1. Wetin mek wi go kɔmpia Setan to ɔntinman?

NA WANGREN tin pɔsin we de ɔntin kin want fɔ du, dat na fɔ kech animal ɔ fɔ kil am. I kin yuz difrɛn trap dɛn, lɛk di wan dɛn we di Baybul tɔk bɔt. (Job 18:8-10) Wetin ɔntinman kin du fɔ mek animal fɔdɔm insay in trap? I kin stɔdi di animal. I kin tray fɔ no usay di animal de go, wetin di animal lɛk, ɛn wetin na di bɛst trap we i go yuz fɔ kech am. Setan tan lɛk da ɔntinman de. I de stɔdi wi. I de notis usay wi de go ɛn wetin wi lɛk. Dɔn i de sɛt trap we i de op se go kech wi di tɛm we wi nɔ de ɛkspɛkt am. Bɔt stil, di Baybul tɛl wi se if Setan kech wi, wi go ebul fɔ kɔmɔt na in trap. Di Baybul de tich wi bak wetin wi go du fɔ lɛ Setan nɔ kech wi.

2. Wetin na tu pan di trap dɛn we Setan de yuz we de rili wok?

² Tu pan di trap dɛn we Setan de yuz ɛn we de rili wok na we pɔsin de mek prawd ɛn we i want ɔltin fɔ insɛf. * Fɔ lɔng tɛm naw, Setan dɔn de yuz dɛn tu tin dɛn ya we rili bad fɔ kech pipul dɛn. I tan lɛk pɔsin we de kech bɔd ɛn we de du tin dɛn fɔ mek di bɔd we i de tray fɔ kech fɔdɔm na di trap ɔ di nɛt we i dɔn sɛt fɔ am. (Sam 91:3) Bɔt i pɔsibul fɔ lɛ Setan nɔ kech wi. Wetin mek? Na bikɔs Jiova dɔn sho wi di tatiks dɛn we Setan de yuz.—2 Kɔr. 2:11.

3. Wetin mek Jiova mek dɛn rayt ɛgzampul dɛn na di Baybul bɔt pipul dɛn we bin mek prawd ɛn we bin want ɔltin fɔ dɛnsɛf?

³ Wan we aw Jiova de ɛp wi fɔ no se i rili bad fɔ lɛ wi prawd ɛn fɔ lɛ wi want ɔltin fɔ wisɛf na we i de ɛnkɔrej wi fɔ  lan bɔt wetin bin apin to sɔm pan in savant dɛn, so dat wi nɔ go mek di sem mistek we dɛn bin mek. Insay di ɛgzampul dɛn we wi de kam tɔk bɔt, wi go si aw Setan bin ivin ebul fɔ kech sɔm pipul dɛn we bin dɔn sav Jiova fɔ lɔng tɛm. Fɔ se dis min se wi nɔ go ebul fɔ avɔyd Setan in trap dɛn? Nɔ, nɔto dat i min. Jiova mek dɛn rayt dɛn ɛgzampul ya na di Baybul fɔ “wɔn wi.” (1 Kɔr. 10:11) I no se wi go ebul lan frɔm dɛn ɛgzampul dɛn de ɛn no aw wi go ebul fɔ avɔyd ɔ kɔmɔt na di Dɛbul in trap dɛn.

4. Wetin go apin to wi if wi prawd?

⁴ Setan want fɔ lɛ wi bi pipul dɛn we prawd. I no se if wi prawd, wi go tan lɛk am, ɛn wi go lɔs di chans fɔ gɛt layf we go de sote go. (Prɔv. 16:18) Na dat mek apɔsul Pɔl bin wɔn wi se i pɔsibul fɔ lɛ pɔsin mek “prawd ɛn gɛt di sem jɔjmɛnt we di Dɛbul dɔn gɛt.” (1 Tim. 3:6, 7) Dis kayn tin kin apin to ɛni wan pan wi, ilɛk i dɔn te we wi de sav Jiova ɔ i nɔ te yet.

5. Akɔdin to Ɛkliziastis 7:16, 20, aw pɔsin go sho se i prawd?

⁵ Pipul dɛn we prawd na pipul dɛn we kin jɔs bisin bɔt dɛnsɛf. Setan de tray fɔ lɛ wi jɔs bisin bɔt wisɛf nɔmɔ, ɛn fɔ lɛ de tink bɔt wisɛf pas aw wi de tink bɔt Jiova, mɔ we wi gɛt prɔblɛm. Fɔ ɛgzampul, pɔsin dɔn ɛva lay pan yu se yu du sɔntin we yu nɔ du? Ɔ pɔsin dɔn trit yu we we nɔ fia? Setan go rili gladi fɔ si we yu vɛks pan Jiova ɔ yu brɔda dɛn. Ɛn di Dɛbul want fɔ lɛ yu tink se di wangren we fɔ sɔlv yu prɔblɛm na we yu du tin yu yon we ɛn nɔ fala di advays we Jiova dɔn gi yu na in Wɔd.—Rid Ɛkliziastis 7:16, 20.

