sum mat na hpe shi chye ai. (Gsh 16:18) Dai majaw, marai langai gaw “gumrawng ai myit rawng nna nat a jeyang ai hku hta” hkrat wa chye ai ngu kasa Pawlu sadi jaw da ai. (1 Tm 3:6, 7) Tengman lam hta anhte ya she du ai raitim, Yehowa a magam hpe shaning law law gun wa sai raitim, dai zawn byin chye ai.

5. Hpaji Ningli 7:16, 20 hta tsun da ai hku nga yang, marai langai gaw gumrawng ai hpe gara hku madun wa chye ai kun?

⁵ Gumrawng ai ni hta tingkyeng myit rawng ai. Yehowa hta na tinang hkum tinang grau myit machyu jung ai hku nna, tingkyeng myit nga wa hkra Satan galaw ai. Grau nna gaw mayak mahkak ni nga ai aten hta re. Ga shadawn, nang mara shagun hkrum ai kun? N tara ai hku kanawn mazum hkrum ai kun? Yehowa (sh) hpunau nauna ni hpe masin pawt wa ai hpe Satan mu mayu ai. Chyum Laika hta mu lu ai Yehowa a lam matsun hpe hkan sa ai hta na, tinang a ladat hte hparan kau ai gaw kaja htum re ngu Satan myit shangun mayu ai.​—Hpaji Ningli 7:16, 20 hpe hti u.

6. Ne-talan kaw na nauna a mahkrum madup kaw na hpa sharin la lu ai kun?

⁶ Kaga ni a n hkum tsup ai lam a majaw, myit hkra machyi mat ai Ne-talan kaw na nauna langai a mahkrum madup hpe yu ga. Ndai hku sha hkam sharang taw nga na sai n re ngu shi dawdan kau ai. Shi ndai hku tsun ai: “Ngai grai garen ai. Nye a hkamsha lam hpe n galai shai lu ai. Kaga nawku hpung de htawt na matu, nye a madu wa hpe ngai tsun ai.” Dai shaloi, March 2016 JW TV lamang hpe shi yu wa ai. Kaga ni a n hkum tsup ai hte seng nna, galaw mai ai hpaji jaw ga nkau hpe dai lamang hta tsun dan da ai. Nauna ndai hku bai tsun dan  ai: “Nawku hpung hta nga ai hpunau nauna ni hpe galai shai na matu shakut na malai, tinang a shut ai lam hpe shagrit shanem let yin la ra ai hpe ngai chye wa ai. Yehowa hte shi a awmdawm ahkaw ahkang hpe myit maju jung na matu dai lamang gaw ngai hpe karum ya ai.” Hpa sharin la lu ai kun? Manghkang ni hkrum ai shaloi, Yehowa hpe matut myit maju jung u. Kaga ni hpe Yehowa mu mada ai zawn, mu chye hkra akyu hpyi u. Sumsing Kawa gaw shanhte a shut ai lam hpe mu ai. Raitim, sharawng awng let mara raw ya ai. Nang hpe mung dai hte maren galaw shangun mayu ai.​—1 Yh 4:20.

7. Hkawhkam Uzia hpa byin wa ai kun?

⁷ Yuda Hkawhkam Uzia gaw gumrawng ai majaw, hpaji jaw ga hpe nyet kau nna grai rai dum ai hku galaw wa ai. Uzia gaw grai ram ai wa re. Hpyen majan ni hpe shi awng dang wa ai. Mare ni hpe gaw gap nna hkai lu hkai sha ai lam hta rawt jat hkra galaw wa ai. “Karai Kasang gaw shi hpe awng shangun wu ai.” (2 Hl 26:3-7, 10) Raitim, “shi gaw hpung dagu lu la jang, shi a akyu hten hkra myit kaba wa” ai ngu nna, Chyum Laika hta tsun da ai. Nawku htingnu hta manam pyaw ai baw nat nawng na ahkang hkinjawng ni hta sha nga ai ngu Yehowa hkang da ai. Raitim, Hkawhkam Uzia gaw rai dum wa nna, manam pyaw ai baw hpe nat nawng na matu galaw wa ai. Yehowa n ra ai majaw, dai gumrawng ai wa hpe manggang ana hte ari jaw wa ai. Uzia gaw prat tup manggang ana kap mat ai.​—2 Hl 26:16-21.

