1. Pamodi ki nu pode fla ma Satanás é sima un kasador?

UN KASADOR ten sô un obijetivu, ki é kasa ô mata un animal. Sima un di kes amigu falsu di Jó fla, el ta uza txeu tipu di armadilha pa el faze kel-li. (Jó 18:8-10) Modi ki un kasador ta ngoda un animal pa kai na se armadilha? El ta studa kel animal. Pur izénplu, pa undi ki el ta bai? Di kuzê ki el gosta? Kal ki é midjór armadilha pa pega-l? Satanás é sima kel kasador li. El ta studa-nu. El ta djobe pa undi ki nu ta bai i di kuzê ki nu gosta. Nton, el ta faze un armadilha pa el pode pega-nu na óra ki nu ka sta ta spéra. Má simé, Bíblia ta fla ma si nu kai na un di kes armadilha, nu pode skapa. Tanbê el ta inxina-nu kuzê ki nu pode faze pa nu ka kai na ninhun di kes armadilha li.

2. Kal ki é kes dôs armadilha di Satanás ki más ta da bons rezultadu?

² Ten dôs armadilha di Satanás ki ta da bons rezultadu, ki é orgulhu ku ganánsia. * Dja ten milharis di anu ki Satanás sta ta uza kes dôs kuza li. El é sima un kasador di pasu ki ta ngoda kel animal pa déntu di se armadilha ô pa déntu di un redi. (Sal. 91:3) Nu ka meste dexa Satanás pega-nu. Pamodi? Pamodi Jeová dja fla-nu kal ki é kes armadilha ki el ta uza. — 2 Cor. 2:11.

3. Pamodi ki Jeová poi izénplu di alguns algen na Bíblia?

³ Jeová ta inxina-nu kuzê ki nu pode faze pa nu ka kai na armadilha di orgulhu i ganánsia. Un di kes manera ki el ta faze kel-li, é através di izénplu di pesoas ki sta na Bíblia. Na kel studu li, nu sta ben odja alguns di es. Nu ta ben odja ma ti mésmu alguns algen ki dja tinha txeu ténpu ta sirbi  Jeová, kai na armadilha di Satanás. Má kel-li krê fla ma nu ka ta pode faze nada pa nu ivita orgulhu i ganánsia? Klaru ki nau! Jeová poi kes izénplu na Bíblia, pa sirbi di ‘avizu pa nos’. (1 Cor. 10:11) El sabe ma kes izénplu li ta djuda-nu skapa ô ka kai na kes armadilha di Satanás.

4. Kuzê ki pode kontise si nu bira orgulhozu?

⁴ Satanás krê pa nu dizenvolve kel orgulhu izajeradu. El sabe ma si nu dexa orgulhu toma kónta di nos, nu ta bira sima el i nu ta perde xansi di ganha vida pa tudu ténpu. (Pro. 16:18) É pur isu ki apóstlu Polu aviza ma un algen pode ‘intxi di orgulhu i kai na kel mésmu julgamentu ki dadu pa Diabu.’ (1 Tim. 3:6, 7) Kel-li pode kontise ku kalker un di nos, ka ta nporta si nos é novu na verdadi ô si dja nu dura ta sirbi Jeová.

5. Sima sta na Eclesiastes 7:16, 20, modi ki un algen pode mostra orgulhu?

⁵ Un algen orgulhozu ta pensa sô na se kabésa. Satanás ta tenta pô-nu ta ser kel tipu di algen li. El krê pa nu konsentra na nos kabésa más di ki na Jeová, prinsipalmenti óras ki nu sta pasa pa algun prubléma. Pur izénplu, dja bu kustuma podu kulpa di un kuza ki bu ka faze? Ô dja bu kustuma tratadu mariadu? Satanás ta fikaba kontenti di odja-u ta fika xatiadu ku Jeová i ku bus irmon. Diabu krê pa bu pensa ma úniku soluson é faze kuzas di bu manera, envês di sigi kes orientason di Jeová ki sta na se Palavra. — Lé Eclesiastes 7:16, 20.