6. Wetin yu lan frɔm wan sista we de na Nɛdaland in ɛkspiriɛns?

⁶ Lɛ wi tɔk bɔt wan sista we de na Nɛdaland in ɛkspiriɛns. In brɔda ɛn sista dɛn mistek dɛn bin de mek i vɛks. So i bin disayd se i nɔ want fɔ spɛn tɛm wit dɛn igen. Dis sista bin se: “A bin de rili fil lɛk se na mi wangren de, ɛn a nɔ bin ebul chenj di we aw a bin de biev to dɛn brɔda ɛn sista  dɛn de. So a bin tɛl mi man se wi fɔ muf go na ɔda kɔngrigeshɔn.” I bin wach di Mach 2016 JW Brɔdkastin program. Da program de bin tɔk bɔt sɔm tin dɛn we wi go du fɔ bia di mistek dɛn we wi brɔda ɛn sista dɛn kin mek. Dis sista bin se: “A bin kam fɔ no se a fɔ put misɛf dɔŋ ɛn tink bɔt mi yon mistek dɛn bifo a de tray fɔ chenj mi brɔda ɛn sista dɛn na di kɔngrigeshɔn. Di program bin ɛp mi fɔ tink mɔ bɔt Jiova ɛn di rayt we i gɛt fɔ tɛl wi wetin fɔ du.” Yu si di pɔynt? Ɛnitɛm we yu gɛt prɔblɛm, kɔntinyu fɔ tink bɔt Jiova. Beg am lɛ i ɛp yu fɔ si yu brɔda ɛn sista dɛn di we aw i de si dɛn. Yu Papa we de na ɛvin de si dɛn mistek dɛn; bɔt i rɛdi fɔ fɔgiv dɛn. I want lɛ yu du di sem tin.—1 Jɔn 4:20.

7. Wetin bin apin to Kiŋ Uzaya?

⁷ Bikɔs Kiŋ Uzaya we bin de na Juda bin stat fɔ mek prawd, dat bin mek i nɔ lisin to di advays we ɔda pipul dɛn gi am, ɛn i bin du sɔntin we i nɔ gɛt rayt fɔ du. Uzaya bin dɔn du bɔku fayn tin dɛn. I bin dɔn win bɔku wɔ dɛn, bil bɔku siti dɛn, ɛn i bin gɛt bɔku fam dɛn. “PAPA GƆD bin mek i de go bifo.” (2 Kro. 26:3-7, 10) Bɔt di Baybul se: “We Kiŋ Uzaya bin dɔn sidɔm na pawa gud gud wan, i bigin mek prawd, we briŋ in dawnfɔl.” Jiova bin dɔn kɔmand dɛn se na di prist dɛn nɔmɔ fɔ bɔn insɛns na di tɛmpul. Bɔt Kiŋ Uzaya bin du sɔntin we i nɔ gɛt rayt fɔ du, ɛn i go insay di tɛmpul fɔ bɔn insɛns. Jiova nɔ bin gladi, ɛn i mek dis prawd man gɛt lɛprɔsi. Uzaya bin kɔntinyu fɔ gɛt lɛprɔsi te i day.—2 Kro. 26:16-21.