8. 1 Korinhtu 4:6, 7 hpe hkan sa ai gaw gumrawng ai hpe koi lu hkra, gara hku karum ya ai kun?

⁸ Uzia zawn anhte mung gumrawng ai mahkam hta hkrat mat chye ai kun? Hosa a mabyin hpe myit yu ga. Shi gaw nawku hpung hta myitsu salang langai rai nna, hpaga bungli hta mung grai awng dang ai. Ninghtawn zuphpawng ni, ginwang zuphpawng ni hta shi mungga htawn ai. Dai shaloi, hpung kawan hpunau gaw shi hpe hpaji jaw ai. Shi ndai hku tsun ai: “Ngai gaw nye a atsam hte mahkrum madup hpe sha kam wa ai. Yehowa hpe n myit shalawm wa ai. Ngai gaw wenyi lam hta kaja ai ngu hkam la da ai majaw, Yehowa a sadi jaw lam hte hpaji jaw ga hpe n madat wa ai.” Hosa gaw mara kaba galaw hkrup nna, shapraw kau hkrum ai. Shaning loi na ai hpang, mi na lit ni hpe shi bai lu wa ai. Ya shi ndai hku tsun ai: “Ahkang aya gaw ahkyak ai n re ai sha, lam matsun hpe hkan ai gaw, ahkyak htum re ai hpe ngai chye hkra Yehowa sharin ya ai.” Dai majaw, nawku hpung hta anhte lu da ai ahkaw ahkang ni hte galaw lu ai lam ni gaw, Yehowa jaw da ai re ai  hpe galoi mung dum nga ga. (1 Korinhtu 4:6, 7 hpe hti u.) Anhte gumrawng ai nga yang, Yehowa anhte hpe akyu jashawn sana n re.

9. Lawhpa ai myit a majaw Satan hte Ewa gara hku byin wa ai kun?

⁹ Lawhpa ai lam hpe myit dat yang, Satan Nat hpe anhte myit hkrup na re. Yehowa a lamu kasa langai hku nna, Satan gaw kaja ai ahkaw ahkang law law hpe lu da ai. Raitim shi grau nna lu mayu ai. Yehowa sha lu ging ai nawku dawjau ai lam hpe shi ra wa ai. Anhte hpe mung shi zawn byin shangun mayu ai. Dai majaw anhte hta nga ai hte sha myit n dik nga na matu, shi shakut nna galaw ai. Ewa hpe ga sa shaga nna dai lam hpe galaw hpang wa ai. Ewa hte shi madu wa a matu, malu masha ni hpe manu mana law hkra, Yehowa gaw tsawra myit hte lajang da ya ai. Sun hta tu ai hpun yawng hta na namsi hpe sha na ahkang jaw ai. Hpung langai na asi hpe sha n sha shangun ai. (Nin 2:16) Raitim, Satan gaw hkum pat da ai dai hpun hta na namsi hpe sha ra ai ngu Ewa myit wa hkra hkalem ai. Ewa gaw, nga ai hte sha myit n dik ai. Grau nna ra marin wa ai. Hpa byin wa ai kun? Mara galaw nna hpang jahtum si mat ai.​—Nin 3:6, 19.

10. Lawhpa ai myit gaw Hkawhkam Dawi a matu, mahkam gara hku byin wa ai kun?

¹⁰ Hkawhkam Dawi mung lawhpa wa ai majaw, Yehowa jaw da ai lam ni hpe malap kau ai. Dai hta sut su ai, arawng aya hte hpyen ni hpe awng dang ai lam lawm ai. Karai Kasang gaw n dang hti hkra law ai shaman chyeju ni hpe jaw da ai majaw, Dawi chyeju dum wa ai. (Shk 40:5) Raitim, kalang mi hta gaw, Yehowa jaw da ai lam ni hpe malap kau ai. Myit dik ai lam n nga ai sha, grau nna ra wa ai. Dawi hta madu jan law law nga ai raitim, kaga ni a madu jan hpe ra marin ai myit nga na ahkang jaw wa ai. Dai num gaw, Batsheba rai nna, shi a madu wa gaw Hiti masha Uria re. Dawi gaw tinggyeng akyu tam let , Batsheba hte shut hpyit wa ai. Batsheba hta ma hkum kap mat ai. Shut hpyit ai sha n-ga, Uria hpe sat na matu lajang wa ai. (2 Sa 11:2-15) Dawi hpa hpe myit nga ai kun? Yehowa n mu na re ngu myit nga ai kun? Yehowa a sadi dung ai mayam raitim, tinggyeng akyu a majaw lawhpa wa nna grai hkra machyi wa ai. Raitim, Dawi gaw shi a mara ni hpe yin la nna myit malai la wa ai. Yehowa a myiman bai lu ai majaw, shi grai kabu na re.​—2 Sa 12:7-13.