6. Kuzê ki bu prende ku izénplu di un irman na Olanda?

⁶ Odja kuzê ki kontise ku un irman na Olanda. El fika iritadu ku inperfeson di irmons na kongregason. Nton, el disidi ma el ka ta toleraba más kel situason. El fla: “N sta xintiba mi sô i N ka sta konsigiba mudaba nha atitudi. I ti N fla nha maridu ma nu devia mudaba di kongregason.” Dipôs, el sisti prugrama JW Broadcasting^®  di marsu di 2016. Kel prugrama daba alguns sujiston sobri modi ki nu ta lida ku inperfesons di otus algen. Kel irman fla: “N da kónta ma N tinha ki sérba umildi i pensa na nhas fadja, envês di tenta muda irmons di kongregason. Kel prugrama djuda-m konsentra na Jeová i na se direitu di governa.” Kuzê ki nu ta prende? Óras ki nu ta pasa pa un prubléma, nu debe konsentra na Jeová. Nu debe pidi-l pa el djuda-nu odja otus sima el ta odja-s. La di Séu, Jeová ta konsigi odja fadjas di tudu nos. Má simé, el sta prontu pa purdua-nu. I el krê pa nu faze mésmu kuza. — 1 João 4:20.

7. Kuzê ki kontise ku rei Uzias?

⁷ Pamodi orgulhu, rei Uzias di Judá, nega obi konsedju di otus algen i el faze un kuza ki el ka tinha direitu di faze. Uzias éra un ómi ki tinha txeu kapasidadi. El ganha txeu géra, el faze txeu sidadi i el tinha txeu lugar di fazeba plantason. ‘Kel Deus verdaderu ta djudaba el ta ten bons rezultadu.’ (2 Cró. 26:3-7, 10) Má Bíblia ta fla: ‘Lógu ki el bira fórti orgulhu entra na se korason, pa se própi distruison’. Jeová dja dexaba klaru na Lei ma éra sô saserdótis ki tinha direitu di ofereseba insénsu na ténplu. Má Uzias, faze un kuza ki el ka tinha direitu. El entra déntu di ténplu i el oferese insénsu. Jeová fika xatiadu ku kel ómi orgulhozu li i el kastiga-l ku lépra. I Uzias kontinua leprozu ti fin di se vida. — 2 Cró. 26:16-21.

8. Sima sta na 1 Coríntios 4:6, 7, kuzê ki pode djuda-nu ka bira orgulhozu?

⁸ Nu pode kai na armadilha di orgulhu sima kontise ku Uzias? Odja izénplu di José. El éra un ómi di nogósiu ki staba ta ten bons rezultadu na se trabadju i tanbê el éra un ansion ki tudu algen ta ruspetaba. El ta fazeba diskursu na asenbleias i kongrésus, i ti mésmu enkaregadu di grupu di kongregason ta ba pidiba el konsedju. Má José fla: “N ta kunfiaba dimás na nha kapasidadi i na nha spiriénsa. N dexa di kunfia na Jeová. N ta atxaba ma mi éra fórti i N ka ta obiba ku kes avizu i konsedjus di Jeová.” José faze un pekadu gravi i el dizasosiadu. Dja ten alguns anu ki el readimitidu. Gósi José ta  fla: “Jeová inxina-m ma más inportanti é ka ten un puzison. Má, é faze kel ki el ta pidi-nu.” Nunka nu ka debe skese ma tudu nos kapasidadi i priviléjius ki nu ta ten é prezentis di Jeová. (Lé 1 Coríntios 4:6, 7.) Si nu bira orgulhozu, Jeová nunka ka ta uza-nu.

9. Kuzê ki ganánsia poi Satanás ku Eva ta faze?

⁹ Óras ki nu ta pensa na ganánsia, talvês nu ta lenbra lógu na Satanás. Dja ki el éra un anju di Jeová, talvês el tinha txeu responsabilidadi inportanti. Má el krê tinha más kuza. El krê resebeba kel adorason ki sô Jeová ta merese. Satanás krê pa nu bira sima el. Nton, el ta tenta konvense-nu pa nu djobe más di ki kel ki nu ten. Primeru bês ki el uza kel armadilha li, é kantu ki el pâpia ku Eva. Jeová daba Eva ku se maridu txeu kumida sábi ki es podia kumeba avontádi. Es podia kumeba ‘di tudu arvi di kel jardin’, ménus di un. (Gén. 2:16) Má simé, Satanás konsigi konvense Eva ma el meste kumeba kel úniku fruta ki el ka devia kumeba. Eva ka da valor pa kel ki dja el tinha. El kreba más. I nu sabe kuzê ki kontise. Eva peka i dipôs el móre. — Gén. 3:6, 19.