8. We wi du wetin de na 1 Kɔrintians 4:6, 7, aw dat go ɛp wi fɔ lɛ wi nɔ mek prawd?

⁸ Yu tink se i pɔsibul fɔ lɛ wisɛf stat fɔ mek prawd ɛn sin lɛk Uzaya? Lɛ wi tɔk bɔt Hose in ɛgzampul. In na bin gud biznɛsman, ɛn in biznɛs bin de rili go bifo. Dɔn bak, i bin de sav as ɛlda we ɔlman rɛspɛkt na di kɔngrigeshɔn. I bin de gi tɔk dɛn na asɛmbli ɛn kɔnvɛnshɔn dɛn, ɛn sakit ovasia dɛn bin de aks am fɔ advays. I bin se: “Bɔt a bin stat fɔ abop pan mi ɛkspiriɛns ɛn wetin a ebul fɔ du. A push Jiova na kɔna. A bin fil se a strɔng, so a nɔ bin de lisin to Jiova in wɔnin ɛn advays dɛn.” Hose bin kɔmit siriɔs sin, ɛn dɛn bin disfɛloship am. Afta lɔng tɛm, i bin kam bak na di kɔngrigeshɔn. I tɔk naw se: “Jiova dɔn tich mi se di tin we impɔtant nɔto fɔ lɛ wi jɔs gɛt pozishɔn, bɔt na fɔ lɛ wi du wetin i de tɛl wi fɔ du.” Lɛ wi mɛmba  se ɛni talɛnt we wi gɛt ɛn ɛni wok we wi de du na di kɔngrigeshɔn kɔmɔt frɔm Jiova. (Rid 1 Kɔrintians 4:6, 7.) If wi prawd, Jiova nɔ go yuz wi.

9. Bikɔs Setan ɛn Iv bin want ɔltin fɔ dɛnsɛf, wetin dat bin mek dɛn du?

⁹ We wi de tink bɔt pipul dɛn we want ɔltin fɔ dɛnsɛf, i go bi se na Setan di Dɛbul fɔs wi go mɛmba. I go bi se di tɛm we Setan na bin wan pan Jiova in enjɛl dɛn, i bin de du bɔku fayn wok dɛn. Bɔt i bin want mɔ. I bin want di wɔship we na Jiova in wangren fit fɔ gɛt. Setan want fɔ lɛ wi tan lɛk am, so i de tray fɔ mek wi nɔ satisfay wit wetin wi gɛt. Di fɔs tɛm we i tray fɔ du dat na we i bin tɔk to Iv. Bikɔs Jiova bin lɛk Iv ɛn in man, na dat mek i bin gi dɛn bɔku fayn fayn it we dɛn fɔ it “pan ɛni tik na di fam,” pas wangren wan. (Jɛn. 2:16) Bɔt stil, Setan bin ful Iv ɛn mek i tink se i nid fɔ it pan da wangren tik we Jiova bin dɔn se dɛn nɔ fɔ it pan. Iv nɔ bin satisfay wit wetin i gɛt; i bin want mɔ. Wi no wetin bin apin afta dat. Iv bin sin, ɛn leta i day.—Jɛn. 3:6, 19.

10. Wetin bin apin we Devid kam fɔ bi pɔsin we want ɔltin fɔ insɛf?

¹⁰ Bikɔs Kiŋ Devid bin want ɔltin fɔ insɛf, dat bin mek i fɔgɛt di tin dɛn we Jiova bin dɔn gi am, lɛk jɛntri, pawa, ɛn we i bin de win bɔku pan in ɛnimi dɛn. Devid bin gladi fɔs fɔ di gift dɛn we Gɔd bin dɔn gi am, ɛn i bin se dɛn “tu bɔku fɔ kɔnt.” (Sam 40:5) Bɔt tɛm bin kam we Devid fɔgɛt di tin dɛn we Jiova bin dɔn gi am. I nɔ bin satisfay wit dɛn igen; i bin want mɔ. Devid bin gɛt bɔku wɛf dɛn, bɔt i bin stil want wan ɔda man in wɛf, pan ɔl we Jiova bin dɔn se i bad fɔ lɛ pɔsin du dat. Di uman na bin Bathshiba, ɛn in man na bin Yuraya di Itayt. Bikɔs Devid bin jɔs tink bɔt insɛf, i du mami ɛn dadi biznɛs wit Bathshiba, ɛn Bathshiba bin gɛt bɛlɛ. Dis tin we Devid du bin rili bad, bɔt i bin du sɔntin we bad pas am. I bin arenj fɔ lɛ dɛn kil Yuraya. (2 Sam. 11:2-15) Wetin Devid bin de tink? Fɔ se i bin de imajin se Jiova nɔ go si am? Pan ɔl we Devid bin dɔn sav Jiova fetful wan fɔ lɔng tɛm, i bin kam fɔ bi pɔsin we want ɔltin fɔ insɛf, ɛn dis bin mek i sɔfa bad bad wan. Leta, Devid bin kɔnfɛs in sin, ɛn i bin ripɛnt. I bin rili gladi we Jiova fɔgiv am.—2 Sam. 12:7-13.