11. Ehpesu 5: 3, 4 hku nga yang, lawhpa ai myit hpe awng dang na matu, hpa gaw karum ya ai kun?

¹¹ Dawi a mabyin kaw na anhte hpa sharin la  lu ai kun? Yehowa jaw da ai lam yawng a matu, matut nna chyeju dum ai lam madun na nga yang, lawhpa myit hpe awng dang lu ai lam anhte sharin la lu ai. (Ehpesu 5:3, 4 hpe hti u.) Nga ai hte sha myit dik ra ai. Chyum ga sharin nnan ni gaw, Yehowa lajang da ya ai lama ma hpe myit nna chyeju dum na matu n-gun jaw hkrum ai. Marai langai gaw shani shagu dai hku galaw ai nga yang, bat mi hta n bung ai lam sanit a matu, akyu hpyi ai ngu ai lachyum re. (1 Ht 5:18) Dai zawn nang galaw ai kun? Yehowa galaw ya ai lam yawng hpe myit sawn sumru na nga yang, chyeju dum lu na matu karum ya na re. Chyeju dum ai nga yang myit dik wa na re. Myit dik ai nga yang lawhpa ai myit ni mung nga sana n re.

12. Lawhpa ai myit gaw hpa galaw na matu, Yuda Iskarut hpe shadut wa ai kun?

¹² Yuda Iskarut gaw lawhpa wa ai majaw sadi n dung wa ai. Shawng nnan hta gaw dai hku n re. (Luk 6:13, 16) Kasa langai hku nna, shi hpe Yesu lata la ai. Yuda gaw atsam nga nna kam mai ai wa re majaw, gumhpraw sumbu hpe ap da hkrum ai. Yesu hte shi a kasa ni gaw, dai gumhpraw hpe hkaw tsun bungli galaw ai shaloi, ra ai lam ni a matu akyu jashawn ai. Dai ni aten na mungkan grup bungli a matu, madi shadaw ya ai alu gumhpraw hte bung ai. Raitim, Yuda gaw lawhpa myit hte seng nna Yesu chyahkring hkring sadi jaw nga ai hpe, na ninglen lagu pang wa ai. (Mrk 7:22, 23; Luk 11:39; 12:15) Dai sadi jaw ga ni hpe Yuda n chye masu su di wa ai.

13. Yuda a lawhpa ai myit gaw gara aten hta dandawng wa ai kun?

¹³ Yuda a lawhpa ai myit gaw, Yesu si na aten ni wa ai shaloi byin ai mabyin ni hta, grau nna dandawng wa ai. Mari, shi a kana Marhta hte hpawn, Yesu hte shi a sape ni gaw manggang kap ai Simun a nta hta du nga ai. Lusha sha nga ai shaloi, Mari gaw rawt sap nna, Yesu a baw ntsa hta nachying hpu ai mura sau hpe ru jaw ya ai. Yuda hte kaga sape ni gaw grai myit n pyaw mat ai. Dai gumhpraw hpe hkaw tsun magam hta lang yang, grau akyu nga na re ngu kaga sape ni hkamsha na re. Raitim, Yuda gaw dai hku n myit ai. Shi gaw “lagut” langai rai nna gumhpraw sumbu kaw na gumhpraw ni hpe lagu mayu ai. Hpang hta, gumhpraw a matu Yesu hpe sadi run mat hkra, lawhpa ai myit gaw Yuda hpe shadut wa ai.​—Yhn 12:2-6; Mat 26:6-16; Luk 22:3-6.