10. Modi ki ganánsia bira un armadilha pa rei Davidi?

¹⁰ Pamodi ganánsia, rei Davidi skese di tudu kel ki Jeová dja daba el, sima rikéza, fama i vitória na txeu géra. Davidi éra gratu pa tudu kes prezenti ki Jeová dja daba el i ti el rekonhese ma es éra ‘txeu dimás pa konta!’ (Sal. 40:5) Má dipôs, el bira ganansiozu i el krê tinha más di ki kel ki Jeová dja daba el. Nbóra Davidi tinha txeu mudjer, el dexa dizenvolve na se korason un dizeju mariadu ki pô-l ta krê ten mudjer di un otu ómi. Kel mudjer éra Batiseba i se maridu éra Urias, kel Itita. Davidi pensa sô na se dizeju, el faze relason seksual ku Batiseba i el fika grávida. Kuzê ki Davidi faze, dja éra gravi, má dipôs el faze un kuza mutu más piór inda. El faze planu pa Urias matadu. (2 Sam. 11:2-15) Má kuzê ki Davidi tinha na kabésa? El pensa ma Jeová ka staba ta odja-l? Davidi éra un sérvu fiel di Jeová. Má el bira ganansiozu, ta pensa sô na se  kabésa i el paga karu pa kel-la. Filismenti Davidi konfesa se pekadu i el rapende. Di sertéza, el fika txeu kontenti pamodi Jeová purdua-l! — 2 Sam. 12:7-13.

11. Sima sta na Efésios 5:3, 4, kuzê ki pode djuda-nu ka bira ganansiozu?

¹¹ Kuzê ki nu ta prende ku izénplu di Davidi? Nu ta prende ma pa nu ka bira ganansiozu, nu meste kontinua ta mostra gratidon pa tudu kel ki Jeová dja da-nu. (Lé Efésios 5:3, 4.) Nu debe sta kontenti ku kes kuza ki nu ten. Nu ta kustuma insentiva kes novu studanti di Bíblia pa es pensa tudu dia na un benson ki Jeová dja da-s i pa es agradese-l. Si un studanti faze kel-li duránti un simana, el ta konsigi pâpia ku Jeová na orason sobri 7 kuza diferenti. (1 Tes. 5:18) Pamodi ki bu ka ta faze mésmu kuza tanbê? Pensa na tudu kel ki Jeová ta faze pa bo. Kel-li ta djuda-u ser sénpri gratu. Si bo é gratu, bu ta fika kontenti ku kel ki bu ten. I si bu sta kontenti ku kel ki bu ten, bu ka ta bira ganansiozu.

12. Kuzê ki ganánsia poi Judas Iskariótis ta faze?

¹² Ganánsia poi Judas Iskariótis ta faze un kuza gravi i ta trai Jizus. Má na komésu, el ka éra si. (Luc. 6:13, 16) Jizus skodje-l pa ser un di se apóstlus. Ta parse ma Judas éra un algen di kunfiansa i ki tinha kapasidadi. Pur isu, éra el ki tinha responsabilidadi pa kuida di kaxa di dinheru. Jizus ku se apóstlus ta uzaba kel dinheru li pa djudaba es na ses trabadju di pregason. Nu pode fla ma dinheru ki ta staba na kel kaxa éra sima kes kontribuison ki ta fazedu oji pa óbra na mundu interu. Nbóra Jizus dja avizaba txeu bês sobri prigu di ganánsia, txiga un ténpu ki Judas kumesa ta furta kes dinheru. (Mar. 7:22, 23; Luc. 11:39; 12:15) Judas ka liga kes avizu di Jizus.