11. Akɔdin to Ɛfishians 5:3, 4, wetin go ɛp wi fɔ lɛ wi nɔ bi pɔsin we want ɔltin fɔ insɛf?

 ¹¹ Wetin wi lan frɔm Devid in ɛgzampul? Wi lan se wi go ebul fɔ bi pɔsin we nɔ want ɔltin fɔ insɛf if wi kɔntinyu fɔ tɛl Jiova tɛnki fɔ ɔl wetin i dɔn gi wi. (Rid Ɛfishians 5:3, 4.) Wi fɔ satisfay wit wetin wi gɛt. We wi stat fɔ stɔdi di Baybul wit pipul dɛn, i go fayn fɔ lɛ wi ɛnkɔrej dɛn fɔ de tink bɔt wan gud tin we Jiova dɔn gi dɛn, ɛn lɛ dɛn tɛl am tɛnki fɔ da tin de. If di pɔsin du dat ɛvride fɔ wan wik, dat min se i go dɔn pre bɔt sɛvin difrɛn tin dɛn. (1 Tɛs. 5:18) Yu de du dis sem kayn tin? If yu de tink gud gud wan bɔt ɔl wetin Jiova dɔn du fɔ yu, i go ɛp yu fɔ gɛt tɛnki. Ɛn we yu gɛt tɛnki, yu go satisfay wit wetin yu gɛt. We yu satisfay wit wetin yu gɛt, yu nɔ go bi pɔsin we want ɔltin fɔ insɛf.

12. Bikɔs Judas Iskariɔt na pɔsin we bin want ɔltin fɔ insɛf, wetin dat bin mek i du?

¹² Bikɔs Judas Iskariɔt bin kam fɔ bi pɔsin we want ɔltin fɔ insɛf, dat bin mek i du bad bad tin, ɛn i ɛp fɔ mek dɛn arɛst Jizɔs. Bɔt nɔto da kayn pɔsin de i bin bi fɔs. (Lyuk 6:13, 16) Jizɔs bin pik am fɔ bi wan pan in apɔsul dɛn. Dɔn bak, bikɔs Jizɔs bin trɔst am na in mek dɛn gi am di mɔnibɔks fɔ kip. Jizɔs ɛn di apɔsul dɛn bin de yuz da mɔni de fɔ gɛt di tin dɛn we dɛn nid as dɛn de du di prichin wok. Di mɔni bin jɔs tan lɛk di kɔntribyushɔn we wi kin put na di wɔlwayd wɔk bɔks tide. Bɔt afta sɔm tɛm, Judas bigin tif di mɔni, pan ɔl we i bin dɔn yɛri we Jizɔs de wɔn pipul dɛn bɔku tɛm se dɛn nɔ fɔ bi pipul dɛn we want ɔltin fɔ dɛnsɛf. (Mak 7:22, 23; Lyuk 11:39; 12:15) Judas nɔ bin lisin to dɛn wɔnin dɛn de.

13. Ustɛm Judas sho se i dɔn bi pɔsin we want ɔltin fɔ insɛf?

¹³ Shɔt tɛm bifo Jizɔs day, Judas bin kam fɔ sho se in na pɔsin we want ɔltin fɔ insɛf. Wan de, Jizɔs, in disaypul dɛn, wit Meri ɛn in sista we na Mata, bin go fɛn Saymɔn we bin gɛt lɛprɔsi. We dɛn bin de it, Meri grap ɛn tɔn pafyum ɔyl we rili dia na Jizɔs in ed. Judas ɛn di ɔda disaypul dɛn bin rili vɛks fɔ da tin de we Meri du. I go bi se di ɔda disaypul dɛn bin de tink se i go bɛtɛ lɛ dɛn yuz da mɔni de we dɛn de du di prichin wok. Bɔt Judas bin vɛks fɔ difrɛn rizin. In “na bin tifman,” ɛn i bin want fɔ tif mɔni na di bɔks. Ɛn bikɔs i bin dɔn bi pɔsin we want ɔltin fɔ insɛf, i bin ɛp pipul dɛn fɔ arɛst Jizɔs jɔs fɔ mek dɛn gi am mɔni.—Jɔn 12:2-6; Mat. 26:6-16; Lyuk 22:3-6.