14. Luka 16:13 hta lawm ai sadi jaw ga hpe yan la langai gara hku hkan sa wa ai kun?

¹⁴ Yesu gaw shi a hpang hkan ai ni hpe ndai tengman lam hte seng nna sadi jaw wa ai: “Nanhte gaw Karai Kasang a magam hta mung, mungkan a sut gan hta mung, rau n gun n hpai lu na myit dai.” (Luka 16:13 hpe hti u.) Dai gaw ya du hkra naw jaw taw ai. Romeniya hta nga ai yan la langai gaw, Yesu tsun ai ga hpe gara hku hkan sa wa ai lam bawngban yu ga. Shan la gaw grau nna sut su ai mungdan hta, chyahkring mi bungli galaw na matu saw shaga hkrum ai. Shan ndai hku tsun ai: “Gumhpraw dum kaw na gumhpraw grai law hkra an lahkawng hkoi da ai. Dai majaw, ndai bungli gaw Yehowa shaman chyeju jaw ai re ngu shawng nnan hta myit wa ai.” Raitim, mayak mahkak langai nga wa ai. Dai bungli hpe hkap la na nga yang, nawku dawjau lam hta hkra machyi wa na re. August 15, 2008, Sin Langchyi-BU hta lawm ai “Myit Masin Mahkra Hte Sadi Dung Lu Hkra Shakut U” ngu ai sumhpa hpe hti ngut ai hpang, shan dawdan lam jahkrat wa ai. Shan ndai hku tsun ai: “Gumhpraw grau lu na matu kaga mungdan de bungli sa galaw na nga yang, Yehowa hte anhte a hku hkau lam gaw nambat lahkawng shara hta rai mat na re. Wenyi lam hta hkra machyi mat na gaw teng sha re.” Dai majaw, saw shaga lam hpe nyet kau ai. Hpa byin wa ai kun? Madu wa gaw hkoi da ai gumhpraw hpe bai jaw lu na bungli hpe, shanhte a mungdan hta  sha tam lu wa ai. Madu jan ndai hku tsun ai: “Yehowa gaw ayan na karum ya ai.” Ndai yan la gaw gumhpraw hta na Yehowa hpe Madu shatai wa ai majaw ngwi pyaw wa ai.

15. Satan a mahkam ni kaw na lawt lu ai ngu hpa majaw anhte lu tsun ai kun?

¹⁵ Anhte hta gumrawng ai myit (sh) lawhpa ai myit nga taw nga ai hpe chye yang gara hku galaw na? Galai shai lu ai! Satan a “rim la hkrum ai ni” mung mahkam kaw na lawt lu ai ngu Pawlu tsun wa ai. (2 Tm 2:26) Dawi gaw Nahtan a sharin shaga ai lam hpe hkap la ngut ai hpang, lawhpa ai myit hpe myit malai la nna, Yehowa hte shi a hku hkau lam kaja hkra bai galaw wa ai. Yehowa gaw Satan hta grau nna, atsam kaba ai hpe ayan na dum u. Yehowa a karum ya ai lam hpe anhte hkap la na nga yang, Satan lajang da ai mahkam yawng kaw na lawt lu na re.

16. Satan a mahkam ni hpe koi lu hkra hpa gaw anhte hpe karum ya na kun?

¹⁶ Satan a mahkam kaw na lawt na matu, shakut na malai mahkam de n du na matu, galaw ging ai. Karai Kasang a karum madi shadaw lam hte sha, dai hku galaw lu ai. Tinang hkum tinang ladu lai kam ai hpe koi ra ai. Yehowa hpe nawku wa ai shaning grai na sai raitim pyi, gumrawng ai myit (sh) lawhpa ai myit nga wa chye ai. Dai majaw, tinang a myit mang lam, lailen ni hta n htap htuk ai dai zawn myit jasat nga ai kun? ngu ai hpe chye na matu, shani shagu Yehowa kaw akyu hpyi u. (Shk 139:23, 24) Dai zawn, myit jasat ni nga wa na ahkang hkum jaw.

17. Anhte a hpyen nat Satan gaw kade n na yang hpa byin mat na kun?

¹⁷ Satan gaw jau gawng langai hku nna galaw wa ai shaning hkying hku na sai. Raitim, kade nna yang shi rim hkrum nna jahten kau hkrum na re. (Shr 20:1-3, 10) Dai aten hpe anhte la nga ga ai. Dai aten n du shi yang, Satan a mahkam ni hte seng nna sadi maja nga ga. Gumrawng ai myit (sh) lawhpa ai myit n nga mat hkra, matut shakut mat ga. “Nat gumlau hpe ban hkum” na matu dawdan da ga. Rai yang, shi anhte kaw na hprawng mat na re.​—Yak 4:7.