13. Na ki ténpu ki Judas mostra ma dja el biraba ganansiozu?

¹³ Judas mostra ma dja el biraba ganansiozu un poku antis di Jizus móre. Simon, kel leprozu, konvida Jizus ku se disiplus i tanbê Maria ku se irman, Marta, pa ba kume na se kaza. Timenti es staba ta kume, Maria labanta i el baza riba kabésa di Jizus un óliu ki ta txeraba sábi i ki éra karu. Judas i kes otu disiplu fika txeu xatiadu. Talvês kes otu disiplu ta atxaba ma éra midjór uzaba kel dinheru na ses trabadju di pregason. Má Judas tinha un otu intenson. El ‘éra ladron’ i el krê furtaba dinheru na kel kaxa. Dipôs, pamodi ganánsia, Judas trai Jizus pa présu di un skravu. — João 12:2-6; Mat. 26:6-16; Luc. 22:3-6.

14. Modi ki un kazal aplika kel lison ki sta na Lucas 16:13?

¹⁴ Jizus lenbra se sigidoris di un verdadi txeu inportanti. El fla: ‘Nhos ka pode ser skravu di Deus i di Rikézas.’ (Lé Lucas 16:13.) Kel verdadi li ka ta muda. Odja modi ki un kazal na Ruménia aplika kel konsedju di Jizus. Es konvidadu pa ba trabadja pa un ténpu na un país más riku ki di ses. Es fla: “Nu pista txeu dinheru na banku i nu tinha ki pagaba el. Nton, na komésu, ta parse ma kel trabadju éra un benson di Jeová.” Má, tinha un prubléma. Si es setaba kel trabadju, es ta tinha poku ténpu pa sirbi Jeová. Nton, kel kazal lé kel artigu, “Mostra lialdadi pa Jeová di tudu bu korason” na Sentinéla di 15 di agostu di 2008. Kel-li djuda-s toma un bon disizon. Es fla: “Si nos obijetivu di ba trabadjaba na otu país, éra pa ganhaba más dinheru, kel-li  ta mostra ma nu sta poba nos amizadi ku Jeová na sugundu lugar. Nu tinha sertéza ma kel-li ta prujudikaba nos amizadi ku Jeová.” Nton, es ka seta kel trabadju. Kuzê ki kontise? Kel maridu atxa un trabadju na ses país ki ta pagaba kel ki es staba ta meste. Se mudjer fla: “Mô di Jeová, é ka kurtu.” Kel kazal sta kontenti pamodi es skodje Jeová pa ser ses sinhor, envês di dinheru.

15. Pamodi ki nu pode ten sertéza ma nu pode skapa di armadilhas di Satanás?

¹⁵ I si nu diskubri ma dja nu kai na armadilha di orgulhu i di ganánsia? Inda nu pode skapa! Polu fla ma kes ki Diabu ‘dja panha’, inda pode skapa di se armadilha. (2 Tim. 2:26) É kel-li ki kontise ku Davidi. El obi ku kel konsedju duru ki Natan da-l, el rapende di se ganánsia i el rekupera se amizadi ku Jeová. Nunka ka bu skese ma Jeová é más fórti di ki Satanás. Nton, si nu seta ajuda di Jeová, nu pode skapa di kalker armadilha ki Satanás ta poi na nos kaminhu.

16. Kuzê ki ta djuda-nu ka kai na armadilhas di Satanás?

¹⁶ É mutu más midjór ka kai na kes armadilha di Satanás di ki skapa di es. Nu ta konsigi kel-li sô ku ajuda di Jeová. Má nu ka debe pensa ma nos é fórti i ma nunka nu ka ta bira orgulhozu ô ganansiozu. Ti mésmu kes algen ki dja tinha txeu ténpu ta sirbi Jeová, kai na kes armadilha li. Nton, pidi Jeová tudu dia pa djuda-u odja si kes kuza mariadu li sta afeta bu manera di pensa i di aji. (Sal. 139:23, 24) Faze bu midjór pa bu ka bira orgulhozu ô ganansiozu.

17. Kuzê ki ta ben kontise ku Satanás?

¹⁷ Dja ten milharis di anu, ki Satanás sta ta aji sima un kasador. Má ka ta dura, é el ki ta ben kasadu i dipôs el ta distruídu. (Apo. 20:1-3, 10) Nu tene gana pa kel dia li txiga. Timenti kel-li ka kontise, mante sienti pa bu ka kai na armadilhas di Satanás. Faze di tudu pa orgulhu ku ganánsia ka toma kónta di bo. Sta disididu na ‘fika kóntra Diabu, i el ta fuji di bo.’ — Tia. 4:7.