14. Aw wan brɔda ɛn in wɛf bin fala di advays we de na Lyuk 16:13?

¹⁴ Jizɔs bin mɛmba in disaypul dɛn bɔt wan simpul tin we na tru. I bin se: “Una nɔ go ebul bi slev fɔ Gɔd ɛn fɔ Jɛntri.” (Rid Lyuk 16:13.) Te tide, wi de si se na tru tin Jizɔs bin tɔk. Lɛ wi tɔk bɔt aw wan brɔda ɛn in wɛf we de na Romenia bin alaw dis tin we Jizɔs tɔk fɔ afɛkt dɛn. Dɛn bin gi dɛn wok we dɛn go du fɔ sɔm tɛm na wan kɔntri we gɛt mɔni pas di wan we dɛn de. Dɛn bin se: “Wi bin gɛt bɔku dɛt we wi fɔ pe di bank, so fɔs wi bin fil se dis wok na blɛsin frɔm Jiova.” Bɔt prɔblɛm bin de. If dɛn tek da wok de, dɛn nɔ go gɛt bɛtɛ tɛm fɔ sav Jiova. Afta we dɛn rid wan atikul we gɛt di taytul “Maintain Loyalty With a Unified Heart” na di Ɔgɔst 15, 2008 Wachtawa, dɛn bin disayd wetin dɛn go du. Dɛn se: “If wi go na ɔda kɔntri jɔs fɔ mek mɔ mɔni, bɔt da sem tɛm de i nɔ go izi fɔ mek wi sav Jiova, dat min se wi padi biznɛs wit Jiova nɔto di tin we impɔtant na wi layf pas ɔl. Wi bin biliv tranga wan se wi padi biznɛs wit Jiova go sɔfa.” So dɛn nɔ bin tek di wok. Bɔt wetin apin? Di brɔda  bin fɛn wok na in kɔntri we bin de mek dɛn gɛt di mɔni we dɛn nid. Di wɛf se: “Jiova go ɛp in savant dɛn ɔltɛm.” Dis brɔda ɛn in wɛf gladi fɔ we dɛn pik Jiova fɔ bi dɛn Masta, bifo dɛn pik mɔni.

15. Wetin mek wi shɔ se i pɔsibul fɔ kɔmɔt na Setan in trap dɛn?

¹⁵ Wetin wi fɔ du if wi notis se wi dɔn bi pɔsin we prawd ɔ we want ɔltin fɔ insɛf? Wi go ebul fɔ chenj. Pɔl bin se di wan dɛn we di Dɛbul “dɔn kech . . . layv layv wan” go stil ebul kɔmɔt na di Dɛbul in trap. (2 Tim. 2:26) Na dat bin apin to Devid. I bin lisin to di strɔng advays we Netan bin gi am, i lɛf fɔ bi pɔsin we want ɔltin fɔ insɛf, ɛn i bin gɛt tayt padi biznɛs wit Jiova bak. Nɔ ɛva fɔgɛt se Jiova gɛt trɛnk pas Setan. So if wi alaw Jiova fɔ ɛp wi, wi go ebul fɔ kɔmɔt na ɛni trap we di Dɛbul dɔn sɛt.

16. Wetin go ɛp wi fɔ lɛ wi nɔ fɔdɔm na Setan in trap dɛn?

¹⁶ Fɔ tru, bifo wi tray fɔ kɔmɔt na Setan in trap dɛn, i go fayn fɔ lɛ wi nɔ ɛva fɔdɔm insay de. Di wangren tin we go mek wi ebul fɔ du dat na we Gɔd ɛp wi. Bɔt wi nɔ fɔ tink se wi so strɔng dat wi nɔ go ɛva bi pɔsin we prawd ɔ we want ɔltin fɔ insɛf. Ivin pipul dɛn we dɔn sav Jiova fɔ lɔng tɛm dɔn kam fɔ bi pipul dɛn we prawd ɛn we want ɔltin fɔ dɛnsɛf. So beg Jiova ɛvride lɛ i ɛp yu fɔ no if yu dɔn stat fɔ tink ɛn du tin dɛn we de sho se yu dɔn bigin mek prawd ɔ yu dɔn bigin fɔ want ɔltin fɔ yusɛf. (Sam 139:23, 24) Du yu bɛst fɔ lɛ yu nɔ ɛva bi pɔsin we prawd ɔ we want ɔltin fɔ insɛf.

17. Wetin go apin jisnɔ to wi ɛnimi we na di Dɛbul?

¹⁷ Setan dɔn bi ɔntinman fɔ lɔng tɛm. Bɔt tɛm nɔ de fa igen fɔ lɛ dɛn tay am ɛn dɔnawe wit am leta. (Rɛv. 20:1-3, 10) Wi de rili wet fɔ da de de. Te da tɛm de rich, kɔntinyu fɔ avɔyd Setan in trap dɛn. Wok tranga wan fɔ lɛ yu nɔ bi pɔsin we prawd ɔ we want ɔltin fɔ insɛf. Mekɔp yu maynd se yu go “de agens di Dɛbul, ɛn i go rɔnawe pan” yu.—Jems 4:7.